Broă 9

Sol dòn jat Yàng

(Broă 22:6-16; 26:12-18)

1Tŭ hơ̆, Sol sơlo pơhìn mơ tơnchơt ală cau bơtê Yàng dê, khai lòt tus hơ cau gơnoar dờng lam bồ ơn phan duh khoai, 2nàng dan ală sră pơyoa ală hìu jum tòm Damas in, tồ dilah tìp cau lơi bal mơ Gùng Duh Khoai Yàng, cau klau hala cau ùr, gen khai cap cèng brê hơ Jerusalem. 3Mơya tòm tŭ Sol gam lòt tòm gùng mòr tus hơ Damas, nisơna gơs bơta àng bơh đang trồ sòl gơcrà gùt dar khai. 4Khai gơplơ̆ tòm ù, mơ kơno jơnau đơs mơ khai lah: “Ơ Sol, Sol, ñchi bơh tài mê kup kơryan Añ taih?” 5Khai ho lah: “Ơ Yàng, Kơnràñ la ñcau?” Yàng đơs lah: “Añ la Jesu mơ mê kup kơryan; 6mơya ntào tĕ, mut tòm ƀòn dờng, cau rơp yal mê in ală bơta mê pal lơh.” 7Ală cau lòt bal mơ khai gen ntào hil hơl, kơno jơnau đơs mơya ò gŏ cau. 8Sol guh bơh di ù, pò mat mơya sền ò gŏ dô êt lơi; cau at di tê tề khai tus hơ Damas. 9Tòm pe ngai khai sền ò gŏ, mơ ò sào kung ò hùc sơl.

Anania lơh ƀaptem Sol in

10Tŭ hơ̆, tòm Damas gơs dô nă cau bơtê sơnđan la Anania. Yàng đơs mơ khai tòm bơta gơtơnggŏ lah: “Ơ Anania!” Khai ho lah: “Ơ Yàng, gơs añ do.” 11Yàng đơs lah: “Ntào tĕ, lòt tus hơ hìu Juda, tòm gùng sơnđan la Gùng Song Ngan, mơ jòi dô nă cau Tarsơ sơnđan la Sol, bơh khai ơm hòi dan, 12mơ tòm bơta gơtơnggŏ, gŏ dô nă cau sơnđan la Anania mut ơn tê hơđang khai, tồ khai in geh àng mat wơl.” 13Anania ho lah: “Ơ Yàng, añ neh kơno oă cau yal bơh cau do neh lơh iơh oă di ală cau sàng goh Yàng dê tòm Jerusalem, 14Tŭ do, cau hơ̆ ơm tềng do geh tơl gơnoar bơh ală cau gơnoar lam bồ ơn phan duh khoai nàng kup cap jơh ală cau hòi dan di sơnđan Kơnràñ.” 15Mơya Yàng đơs lah: “Lòt tĕ, bơh khai la dô nơm phan ngui Añ neh sac rwah nàng cèng sơnđan Añ di đap ală làng bol bơdìh, ală cau bơtau mơ ală kòn sau Israel dê. 16Añ kung rơp ai khai in git oă bơta jê sồt khai pal kong bơh sơnđan Añ.” 17Anania lik lòt, mut tòm hìu, gen ơn tê hơđang Sol mơ đơs lah: “Ơ bi Sol, Yàng la Yàng Jesu, neh tơlik să mơ bi tòm gùng bi lòt tus hơ do, neh sồr añ lòt tus tồ bi in geh àng mat wơl mơ geh bềng lìu Yàng Hwềng Goh.” 18Tŭ hơ̆ mo gơs phan be ngkàp rung bơh di mat khai, gen khai geh àng mat wơl; lồc behơ̆ khai ntào mơ gơs ƀaptem. 19Tơnơ̆ mơ tŭ sir sào sa rau, gen khai gơs pràn kơldang wơl.

Sol sơntòm bơto Jơnau Niam

20Sol ơm wơl tòm bàr pe ngai bal mơ ală cau bơtê tòm Damas. Khai bơto yal mo tòm ală hìu jum lah Yàng Jesu la Kòn Yàng Tom Trồ dê. 21Cau lơi kơno jơnau khai gen ai lơh nrơt nrơl mơ đơs lah: “Ò di cau do neh tơnchơt ală cau hòi dan di sơnđan hơ̆ tòm Jerusalem, mơ kung lòt tus tềng do nàng cap bol khai hwài brê di đap ală cau gơnoar lam bồ ơn phan duh khoai ò ơ?” 22Mơya Sol sơlo gơbơtơl pràn kơldang tòm pơndang mơ ală cau Juda ơm tòm Damas, mơ lơh cơng nền lah Yàng Jesu la Bơtau Krist.

