Mak 8

Yàng Jesu lơh piang lă gơlik gơs oă dơ̆ bàr

(Mathiơ 15:32-39)

1Tòm ală ngai hơ̆ gơs mpồl làng bol oă pơjum bal tai, mơ ò gơs phan lơi sa. Gen Yàng Jesu hòi ală cau bơtê tus mơ đơs lah: 2“Añ nđàc sơngit di mpồl làng bol do, tài bơh neh pe ngai rau bol khai kư̆ ơm mơ Añ, mơ ò gơs phan lơi sa. 3Dilah Añ lòi bol khai in rê jơgloh gen bol khai rơp hồi tòm gùng, bơh gơs cau ƀà neh tus bơh tiah ngài.” 4Ală cau bơtê ho lah: “Mbe kòñ lơh tồ geh piang lă nàng bol khai in sa hòm tòm tiah ngềt ngơt do taih?” 5Kơnràñ lùp lah: “Bol mê gơs nđò nơm piang lă taih?” Bol khai đơs lah: “Gơs poh nơm.” 6Kơnràñ sồr mpồl làng bol nggui di ù. Chòp Kơnràñ ai poh nơm piang lă, ưnngài, gen dơrkă tong ală cau bơtê in, nàng tòmpà ală làng bol in. Gen cau bơtê tòmpà làng bol in. 7Ală cau bơtê kung gơs dô êt ka dềt sơl; Yàng Jesu ai lơngai rau, gen kung sồr pà bol khai in sơl. 8Jơh tơl nă kung sa hòm lơm, lồc behơ̆ cau dòñ ală pet tơngkah gơs bềng poh bài dờng. 9Mơ tai, ntum khà cau sa pơgap poan rbô nă. Yàng Jesu ai mpồl làng bol in rê; 10lồc behơ̆ mut mo tòm ơhò bal mơ ală cau bơtê, tiă hơ kơnhwàl Dalmanutha.

Cau Pharisi dan dô nơm tềl krơi

(Mathiơ 12:38-42; 16:1-4)

11 # Mat 12:38; Luk 11:16. Gơs ală cau Pharisi lòt tus, sơntòm pơndang mơ Kơnràñ, dan dô nơm tềl krơi bơh trồ nàng lòng Kơnràñ. 12#Mat 12:39; Luk 11:29.Yàng Jesu tă nhơm dờng mơ đơs lah: “Ñchi bơh tài jơi bơtiàn do dan dô nơm tềl krơi taih? Di ngan Añ đơs mơ bol mê, rơp ò ai jơi bơtiàn do in dô nơm tềl krơi lơi ò.” 13Chòp Kơnràñ lòi bol khai, mut wơl tòm ơhò nàng tiă đah bơtĭ ne.

Kañ cau Pharisi mơ Herôt dê

(Mathiơ 16:5-12)

14Mơ tai, cau bơtê hŭi cèng piang lă, tòm ơhò gơs mìng dô nơm lơm. 15#Luk 12:1.Kơnràñ bơto tơngkah bol khai lah: “Kơrhia tĕ, kơrmap gàr să he bơh kañ cau Pharisi mơ kañ Herôt dê.” 16Bol khai bơyai bal lah: “Hơ̆ la bơh bol he ò gơs piang lă.” 17Yàng Jesu git bơta hơ̆ gen đơs lah: “Ñchi bơh tài bol mê bơyai bal hơ̆ la tài bơh bol mê ò gơs piang lă taih? Bol mê gam òhềt git mơ kung ò wă sơl ơ? Bol mê gơs nùs kră kơldang ơ? 18#Jer 5:21; Ejek 12:2; Mak 4:12.Bol mê gơs mat mơ ò gŏ? Gơs tồr mơ ò kơno? Bol mê ò kah wơl ơ? 19Tòm tŭ Añ dơrkă pram nơm piang lă ai pram rbô nă cau in, bol mê dòñ pet tơngkah bềng nđò bài taih?” Bol khai ho lah: “Jơt bàr bài.” 20“Ai tòm tŭ Añ dơrkă poh nơm piang lă ai poan rbô nă cau in, bol mê dòñ pet tơngkah bềng nđò bài dờng taih?” Bol khai ho lah: “Poh bài.” 21Kơnràñ đơs tai lah: “Bol mê gam òhềt git wă sơl?”

