Matius 26

I Yesus nisaka, nitangara bo nipatesi (Pasal 26-27)

Topanggeni agama Yahudi nasintuvu mompatesi i Yesus

Markus 14:1-2; Lukas 22:1-2; Yohanes 11:45-53

1Naupu i Yesus nompatuduki pura-pura haitu, niulikaNa ana-anaguruNa, 2“Nisanimiumo roeopa Eo Mbaso Paskahmo. Bo Yaku, Ana nu Manusia, radekei ka baliKu bo rapakura ri kayu salib.”

3Tempo haitu balengga-balengga ntopanggeni pesomba bo totua-totua ntoYahudi nasiromu ri banua nu Pakeni nTopanggeni Pesomba anu nosanga i Kayafas. 4Ira nonia mombasaka i Yesus nggalino ala mamala Ia rapatesi. 5Tapi nosiulika ira, “Nee kita movia haitu tempo Eo Mbaso Paskah ala todea ledo magado.”

Mombine nantoli lana dupa ri balengga i Yesus, mombabila Ia

Markus 14:3-9; Yohanes 12:1-8

6Tempo i Yesus ante ana-anaguruNa naria ri ngata Betania ira nesai ri banua ntona nosanga i Simon anu nadua oge bara ipia. 7Da nangande ira hamai, nakavamo saito mombine nanggeni sangu botolo nipovia lako ri vatu pualam anu noisi lana dupa nasuli mpuu alina. Mombine haitu nombatoli lana dupa ri balengga i Yesus, tandana pebilana ka Ia. 8Tapi nanggita anu nipovia mombine haitu, naraumo rara ana-anaguru i Yesus bo nanguli, “Nakuya lana dupa haitu aga nipakarugi bayangi? 9Lana dupa nasuli haitu masipato rapobalu bo alina radekei ka tona napakasi!”

10Nisani i Yesusmo pekirira, jadi niulikaNa ira, “Nakuya komiu nompakasusa mombine hitu? Anu nipoviana ka Yaku nabelo. 11Apa tona napakasi bate-batena maria ri tatangamiu, tapi Yaku ledo. 12Ante nombatoli lana hitu nte Yaku, ia nompakasadia karoKu ratana bara maipia. 13Pariaramo tesaKu hitu! Ri umba-umba ri dunia Kareba Belo rapatolele, povia nu mombine hitu ratesa muni ala ratora ia.”

I Yudas nonia mompobalu i Yesus ka baliNa

Markus 14:10-11; Lukas 22:3-6

14Naupu haitu, i Yudas, saito lako ri sapulu randua anaguru i Yesus, hau nte balengga-balengga ntopanggeni pesomba 15bo nanguli, “Ane kupobalu i Yesus ka komiu, nuapa radekeimiu ka yaku?” Jadi nibilaramo talupulu mpeka doi salaka bo nidekeira ka i Yudas. 16Nompamula lako ri eo haitu i Yudas nangelo loga nabelo mombadekei i Yesus ka baliNa.

I Yesus nangande ri Posusa Paskah nosanggani-nggani ante ana-anaguruNa

Markus 14:12-21; Lukas 22:7-13, 21-23; Yohanes 13:21-30

17Ri eo pamulana Posusa Roti Ledo Noragi, nakavamo ana-anaguru i Yesus nompekutana Ia, “Pue, ri umba rapodotaMiu rapompakasadia kami kandea Paskah ka kita?”

18Nesana Ia, “Koimo hau ri ngata Yerusalem nte i Yanu, bo uli ka ia ivei: ‘I Guru nanguli, naparamo gantana makava nte Ia. Ia madota mangoseaka Eo Mbaso Paskah ri banuamu mosanggani-nggani ante ana-anaguruNa.’ ” 19Bo haumo ana-anaguruNa novia anu nitudu i Yesus ka ira, bo nipakasadiaramo kandea Posusa Paskah.

20Nabongipa, nonturomo i Yesus nangande nosanggani-nggani ante ana-anaguruNa. 21Da nangande ira, nangulimo i Yesus, “Pariaramo tesaKu hitu. Saito komiu mompobalu Yaku ka baliKu.”

