Matius 5
5
Pepatuduki i Yesus ri bavo nu bulu (Pasal 5-7)
Nabelo mpuu tona anu nantuntuni dota nu Alatala
Lukas 6:20-26
1Tempo i Yesus nanggita todea haitu, nantendemo Ia hau ri bulu. Nonturopa Ia ri sia, nakavamo topangoseaka Ia. 2Pade nompamulamo Ia nompatuduki ira ivei:
3“Nabelo mpuumo tona nisanina ledo rapakulena mompakasalama karona mboto bo aga nanjarumaka Tupu, sabana iamo najadi todea riara Poparenta nu Alatala.
4Nabelo mpuumo tona nabuku rarana, sabana Alatala mompakavoe rarana.
5Nabelo mpuumo tona naede rarana, sabana ia mantarima pura-pura anu nijanji nu Alatala ka todeaNa.
6Nabelo mpuumo tona naino rarana matuvu manoa ri panggita nu Alatala, sabana Alatala mbotomo mompopapakule ia matuvu manoa.
7Nabelo mpuumo tona naasi matana nanggita roana, sabana iamo rapoasi nu Alatala.
8Nabelo mpuumo tona nagasa bo naliangu rarana, sabana iamo manggita Alatala.
9Nabelo mpuumo tona nompoposinggabelo roa, sabana iamo rauli nu Alatala anaNa.
10Nabelo mpuumo tona nipandasa sabana novia anu nanoa ri panggita nu Alatala. Iamo majadi todea riara Poparenta nu Alatala.
11Nabelo mpuumo ane komiu rasalai atau rapandasa atau rarai ntona sabana komiu topangoseaka Yaku. 12Ivesia muni nipoviara ka nabi-nabi nggaulu. Jadi kadamba-dambamo raramiu ane tutu majadi nte komiu sabana naoge mpuu belo nipakasadia ka komiu ri suruga.”
Topomparasaya i Yesus nipakasimbayu eva gara bo reme ri dunia hitu.
Markus 9:50; Lukas 11:33-36; 14:34-35
13“Komiu nasimbayu eva gara ri dunia. Tapi ane gara mamolimo, domo mapaga mpanjili! Natantu gara haitu domo ria gunana, bo aga ratedaka bo rajeje-jeje ntona.
14Komiu nasimbayu eva reme nombavanta dunia. Ngata ri bavo bulu ledo namala ratabuniaka. 15Ivesia muni ante poindo. Ledo ria tona nombatunju poindo bo niloduna ntonda! Natantu poindo haitu rabolina ri kalangana, ala pura-pura tona riara banua ravanta nu remena. 16Ivesia muni reme anu naria riara ntaimiu, nee ratabuniaka! Komiu kana matuvu ante pokainggu nabelo ala tona ntanina mamala manggita pokainggumiu haitu bo mantoiya Tuamamiu ri suruga.”
Pepatuduki i Yesus nanguli Atura-atura agama Yahudi
17“Nee rapekirimiu Yaku hii nakava mompakaropu Atura-atura agama nitulisi i Musa bo pepatuduki nu nabi-nabi. Yaku ledo nakava mompakaropuna tapi ala mompopakita kadupana.#5:17 Yaku ledo nakava mompakaropuna tapi ala mompopakita kadupana ATAU: Yaku nakava ala mompatuduki ka komiu batuana kakanana anu nitulisi bara ipia. 18Pariaramo tesaKu hitu! Ane da maria langi bo tana, ledo ria malipo sambelaa lako ri Atura-atura haitu, nau sangu hurupu atau santiti ledo ntoto. Kana madupa puramo. 19Jadi, isema-sema nombaliunaka nau aga sambela lako ri parenta riara Atura-atura haitu, nau parenta anu nakodi ntoto, bo mompatuduki tona ntanina mombaliunaka muni, ia rareke tona nelabipa kakodina riara Poparenta nu Alatala. Tapi isema-sema nangoseaka Atura-atura haitu bo nipatudukina ka tona ntanina mangoseakana muni, iamo rareke tona nelabi kaogena riara Poparenta nu Alatala. 20Pariaramo tesaKu hitu! Komiu kana matutupa nangoseaka dota nTupu pade guru-guru agama bo toFarisi. Ane ledo, komiu ledo ntoto mamala majadi todea riara Poparenta nu Alatala.”
Nee marau rara
Lukas 12:57-59
21“Natantu niepemiumo pepatuduki ntotuata nggaulu ivei: ‘Nee mepatesi! Isema-sema mepatesi masipato ratangara.’#5:21 Pesuvu 20:13; Ulangan 5:17 22Tapi Kuuli ka komiu, isema-sema narau rarana nte sampesuvuna masipato ratangara. Bo isema-sema nanjalai sampesuvuna masipato raposintingayo ri Polibu Mbaso Agama. Tapi isema-sema manguli ka sampesuvuna, ‘Kanavumo ri narakaa iko!’ ia haitumo masipato ratedaka riara apu narakaa.
23Sabana haitu, ane rapana komiu hau ri lanta pesomba manggeni pesombamiu ka Alatala, bo ratoramiu naria sampesuvumiu nadua rarana nte komiu, 24boli ntanimo ruru pesombamiu haitu ri ngayo lanta pesomba, bo koimo mosinggabelo ante sampesuvumiu. Maupu haitu pade manjili komiu mombadekei pesombamiu ka Alatala.
