Lukas 23

I Yesus niparesa ri ngayo i Pilatus bo Magau Herodes

Matius 27:1-2, 11-14; Markus 15:1-5; Yohanes 18:28-38

1Jadi neangga puramo toPolibu Mbaso haitu hau manggeni i Yesus ri ngayo Gubernur Pilatus. 2Ri sia ira nombarai Ia. Niulikara i Pilatus, “Tona hitu nikava kami nompatuduki tona mangeva pomarenta. NitagiNa tona mombayari balasitee ka Magau Mbaso Kaisar, bo niuliNa Iamo i Kristus, saito Magau.”

3Nekutanamo Gubernur Pilatus, “Nakana mpuu Iko Magau ntoYahudi?”

Nesana i Yesus, “Nakana niulimiu.”

4Gubernur Pilatus nangulika balengga-balengga ntopanggeni pesomba bo todea haitu, “Niparesakumo tona hitu, ledo ntoto naria salaNa nikavaku!”

5Tapi aga nantambaipa pebarusura bo nanguli, “PepatudukiNa nompakapane rara ntodea ri njumangu ngata ri bagia Yudea hitu. Ia nompamula nompatuduki ri bagia Galilea, sampe nakava ri sii munimo.”

6Nangepe haitu, nekutanamo Gubernur Pilatus, “ToGalilea Ia hii?”

Nesana tona, “Iyo, toGalilea Ia.”

7Nisaninapa i Yesus toGalilea, nitudunamo tona manggeni i Yesus hau ri ngayo Magau Herodes, apa Magau Herodes noparenta ri Galilea. Bo tempo haitu, Magau Herodes naria muni ri ngata Yerusalem.

I Yesus niparesa ri ngayo Magau Herodes

8Nadamba mpuu rara Magau Herodes nanggita i Yesus, apa nasaemo pangepena kareba i Yesus bo naoge rarana manggitaNa. Nisarumakana muni bara mamala rakitana kabaraka rapovia i Yesus. 9Haitumo sampe nadea pompekutanana nte i Yesus, tapi i Yesus ledo nesana. 10Balengga-balengga ntopanggeni pesomba bo guru-guru agama neangga ri sia muni bo nanggarasese nombarai i Yesus. 11Jadi Magau Herodes ante tantarana nanjalai Ia bo nipongei-ngeikara. Nipopasuakara baju magau ka i Yesus, pade nikenira mpanjili ka Gubernur Pilatus. 12Magau Herodes ante Gubernur Pilatus bara ipia nosipobali. Tapi nompamula eo haitu, nosimpovegamo ira.

I Yesus nihuku mate

Matius 27:15-26; Markus 15:6-15; Yohanes 18:39-19:16

13Gubernur Pilatus nompasiromu balengga-balengga ntopanggeni pesomba, totua ngata, bo todea ntanina, 14pade niulikana ira pura-pura, “Tona hitu nikenimiu ka yaku bo niulimiu Ia nompakeni tona nangeva pomarenta. Niparesakumo Ia ri ngayomiu pura-pura, tapi ledo ntoto nikavaku anu niraimiu ka Ia. 15Ivesia muni panggava Magau Herodes, apa nipopanjilina tumai ka yaku. Tona hitu ledo novia nuapa-nuapa masipato rapohuku mateNa. 16Sabana haitu, kutudu tantaraku mombaboba bo mombakabasaka Ia.” 17[I Pilatus nanguli ivesia apa nantuntuni kabiasara, tempo Posusa Paskah, ia kana mombakabasaka ka ira saito tona nitarunggu.]

18Tapi pura-pura tona ri sia nongare-ngare, “Patesimo Ia! Kabasakamo i Barabas ka kami!” 19(I Barabas haitu nitarunggu sabana ia nangeva pomarenta ri ngata Yerusalem, bo ia topepatesi.)

20I Pilatus madota mombakabasaka i Yesus, jadi niulina vai sangganipa ri ngayo ntodea. 21Tapi nongare vaimo ira, “Pakumo Ia ri kayu salib! Pakumo Ia ri kayu salib!”

22Katalu-ngganina i Pilatus notesa ri ngayora, “Tapi nuapa salaNa? Ledo ria sangua salaNa nikavaku sampe masipato Ia rapatesi.”

23Tapi ira aga nantambaipa kamanggana pongarera, “I Yesus kana rapaku ri kayu salib!” Kaupuna, padagimo ira, apa ira ledo naupu-upu nongare. 24Jadi kaupuna i Pilatus nombabotusi bo nompoiyo perapi ntodea, 25bo nikabasakana ka ira tona niperapira, haitumo i Barabas, anu nitarunggu sabana nangeva pomarenta bo nepatesi. Bo i Yesus nidekeina ka tantara Roma mompatesina nangoseaka dota nu pakeni ntoYahudi.

I Yesus nipaku ri kayu salib

Matius 27:32-44; Markus 15:21-32; Yohanes 19:17-27

26Naupu haitu nikenira i Yesus hau rapatesira. Ri tatanga dala, nipotomuramo saito toKirene nosanga i Simon. Ia dako nakava ri kota Yerusalem. Nipopetaara ia bo nibarusura manjimbuaka kayu salib i Yesus ri puriNa.

