Sơnròp Gơlik Gơs 25

Abraham bau mơ Ketura

(I Yal Yau 1:32-33)

1Abraham bau mơ dô nă cau ùr ndai, sơnđan la Ketura. 2Khai deh Abraham in Simran, Jôksan, Medan, Midian, Isbak mơ Sua. 3Jôksan deh Seba mơ Dedan, kòn sau Dedan dê la làng bol Asurim, làng bol Letusim mơ làng bol Leummim. 4Ală kòn klau Midian dê la Epha, Epher, Henok, Abida mơ Eldaa. Ală cau do la kòn sau Ketura dê.

5Abraham ai Isak in jơh ală phan mơna khai dê. 6Mơ ai ală phan kòn ală bau cồng khai dê, gen tòm tŭ gam kis, khai sồr bol hơ̆ lòt ơm hơ đah mattơngai lik, ngài bơh Isak kòn klau khai.

Abraham chơt

7Rài kis Abraham la dô rhiang poh jơt pram nam. 8Mơ Abraham tac nhơm chơt tòm tŭ khai să kra sơnam jòng mơ geh cèng tus hơ mò pàng khai dê. 9Bàr nă kòn klau khai la Isak mơ Ismael tơp khai tòm trồm lŭ Makpela tòm sre Eprôn, kòn klau Sôhar dê, cau Hetit, tòm toh mơ Mamre. 10#Sơnròp 23:3-16.Hơ̆ la sre bơh lài Abraham neh blơi mơ kòn sau Het, tềng hơ̆ bol khai tơp Abraham bal mơ Sara bau khai.

11Tơnơ̆ mơ tŭ Abraham chơt, Yàng Jehôwa ai lơngai Isak kòn klau khai in. Isak ơm rềp mơ tơrlung Lacairoi.

Jơi bơtiàn Ismael dê

12Do la jơi bơtiàn Ismael dê, kòn klau Abraham mơ Agar, cau dĭ ùr Sara dê neh deh. 13Mơ do la ală sơnđan kòn klau Ismael dê, pơnjat mơ ngai deh: kòn tơnhoa Ismael la Nebayôt, cau tơnơ̆ la Kedar, Atbeel, Mipsam, 14Misma, Duma, Masa, 15Hadat, Thema, Jethur, Naphis, mơ Kedema. 16Hơ̆ la ală kòn klau Ismael dê mơ sơnđan bol khai pơnjat mơ ƀòn mơ tiah bơtào sàl. Hơ̆ la jơt bàr bơtau tòm làng bol bol khai dê. 17Rài kis Ismael la dô rhiang pe jơt poh nam, tac nhơm mơ chơt, geh cèng tus hơ mò pàng khai dê. 18Ală kòn sau khai ơm bơh Habila tus hơ Sur di gah nhàr Ejiptơ, tiah gùng lòt tus hơ Asiri. Ơm cah is bơh ală oh mi khai dê.

Bơta deh Esau mơ Jakôp

19Do la jơi bơtiàn Isak kòn klau Abraham dê. Abraham tơnggơs Isak. 20Mơ tòm tŭ Isak neh tơl poan jơt nam gen bau mơ Rebeka, kòn ùr Bethuel dê la oh ùr Laban dê, la cau Aram, ơm tòm lơgar Padan Aram.#25:20 Padan Aram hơ̆ la lơgar Mesôpôtami. 21Isak hòi dan mơ Yàng Jehôwa bau khai in bơh khai kơnền. Yàng Jehôwa kơno jơnau hòi dan hơ̆ gen ai Rebeka in bun. 22Bơh bàr nă kòn tòm tup bal tòm kơndul, gen khai đơs lah: “Dilah ngan behơ̆, ñchi bơh tài gơlik gơs añ in be do taih?”#25:22 Tòm jơnau tòm sèng do ò loh làng gơtha. Khai lòt lùp Yàng Jehôwa. 23#Rôm 9:12.Yàng Jehôwa ho lah: “Bàr nơm lơgar ơm tòm kơndul ai, mơ bàr làng bol rơp lik bơh kơndul ai, làng bol do pràn rlau mơ làng bol ne, mơ cau bi rơp kong duh broă cau oh.”

24Tus dê ngai khai deh, ngan gơs kòn bàr tòm kơndul khai. 25Kòn lik lài la pơrhê, sơnò làm să be dô nơm ào sơnò, sơnđan la Esau.#25:25 Esau: Sơnđan do sơnio bơh Seirơ, la ù tiah tơnơ̆ hơ̆ kòn sau Esau ơm tơn, “Seirơ” sap đơs tòm toh be jơnau Hebrơ gơs gơtha la “oă sơnò”. 26Oh khai lik tơnơ̆, tê khai at dê kơndòl jơng Esau, behơ̆, sơnđan khai la Jakôp.#25:26 Jakôp: Sơnđan do gơs sap đơs sap đơs tòm jơnau Hebrơ gơs gơtha la “kơndòl jơng”. Tŭ Rebeka neh deh bàr nă kòn do gen Isak neh prau jơt nam.

Esau sền òsơp gơnoar kòn tơnhoa

27Tŭ bàr nă kòn klau do dờng rau gen Esau la dô nă cau jak mòc, òs ơm tòm ƀlàng sre, ai Jakôp la cau ring ngềt, kư̆ ơm tòm sàl. 28Isak kòñ gơboh Esau, bơh khai kòñ sa poac phan brê, mơ Rebeka kòñ gơboh Jakôp.

29Dô ngai ne Jakôp gơm biap mơ Esau rê bơh tòm ƀlàng bòl glar ngan. 30Gen Esau đơs mơ Jakôp lah: “Mê ai añ in sa biap pơrhê hơ̆ bơh añ bòl glar ngan.” Tài bơh hơ̆ cau sơnđan Esau la Edôm.#25:30 Edôm: Jơnau do gơs sap đơs tòm toh be jơnau Hebrơ gơs gơtha la “pơrhê”. 31Jakôp đơs lah: “Ngai do mê tac tĕ gơnoar kòn tơnhoa mê dê añ in.” 32Esau đơs lah: “Do añ mòr chơt, ñchi kwơ añ lòi gơnoar kòn tơnhoa taih?” 33#Heb 12:16.Jakôp ho lah: “Mê ho bal tĕ lài.” Gen khai ho bal, behơ̆, khai tac gơnoar kòn tơnhoa mơ Jakôp. 34Gen Jakôp ai Esau in sa piang lă mơ biap khoah pơrhê. Neh sa mơ hùc sir rau gen khai ñă lòt. Behơ̆ Esau sền òsơp dê gơnoar kòn tơnhoa khai dê.

Currently Selected:

Sơnròp Gơlik Gơs 25: KPM2018

Highlight

Copy