Broă 19

Pol tòm Ephesô

1Tòm tŭ Apôlôs gam ơm tòm Kôrintô, Pol neh lòt làm jơh kơnhwàl gen tus hơ Ephesô, tìp dô êt nă cau bơtê ơm tềng hơ̆, 2gen khai lùp lah: “Bơh tŭ oh mi dòn, neh dòp geh Yàng Hwềng Goh sơl?” Bol khai ho lah: “Ò, bol hi kung òhềt kơno gơs Yàng Hwềng Goh lơi ò.” 3Pol lùp tai lah: “Behơ̆ oh mi neh gơs ƀaptem lơi taih?” Bol khai ho lah: “Bơta ƀaptem Jang dê.” 4#Mat 3:11; Mak 1:4,7-8; Luk 3:4,16; Jang 1:26-27.Behơ̆ Pol đơs tai lah: “Jang neh lơh ƀaptem bơh bơta gơjrañ sang glài mơ sồr làng bol Israel pal dòn jat Bơtau rơp tus tơnơ̆ khai, hơ̆ la dòn Yàng Jesu.” 5Tòm tŭ kơno ală jơnau hơ̆ gen bol khai geh lơh ƀaptem tòm sơnđan Yàng Jesu. 6Tòm tŭ Pol neh ơn tê hơđang bol khai, gen gơs Yàng Hwềng Goh mù rơp hơđang bol khai, mơ ai bol khai in đơs jơnau đơs ndai mơ đơs hwơr. 7Jơh ală bol khai pơgap jơt bàr nă.

8Pol mut tòm hìu jum cau Juda, tòm pe kơnhai bơto yal dô bă khin cha, bơto bơyai mơ bơto pơndòm ală bơta bơh lơgar Yàng Tom Trồ dê. 9Mơya tài bơh gơs ală cau kơldang nùs ò dòn, đơs iơh di Gùng Duh Khoai Yàng di đap mpồl làng bol, gen khai sang lòi bol hơ̆, cèng ală cau dòn mơ bơto bơyai kòp ngai tòm klòng bơtê Tirannus. 10Broă hơ̆ lơh sùm tòm bàr nam, tian gơs jơh tơl nă cau Juda mơ cau Grek ơm tòm lơgar Asi làm kơno jơnau Yàng dê.

Poh nă kòn Seba bơtrơh cà

11Yàng Tom Trồ ngui tê Pol lơh gơs ală bơta krơi crih crài dờng ngan, 12tian gơs cau ai chèo hala ồi bơh di să khai, lồc behơ̆ tă cèng ơn hơđang ală cau kòp jê, gen bol khai gơs bòi, mơ ală hwềng iơh lik jơh bơh bol khai.

13Tŭ hơ̆ gơs ală cau Juda lòt bơh tiah do tus hơ tiah ne bơtrơh hwềng iơh, kung lòng ai sơnđan Yàng Jesu bơtrơh ală hwềng iơh lah: “Añ ai sơnđan Yàng Jesu, la Bơtau mơ Pol neh bơto yal, nàng bơtrơh bol mê.” 14Ală cau neh lơh broă hơ̆ la poh nă kòn klau cau gơnoar lam bồ ơn phan duh khoai cau Juda dê sơnđan la Seba. 15Mơya hwềng iơh ho lah: “Añ git Yàng Jesu mơ añ git loh bơh Pol, mơya, bol mê la ñcau taih?” 16Cau neh hwềng iơh lơh hơ̆ brồ tơm di bol khai, klơn jơlềt mơ lơh bol khai, tian gơs bol khai gơtơnlòi rồ sồt să bồ, mơ dô prut lik bơh hìu. 17Jơh tơl nă cau Juda mơ cau Grek ơm tòm Ephesô git broă hơ̆, gen rngòt rngơt; mơ sơnđan Yàng Jesu dê sơlo geh jòng ro. 18Tòm mpồl cau neh dòn gơs oă cau lòt tus yal glài mơ yal loh ală broă iơh he neh lơh. 19Tòm mpồl cau neh lơh bơta juh proh kung gơs oă cau cèng ală sră pơàr bol khai dê chu di đap ƀòn lơgar; cau pơgap ală sră hơ̆ la pram jơt rbô priă.#19:19 Dô pơnai priă: la jền dô tơngai lơh broă. Sền Mat 20:2. 20Behơ̆, kơnòm gơnap gơnoar Yàng dê, jơnau Yàng kư̆ geh ntoat tơngguh mơ sơlo ngai sơlo kơ̆ nền.

Bơta sơlồng sơlàng tòm Ephesô

21Tơnơ̆ mơ ală broă hơ̆ neh sir rau, Pol lơh nền tòm nùs#19:21 Gơs sră cih tơlik lah: gơs Yàng Hwềng Goh tề lam. lòt gan di lơgar Masedoan mơ lơgar Acai, gen lòt tơn hơ Jerusalem. Khai đơs lah: “Tòm tŭ añ neh tus tềng hơ̆, añ kung pal lòt còp Rôma tai sơl.” 22Khai sồr bàr nă cau dong broă khai la Timôthe mơ Erastus lòt lài hơ Masedoan, ai să tòm khai gen gam ơm tòm kơnhwàl Asia dô êt tai.

