Mateu 10

Jezu an'tuma atumiki khumi na awiri

(Mko 5.7-13; Luk 9.1-6)

1Jezu adacemera wakupfundzira wace khumi na awiri aciwapasa mphambvu yakuthotha mizimu yakuipa na kupolesa matenda yentse na bzakuwofoka bza m'thupi.

2Madzina ya atumiki khumi na awiriwo ngaya: Wakuyamba ni Simau wakucemeredwa Pedru na Andereya m'bale wace, Tiyago, mwana wa Zebedeu na Juwau m'bale wace, 3Filipi na Bartolomeu, Tomasi na Mateu wakulipirisa m'tsonkho, Tiyago, mwana wa Alifeu, na Tadeu, 4Simau wa phathi la azeloti na Judasi Isikaliyoti, omwe adapindukira Jezu.

Kutumidwa kwa atumiki khumi na awiri

5Amuna khumi na awiriwa Jezu adawatuma aciwauza kuti: “Lekani kuyenda kwa omwe ni Ajuda lini, napo kupita mum'zinda uliwentse wa aSamaliya. 6Tsono ndokoni kuna aIjirayeri omwe ali ninga mabira yakutaika. 7Ndipo kwentse komwe muniyenda mbapalidzani mafala yakuti: ‘Umambo bwa kudzulu buli pafupi’. 8Polesani wakuduwala, lamusani wakufa, cizani wamapere, thothani bziwanda. Imwepo mwatambira mwaulere, perekanimbo mwaulere. 9Lekani kutakula oro, ayai parata, ngakhale kobre m'mabhande. 10Lekani kutakula budu la ulendo, ngakhale cakubvala ca pambali, napo xango, ayai mpsimbo. Pakuti wabasa ngwakuthemera kutambira cakudya cace.

11“Pomwe mun'pita mumzinda ayai m'mudzi, nyang'anani munthu womwe an'funa kukutambirani ndipo mukhale panyumba pace mpaka kucoka kwanu. 12Pakupita m'nyumbamo, amuseni. 13Penu pa nyumbapo an'kutambirani bwino, mtendere wanu ukhale na iwo. Penu an'kutambirani lini bwino, mtendere wanu ubwerere kuna imwe. 14Penu winango an'kutambirani lini ngakhale kubva mafala yanu, kunkhumulani pfumbi#10.14 Mab 13.51 la kundzayo zanu pakucoka pa nyumbapo ayai mum'zindamo. 15Ine nin'kuuzani bzacadidi kuti: Pantsiku ya kudzatonga Mulungu an'dzabvera ntsisi#10.15 Mat 11.23-24 Sodoma na Gomora#10.15 Jen 19.24-28 kuposa mzinda umweyo#10.15 Luk 10.1-12.

M'cenjezo kwa atumiki

16“Ine ndirikukutumani ninga mabira pakati pa mphumphi. Na tenepo khalani wakucenjera ninga nyoka ndipo wakusaya cakuipa ninga nkhangaiwa.

17“Khalani na cheru, pakuti wanthu an'dzakuperekani kumphala zawo ndipo an'dzakuchangani m'nyumba zawo za mapembo. 18Imwepo mun'dzayendesedwa patsogolo pa atongi wa bzigawo na azimambo thangwe ra Ine, kuti mukakhale mboni kwa iwo na kwa omwe ni Ajuda lini. 19Tsono akadzakumangani lekani kudzaneseka kutimun'dzalewa ciyani ayai mun'dzalewa tani. Nakuti nthawe imweyo mun'dzauzidwa bzakuti mulewe, 20pakuti ndimwepo lini omwe mun'dzalewa, tsono Mzimu wa Baba wanu ndiwo un'dzalewa mwa imwe.

21“M'bale an'dzapereka m'bale wace kuimpfa, ndipo baba an'dzapereka mwana wace. Wana an'dzamukira azibaba wawo ndipo an'dzawapha. 22Wentse an'dzakuwengani thangwe ra dzina langu, tsono ule omwe an'dzalimbikira mpaka pakumalizira an'dzapulumuka. 23Ndipo pomwe an'dzakufambirani mbuyo mumzinda uyu, thawirani kuunango. Ine nin'kutsimikizirani kuti mun'mala lini mizinda yentse ya muIjirayeri, Mwana wa munthu akanati kubwera.

