Markus 9

1Tu̱ ze wor tu̱k za, “Zhire nga zu̱ran ye nu, ɓeena nduki a nje chingndan fan nu̱ke ɓu̱ mu̱t ku dong ɓa kope wa na kwaaɗar ɓu̱ Magham ndu̱ zalale.”

Yesu wa Wut Zhaaji ɓaran ye Ɓeena Pudekwang

(Mat 17:1-13; Luk 9:28-36)

2Gaanje qaandi njong tu̱ Yesu da Biturus ndu̱ Yaqub ndu̱ Yokhana tu̱ ɗu̱ ndu̱ wor ɗyine dleng kirkandi nggur wor ɗyenda, tu̱ yang shipar ɓaran nggoɗ gume wora. 3Tu̱ luktiku nu̱ ve nda nggoɗ tu̱ kha ma ɓong ter maɗyi maɗyi, nu̱ke sarda ɗye shiɓti a nje nu̱ke nduk kaa shiki boote su̱ tu̱ shiɓ lukti nu̱ gha ɓong wanang mbu̱ larji ɓa. 4Fan ndu̱ fan tu̱ Iliya ndu̱ Musa a ɗal gume wora a ɓalarku ndu̱ Yesu.

5Tu̱ yang Biturus ze Yesu za, “Zhinerem gwaanji, wa shi mbar nu̱ke chem a nje fan, yang buu kwaɗami maa khar kunung ye nu, da ɓaaro, da ɓu̱ Musa, da ɓu̱ Iliya.”

6Yang Biturus zu̱ wanang ku̱me wa mbu̱ɗ ɗye zu̱ri, kha sawar maɗyikandi ni nu̱ mburi nda ku nu̱ke a njang tu̱kki.

7Tu̱ yang ku̱zapti a ɓa tu̱ lu̱pa wor nu̱gha, tu̱ ɓalar a vi mbu̱ ku̱zaptang za, “Nang ɗya Yi ɓanga, nu̱ke nga ndola nda, gwa maa dlu̱mndonu yenda.”

8Yang ba nu̱ nggu̱tki ku kawal, nu̱ na aaki tu̱k ku ɓa kope Yesu nu̱ke a su̱yen ndu̱ wor ɗyenda.

9A mbu̱ zhurti ku ɗyine dlengang, tu̱ wu wor za ku̱ zu̱ ɗyi nu̱ wor naki nang ye aaki ɓa kope Yi ɓu̱ nduk wa ji mbe mu̱ti. 10Tu̱ yang njig ɓalar nang nu̱ chele ɓaanda ɗyenda, tu̱ kaa zham yenku za, “Woɗye nu̱m ke mbu̱ jiiri mbe mu̱tang na?”

11Tu̱ shi zhamndi ye Yesu ku za, “Yang nu̱m saki tu̱ Maalu̱m Taurete kwa zu̱ za annabi Iliya kaɗa baki guma, kom tu̱ Masiya ɓa gaanje nda?”

12Tu̱ Yesu tlogha ye wor za, “Ɗya zhire annabi Iliya kaɗa ɓa ki dong ma daasa aa nu̱m, yang wa bu̱lan gha tu̱k za Yi ɓu̱ nduka ma za bonye zum zum su̱yen ndu̱ vu̱rti palase yenda yang wanang de? 13Yang ngaa zu̱ran ye nu, annabi Iliya ɓa, ndukiku tu̱k wa shi ɗyi nu̱ shimki ku tu̱k yenda baa wa nu̱ bu̱laki za ka ɓa shi ku.”

Yesu wa Shaana Nyakhtlir nggur nu̱ Khu̱kheeti Malkandi

(Mat 17:14-21; Luk 9:37-43)

14Nu̱ Yesu ndu̱ nu̱ mburi nda kunungndang a gaɓki nu̱ she ɓeena nu̱ mburindakwang ta gwa tabar ndukiku khang maɗyi wa kara ɓeena nu̱ mburindakwang ku̱me Maalu̱m Taurete ku a keele ndu̱ wora. 15Yang nu̱ tabar ndukyang naki Yesu tu̱ shi lazham ku kom tu̱ ɗan she nda ku tu̱ shi qaandi yenda.

16Tu̱ yang zham wor za, “Tun a shikya keele nu̱m ndu̱ wora?”