22Nangepe haitu, nasusa mpuumo rarara, bo saito-saito nanguli ka Ia, “Pue, tantu ledo yaku niuliMiu.”

23Nesana i Yesus, “Tona notula roti ri uta nosanggani-nggani ante Yaku, iamo mompobalu Yaku. 24Yaku, Ana nu Manusia, kana mamate nangoseaka anu nitulisi riara Buku Gasa. Tapi mandasa mpuu tona mompobalu Yaku! Aginapa tona haitu ledo nipoanaka ntinana.”

25Naupu haitu nanguli i Yudas, anu mompobalu i Yesus ngena, “Guru, tantu ledo yaku niuliMiu.”

Nesana i Yesus, “Tesamu mboto tu!”

I Yesus nompakatantu ada rapombatora Ia

Markus 14:22-26; Lukas 22:14-20; 1 Korintus 11:23-25

26Tempo ira da nangande, i Yesus nangala roti bo nosambaya nanguli tarima kasi ka Alatala. Naupu haitu nitubiNa roti haitu bo nibagiNa ka ana-anaguruNa bo nanguli, “Alamo roti hitu, bo kandemo. Hitumo karoKu.” 27Naupu haitu nialaNa muni saboda uve anggur. NiuliNa tarima kasi ka Alatala pade nidekeiNa ka ira bo nanguli, “Panginu puramo komiu 28sabana hitumo raaKu rapatiti ka todea ngena ala mompakaasa Pojanji nu Alatala nabaru. RaaKu hitu rapatiti ka todea ala dosa-dosara raampungi. 29Toramo tesaKu hitu. Domo Kuinu sanupa uve anggur sampe makava tempona bara maipia Alatala, TuamaKu, momparenta mpo Magau. Ri Poparenta haitumo pade Kuinu uve anggur nabaru mosanggani-nggani ante komiu.” 30Naupu haitu ira nodade sanggayu dade mombatoiya Alatala, pade nalai hau ri Bulu Zaitunmo ira.

I Yesus nombaboto i Petrus mombasapu Ia ngena

Markus 14:27-31; Lukas 22:31-34; Yohanes 13:36-38

31Bo i Yesus nanguli ka ana-anaguruNa, “Bongi hitu komiu pura-pura moleju pomparasayamiu bo rapalaisimiu Yaku, sabana nitulisi riara Buku Gasa ivei:

‘Kupatesi topoevu

bo bimba-bimbana masimpotare.’

Zakharia 13:7

32Tapi tempo Yaku matuvu mpanjili, Yaku mokolu ka komiu hau ri bagia Galilea.”

33Nanguli i Petrus, “Nau ira pura-pura moura mompalaisi Komiu, yaku ledo ntoto moura!”

34Nanguli i Yesus, “Petrus, pariaramo tesaKu hitu. Bongi hitu dopame manu mototoroko, talu-ngganimo iko mombasapu Yaku.”

35Nesana i Petrus, “Nau yaku mamate mosanggani ante Komiu, ledo ntoto kusapu Komiu!” Bo ivesia muni niuli nu ana-anaguruNa pura-pura ntanina.

I Yesus nosambaya ri Getsemani

Markus 14:32-42; Lukas 22:39-46

36Naupu sia i Yesus ante ana-anaguruNa hau ri sangu pampa niuli Getsemani.#26:36 Getsemani: batuana, pompea lana zaitun. Jadi Getsemani haitu bara pampa kayu zaitun ri Bulu Zaitun napara Yerusalem. Nanguli Ia, “Ponturomo ri sii. Haunapa Yaku mosambaya.” 37NikeniNa i Petrus bo randua ana i Zebedeus#26:37 Ana-ana i Zebedeus haitumo i Yakobus bo i Yohanes. nosanggani nte Ia. Hamai nompamulamo i Yesus nasusa bo napari raraNa. 38Bo niulikaNa gi Petrus, “Nasusa mpuumo raraKu. NirasaiKu eva mamate Yaku! Popea ri sii ruru. Mainga-ingamo bo posambayakamo Yaku!”

39Naupu haitu, i Yesus napola haunapa sakide lako nte ira tatalu bo notungga sampe ri tana nosambaya. NiuliNa, “Tata, ane mamala, Kuperapi ala peparajea anu rapambela ka Yaku, nee rapambela ka Yaku. Tapi nee dotaKu majadi, damo aga dotaMiu majadi!”