23 # II Kô 11:32-33. Tòm jŏ ngai tơnơ̆, cau Juda bơyai bal jòi kai nàng tơnchơt Sol, 24mơya gơs cau yal Sol in git jơnau bơyai bol khai dê. Bol khai kơp ală mpồng ƀòn dờng ngai mơ mang nàng tơnchơt Sol. 25Mơya tòm trồ mang, ală cau bơtê ai bài dờng tơmù khai đah bơdìh dơrñang ƀòn dờng.

26Tòm tŭ Sol tus hơ Jerusalem rau, kòñ lơh gơs dô bă bal mơ ală cau bơtê; mơya jơh ală bol hơ̆ pin rngòt di khai, ò dòn khai la cau bơtê ngan. 27Mơya Banaba dong khai mơ lam tus hơ ală cau gơnoar bơto dờng, mơ yal wơl bol hơ̆ in git mbe lơi rò gùng khai neh gŏ Yàng tơlik să mơ Kơnràñ neh đơs mơ khai, mơ khai neh ai sơnđan Yàng Jesu mơ bơto yal dô bă khin cha tòm Damas. 28Bơh di tŭ hơ̆, Sol lòt rê sùm bal mơ ală cau bơtê tòm Jerusalem, 29mơ ai sơnđan Yàng nàng bơto yal dô bă khin cha. Khai kung đơs mơ pơndang mơ ală cau Juda git đơs jơnau Grek, mơya bol khai jòi gùng nàng tơnchơt khai. 30Ală oh mi git bơta hơ̆ gen cèng khai mù hơ Sesare mơ jun khai lòt hơ Tarsơ.

Ene geh sơmbòi

31Behơ̆ Hìu Jum Goh tòm làm jơh kơnhwàl Jude, Galile, mơ Samari geh ring lơngai, bơt bơtào, mơ lòt tòm bơta duh rngòt di Yàng, mơ kơnòm di Yàng Hwềng Goh dong kòl, gen khà cau dòn sơlo ngai geh gơbơtơl tai.

32Tŭ hơ̆, Pier lòt làm bă tiah, kung lòt tus hơ ală cau sàng goh tòm ƀòn dờng Lida sơl. 33Tềng hơ̆, Pier tìp mơ dô nă cau gơlte sơnđan la Ene, bic kòp hơđang cơnòng neh phàm nam rau. 34Pier đơs mơ khai lah: “Ơ Ene, Yàng Jesu Krist sơm mê in gơs bòi, guh tĕ, pồt bềl mê dê.” Gen phul khai guh mo. 35Jơh ală cau ơm tòm Lida mơ tòm Sarôn gŏ behơ̆ gen dòn jat Yàng.

Bơta kis wơl Tabitha dê

36Tòm ƀòn dờng Jôppe, gơs dô nă cau ùr sơnđan la Tabitha,#9:36 Tabitha, tòm jơnau Aram mơ Dorkas, tòm jơnau Grek gơs gơtha la: dô nơm keh hala be brê. cih tơlik hơ̆ la Dorkas la cau bơtê; khai lơh oă broă lơbơn niam mơ jak pà gòi cau rƀah lơòi in. 37Tòm ală ngai hơ̆, khai kòp mơ chơt, cau tơnum ƀồc khai, gen tơmbic khai tòm dô nơm ơdŭ tap hơđang. 38Ală cau bơtê kơno Pier gam ơm tòm Lida rềp mơ Jôppe, gen sồr bàr nă cau lòt jà khai mơ đơs lah: “Dan lòt tus mhar mơ bol hi.” 39Pier ñă lòt bal mơ bol khai. Neh tus tềng hơ̆ rau, cau lam Pier tus tòm ơdŭ tap hơđang; jơh ală cau ùr bơnrau ntào di gah Pier mơ ñìm, mơ tơyơr sơnio khai in sền ală ào jrùh mơ ồi ào ndai mơ Dorkas neh jing bol khai in tòm tŭ khai gam kis. 40Pier sồr cau lik jơh di tiah, lồc behơ̆ cùn gơltang hòi dan; chòp khai wèt mat hơ să ƀồc mơ đơs lah: “Ơ Tabitha, guh tĕ!” Gen khai pò mat gŏ Pier, mơ guh nggui. 41Pier ai tê yò tơngguh khai in ntào, gen hòi ală cau sàng goh mơ ală cau ùr bơnrau tus sơnio bol khai in mò neh kis. 42Jơnau hơ̆ pơnro làm jơh Jôppe, behơ̆ gơs oă cau dòn Yàng. 43Ai Pier gen ơm wơl jŏ ngai tòm Jôppe, tòm hìu cau chài lơh gơltau sơnđan la Simôn.

Currently Selected:

Broă 9: KPM2018

Highlight

Copy