Yàng Jesu sơmbòi cau jơngo tòm Betsaida

22Yàng Jesu mơ ală cau bơtê lòt hơ Betsaida. Cau cèng tus hơ Yàng Jesu dô nă cau jơngo, rac dan mơ Kơnràñ ƀư di khai. 23Yàng Jesu at di tê cau jơngo tề tơlik hơ bơdìh ƀòn, bong dà diau#8:23 Js: choh hala bruh di mat cau jơngo. di mat khai, ơn tê hơđang khai mơ lùp lah: “Mê gŏ bơta lơi sơl?” 24Cau jơngo tơnggòr sền mơ ho lah: “Añ gŏ cau, mơ gŏ bol khai lòt gơlơh be chi.” 25Gen Kơnràñ ơn tai tê di mat khai; khai tơnggòr sền, geh àng mat, gŏ loh làng jơh ală bơta. 26Yàng Jesu sồr khai rê hìu, mơ nting lah: “Bañ mut wơl tòm ƀòn.”

Pier yal tơlik Yàng Jesu la Bơtau Krist

(Mathiơ 16:13-20; Luka 9:18-21)

27Yàng Jesu bal mơ ală cau bơtê lik bơh hơ̆, lòt tus hơ ală ƀòn gơrê bal mơ kơnhwàl Sesare Philip. Lòt rò gùng, Kơnràñ lùp cau bơtê lah: “Cau đơs Añ la ñcau taih?” 28#Mak 6:14-15; Luk 9:7-8.Bol khai đơs lah: “Cau ƀà đơs la Jang Ƀaptis; cau ƀà đơs la Eli; cau ƀà tai đơs la dô nă tòm ală cau gơnoar hwơr.” 29#Jang 6:68-69.Kơnràñ lùp lah: “Ai bol mê gen đơs Añ la ñcau taih?” Pier ho lah: “Kơnràñ la Bơtau Krist.” 30Gen Kơnràñ bơkơŭ ală cau bơtê bañ yal cau lơi in bơh Kơnràñ.

Yàng Jesu yal lài bơh bơta bòl glar mơ bơta chơt

(Mathiơ 16:21-28; Luka 9:22-27)

31Tŭ hơ̆ Yàng Jesu sơntòm bơto bol khai lah: Kòn Mơnus pal kong oă bơta bòl glar, pal kong ală cau kwang kra, ală cau gơnoar lam bồ ơn phan duh khoai mơ ală cau gơnoar cih sang tơlik, mơ kong cau tơnchơt, tơnơ̆ mơ pe ngai gen kis wơl. 32Kơnràñ đơs loh làng bơta hơ̆. Behơ̆ Pier lam Kơnràñ lik mơ lah pơrhơng Kơnràñ. 33Mơya Yàng Jesu wơlke sền ală cau bơtê mơ lah pơrhơng Pier lah: “Ơ cà Satan, ruc tĕ tơnơ̆ Añ, bơh nùs kơlôi mê ò gơwèt hơ broă Yàng Tom Trồ, mơya gơwèt hơ broă kòn mơnus dê.”

34 # Mat 10:38; Luk 14:27. Chòp Kơnràñ hòi mpồl làng bol bal mơ cau bơtê tus mơ đơs lah: “Dilah cau lơi jat Añ, gen pơndang sang tĕ să he, tui chi pơng he mơ jat Añ. 35#Mat 10:39; Luk 17:33; Jang 12:25.Bơh dilah cau lơi kòñ dong klàs bơta kis he gen gơ rơp roh, ai cau lơi tài bơh Añ mơ Jơnau Niam mơ roh bơta kis he gen rơp geh dong klàs. 36Dilah cau lơi geh jơh dunnia mơ roh hwềng soàn he, gen gơs ñchi kwơ cau hơ̆ in taih? 37Hala ñchi cau ai nàng tòmgơl ala hwềng soàn he taih? 38Dilah cau lơi ƀàssìl bơh Añ mơ jơnau Añ jê digùl jơi bơtiàn rềs àr bơrnàn do, gen Kòn Mơnus kung rơp ƀàssìl bơh cau hơ̆ tòm tŭ Kơnràñ tus wơl tòm bơta gơklŏ Bèp Kơnràñ dê bal mơ ală cau gơnrơh sàng goh.”

Currently Selected:

Mak 8: KPM2018

Highlight

Copy