25Ane maria tona mompangadu komiu, masalisa mosinggabelo mpanjili ante ia dopame komiu makava ri ngayo ntopotangara. Sabana, ane komiu ledo mosinggabelo ante ia, natantumo ia mompangadu komiu nte topotangara, bo topotangara haitu mombadekei komiu ka polisi, bo polisi mombasuaraka komiu riara ntarunggu. 26Pariaramo tesaKu hitu! Natantumo komiu ledo rasuvuraka lako riara ntarunggu haitu ane dopa nibayarimiu pura vayamiu.”
Pasimbukumo ala nee mogau sala
27“Natantu niepemiu pepatuduki ntotuata nggaulu ivei: ‘Nee mobualo.’#5:27 Pesuvu 20:14; Ulangan 5:18 28Tapi Kuuli ka komiu, isema-sema mombalele mata manggita mombine bo madota mompogau ia, natantu tona haitu nireke nombabualoni mombine haitu riara pekirina. 29Ane mata ngganamu manggeni iko movia dosa, suimo bo tedakamo matamu haitu. Aginapa sangu sipa nu karomu malipo pade njumangu karomu ranavusaka riara narakaa. 30Bo ane pale ngganamu manggeni iko movia dosa, tampasimo bo tedeakamo palemu haitu. Aginapa sangu sipa nu karomu malipo pade njumangu karomu ranavusaka riara narakaa.”
Pepatuduki i Yesus ane topoberei mogaa
Markus 10:11-12; Lukas 16:18
31“Naria muni pepatuduki nggaulu nanguli ivei: ‘Isema-sema madota mompogaaka bereina mombine, ia kana mombadekei ka bereina sura kaupu poberei.’#5:31 Ulangan 24:1-4 32Tapi Kuuli ka komiu, ane komiu mompogaaka bereimiu mombine, tano ledo ria ia nosipogau nte langgai ntanina, batuana komiu nompopobualo ia. Bo isema-sema mompoberei mombine nipogaaka haitu, ia muni nobualo.”
Nee mosumpa
33“Niepemiu pepatuduki ntotuata nggaulu ivei: ‘Nee mombaleva janjimiu. Anu nijanjimiu nte nosumpa ri ngayo nu Alatala, kana rapoviamiu.’#5:33 Imamat 19:12; Bilangan 30:2 34Tapi Kuuli ka komiu, nemo ntoto mosumpa ante manguli langi, sabana langi gadera nu Alatala. 35Nee mosumpa ante manguli dunia, sabana dunia hitu polampi kada nu Alatala. Nee mosumpa ante manguli Yerusalem, sabana Yerusalem ngata nu Magau anu nambaso kuasaNa. 36Bo nee mosumpa ante manguli vuvumiu mboto, sabana ledo rapakulemiu mombabaliki nau sambesa buluamiu majadi mabula bara mavuri. 37Tapi ane patujumiu iyo, ulimo iyo, bo ane patujumiu ledo, ulimo ledo. Ledo nabelo mompakaroso tesa ante mosumpa sabana pokainggu eva haitu nopuna lako ri Magau nu Seta.”
Nee rabalasi kadaa
Lukas 6:29-30
38“Niepemiu pepatuduki ntotuata nggaulu ivei: ‘Mata rasambei mata, ngisi rasambei ngisi.’#5:38 Pesuvu 21:24; Imamat 24:20; Ulangan 19:21 39Tapi Kuuli ka komiu, nee rapesavamiu. Ane maria tona mombasapa kalimpi ngganamiu, dekei muni sabingga kalimpi njidimiu rasapana. 40Bo ane maria tona manggeni komiu ri ngayo ntopotangara sabana madota mangala buyamiu, dekei ka ia muni bajumiu. 41Ane maria tona mompasuu komiu manggala mbara-mbarana sangu kilo kakavaona, kalamo mbara-mbara haitu rokilo kakavaona. 42Dekeimo ka tona nerapi nte komiu, bo nee mompoara tona makava manginda anumiu.”
Potovemo balimu
Lukas 6:27-28, 32-36
43“Niepemiu pepatuduki nggaulu nanguli ivei: ‘Potovemo roamiu bo povuu matamo balimiu.’#5:43 Imamat 19:18 44Tapi Kuuli ka komiu, potovemo balimiu bo posambayaka tona nompandasa komiu. 45Ane komiu mokainggu ivehaitu, komiu majadi ana-ana nu Alatala, Tuamamiu ri suruga. Apa nipotoveNa pura-pura tona bo nipopebondaNa mata nu eo ka tona nadaa bo ka tona nabelo. Bo nidekeiNa uda ka tona nanoa bo ka tona natenggo muni. 46Ane komiu aga mompotove tona nompotove komiu, natantumo komiu ledo masipato ratoiya nu Alatala. Apa nau topesingara balasitee nadaa ingguna, nompotove tona anu nompotove ira. 47Bo ane komiu aga nabelo nte roamiu mboto, natantumo pokainggumiu haitu ledo mbeki ratoiya. Nau tona ledo nosisani nte Alatala nabelo nte roara mboto! 48Jadi komiu kana mokainggu mabelo ante mpuu-mpuu raramiu, nasimbayu eva pokainggu nu Alatala, Tuamata ri suruga.”
Currently Selected:
Matius 5: TLEDOV
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.