Malaci 2
2
Jơnau bơto tơngkah ală cau gơnoar ơn phan duh khoai
1Mơ tŭ do, Ơ ală cau gơnoar ơn phan duh khoai, do la gơnoar sồr bol mê in. 2Yàng Jehôwa Gơnap Gơnoar Dờng Làm Jơh đơs lah: “Dilah bol mê ò iat, mơ ò ai nùs ki ngàm di sơnđan gơklŏ Añ jê, gen Añ rơp tơndùh dô bơta srat sơntơm hơđang bol mê, mơ Añ rơp srat sơntơm ală bơta lơngai lơngò bol mê dê. Ngan Añ neh srat sơntơm rau, tài bơh bol mê ò ơn nùs duh rngòt di Añ. 3Añ rơp lah pơrhơng#2:3 pơrhơng: hala koh sang. kòn sau bol mê dê, rsìh è phan poan jơng hơđang muh mat bol mê dê, è ală phan ơn bol mê dê, mơ Añ rơp bơtrơh tơlik bol mê bơh di bơta gơs mat Añ jê. 4#Khà 3:11-13.Git tĕ lah Añ neh ai jơnau gơnoar sồr do bol mê in nàng lơh bơta ho bal Añ jê mơ Lebi geh kơ̆ nền, Yàng Jehôwa Gơnap Gơnoar Dờng Làm Jơh đơs behơ̆.
5 #
Khà 25:12. Bơta ho bal Añ jê mơ khai la bơta ho bal kis mơ lơngap lơngai, Añ neh ai khai in; bơta hơ̆ geh sơnđan la pal duh rngòt, mơ khai neh duh rngòt di Añ, mơ rngòt rơm să di sơnđan Añ. 6Jơnau bơto sồr song ngan neh ơm tòm bơr khai, ò gơs dô jơnau lơi tìs tòm bơr khai dê, mơ ò gơs dô jơnau lơi tìs geh jòi bàn tòm sơndồi khai dê. Khai neh cơnđòa lòt bal mơ Añ tòm bơta song ngan mơ song ring, mơ neh lơh oă cau in pơrlac sang bơta tồi glài. 7Bơh bơr sơndồi cau gơnoar ơn phan duh khoai dê pal prap gàr bơta git jak, mơ làng bol jòi bơta bơto sồr bơh di bơr khai dê, bơh khai la cau kong sồr Yàng Jehôwa Gơnap Gơnoar Dờng Làm Jơh dê.
8Mơya, bol mê neh pleh lik bơh di gùng, jơnau bơto sồr bol mê dê neh lơh oă cau in gơtup pừ; bol mê neh lơh gơltac sang bơta ho bal Lebi dê,” Yàng Jehôwa Gơnap Gơnoar Dờng Làm Jơh đơs behơ̆. 9Behơ̆ gen Añ neh lơh bol mê in kòl sền òsơp mơ kong ƀàssìl di đap jơh ală làng bol, tài bơh bol mê ò lòt jat ală gùng dà Añ jê mơya neh yal tơlik bơta ò song ngan tòm bơta bơto sồr mê dê.
Cau Juda ò dòn song
10Bol he jơh tơl nă ò di gơs dô nă Bèp ơ? Ò di dô nă Yàng Tom Trồ neh crơng gơs bol he ơ? Gen ñchi bơh tài bol he ò dòn song bal mơ gơp, lơh gơtup tìs di bơta ho bal mơ ală ồng pàng bol he dê taih? 11Juda neh ò dòn song. Dô bơta ngkòr ngkàc neh gơs tòm Israel mơ tòm Jerusalem. Bơh Juda neh lơh ƀơ̆ ƀơl tiah sàng goh Yàng Jehôwa dê, bơta lơi khai kòñ gơboh, mơ tòmbau mơ kòn ùr dô nă yàng lơgar bơdìh. 12Dan Yàng Jehôwa tơnroh khai bơh di ală sàl Jakôp dê, dilah cau lơi neh lơh bơta hơ̆, gơs cau lơi lơh cơng hala ho wơl, hala khai cèng phan ơn Yàng Jehôwa Gơnap Gơnoar Dờng Làm Jơh in kung behơ̆ sơl.
13Dô bơta tai bol mê lơh: hơ̆ la bol mê ai dà mat tơnkram cơnòng duh khoai Yàng Jehôwa dê. Bol mê ñìm mơ pơt wòl tài bơh Kơnràñ ò tai wèt sền di ală phan ơn bol mê dê, hala chò dòp ală phan ơn hơ̆ bơh di tê bol mê dê. 14Bol mê lùp lah: “Ñchi bơh tài behơ̆ taih?” Hơ̆ la tài bơh Yàng Jehôwa gơs kung be cau lơh cơng digùl mê mơ bau ùr mê neh bau bơh tŭ mê gam pơnu, bơh mê ò dòn song mơ khai, bulah khai la cau bơyô mê dê, la bau ùr bơta ho bal mê dê. 15Ò di Yàng Tom Trồ neh lơh bol khai in gơlik gơs mìng dô nă lơm ò ơ? Tòm poac să mơ hwềng nùs bol khai gơrê bal mơ Kơnràñ. Mơ ñchi bơh tài lơh gơlik gơs mìng dô nă lơm taih? Hơ̆ la tài bơh Kơnràñ jòi dô jơi bơtiàn sàng goh.#2:15 Js: Jơi bơtiàn Yàng Tom Trồ. Behơ̆ kơrhia tĕ tòm hwềng nùs bol mê dê; bañ ơm ò dòn song mơ bau ùr mơ mê neh bau bơh tŭ mê gam pơnu. 16Jehôwa Yàng Tom Trồ Israel dê neh đơs lah: “Añ gơjrañ di bơta lòi bau, mơ Añ gơjrañ di cau lơi jơm să he bơh bơta iơh bơsak be ồi ào khai dê,” Yàng Jehôwa Gơnap Gơnoar Dờng Làm Jơh đơs behơ̆. Behơ̆ gen, să tòm mê ai tồr iat tĕ, mơ bañ gơwèt ò dòn song mơ bau mê dê.
17Bol mê neh lơh pơnjê Yàng Jehôwa bơh ală jơnau đơs bol mê dê. Bol mê lùp lah: “Mbe bol hi neh lơh pơnjê Kơnràñ taih?” Hơ̆ la tòm tŭ bol mê đơs lah: “Jơh tơl nă cau lơh bơta iơh la niam di đap mat Yàng Jehôwa, mơ Kơnràñ niam nùs di bol khai.” Hala “Ntềng đah Yàng Tom Trồ bơta song ngan dê taih?”
Currently Selected:
Malaci 2: KPM2018
Highlight
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.
