2 Macabeos 11
11
Judas Macabeo Lisiasta atipan
(1 Mac 4.28-35)
1Chaymantataj, uj runa Lisias sutiyoj, pichus kuraj kamachej Antíoco Eupatorpa aylluntaj, yuyaychajnintaj karqa,#1 Mac 3.32-33; 6.17; 2 Mac 13.2. chay runa imachus pasasqanta yachaspa, anchatapuni phiñakorqa. 2Chayrayku chakipi purej soldadokunamanta, caballopi rej soldadokunamanta ima 80.000 soldadokunata tantarqa. Chantaqa, judiokunawan maqanakoj llojserqa. Payqa Jerusalén llajtata Grecia llajtayojkunaj llajtanman tukuchiyta munarqa. 3Lisias munallarqataj judiokunaj Templonmanta impuestota jap'iyta, imaynatachus waj suyukunapi templonkuwan karqa, ajinata. Jinallataj, sapa wata kuraj sacerdotepaj churayta munarqa, pichus astawan qolqeta paganman, chay runata. 4Chaywanpis Lisiasqa mana cuentaman churarqachu Tukuy Atiyniyoj Diosman sayaykushasqanmanta, manachayqa uman oqharisqa waranqa waranqa chakipi purej soldadonkunapi, caballokunapi rejpi, chantá 80 elefantenkunapi ima atinikusharqa.
5Chantá Judeaman yaykuspa, Lisiasqa ñawpajtaj Betsur pukarata jap'iyta munarqa. Betsurqa Jerusalenmanta 25 kilometropi karqa. 6Maypachachus Macabeoj soldadonkuna Lisias pukarata jap'iyta munashasqanta yacharqanku chaypacha, paykuna llajtapi tukuy tiyakojkunawan tantakorqanku. Chantá qhaparispa, waqaspataj Tukuyta Kamachej Diosmanta mañakorqanku angelninta kachamunanta #Ex 23.20; Jos 5.13-15; Jue 6.11-24; 2 R 19.35; Tob 5.21; 2 Mac 15.23. israelitakunata yanapananpaj. 7Chaymantataj kikin Macabeopuni ñawpajta armanta oqharispa, chay ujkunata mayta kallpacharqa paywan khuska mana manchachikuspa maqanakoj rinankupaj, ajinamanta wawqenkuta yanapanankupaj. Chantaqa, tukuyninku mana manchachikuspa maqanakoj llojserqanku.
8Jerusalenpa qayllallanpiraj kashajtinku, ñawpaqenkupi caballopi lloq'asqa uj runa rikhurerqa, yuraj p'achayoj, qorimanta arma oqharisqa ima. 9Chaypacha tukuyninku uj sonqolla khuyakoj Diosta yupaycharqanku, sonqonkupi kallpachakuspataj, maqanakoj rerqanku. Paykuna mana chay soldadokunallawanchu maqanakunankupaj jina kasharqanku. Manachayqa yuyarqanku phiña animalkunawanpis maqanakunankupaj jina kashasqankuta, chayrí fierromanta perqakunatapis urmachinankupaj jina. 10Tukuyta Kamachej Dios paykunamanta khuyakusqanta yachaspa, sinrulla maqanakoj kachaykukorqanku. Paykunaj ñawpaqenkutataj janaj pachamanta jamoj yanapajninku risharqa. 11Chantaqa, leonkuna jina awqankukunaman phinkiykorqanku. Chaypachataj 11.000 chakipi purej soldadokunata wañucherqanku, caballopi rejkunamantataj 1.600 soldadokunata. Puchojkunatataj ayqecherqanku. 12Ayqejkunamanta tukuy k'irisqa karqanku, mana armayojtaj. Lisiastajrí p'enqayta ayqesqanrayku mana payta wañuchiyta aterqankuchu.
Lisias judiokunawan allinyakapun
13Lisiasqa mana wampuchu karqa. Chayrayku maqanakupi atipachikusqanmanta unanchaspa, pay repararqa hebreokunata manapuni atipayta atinanta, Tukuy Atiyniyoj Dios paykunata yanapasqanrayku. 14Chayrayku Lisiasqa judiokunaman kachakunata kacharqa, paywan tratota ruwaspa allinyakapunankupaj. Jinallataj pay nicherqa kuraj kamachej Eupatorman paykunarayku parlananta, paykunaj kawsaqenkuman tukunanpaj. 15Chantá Macabeo llajta masinkunaj allinninkuta mask'aspa, Lisiasta uyarerqa. Macabeotaj uj cartanejta tukuy imata mañarqa judiokunata yanapananpaj. Kuraj kamachejtaj imatachus Macabeo mañasqanta qorqa.