40Naupu haitu Ia nanjili hau nte anaguruNa tatalu haitu. NikavaNa namonjo puramo ira. NiulikaNa i Petrus, “Ha! Ledo nipakulemu mainga bo mosambaya ka Yaku nau aga sajaa? 41Komiu kana mainga pura bo mosambaya ala komiu ledo mambela pesori! Komiu madota movia anu mabelo, tapi ledo nipakulemiu sabana komiu manusia nalente.”

42Naupu haitu, hau vaimo i Yesus saitoNa nosambaya. NiuliNa, “Tata, ane peparajea hitu ledo mamala raala lako nte Yaku, palambamo, damo dotaMiu majadi.” 43Naupu haitu nanjili vaimo Ia nte anaguruNa. Namonjo vaimo ira sabana naroyo gagamo matara.

44Bo sangganipa vai Ia nompalaisi ira bo hau nosambaya katalu-ngganina. PosambayaNa nasimbayu ante posambayaNa pangane. 45Naupu nosambaya, nanjili vai Ia hau nte anaguruNa bo nanguli, “Berimba komiu? Da namonjo bo da nangosanakapa komiu? Epemo! Nakavamo gantana Yaku, Ana nu Manusia, rapobalu ka tona nadosa. 46Pembangumo! Peinta, nakavamo topompobalu Yaku! Haumo kita mosintomuka ia.”

I Yesus nisaka

Markus 14:43-50; Lukas 22:47-53; Yohanes 18:3-11

47Da notesa i Yesus, nakavamo i Yudas, saito lako ri sapulu randua anaguruNa. Ia nakava nosanggani nte todea nantipale guma bo pato, tona nitudu nu balengga-balengga ntopanggeni pesomba bo totua-totua ntoYahudi. 48Lave niuli i Yudas mamimo ka ira tandana ala rasanira umbana i Yesus. Niulina, “Tona kueki, iamo i Yesus. Sakamo Ia!” 49Jadi nakava hamai, i Yudas nanggaparai i Yesus bo nanguli, “Tabe, Guru!” Bo niekina i Yesus.

50Nanguli i Yesus, “Tutu sampe tumai iko?”#26:50 Tutu sampe tumai iko? ATAU: Poviamo masalisa anu nipatujumu! Bo kaliu-liu todea haitu nanggaparai i Yesus bo nisakara Ia. 51Nanggita haitu, saito lako ri anaguru anu nosanggani ante i Yesus, nangosu gumana bo nitimbena batua nu Pakeni nTopanggeni Pesomba sampe napudu talingana. 52Nanguli i Yesus ka anaguruNa haitu, “Pasuamo gumamu! Apa isema-sema metimbe ante guma, ia muni rapatesi nu guma. 53Nisarumakamiu ledo mamala Yaku merapi tulungi nte TuamaKu Alatala? Ane mekitulungi Yaku, masalisa ratuduNa melabi sapulu randua lunu#26:53 Salunu tantara Magau Roma biasana nte 6.000 tona. Jadi ane 12 lunu nitasere 72.000 malaeka. malaekaNa mantulungi Yaku! 54Tapi ane ivesia, ledo madupa tesa riara Buku Gasa anu nanguli pura-pura hitu kana majadi nte Yaku.”

55Pade nanguli i Yesus ka todea ri sia, “Berimbamo? Yaku hii topeago sampe komiu kana tumai ante guma bo pato mombasaka Yaku? Eo-eo Yaku nonturo nompaguru ri doyata Banua nu Alatala, tapi ledo nisakamiu Yaku! 56Tapi domo. Kana majadi ivesia mamimo ala madupa tesa nitulisi nabi-nabi nggaulu ri Buku Gasa.” Naupu haitu nipalaika nu anaguruNa puramo Ia.