27Nadea ntoto tona nantuntuni i Yesus. Naria muni bara sako-ndua mombine netuntuni. Mombine gahaitu notumangi, nantangisi Ia. 28I Yesus neili nompeinta ira bo nanguli, “Mombine toYerusalem! Nee ratangisimiu Yaku. Aginamo tangisi karomiu mboto bo anamiu, 29apa makava tempona ngena rauli ntona, ‘Nabelo mpuu mombine nagampa anu ledo sanggania noana bo ledo sanggania nompatomi ngana!’ 30Tempo haitu rauli ntona ka bulu, ‘Rumpimo kami!’ bo raulira ka buntina, ‘ivumo kami!’ Mandasa mpuu komiu ngena!#23:30 Hosea 10:8 31Sabana, ane rapoviara ivesia sii-sii nte kayu mata evamo Yaku tonoa, berimba muni rapoviara ngena nte kayu ngau evamo komiu totenggo? Tantu mandasa ntotopa komiu ngena!”

32Tempo haitu nikenira muni randua tona rapatesi sanggani nte i Yesus. Tona randua haitu nadaa mami. 33Tempo nakava ri buntina nosanga Banga Balengga#23:33 Banga Balengga: riara basa Ibrani “Golgota”., nipakuramo i Yesus ri kayu salib. Bo tona nadaa randua haitu nipakura munimo ri kayu salib ntanina, saito ri sabingga nggana i Yesus, bo saito ri sabingga njidiNa. 34Naupu haitu i Yesus nosambaya, “Tata, ampungimo ira. Ledo nisanira nuapa nipoviara.”

Tantara anu nombapaku i Yesus, notende lamoro ala rasanira isema rakamalakana pakea i Yesus. 35Nadea tona neangga ri sia nantarana. Naria muni pakeni-pakeni ntoYahudi nompongeika i Yesus. Niulira, “Hm! Tona ntanina nipakasalama. Ane mpuu-mpuu Ia Magau Topepakasalama nipelisi nu Alatala, dekeikamo Ia mompakasalama karoNa mboto!”

36Tantara muni nompongeika Ia. Ira nanggaparai i Yesus bo nombaduduaka uve anggur napoi ka Ia. 37Niulira, “Ane Iko mpuu-mpuu Magau ntoYahudi, pakasalama mbotomo karoMu!”

38Ri kayu salib ri bavo balengga i Yesus nitulisi ivei:

HITUMO MAGAU NTOYAHUDI.

39Saito tona nadaa anu nipaku ri kayu salib ri sinjori i Yesus, nombadee Ia, “Heh, le! NiuliMu Iko Magau Topepakasalama. Ane makana, le, pakasalamamo karoMu bo pakasalama muni kami!”

40Tapi tona nadaa ntanina haitu nombatagi roana. Niulina, “Nee ivesia! Ledo naeka iko nte Alatala? Kita pura-pura nosanggani-nggani nihuku mate. 41Bo kita randua hii masipato rahuku nasinjuru ante pokaingguta nadaa. Tapi tona hitu ledo ntoto nasala!” 42Niulina ka i Yesus, “Yesus, tora muni yaku tempo Komiu makava majadi Magau.”

43Nanguli i Yesus ka ia, “Pariaramo tesaKu hitu. Eo hitu muni iko mosanggani-nggani ante Yaku ri Firdaus.”

Kamate i Yesus

Matius 27:45-56; Markus 15:33-41; Yohanes 19:28-30

44Nitasere tinti sapulu randua tanga eo, domo nevangga mata nu eo. Pura-pura ngata haitu najadi nalanda sampe tinti tatalu nggoviana. 45Pade kae povombo ri Banua nu Alatala nabite najadi rombite. 46Naupu haitu i Yesus nongare ante suara namangga, “Tata, siimo nyawaKu!”#23:46 Mazmur 31:6 Naupu nanguli ivesia, naponjimo nosaNa.

47Tempo balengga nu tantara nanggita anu najadi, nitoiyanamo Alatala. Niulina, “Nakana mpuu tona hitu ledo ria salaNa.”

48Todea anu nakava nantara pura-pura kajadia haitu nikitara i Yesus namatemo. Jadi nanjilimo ira nosapa-sapa bambarara apa nanjoso rarara. 49Pura-pura roa i Yesus bo mombine anu nosanggani nte Ia lako ri bagia Galilea, neangga nggavao nompeintaka pura-pura anu najadi haitu.

I Yesus nitana

Matius 27:57-61; Markus 15:42-47; Yohanes 19:38-42

50-51Naria langgai nosanga i Yusuf, lako ri ngata Arimatea ri bagia Yudea. Ia tona nabelo bo pokaingguna nanoa. Ia nantongoraka tempona Alatala moparenta mpo Magau. Ia saito lako ri Polibu Mbaso Agama Yahudi tapi ledo nasituju ia ante potangara bo poviara nompatesi i Yesus. 52I Yusuf hau nte i Pilatus nerapi karobata i Yesus radekei ka ia ratanana. 53Nitaurakana karobata i Yesus lako ri kayu salib, pade nisompuna ante kae gandisi nabelo. Naupu haitu nibolina karobata i Yesus riara dayo, ri vatu nipaa. Dayo haitu da nabaru dopa ria sanggani nipodayo. 54Haitu najadi nggoviana ri eo pompakasadia ka eo penonto. Nangoseaka kabiasa ntoYahudi, nompamula kasolo nu eo, ira nitagi nokarajaa sabana nompamulamo eo penonto.

55Mombine nomporoa i Yesus lako ri bagia Galilea, hau nantuntuni i Yusuf manggita dayo. Nikitara muni berimba karobata i Yesus niboli riara dayo. 56Naupu haitu nanjilimo ira hau rangata, pade nipakasadiara rampa-rampa bo lana dupa radika ri karobata i Yesus. Eo sunjuna haitu eo penontomo, jadi nenontomo ira nokarajaa, nantuntuni atura agama ntoYahudi.

Currently Selected:

Lukas 23: TLEDOV

Highlight

Copy