Broă 4

Pier mơ Jang ntào di đap mpồl kwang tơrña

1Tòm tŭ Pier mơ Jang ơm đơs mơ làng bol gen ală cau gơnoar ơn phan duh khoai, cau kwang sền gàr hìu duh khoai mơ cau Saduse#4:1 Sền jơnau cih tơngkah tòm Mat 3:7. lòt tus. 2Bol khai sơềt sơềl tòm nùs bơh bàr nă cau gơnoar bơto dờng bơto làng bol mơ yal bơh Yàng Jesu gơs bơta kis wơl bơh bơta chơt, bơta hơ̆ lơh cơng lah cau chơt rơp geh kis wơl. 3Tài bơh hơ̆, bol hơ̆ kup cau gơnoar bơto dờng jàm tòm hìu jàm jơl tus di ngai hìng, bơh tŭ hơ̆ neh mang rau. 4Bulah behơ̆, tòm ală cau iat jơnau Yàng gơs oă cau dòn, ntum cau klau gơbơtơl tus di pơgap pram rbô nă.

5Ngai tơnơ̆, ală cau kwang làng bol dê, ală cau kwang kra, mơ ală cau bơto bơta boh lam pơjum tòm Jerusalem, 6bal mơ Anne, cau gơnoar dờng lam bồ ơn phan duh khoai, Kaiphe, Jang, Aleksandria mơ jơh ală cau bơtiàn bal mơ cau gơnoar dờng lam bồ ơn phan duh khoai. 7Bol khai kup Pier mơ Jang ntào digùl mơ khào lùp lah: “Bơh gơnap gơnoar lơi hala bơh sơnđan lơi mơ bol mê lơh bơta do taih?” 8Tŭ hơ̆ Pier bềng lìu Yàng Hwềng Goh mơ đơs lah: “Ơ ală cau kwang làng bol dê mơ ală cau kwang kra, 9dilah ngai do bol hi kong khào lùp bơh neh lơh broă niam dô nă cau kwet gơlte in, mơ mbe gơlơh khai geh bòi, 10behơ̆ jơh ală ồng mơ jơh làng bol Israel git tĕ lah hơ̆ la ai sơnđan Yàng Jesu Krist Cau Nasaret mơ ală ồng neh pơng di chi pơng mơ Yàng Tom Trồ neh lơh kis wơl bơh bơta chơt, hơ̆ la kơnòm di Bơtau hơ̆ tàng cau do geh pràn kơldang tŭ do ơm ntào di đap ală ồng. 11#Đơs Crih 118:22.Yàng Jesu la cau mơ Sră Goh neh cih lah:

Kơnràñ la pơnai lŭ mơ ală ồng la cau bơt hìu neh sang tơlik,

mơya neh gơlik gơs pơnai lŭ mum hìu wơl.

12Ò gơs bơta dong klàs tòm bơtau lơi ndai ò; bơh ơm tòm tiah trồ do, ò gơs sơnđan lơi ndai tai Yàng Tom Trồ ai jơi kòn mơnus in, tồ bol he in kơnòm tềng hơ̆ nàng geh dong klàs.”

13Dơ̆ bol hơ̆ gŏ bơta khin cha Pier mơ Jang dê, mơ git đal lah bol khai la cau òs, ò bơtê gen ai lơh krơi; mơ git loh lah bàr nă bol khai neh ơm mơ Yàng Jesu. 14Mơ bơh gŏ cau neh geh sơmbòi hơ̆ ntào bal mơ bàr nă bol khai, behơ̆ tàng ală bol hơ̆ ò gơs gùng đơs. 15Tơnơ̆ mơ tŭ sồr Pier mơ Jang lik bơh ơdŭ Mpồl Kwang Tơrña, gen bol khai sơntòm bơyai bal lah: 16“Mbe bol he kòñ lơh di bàr nă cau do taih? Bơh bol khai neh lơh dô bơta crih crài loh làng ngan di đap jơh làng bol Jerusalem; bol he ò rgơi pơndang. 17Mơya bol he ai tĕ jơnau pơhìn bơkơŭ bol khai bañ ai tai sơnđan Yàng Jesu mơ bơto sồr cau lơi in, tồ geh klàs gơpơnro broă do tòm làng bol tai.” 18Behơ̆, bol khai hòi wơl Pier mơ Jang mơ bơkơŭ bañ ai sơnđan Yàng Jesu nàng đơs hala bơto tai. 19Mơya Pier mơ Jang ho lah: “Ală ồng sền sơwì tĕ di đap Yàng Tom Trồ, lơh jat jơnau ală ồng dê hala lơh jat jơnau Yàng Tom Trồ dê? 20Bơh bol hi ò rgơi ò đơs bơh ală bơta he neh gŏ mơ kơno.” 21Tơnơ̆ mơ tŭ pơhìn tai Pier mơ Jang, lồc behơ̆ hồ bol khai in rê; gŏ ò rgơi lơh glài tài bơh làng bol, bơh jơh tơl nă jòng ro Yàng Tom Trồ bơh broă neh gơlik gơs. 22Cau neh kơnòm di bơta krơi mơ geh sơmbòi hơ̆ neh rlau poan jơt nam rau.

