2 Macabeos 13
13
Menelao wañun
(1 Mac 6.28-30)
1Grecia llajtayojkuna Judeapi 149 kaj watapi kamachishajtinku, Judas uyarerqa Antíoco Eupátor ashkha soldadowan Judeaman jamushasqanta. 2Paykunawan khuskataj Lisiaspis jamushasqanta willarqanku. Lisiasqa Antiocota uywasqa, kunantaj paypa sutinpi kamachej karqa. Payqa Greciamanta 110.000 chakipi purej soldadokunawan risharqa, 5.300 caballopi rej soldadokunawan ima. Jinallataj, 22 elefantekunatawan, 300 carretakunatawan ima apamusharqanku. Chay carretakunaj ruedankumantaj jatuchaj cuchillokunata wataykorqanku.
3Paykunaman Menelaopis k'askaykorqa. Chay puraj uyaqa mana llajtanta yanapayta yuyasharqachu, manachayqa kuraj kaj sacerdote kanata watej jap'iyta munasharqa. 4Chaywanpis, kay pachata kamachejkunaj Kuraj Kamachejninku Diosqa Antiocoj sonqonta t'impuricherqa millayta ruwaj Menelaoj contranpi. Jinapi Lisiasqa Antiocoman willaykorqa, Menelaolla chay tukuy llakiymanta juchayoj kasqanta. Chayta uyarispataj, kuraj kamachejqa Menelaota Berea llajtaman pusanankuta kamacherqa, chaypi wañuchisqa kananpaj, chay llajtayojkuna yachasqankuman jina. 5Bereapi uj torre 22 metroyoj karqa. Chay torreqa ushphawan junt'a karqa, torrej patanpitaj muyushaj uj máquina karqa. Chay maquinaman imatapis churaykojtinku, ushphata t'oqoman wijch'uykoj. 6Berea llajtayojkuna chay maquinaman wijch'uykoj kanku, pikunachus templomanta imatapis suwaj kanku, chayrí ancha millay kajta ruwaj kanku, chaykunata. 7Ajinata, millayta ruwaj Menelaoqa wañuchisqa karqa, nitaj pipis ayanta p'amparqachu. 8Menelaoqa chay jinata wañunan karqa, Diospa altarpa contranpi chhika millaykunata ruwasqanmanta, imaraykuchus altarpi ninaqa, jinataj ushphapis Diospaj t'aqasqa may llimphu kanku. Ajinamanta Menelao ushphapi wañorqa.
Antioco judiokunawan allinyakapun
(1 Mac 6.31-63)
9Kuraj kamachej Antioco judiokunata ñak'arichinanpaj risharqa, paypa tatan llakichisqanmanta astawan sinch'itaraj. 10Chayta yachaspataj, Judas soldadonkunata kamacherqa tuta p'unchay Tukuyta Kamachej Diosmanta mañakunankuta watejmanta judiokunata yanapananpaj. Manachus Dios yanapanman chayqa, chay runa Diospa kamachisqankunata, paykunaj suyunkuta, chantá llimphu Templotapis chinkachinman. 11Jinallataj Judasqa soldadonkunata nerqa Diosmanta mañakunankuta ayllun ama Diospa contranta rimaj awqakunaj makinpi urmananpaj, imaraykuchus paykuna ñak'ayta jatun llakiymanta llojsisharqanku. 12Tukuyninkutaj uj sonqolla Judaspa kamachisqanta kasorqanku. Kinsa p'unchay junt'ata, mana sayk'uspa Tukuyta Kamachej Diosmanta mañakorqanku, waqaspa, mana mikhuspa, pampaman k'umuykuspa ima. Chaymantataj Judasqa paykunata sonqochaspa, maqanakupaj wakichisqa kanankuta nerqa.