23Tòm tŭ hơ̆ gơlik gơs sơlồng sơlàng dờng ngan tòm Ephesô tài bơh Gùng Duh Khoai Yàng.

24Gơs dô nă cau chài tŏ priă ne sơnđan la Demetrius, òs ngui priă lơh đài ơn rùp yàng Dian,#19:24 Dian: geh sơnđan la yàng ùr kòñ gơboh mơ pas gơs, kung geh sơnđan la yàng Artemis. lơh gơlik oă cồng nha cau chài tŏ priă in. 25Khai pơjum ală cau chài tŏ hơ̆ mơ ală cau lơh broă ndròm bal, mơ đơs lah: “Ơ ală oh mi, bol he gơlik pas gơs la kơnòm di broă do. 26Ală oh mi gŏ mơ kơno lah ò di mìng tòm Ephesô lơm ò, mơya kung mòr jơh kơnhwàl Asia sơl, Pol do neh bơchồt mơ lơh pơrlơ̆ nùs oă cau, mơ đơs lah ală yàng bơh tê cau lơh gơs gen ò di la yàng.

27Behơ̆, ò di mìng broă kă bro he dê roh bơta dòn kơnòm lơm ò, mơya hìu duh khoai yàng ùr dờng Dian dê kung gơkòl sền òsơp, mơ bơta dờng ryŭ yàng ùr dê tòm làm Asia bal mơ dunnia duh khoai kung rơp roh jơh gơklŏ sơl.” 28Bol khai kơno ală jơnau hơ̆ gen bềng nùs gơjrañ, mơ ai jơnau hòi driau lah: “Dờng ngan la yàng Dian cau Ephesô dê!”

29Jơh ƀòn dờng sơlồng sơlàng, bol khai dô nùs bal ntoat ràn ur òr tus hơ hìu tòmya kơnhơl, hwài Gaius mơ Aritak, cau Masedoan, la ală cau bơyô lòt bal mơ Pol. 30Pol kòñ tơlik mat di đap làng bol mơya ală cau dòn ò ai. 31Gơs dô êt nă cau kwang kơnhwàl Asia la oh mi bơyô khai, sồr cau lòt dan khai bañ phi să mut tòm hìu tòmya kơnhơl. 32Tŭ hơ̆, tòm mpồl jơnum ur òr nggồr nggàc; cau do nggà driau be do, cau ne nggà driau be ne; bơh oă cau kung ò git ñchi bơh tài bol khai pơjum behơ̆. 33Cau Juda chồl Aleksandria lik hơđap mơ gơs dô êt nă cau sồr khai đơs. Khai ai tê lơh tềl kòñ đơs nàng tò să di đap làng bol. 34Mơya dơ̆ bol hơ̆ đal git khai la cau Juda gen jơh mpồl làng bol driau bal pơgap tòm bàr jơ lah: “Dờng ngan la yàng Dian cau Ephesô dê!” 35Tŭ hơ̆ gơs dô nă cau gơnoar cih ƀòn dờng dê, lơh pơnring mpồl làng bol, mơ đơs lah: “Ơ cau Ephesô, gơs cau lơi ò git Ephesô la ƀòn dờng kơp gàr hìu duh khoai yàng Dian dờng dê mơ rùp yàng hơ̆ dê neh dùh bơh trồ sơl ơ? 36Bơh ală bơta hơ̆ ò gơs cau lơi rgơi pơndang, gen bol mê pal ơm mŏ mŏ, bañ lơh bơta lơi sơrbac sơrbang behơ̆. 37Bơh ală cau mơ bol mê hwài tus tềng do, ò di la cau kơñau phan tòm hìu duh khoai, hala đơs tràl sơrbil di yàng ùr bol he dê ò. 38Behơ̆ dilah Demetrius mơ ală cau chài tŏ priă ơm bal mơ khai gơs jơnau kòñ yă wơn cau lơi, gen gơs tiah cahrña mơ cau kwang đơng lơgar; lòi bol khai yă wơn bol khai dê. 39Dilah bol mê gơs broă ndai kòñ dan, gen gơs mpồl cau bơyai broă rơp lơh nền broă hơ̆, jat be bơta boh lam gơ dê. 40Bơh bol he rngòt lah, rơp gơkòl yă bơh bơta sơlồng sơlàng tòm ngai do, mơ ò gơs jơnau lơi nàng dong tò bơta nggồr nggàc ò bồ do.” 41Lồc khai đơs ală jơnau hơ̆, gen sồr mpồl jơnum rê.

Currently Selected:

Broă 19: KPM2018

Highlight

Copy