Broă 16

Timôthe lòt jat Pol

1Pol tus hơ ƀòn dờng Derbơ mơ Listrơ. Tềng hơ̆, gơs dô nă cau bơtê sơnđan la Timôthe, kòn klau dô nă cau ùr Juda dê neh dòn Yàng, ai bèp khai la cau Grek. 2Ală cau dòn ơm tòm Listrơ mơ Ikôni lơh cơng niam bơh Timôthe. 3Pol kòñ cèng Timôthe lòt bal, gen tàng Pol neh siat gơltau khai in, tài bơh ală cau Juda ơm tòm ală tiah hơ̆ git lơm bèp khai la cau Grek. 4Tòm tŭ neh lòt làm ală ƀòn dờng, bol khai nting sồr ală cau dòn pal prap gàr ală bơta sồr lam neh geh lơh nền bơh ală cau gơnoar bơto dờng mơ ală cau kwang kra ơm tòm Jerusalem, mơ sồr bol khai pal lơh jat. 5Behơ̆, ală Hìu Jum Goh geh kơ̆ nền pràn kơldang tòm bơta dòn, mơ khà cau dòn kư̆ sơlo gơbơtơl kòp ngai.

Bơta gơtơnggŏ Pol dê tòm Trôas

6Bol khai lòt làm kơnhwàl Phriji mơ Galati, tài bơh Yàng Hwềng Goh neh bơkơŭ bol khai bơto yal jơnau Yàng tòm Asia. 7Tòm tŭ neh tus hơ nhàr Misia rau, bol khai pơnđơl mut tòm kơnhwàl Bithini, mơya Hwềng Yàng Jesu dê ò ai gơnoar, 8gen tàng bol khai lòt gan di Misia mơ mù hơ Trôas.

9Tòm mang hơ̆ Pol gŏ bơta gơtơnggŏ gơs dô nă cau Masedoan ntào di đap khai mơ rac dan lah: “Tus tĕ hơ Masedoan nàng dong kòl bol hi.” 10Tòm tŭ Pol gŏ bơta gơtơnggŏ rau, tŭ hơ̆ mo bol hi rcang nàng tus hơ Masedoan, bơh dòp git nền lah Yàng Tom Trồ hòi sac bol hi bơto yal Jơnau Niam ală cau ơm tềng hơ̆.

Tòm ƀòn dờng Philip. – Lidi dòn Yàng

11Behơ̆, bơh Trôas bol hi hào ơhò tus song hơ Samôtras, ngai tơnơ̆ lòt tus hơ Neapôli. 12Bơh tềng hơ̆, bol hi lòt tus hơ Philip la ƀòn dờng sơnròp#16:12 Gsc: ƀòn dờng màng rlau jơh, hala ƀòn khà dùl tòm càr Masedoan. tòm càr Masedoan, gơrê bal mơ lơgar Rôma. Bol hi ơm tềng hơ̆ dô êt ngai.

13Tus dê ngai Saƀat, bol hi lik hơ bơdìh ƀòn dờng lòt rềp di gah hiòng, tềng hơ̆ la tiah bol hi kơlôi lah gơs cau Juda pơjum bal nàng hòi dan; Bol hi nggui mơ tòmbơhbơr mơ ală cau ùr neh pơjum tềng hơ̆. 14Gơs dô nă cau ùr iat jơnau bol hi, sơnđan la Lidi, ƀòn tòm la Thiatirơ, la cau tac bài dà gur, mơ duh khoai Yàng Tom Trồ. Yàng pò nùs mò in wèt tồr iat jơnau Pol đơs.

15Tơnơ̆ mơ tŭ neh gơs ƀaptem bal mơ cau tòm hìu khai dê rau, Lidi jà bol hi lah: “Dilah ală ồng sơwì añ la cau dòn song mơ Yàng, gen dan mut ơm tòm hìu añ.” Lồc behơ̆ khai jơh nùs jà bol hi mut.