13Judío kurajkunawan parlaytawan, Judas kamacherqa soldadonkuna maqanakoj llojsinankuta. Tukuyta Kamachej Diospa yanapayninwan pay yuyarqa tukuyta sut'iman orqhoyta, manaraj suyashaspa Antíocoj soldadonkuna Judeaman chayamunankuta Jerusalén llajtata jap'inanpaj. 14Judasqa kay pachata ruwajpi atinikorqa awqankunata atipananpaj. Chantá tukuy soldadonkunata tantaykuspa, paykunata nerqa wañunankukama may kallpawan maqanakunankuta Diospa kamachisqankunarayku, Templorayku, Jerusalenrayku, Judearayku, chantá judiokunaj usunkurayku ima. Chaymantataj tukuyninku Modín qayllapi jarakorqanku.
15Judasqa soldadonkunata yachacherqa, mayk'ajchus pay qhaparenqa: Diosqa atipachiwasun, nispa, chaypacha, paykuna maqanakoj yaykunankuta. Ajinatataj ruwarqanku. Chaymantataj, Judasqa wakin wapu waynakunawan khuska, chawpi tutata kuraj kamachej Antíocoj jaranman yaykorqanku. Chaypitajrí yaqha 2.000 soldadokunata wañucherqanku. Jinallataj, astawan jatun kaj elefanteta, purichejnintinta wañuchillarqankutaj. 16Ajinata ruwasqankurayku awqankukunaqa mancharisqa qhollpirakorqanku. Ajinata atipaspa Judas soldadonkunawan riporqa. 17Q'ayantin sut'iyamushajtintaj, tukuy awqankuna phirisqa karqanku, Tukuyta Kamachej Dios Judasta yanapasqanrayku.
Antioco judiokunawan uj tratota ruwan
18Maypachachus kuraj kamachej Antíoco, judiokuna may kallpayoj kasqankuta repararqa, chaypacha, pay soldadonkunawan pukarakunata jap'iyta munarqa. 19Jinapi Betsur pukaraman qayllarqa. Chaywanpis mana chay pukarata jap'iyta aterqachu, manachayqa judiokuna payta jark'aykuspa, atipaykorqanku. 20Chaymanta Judasqa, pukarapi kaj soldadokunaman mikhunata apacherqa. 21Chaywanpis Ródoco sutiyoj judío awqa soldadonkunaman willarqa, imatachus judiokuna pakayllamanta ruwayta munashasqankuta. Judiokunatajrí chay runata ajinata willashajta taripaspa, wañucherqanku.
22Watejmanta kuraj kamachej Antioco Betsur llajtayojkunawan parlaspa, paykunawan tratota ruwarqa, chaymantataj pay riporqa. Jinaspataj, Antiocoqa Judaswan, soldadonkunawan ima maqanakoj rerqa. Chaywanpis chay kutipipis Judas payta atiparqa. 23Jinallapi kuraj kamachej Antíoco astawan mancharikorqa, imaraykuchus pay uyarerqa Filipo paypa contranta oqharikusqanta. Antiocoqa Filipota churasqa purinankama paypa sutinpi kamachinanpaj.#1 Mac 6.14-15,55-56. Chayrayku Antíoco may mancharisqa kaspa, judiokunata wajyachimorqa paykunawan tratota ruwananpaj. Chaymanta, tiluspa nerqa maychus kajta ruwananta. Judiokunawan allinyakapuspataj, Temploman respetowan yaykuspa, uywa ñak'asqata q'olachinapaj jaywarqa. Jinallataj ashkha qolqetapis qollarqataj. 24Chaymanta, Macabeota walej jamusqanta nerqa. Jinallataj Hegemonidasta churarqa soldadokunata kamachej kananpaj Tolemaidamanta Gerrakama. 25Chayta ruwaytawantaj Antioco Tolemaidaman riporqa. Chaypi tiyakojkunatajrí judiokunawan tratota ruwasqanmanta phiñakorqanku, jinataj kuraj kamachejwan ruwasqanku tratota yanqhayachiyta munarqanku. 26Chaymantataj Lisiasqa patachaman wicharispa, paykunaman sut'incharqa chay trato may sumaj kasqanta. Ajinata parlaspataj, chay ch'ajwata ch'inyacherqa. Chantá chay runakuna kusisqalla qhepakorqanku, chaymantataj Lisiasqa Antioquiaman kutimporqa. Ajinata kuraj kamachej Antíoco Judeaman yaykusqa, chaymantataj watej ripusqa.
Currently Selected:
2 Macabeos 13: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.