17Tu̱ da chele tabar ndukya tlogha za, “Zhinerem gwaanji, wonji nga ɓa ndu̱ woi ɓang nu̱ khu̱kheeti malkandi nggu̱tlki ɓalar yenda. 18Khu̱kheetang wa ka mbuk nda nu̱ yaghai, tu̱ nyakhti kaa vi ve men, a ku̱t dliindan tu̱ka ghwa ɓar ganggarɗang, nga ze nu̱ mburokwang ma ku̱ fet nda ɓar mbe woyang, yang wa ku̱na ku.”

19Tu̱ Yesu tlogha yenda za, “Ai tun nduki nu̱ qaandi virkir song maito ku, ngga du̱ng me khar ndu̱ tun kochiya? Ngga du̱ng me kaɗanyi ndu̱ tun nu̱ fu̱na? A ɓa ma ndu̱ woyang ya.”

20Ta ɓa ndu̱ chin yenda. Nu̱ khu̱kheetang naki Yesu, tu̱ ghwat woyang yaghai varanang dlu̱rti a mbu̱mmbu̱layilo, nyakhti a viri mbu̱ men.

21Tu̱ Yesu zham zhin woyang za, “Ɗyinang gwa woi nang kochiya?”

Tu̱ tlogha yenda za, “Gwaanda a mbu̱ woi koɗomma. 22Wa ka mbuk nda nu̱ ɓai, ndu̱ mbu̱ ɗyimi, ma tlagha nda, yang mbu̱ to ka ɗu̱ma shi tun ɗyinan, ku̱gam tu̱k zhiyaye ɓaarem to shaata rem.”

23Tu̱ Yesu tlogha yenda za, “To za mbu̱ ngga ɗu̱ma? Ai tun a nje nu̱ke ka ku̱naki njif nu̱ maitaki ɓa.”

24Fan ndu̱ fan tu̱ zhin woyang da su̱quran nu̱ viɗ za, “Ngaa maita, shoto vu̱rti zhire ya!”

25Nu̱ Yesu naki nduki khang a ɓar ku ɗyin ɗari, tu̱ wu khu̱kheetang za, “To khu̱kheeti nu̱ nggu̱tli ɓalari, nga zu̱ran yoro, a vi ɓar mbe nda, gaɓ na to vi nu̱ mbe nda tu̱k ɓa.”

26Tu̱ khu̱kheetang ghwat zhaano, tu̱ yakhta nda maɗyi dong, kom ta vi ɓar mbe nda, tu̱ njig woyang qaandan wa mu̱tan tu̱ ndukyang taman ku za, “Wa mu̱ɗi.”

27Tu̱ yang Yesu khuɓ kharan tu̱ daa nda nu̱ viɗi tu̱ ching gha ndu̱ mbu̱ saaran.

28Nu̱ viki nu̱ kaari ku, tu̱ nu̱ mburi nda kwa zham nda konggol za, “Nu̱m saki nyem ɗu̱ma fet khu̱kheetang ɓar ɓa?”

29Tu̱ tlogha ye wor za, “Poona khu̱kheeti nang ɓu̱ vi ɓar ɓa kope tun wa shi barari ndu̱ zhumti.”

Yesu wa Gaɓ tu̱ Shi Ɓalar ɗyine Mu̱ti ɓaran

(Mat 17:22-23; Luk 9:43-45)

30Tu̱ Yesu ndu̱ nu̱ mburindakwang njig ye maaranang, tu̱ peeta ku nu̱ mbu̱ dlar ghai Galili, yang Yesu nu̱ shim ku̱ nduk zu̱n ye maa nu̱ke wora si ku ɓa. 31Ku̱me wa shoga ye nu̱ mburindakwang za, “Ka vu̱r Yi ɓu̱ nduk nu̱ mbu̱ khar nduki, yang ka tlagha nda nu̱ gha ku, ye fu̱ɗar nu̱ kunung ka ji nu̱ viɗi.”

32Yang nu̱ daa mbu̱ ɓalarang ku ɓa, wonji a tu̱k sawar zham nda ku.

Ki Dukki Gwaara

(Mat 18:1-5; Luk 9:46-49)

33Nu̱ khu̱lkiku Kaparnakhum a mbu̱ rafti nggur ku tu̱ Yesu Zham wor za, “Tun a shikya nyi pooni keele yiti njiva na?” 34Tu̱ yang kha vaanda gha yit ku̱me wa shi keele ku yiti njiva nu̱ ɗyine ki ke gor chele ɓaanda.