Hòi dan bơta khin cha

23Tơnơ̆ mơ tŭ neh geh hồ, Pier mơ Jang rê tus hơ oh mi bol khai dê, gen yal wơl ală bơta ală cau gơnoar lam bồ ơn phan duh khoai mơ ală cau kwang kra neh đơs mơ bol khai. 24#Lik 20:11; Neh 9:6; Đơs Crih 146:6.Tòm tŭ neh kơno jơh rau, gen bol khai dô nùs bal ai jơnau hòi dan mơ Yàng Tom Trồ lah: “Khoai Yàng, la Bơtau neh crơng gơs trồ tiah, mơ dàlềng, bal mơ jơh ală phan tòm hơ̆, 25Kơnràñ neh kơnòm di Yàng Hwềng Goh ngui bơr ồng pàng bol hi dê la Dabit cau duh broă Kơnràñ dê, mơ đơs lah:

‘Ñchi bơh tài ală làng bol bơdìh gơhào gơjrañ,

Mơ ală lơgar jòi kai roh lơm taih?

26 # Đơs Crih 2:1,2. Ală bơtau tòm ù riap dô nùs tơngguh,

Ală cau kwang pơjum bal dô bă,

Nàng tòmdră mơ Yàng, mơ Bơtau neh geh bong mơñà Kơnràñ dê.’

27 # Luk 23:7-11; Mat 27:1-2; Mak 15:1; Luk 23:1; Jang 18:28-29. Ngan behơ̆, Herôt mơ Bônsơ Pilat bal mơ ală làng bol bơdìh mơ làng bol Israel sơl, neh pơjum bal dô bă tòm ƀòn dờng do nàng tòmdră mơ Cau Duh Broă#4:27 Rct: Kòn. sàng goh Kơnràñ dê la Yàng Jesu, mơ Kơnràñ neh bong mơñà, 28nàng lơh gơlik gơs ală broă gơnap gơnoar mơ nùs kòñ Kơnràñ dê neh lơh nền lài. 29Tŭ do dan Yàng sền ală jơnau pơhìn bol khai dê, mơ ai ală dĭ gơna Kơnràñ in bơto yal jơnau Kơnràñ dê dô bă khin cha. 30Dan Kơnràñ pò tơlik tê nàng sơmbòi, mơ lơh ală bơta krơi tềl is bơh sơnđan Cau Duh Broă sàng goh Kơnràñ dê la Yàng Jesu.” 31Tòm tŭ neh jơh hòi dan rau, gen tòm tiah pơjum hơ̆ gơlơnggơr ung; jơh tơl nă geh bềng lìu Yàng Hwềng Goh mơ bơto yal jơnau Yàng Tom Trồ dê dô bă khin cha.

Cau dòn tòmpà phan mơna bol khai dê

32 # Broă 2:44-45. Tŭ hơ̆, mpồl cau dòn gơs dô nùs nhơm dô bơta kơlôi sơnơng. Ò gơs cau lơi kòp phan he la phan is, mơya tòmpà ală phan he gơs cau ndai in. 33Ală cau gơnoar bơto dờng ai gơnap gơnoar dờng ngan nàng lơh cơng bơh bơta kis wơl Yàng Jesu Krist dê, mơ Kơnràñ tuh bơta nđàc#4:33 Sền jơnau cih tơngkah tòm Luk 2:40. dờng ngan hơđang jơh tơl nă cau. 34Tài behơ̆, tòm bol khai ò gơs dô nă cau lơi siơ̆u siar ò, bơh ală cau neh gơs sre brê hala hìu đam gen tac jơh, cèng jền hơ̆, 35mơ ơn jơh di jơng ală cau gơnoar bơto dờng, lồc behơ̆ tòmpà jat be bơta ngui sa kòp nă cau dê. 36Behơ̆ gơs dô nă cau Lebi, deh tòm Ciprus, sơnđan khai la Jôsep, ală cau gơnoar bơto dờng sơnđan khai la Banaba, (geh gơtha la kòn klau bơta pơndòm pơniang dê), 37Gơs dô bă sre, khai tac sre hơ̆, cèng jền ơn di jơng ală cau gơnoar bơto dờng.

Currently Selected:

Broă 4: KPM2018

Highlight

Copy