Jang 17

Yàng Jesu hòi dan ala

1Tòm tŭ neh đơs ală jơnau hơ̆ rau, Yàng Jesu tơnggòr hơđang trồ mơ đơs lah: “Ơ Bèp, jơ neh tus, dan lơh gơklŏ Kòn in tồ Kòn kung lơh gơklŏ Bèp in sơl, 2Bơh Bèp neh ai Kòn in gơnoar hơđang jơh ală poac să, nàng ai bơta kis gam sùm sùm ală cau mơ Bèp neh ai Kòn in. 3Bơta kis gam sùm sùm la dòp git Bèp, la Yàng Tom Trồ song ngan mơ gơs mìng dô nă lơm, bal mơ Jesu Krist mơ Bèp neh sồr lòt tus. 4Añ neh lơh gơklŏ Bèp in tòm ù, mơ lơh sir broă Bèp neh jào Añ in lơh. 5Ơ Bèp, tŭ do dan ai bơta gơklŏ Añ neh geh bal mơ Bèp lài mơ tŭ òhềt gơs dunnia, nàng lơh gơklŏ Añ in di đap Bèp.

6Añ neh yal tơlik sơnđan Bèp mơ ală cau Bèp neh ai Añ in bơh digùl dunnia do; bol khai bal mơ Bèp, Bèp ai bol khai Añ in, mơ bol khai neh prap gàr jơnau Bèp. 7Tŭ do bol khai git lah jơh ală bơta Bèp neh ai Añ in la bơh Bèp mơ tus. 8Bơh Añ neh ai bol khai in ală jơnau Bèp neh ai Añ in; bol khai neh dòp mơ git ngan lah Añ neh tus bơh di Bèp, mơ dòn lah Bèp neh sồr Añ lòt tus. 9Añ bơh bol khai mơ hòi dan; ò di bơh dunnia mơ hòi dan, mơya bơh cau mơ Bèp neh ai Añ in, tài bơh bol khai bal mơ Bèp. 10Mơ jơh ală bơta bal mơ Añ la bal mơ Bèp, ală bơta bal mơ Bèp la bal mơ Añ, mơ Añ geh gơklŏ bơh bol khai. 11Añ ò ơm tòm dunnia tai, Añ rê wơl hơ Bèp, mơya bol khai gam ơm tòm dunnia. Ơ Bèp sàng goh, dan sền gàr bol khai tòm sơnđan Bèp la sơnđan Bèp neh ai Añ in, nàng bol khai in gơs dô bă bal kung be bol he sơl. 12#Đơs Crih 41:9; Jang 13:18.Tòm tŭ Añ gam ơm mơ bol khai, Añ sền gàr bol khai tòm sơnđan Bèp la sơnđan Bèp neh ai Añ in; Añ neh sền gàr bol khai ò gơs dô nă cau lơi roh, gơs mìng dô nă kòn bơta roh rui dê, tồ Sră Goh in gơlik di ngan. 13Tŭ do Añ rê wơl hơ Bèp, mơ Añ đơs ală bơta hơ̆ tòm dunnia, tồ bơta hòn chò Añ jê geh wil tơl tòm bol khai. 14Añ neh ai jơnau Bèp dê bol khai in, mơ dunnia gơjrañ di bol khai tài bơh bol khai ò bal mơ dunnia, kung be Añ ò bal mơ dunnia sơl. 15Añ ò dan Bèp tă bol khai bơh di dunnia, mơya dan Bèp sền gàr bol khai klàs bơh bơta iơh.#17:15 Hala cau iơh. 16Bol khai ò bal mơ dunnia, kung be Añ ò bal mơ dunnia. 17Dan Bèp ai jơnau song lơh bol khai in gơlik gơs sàng goh; jơnau Bèp la jơnau song. 18Be Bèp neh sồr Añ lòt tus tòm dunnia, gen Añ kung sồr bol khai lòt tus tòm dunnia sơl. 19Añ bơh bol khai mơ ơn is să Añ jê nàng bol khai in gơlik gơs sàng goh tòm jơnau song.

20Hơ̆ ò di mìng bơh bol khai mơ Añ hòi dan lơm ò, mơya kung bơh ală cau rơp kơnòm di jơnau bol khai mơ dòn Añ sơl, 21nàng jơh ală bol khai gơs dô bă bal, be Bèp ơm tòm Añ mơ Añ ơm tòm Bèp; mơ bol khai kung ơm tòm Bol He, tồ dunnia in dòn lah Bèp neh sồr Añ lòt tus. 22Añ neh ai bol khai in bơta gơklŏ mơ Bèp neh ai Añ in, nàng bol khai gơs dô bă bol kung be Bol He la dô bă bal. 23Añ ơm tòm bol khai mơ Bèp ơm tòm Añ nàng bol khai in gơs dô bă bal wil tơl, tồ dunnia in git lah Bèp neh sồr Añ lòt tus, mơ Bèp neh kòñ gơboh di bol khai kung be Bèp kòñ gơboh di Añ sơl. 24Ơ Bèp, Añ kòñ tiah lơi Añ ơm, gen ală cau mơ Bèp neh ai Añ in kung ơm tềng hơ̆ bal mơ Añ, nàng bol khai sền gŏ bơta gơklŏ mơ Bèp neh ai Añ in, tài bơh Bèp neh kòñ gơboh di Añ lài mơ tŭ òhềt crơng gơs trồ tiah. 25Ơ Bèp song ring, dunnia ò git Bèp ò, mơya Añ neh git Bèp, mơ ală cau do git lah Bèp neh sồr Añ lòt tus. 26Añ neh yal bol khai in git sơnđan Bèp, mơ rơp yal bol khai in git tai, tồ bơta kòñ gơboh Bèp neh kòñ gơboh di Añ, ơm tòm bol khai, mơ Añ kung ơm tòm bol khai sơl.”

Currently Selected:

Jang 17: KPM2018

Highlight

Copy