Génesis 17

Dios Abramwan trato ruwasqanmanta señal

1Abram jisq'on chunka jisq'onniyoj watayoj kashajtin, Tata Dios payman rikhurispa, nerqa: Noqa Tukuy Atiyniyoj Dios kani.#17.1 Tukuy Atiyniyoj Dios: Diospa ujnin sutin karqa, hebreo rimaypi “El Shadai” Sal 91.1; Gn 28.3; 35.11; 48.3; Ex 6.3. Tata Dios, Tukuy Atiyniyoj Dios jina Abramman rejsichikuspa, tilusqa imatachus nisqanta junt'ananpaj atiyniyoj kasqanta. Dios nisqa Abrahammanta mirajkuna may chhika kanankuta, mama qocha kantupi t'iyu jina. Chayrayku qan munasqayman jina cheqanta puriy. 2Noqa qanwan uj tratota ruwasaj, mirayniykitaj may chhikapuni kanqa, nispa.

3Chantá Abram pampakama k'umuykorqa. Diostaj payta nillarqataj: 4Qanwan trato ruwasqayqa ajina kanqa: Qanmanta ashkha suyukuna rikhurenqanku. 5Jinataj sutiykeqa#17.5 Waj sutita churana, niyta munaj ñawpa kawsaymanta waj jina kawsayman yaykusqanrayku manaña, imaynachus ñawpata karqa, jinañachu kananta. Gn 32.28, 29; Ro 4.17-18. manaña Abramchu kanqa. Manachayqa kunanmanta qan Abraham#17.5 Abram: Niyta munan: “Maypaj qhawasqa tata” chayrí “munakoj tata”. Abraham: Niyta munan: “Ashkha wawaj tatanku”. sutiyoj kanki, imaraykuchus ashkha runaj tatanku kanaykipaj churasqayki. 6Mirayniykeqa may chhikapuni kanqanku. Suyukuna, chantá kuraj kamachejkuna ima qanmanta rikhurenqanku.

7Qanwan kay ruwasqay trato, jinataj qhepanejman qanmanta mirajkunawan trato ruwasqaypis wiñay wiñaypaj kanqa. Noqaqa qanpa Diosniyki wiñaypaj kasaj, jinallataj paykunajtapis. 8Qanman, mirayniykimanwan, maypichus tiyakushanki, chay tukuy Canaán jap'iyta qosqaykichej wiñaypaj chayaqeykichej kananpaj. Noqataj wiñaypaj Diosniyki kasaj, nispa.#Hch 7.5-6.

9Chay jawa Diosqa Abrahamman nillarqataj: Qan trato ruwasqayta junt'ay, jinataj wawaykikuna, allchhiykikunapis junt'achunku. 10Kaymin qanwan, mirayniykiwan ima trato ruwasqayqa, chaytataj tukuyniykichej junt'anaykichej tiyan: Qankuna ukhupi tukuy qhari circuncidasqa kananku tiyan.#17.10-14 Circuncisión ruwana: Qharej phichilunpi qaritanta muyurisqata khuchuspa, orqhona. Chayta orqhonaqa señal karqa Diosqa Abrahamwan tratota ruwasqanmanta. Jos 5.2; Hch 7.8; Ro 4.11. 11Qankunaqa phichiluykichejpi qaritanta khuchuspa, orqhonkichej. Chaymin qankunawan trato ruwasqaymanta señal kanqa. 12Kunanmanta qhepaman tukuy qhari wawakuna paqarisqankumanta pusaj p'unchayninman circuncidasqa kanqanku. Jinallataj wasiykichejpi paqarejkuna, rantikusqaykichej wata runaj qhari wawan, waj llajtayojkunaj qhari wawanpis circuncidasqallataj kanqanku. 13Wasiykichejpi paqarejkuna, rantisqaykichej wata runaj qhari wawanpis tukuypuni circuncidasqa kanqanku. Ajinata wiñaypaj trato ruwasqayqa ukhuykichejpi señalasqa kanqa. 14Pichus mana circuncidasqa kajrí, qankuna ukhumanta wijch'usqa kanqa, trato ruwasqayta mana kasusqanrayku, nispa.

15Chantá Diosqa Abrahamta nillarqataj: Saraí warmiykipis manallataj ajina sutiyojchu kanqa. Manachayqa kunanmantapacha “Sara” sutin kanqa.#17.15 Sara: Niyta munan “ñust'a” chayrí “qoya”. 16Noqataj paytapis saminchasaj, jinataj paypipuni wawayki kanqa. Arí, payta saminchasaj, Saraj mirayninmantataj suyukuna rikhurenqanku, kuraj kamachejkuna ima, nispa.

17Ajinata Diospa nisqanta uyarispa, Abraham pampakama k'umuykorqa, chantá asirikuspa, sonqonpi nerqa: Pachaj watayoj runa wawayoj kayta atinmanrajchu? Saraqa jisq'on chunka watayojña kashaspapis, wawayojrajchu kanmanri? nispa.

18Chayrayku Abrahamqa Diosta nerqa: Walej kanman nisqaykita waway Ismaelwan junt'anayki, nispa.

19Diostajrí kuticherqa: Cheqapuni qanqa warmiyki Sarapi wawata rejsinki. Chay wawatataj “Isaac” sutiwan sutichanki. Noqataj paywan wiñaypaj tratota ruwasaj, jinallataj mirayninwanpis. 20Wawayki Ismaelmanta niwasqaykitapis uyariyki, paytapis yanapasaj. Paypis ashkha wawayoj kanqa, noqataj miraynintapis ashkhayachisaj. Ismaelqa chunka iskayniyoj kurajkunaj tatanku kanqa, jinallataj paymanta ashkha runayoj jatun suyuta ruwasaj. 21Chaywanpis tratoytaqa Isaacwanpuni ruwasaj. Chayrayku kunanmanta wataman jina warmiyki Sara qanpaj wawayoj kanqa, nispa. 22Chantá Diosqa Abrahamwan parlayta tukuytawan, chaymanta riporqa.

23Chay p'unchaypacha Abraham churin Ismaelta circuncidarqa, jinallataj wasinpi paqarej kamachinkunata. Rantisqan kamachinkunatapis circuncidallarqataj. Jinallataj Diospa kamachisqanman jina wasinpi tukuynin qhari kamachinkunata circuncidallarqataj. 24Maypachachus Abraham phichilunpa qaranta khuchorqa chaypacha, jisq'on chunka jisq'onniyoj watayoj karqa. 25Churin Ismaeltaj circuncidasqa kashaspa, chunka kinsayoj watayoj karqa. 26Abrahamwan, churin Ismaelwan ima uj p'unchaylla circuncidasqa karqanku. 27Jinallataj Abramwan khuska wasinpi tiyakojkuna, wasinpi paqarej kamachinkuna, waj llajtayojkunamanta rantikusqan kamachinkuna ima chaypachallataj circuncidasqa karqanku.

Currently Selected:

Génesis 17: DQDC

Highlight

Copy