I Yesus ri ngayo Polibu Mbaso Agama Yahudi

Markus 14:53-65; Lukas 22:54-55, 66-71; Yohanes 18:12-14, 19-24

57Bo toposaka i Yesus nanggeni Ia hau ri banua i Kayafas, Pakeni nTopanggeni Pesomba. Tempo haitu, guru-guru agama bo totua-totua ntoYahudi lave nasiromu hamai mamimo. 58I Petrus netuntuni nggavao lako ri puri, sampe nakava ri doyata nu banua Pakeni nTopanggeni Pesomba. Nakava hamai, nesuamo ia rara doyata bo nonturo nosanggani-nggani ante topojaga-topojaga ala rasanina nuapa majadi ante i Yesus.

59Tempo haitu balengga-balengga ntopanggeni pesomba bo pura-pura topolibu ntanina ri Polibu Mbaso Agama Yahudi nompasimbuku mangelo tona nasadia mosabi dava ala i Yesus mamala rahuku mate. 60Nadea tona nakava nosabi dava tapi ledo nikavara salaNa sampe Ia masipato rahuku mate. Kaupuna naria randua sabi nantingayo Polibu Mbaso haitu 61bo nanguli, “Naria sanggani tona hitu nanguli ivei: Yaku nompakule mombagerosi Banua nu Alatala bo mombabanguna mpanjili riara talu-eo.”

62Naupu haitu neanggamo Pakeni nTopanggeni Pesomba bo nanguli ka i Yesus, “Berimba? Ledo Nupesanaka pangadura haitu?” 63Tapi nau ledo nasala, i Yesus ledo notingo. Bo sangganipa Pakeni nanguli ka Ia, “Ulimo ri ngayo nu Alatala anu Natuvu, uli ka kami ane Iko mpuu-mpuu Magau Topepakasalama, Ana nu Alatala!”

64Nesana i Yesus, “Nakana niulimiu tu. Pariaramo! Kana makava tempona bara maipia rakitamiu Yaku, Ana nu Manusia, monturo ri sabingga nggana nu Alatala toNeliu KakuasaNa, bo rakitamiu Yaku manau lako ri suruga riara kulimu.”#26:64 Mazmur 110:1; Daniel 7:13

65Nangepe haitu nagigimo rara nu Pakeni nTopanggeni Pesomba sampe nibitesina mboto bajuna. Niulina, “Ia mboto nompakasimbayu karoNa ante Alatala! Niepemiu mboto tesaNa nanjalai Alatala! Domo paraluu sabi-sabi ntanina! 66Berimba pantaseremiu?”

Nesana ira, “Ia masipato rahuku mamate!”

67Naupu haitu naria sanu nantaveulusi lenje i Yesus bo nombaboba Ia. Naria sanupa nosapa Ia 68bo nanguli, “He, Magau Topepakasalama anu nijanji nu Alatala! Boto vei, isema nombasapa Iko?”

I Petrus nombasapu i Yesus

Markus 14:66-72; Lukas 22:56-62; Yohanes 18:15-18; 25-27

69Tempo haitu i Petrus da nonturo ri savalikuna ri doyata banua haitu. Saito batua mombine anu nokarajaa ri banua Pakeni nTopanggeni Pesomba nanggaparai ia bo nanguli, “Iko muni roa i Yesus toGalilea haitu!”

70Tapi i Petrus nesapu ri ngayora pura-pura, “Ledo nakana! Ledo nisaniku nuapa niulimu!”

71Naupu haitu i Petrus hau ri bobaa nu doyata. Ri sia saito batua mombine ntanina nanggita ia bo nanguli ka tona hamai, “Tona hitu muni nosanggani-nggani ante i Yesus, toNazaret haitu.”

72Tapi i Petrus nesapu vaimo ante nopinda bo nanguli, “Ledo nisaniku tona haitu!”

73Dopa nasae, tona neangga hamai nanggaparai i Petrus bo nanguli, “Natantumo iko muni topangoseaka i Yesus, apa nalanto lako ri enggo ntesamu iko toGalilea!”

74Bo nopinda vaimo i Petrus bo nanguli, “Ledo ntoto nisaniku tona haitu!” Bo eva nisuka, nototorokomo manu. 75Bo nitora i Petrusmo tesa i Yesus pangane nanguli, “Dopame manu mototoroko ngena, talu-ngganimo iko mombasapu Yaku.” Bo nesuvumo i Petrus notumangi nonjodu-njodu ante nasusa mpuu rarana.

Currently Selected:

Matius 26: TLEDOV

Highlight

Copy