Pol mơ Sila kòl jàm cau at bồ hìu jàm dòn Yàng

16Dô ngai ne, bol hi lòt tus hơ tiah hòi dan, gen tìp dô nă cau dĭ ùr kòl cà Phithôn#16:16 cà Phithôn la cà juh proh, sền dà. mut mơ ai khai in yal lài bơta rơp gơlik tus. Khai jòi geh oă ngan priă cau tòm khai in tòm bơta juh proh. 17Khai jat Pol mơ bol hi, hòi driau lah: “Ală cau do la dĭ gơna Yàng Tom Trồ Hơđang Rlau Jơh dê, bơto yal bol mê in bơta dong klàs.” 18Khai kư̆ lơh sùm behơ̆ tòm oă ngai, Pol gơlơh sơềt sơềl ngan tòm nùs, gen wơlke đơs mơ hwềng iơh lah: “Añ ai sơnđan Yàng Jesu Krist sồr mê lik tĕ bơh di cau ùr do.” Gen tòm jơ hơ̆ mo hwềng iơh lik bơh di khai. 19Tòm tŭ ală cau tòm khai dê gŏ ò gam gơn kơnòm jòi geh cồng nha tai, gen kup Pol mơ Sila hwài tus hơ ƀlàng drà di đap ală cau kwang, 20Bol khai cèng bol hơ̆ tus di đap ală cau kwang dờng Rôma mơ đơs lah: “Ală cau do la cau Juda, lơh nggồr nggàc tòm ƀòn dờng bol he dê, 21bơto yal ală bơta òs mòng tòmdră mơ bơta boh lam bol he dê, bol he la cau Rôma ò rgơi dòp hala lơh jat.” 22Mpồl làng bol kung ntào tòmdră di Pol mơ Sila sơl, ală cau kwang dờng sồr crè ào mơ pù lơh bàr nă bol khai. 23Tơnơ̆ mơ tŭ neh pù lơh rau, tơmut bol khai tòm hìu jàm, mơ nting sồr cau at bồ hìu jàm kơp gàr kơ̆ nền ngan. 24Geh gơnoar sồr hơ̆ rau, cau at bồ hìu jàm sơrbì bol khai tòm ơdŭ jơngo mơ dò gơsàng di jơng.

25Pơgap digùl mơnang, Pol mơ Sila ơm hòi dan mơ đơs chò jòng ro Yàng Tom Trồ, jơh ală cau ơm jàm kơno lơm. 26Nisơna, gơs bơta gơlơnggơr ù dờng ngan, tian gơs mơnàng hìu jàm wañ lơnggơr; tŭ hơ̆ mo, ală mpồng gơ pò jơh, che sreng cap cau ơm jàm gơhồ sơntă jơh hir. 27Cau at bồ hìu jàm kah rngal, gŏ ală mpồng neh gơ pò jơh, tồnlah ală cau ơm jàm neh dô jơh rau, gen tă đào mong srơp să tòm. 28Mơya Pol hòi dờng lah: “Bañ lơh iơh di să tòm behơ̆, jơh ală bol hi gam lơm do.” 29Cau at bồ hìu jàm hòi cau ai ồs, mut sơrbac sơrbang, rơm să rngòt, mơ tơmbic să di jơng Pol mơ Sila, 30chòp tơlik bàr nă bol khai hơ bơdìh mơ lùp lah: “Ơ ală ồng, ñchi añ pal lơh tồ geh dong klàs taih?” 31Bol khai ho lah: “Dòn tĕ Yàng Jesu gen mê mơ jơh hìu nhă mê rơp geh dong klàs.” 32Gen bol khai bơto yal jơnau Yàng khai in, mơ jơh ală cau ơm tòm hìu khai in sơl. 33Di di jơ hơ̆ tòm mang hơ̆, cau at bồ hìu jàm cèng bàr nă ồng rào ală tềl sồt; lồc behơ̆ khai mơ jơh hìu nhă gơs ƀaptem mo. 34Cau at bồ hìu jàm jà bàr nă ồng guh tòm hìu khai dê mơ rcang yò sào. Khai mơ jơh hìu nhă hòn chò ngan bơh neh dòn Yàng Tom Trồ.

35Àng drim ngai tơnơ̆, ală cau kwang Rôma sồr ală cau ling đơs mơ cau at bồ hìu jàm lah: “Hồ tĕ bàr nă cau hơ̆.” 36Behơ̆ cau at bồ hìu jàm đơs mơ Pol lah: “Ală cau kwang dờng neh sồr añ hồ ală ồng; behơ̆ lik tĕ mơ lòt lơngap lơngai.” 37Mơya Pol đơs mơ bol khai lah: “Bol hi la làng bol Rôma, tòm tŭ òhềt lơh nền glài gen bol khai neh pù lơh bol hi di đap ƀòn lơgar, lồc behơ̆ krơ̆ tòm hìu jàm; mơ tŭ do kòñ tơlik òm bol hi ơ? Ò di behơ̆. Să tòm bol khai pal lòt tus hơ do nàng hồ bol hi.” 38Ală cau kwang dờng kơno ală ling yal wơl jơnau hơ̆, gen rngòt tài bơh git bàr nă cau hơ̆ la cau Rôma. 39Behơ̆, bol khai lòt tus dan să mơ lam bàr nă ồng lik, mơ dan bol khai lik bơh di ƀòn dờng. 40Tòm tŭ lik bơh jàm, bàr nă cau gơnoar bơto dờng mut tòm hìu Lidi, còp să mơ bơto pơndòm ală cau dòn, lồc behơ̆ lik lòt.

Currently Selected:

Broă 16: KPM2018

Highlight

Copy