16Lisiasqa judiokunaman uj cartata ruwaspa, kay jinata nerqa: Noqa Lisias qankuna judiokunata napaykuykichej. 17Sutiykichejpi jamuwajkuna Juanwan, Absalonwan ima uj cartata jaywawarqanku, chay cartapi imatachus mañakuwasqaykichejta qankunaman qonaypaj. 18Imatachus kuraj kamachej qonasuykichej karqa, chaymanta payman yachayta qoniña. Imachus noqaj makiypi kashan, chayta qoykichejña. 19Chayrayku, sichus qankuna kay suyoj allinninta mask'anaykichejpaj sonqoykichej tiyan chayqa, noqapis tukuy imapi atisqayman jina yanapallasqaykichejtaj. 20Imaynatachus tratota ruwanata kachaykunaman, kachaykichejman ima niniña qankunawan parlarinankuta. 21Kunantaj walejllata karikuychej. Kay cartata apachimuykichej Dióscoro nisqa killamanta iskay chunka tawayoj kaj p'unchaypi, pachaj tawa chunka pusajniyoj kaj watapi.
22Kuraj kamachej Antíoco Eupatorpa ruwachisqan carta kay jinata nerqa: Noqa kuraj kamachej Antíoco qanta napaykamuyki, Lisias wawqéy. 23Tatay wañupuspa, dioskunajpaman ripusqanmantapacha, noqa munani pikunachus kamachiyniypi tiyakojkuna ni imamanta manchachikuspa tiyakunankuta, imachus ruwanankuta ruwaspa kanankupaj. 24Jinallataj noqa uyarerqani judiokunaqa manapuni ñawpa tatanchejkunaj usunkuman jina kawsayta munasqankuta, manachayqa usunkuman jinalla. Chayrayku paykuna mañakorqanku kamachisqankunata junt'aspa kawsakojta saqenanchejta. 25Noqaqa chay llajtayojkuna sonqo tiyasqa kawsakunankuta munani. Chayrayku kamachini Templonkuta paykunaman kutichipunankuta. Jinallataj ñawpa tatankukunaj usunkuta qhatispa kawsakunankuta. 26Chayrayku, kachaykikunata kachay, judiokunaman willanankupaj imatachus kay cartapi nisqaymanta, chantá paykunawan allinyakunankupaj ima. Ajinata mana imatapis manchachikuspa kawsakonqanku, imachus ruwanankutapis ruwakullanqanku, nispa.
27Kuraj kamachej Antíoco judiokunaman apachisqan cartapi kay jinata nillarqataj: Noqa, kuraj kamachej Antíoco Eupátor judiokunaj kurajninkunata, tukuy waj judiokunata ima napaykuni. 28Tukuy qankuna walejlla kanaykichejta munani. Noqapis walejllataj kashani. 29Kuraj sacerdotekunaj kamachejninku Menelao willawan qankuna wasiykichejman kutipuyta munashasqaykichejta. 30Chayrayku, pikunachus kutipunku manaraj Xántico killa tukukushajtin, paykuna ni pej ima nisqan wasinkuman kutipuyta atinku. 31Ajinamanta, judiokuna mikhunankuta yachasqankuman jina wakichiyta atinku. Jinallataj kamachisqankukunaman jina kawsayta atillanqankutaj, imaynatachus ñawpajta ruwaj kanku, ajinata. Chantapis, mana ni pi ch'ataykusqachu kanqa ñawpajta imatapis ruwasqankumanta. 32Jinallataj Menelaota kachamushaykichej ni imamanta manchachikuspa kawsakunaykichejpaj. 33Walejllata kakushaychej. Kay cartata apachimuykichej Xántico nisqa killamanta, chunka phishqayoj kaj p'unchaypi, pachaj tawa chunka pusajniyoj kaj watapi, nispa.
34Roma llajtayojkunapis judiokunaman uj cartata apachillarqankutaj kay jinata nispa: Roma llajtayojkunaj sutinkupi noqayku Quinto Memiowan, chantá Tito Maniowan, qankunata napaykuyku. 35Imatachus kuraj kamachejpa ayllun Lisias qosunaykichejta nisorqachej, chayta noqaykupis allillan kasqanta niyku. 36Chaywanpis qankuna allinta qhawaychej imatachus Lisias kuraj kamachejmanta qankunarayku mañasqanta. Chantá uj kachawan mañakusqaykichejta rejsichimuwayku, noqayku kuraj kamachejwan qankunarayku parlanaykupaj. Ña noqaykoqa Antioquiaman rinaykupajña kashayku. 37Chayrayku, usqhayta kachaykichejkunata kachamullawaykuña, yachanaykupaj imatachus qankuna mañashankichej, chayta. 38Walejllata kakushaychej. Kay cartata apachimuyku Xántico nisqa killamanta chunka phishqayoj kaj p'unchaypi, pachaj tawa chunka pusajniyoj kaj watapi.
Currently Selected:
2 Macabeos 11: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.