35Tu̱ Yesu kha gha dong, kom tu̱ qa gwaanggu̱m rapndang tu̱ ze wor za, “Kap njif nu̱ke a shim ku̱ khan guma wa ku̱s ku̱ kha ma nu̱ gana dong. Kom tu̱ gaɓ ndu̱ ɗyinan ma maavi ɓu̱ aaki.”

36Tu̱ sa woi nggur tu̱ ching gha chele ɓaanda. Nu̱ daki nda tu̱ ze wor za, 37“Aaki dlu̱ki poona qusonggi nang mbu̱ dlu̱ma dlu̱kya nga. Yang kap njif nu̱ dlu̱ki nga, dlu̱kya nga ɓa, dlu̱kya njif nu̱ ɗa ru̱kki nga.”

Njif nu̱ke nu̱ Kare ɓaarem ɓa a Su̱yen ndu̱ Chem

(Luk 9:49-50)

38Tu̱ Yokhana ze nda za, “Zhinerem gwaanji, chem wa na njif nggur a komba khu̱kheeti ku ɓar mbu̱ dlu̱moro, yang chem nggu̱tl nda ku̱me a su̱yen ndu̱ chem ɓa.”

39Tu̱ Yesu zu̱ za, “Nggu̱tl nu nda ɓa, ku̱me nduka nje nu̱ke kaa shiki ɗye lazham mbu̱ dlu̱ma, tu̱ yang zu̱ malkandi nu̱ vya fan ndu̱ fan ɓa. 40Ai njif nu̱ke nu̱ kare ɓaarem ɓa, a su̱yen ndu̱ chem. 41Zhire ngaa zu̱ran ye nu aaki vu̱rki ɗyim zar ye nu, aa mbu̱ ɗyekhti da mbu̱ dlu̱ma, ku̱me tun nduki ɓu̱ Masiya, ɓu̱ laada gwa barke nu̱ ɓa.”

Ɗyi nu̱ka Ɓa ki ndu̱ Ji Saari

(Mat 18:6-9; Luk 17:1-2)

42Yang aaki saki da chele qusonggi pichichindi nu̱ maitaki nga nang ma sola, kuzhom ku̱ lokh ndogdi khiiri nu̱ ve quran tu̱ yang ngga nda nu̱ mbu̱ ɗyim chitndi. 43Yang mbu̱ bu̱nor wa ka sa maa zop, ku̱rto nu̱ gha, ku̱me kuzhom gwana nyifiri she Magham ndu̱ gwattang bu̱ni. Ye ku̱ vina nu̱ mbu̱ giɗim ɓai ndu̱ bu̱nor rap wonji ɓaiyan nu̱ka shi mu̱t ɓa 44yang khogdiku nu̱ nje nu̱ka shi mu̱t zu̱m ɓa. 45Mbu̱ saaroro wa ka sa ma zop tu̱k ku̱rto nu̱ gha, ku̱me kuzhom gwana nyifirang ndu̱ saaror da, ye ku̱ sa nu̱ mbu̱ giɗim ɓai ndu̱ saaror rap. Ye maa nu̱ke ɓai ɓaran nu̱ka shi piita ɓa, 46Khogdi nu̱ke a mban nu̱ka mu̱t ku ɓa yang ɓaiyan nu̱ka shi mu̱t zum ɓa. 47Aa yitor ke nu̱ sa ma zop, pulo nu̱ gha kuzhom vina nu̱ mbu̱ kwaaɗar ɓu̱ Magham ndu̱ yiti da, ye ku̱ mbuktor nu̱ mbu̱ giɗim ɓai ndu̱ yitor ku̱lmbu̱r. 48Ye maaranang

khogdiku nu̱ nje nu̱ka mu̱t ku ɓa,

yang ɓaiyan nu̱ka mu̱t ɓa.

49Ku̱me ka shiɓ aaki nu̱gha ndu̱ ɓai, ba wa nu̱ dleeri ka saki dlu tu̱ kha shakhshakh.

50“Dleeru ɗya ɗyi mbarkandi, yang mbu̱ dleeru wa mbu̱ɗ mu̱ndi ɓaran, nduk ka gaɓ ndu̱ nyeeri ɓaran kikimnda? Kha ma nu̱ dleeri mbe nu̱, tun kha mu̱n ndu̱ yen.”

Currently Selected:

Markus 9: ttrNT

Highlight

Copy