Matius 7
7
Nee mompakasala tona ntanina
Lukas 6:37-38; 41-42
1“Nee mompakasala tona ntanina ala komiu ledo rapakasala nu Alatala. 2Apa komiu ratangara nu Alatala nangoseaka kabiasamiu mboto mombatangara tona ntanina. Posuka nipakemiu mosuka ka tona ntanina, haitu muni rapake nu Alatala mosuka ka komiu. 3Nakuya komiu namala manggita dosa roamiu nakodi eva garupu ri matana, tapi dosamiu mboto nambaso eva baloti ri matamiu mboto ledo nikitamiu? 4Berimba komiu manguli ka roamiu, ‘Mai, kulelaka garupu ri matamiu,’ iyapa ri matamiu mboto naria baloti! 5Komiu aga tobelo ri sumba! Lelaka ntani ruru baloti lako ri matamiu mboto ala matamiu malanto mekita bo komiu mamala mombalelaka garupu ri mata nu roa.”
I Yesus nombatagi ira nompatolele pepatuduki lako nte Alatala ka tona aga nompoarana
6Naupu haitu, nanguli i Yesus, “Nee radekei ka asu anu nagasa mbelaka asu aga megoli mombalopo komiu! Bo nee radekei mutiara ka bavu, apa bavu aga mombajeje bayangi mutiara haitu.”
Perapi nte Alatala
Lukas 11:9-13
7“Perapimo nte Alatala bo radekeiNa ka komiu. Elomo bo rakavamiu. Tanedemo vamba bo vamba raunggeNa ka komiu. 8Apa isema-sema merapi, kana radekei ka ia. Isema-sema mompaelo kana rakavana. Bo isema-sema mantanede vamba, kana raungge ka ia.
9Natantu ledo ria saitoa komiu mombadekei vatu ka anamiu ane roti raperapina! 10Bara ane anamiu merapi bau ntasi, natantu ledo ule radekeimiu. 11Nau komiu tona nadosa, nisanimiu nombadekei anu nabelo ka anamiu. Nemopa Alatala, Tuamamiu ri suruga! Natantu Ia muni mombadekei anu nabelo ka isema-sema merapi nte Ia.”
Dala nakana
Lukas 13:24
12“Jadi nuapa-nuapa rapodotamiu rapovia ntona ka komiu, ivesia muni rapoviamiu ka tona. Sabana parenta haitumo isi nu Atura agama bo pepatuduki nu nabi-nabi nggaulu.
13Pesuamo ri bobaa napii, sabana naluo bobaa bo nabelo dala hau ri narakaa, bo nadea muni tona nangosena. 14Tapi napiimo vamba bo nakaja dala manggava katuvua nabelo bo ledo nadea tona nangosena.”
Nabi-nabi mpodava nalanto rasani lako ri pokainggura
Lukas 6:43-44; 13:25-27
15“Komiu kana mainga nte tona nanguli karora nabi tano aga nodava. Ira nakava nte komiu netibelo rara eva bimba nanondo, tano rara ntaira nadaa mpuu eva asulaku nasoa. 16Rasanimiu ira lako ri pokainggura. Vua anggur ledo nipupu lako ri lemo ntasi bo vua ara ledo nipupu lako ri kavoko nggarui. 17Ivesia muni kayu naboya novua nabelo, tapi kayu nangguru ledo novua nabelo. 18Ledo ria kayu nabelo novua nadaa. Bo ledo muni naria kayu nangguru novua nabelo. 19Pura-pura kayu ledo nabelo vuana kana ratovo bo ratedeaka riara apu. 20Jadi ivesia muni ante nabi-nabi mpodava. Lako ri pokainggura rasanimiumo isema ira.
21Ledo pura-pura tona nanguli Yaku Tupura majadi todea riara Poparenta nu Alatala. Aga tona anu novia dota nu Alatala, TuamaKu ri suruga, masipato mesua riarana. 22Ri Eo Potangara bara maipia madea tona manguli ka Yaku, ‘Pue, Pue! Kami nompasimbayu tesaMiu ka tona ntanina ante kuasaMiu bo ante kuasaMiu muni kami nompopalai seta-seta lako nte tona. Bo nadeamo kabaraka nipovia kami nte kuasaMiu!’
23Tapi Kupesanaka ira, ‘Ledo nisaniKu komiu! Palaimo lako ri sii, komiu topokainggu nadaa!’ ”
Porapa topande bo todoyo novia banua
Lukas 6:47-49
24“Jadi isema-sema mangepe tesaKu bo mangoseakana, ia nasimbayu ante topande novia banuana ri bavo vatu. 25Nauda romba bo nakava lono ante poiri nombaburu banua haitu, tapi banua haitu ledo nagero sabana nipovia ri bavo vatu.
26Tapi isema-sema mangepe tesaKu bo ledo nioseakana, ia nadoyo nasimbayu eva tona novia banuana ri bavo bone. 27Naromba uda, bo nalono, bo poiri narimboso nombaburu banua haitu sampe banua haitu naombo bo narupusaka.”
28Naupu i Yesus nompatuduki haitu pura-pura ka todea, nokumaa mpuumo ira nangepena. 29Apa Ia ledo nompaguru eva guru-guru agama. Ia nompatuduki eva tona mpuu-mpuu nakuasa.
Currently Selected:
Matius 7: TLEDOV
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.