24“Wakupfundzira#10.24 Luk 6.40 an'posa lini m'pfundzisi wace, napo nyagirinya#10.24 Juw 13.16, 15.20 an'posa lini mbuya wace. 25Na tenepo wakupfundzira bzim'kwanire kukhala ninga m'pfundzisi wace ndipo nyagirinya ninga mbuya wace. Penu mwenekaciro wa nyumba adacemeredwa Belezebu#10.25 Ndiko kulewa kuti mkulu wa mizimu yakuipa, wonani pomwe kuna Mat 9.34; 12.24, Mko 3.22; Luk 11.15., ndiye tani wanthu wa m'banja mwace!

26“Na tenepo lekani kubva mantha na iwo. Nakuti palibe cakumpsinkhika comwe cin'dzasaya kuwoneka#10.26 Mko 4.22; Luk 8.17 ayai cakubisika comwe cin'dzasaya kudziwika. 27Bzomwe Ine nin'kuuzani mum'dima, bzireweni pa ceza. Bzomwe mudabzibvera m'khutu bzireweni pa ntsodzi. 28Lekani kugopa omwe anipha thupi, ndipo m'zimu an'kwanisa lini kuupha. Tsono gopani ule omwe anipha m'zimu na thupi kumoto wakusaya kumala. 29Atimba awiri ambagulisiwa lini na kasentavu kabodzi? Na tenepo palibe na ibodziyo inigwa pantsi Baba wanu acisaya kudziwa. 30Napo kuna imwepo tsisi lentse la mumsolo mwanu lidalewengedwa. 31Na tenepo lekani kugopa. Imwepo ndimwe wakufunika kwene-kwene kuposa atimba azinji!

32“Wentse ule omwe an'dzandicitira umboni pakati pa wanthu, Ine nin'dzamucitirambo umboni patsogolo pa Baba wangu omwe ali kudzulu. 33Tsono ule omwe andiramba#10.33 2Ti 2.12 pakati pa wanthu, Ine nin'dzamulambambo patsogolo pa Baba wangu omwe ali kudzulu.

34“Lekani kukumbuka kuti Ine ndabweresa mtendere pa dziko la pantsi. Ndiribe kubweresa mtendere, koma nkhondo. 35Nakuti Ine ndidabwera kudzamwazanisa mwana wacimuna na baba wace, mwana wacikazi na mai wace, mulowola na mibzala wace. 36Anyamadulanthaka wa munthu an'dzakhala wa m'banja mwace caiwo#10.36 Mik 7.6.

37“Omwe an'funa baba wace ayai mai wace kuposa Ine, an'themera lini kwa Ine. Omwe an'funa mwana wace wacimuna ayai wacikazi kuposa ine an'themera lini kwa Ine. 38Ndipo omwe an'saya kutakula m'tanda wace acinditewera, an'themera lini kwa Ine. 39Ule omwe an'bzikoyera moyo wace an'dzauluza#10.39 Luk 17.33, Juw 12.25, ndipo omwe aniruza moyo wace thangwe ra ine un'dzauwona#10.39 Mat 16.24-25, Mko 8.34-35, Luk 9.23-24, 17.33, Juw 12.25.

Bza mabaibai

40“Ule omwe an'tambira imwepo, atambira Ine. Ndipo omwe an'tambira Ine, atambira ule omwe adandituma. 41Ule omwe an'tambira m'polofita, thangwe ra kuti iye ni m'polofita, an'dzatambira mabai-bai ya m'polofita, ndipo omwe an'tambira wakulungama thangwe ra kuti iye ni wakulungama an'dzatambira mabai-bai ya wakulungama. 42Ndipo penu wina an'dzapasa ngakhale mkombo ubodzi wa madzi yakudjedjera kwa m'bodzi mwa wakupfundzira wangu ang'onowa, thangwe ra kuti iye ni wakupfundzira wangu, Ine nin'kutsimikizirani kuti an'dzaluza lini mabai-bai yace”.

Currently Selected:

Mateu 10: NYNT

Highlight

Copy