Matta 9

Yesu wa Shaana njif nggur nu̱ke Zurɗaran

(Mar 2:1-12; Luk 5:17-26)

1Tu̱ Yesu vi nu̱ mbu̱ du̱mbu̱l ɗyim, tu̱ dlan dam tu̱ ɗu̱ mbu̱ ghai nu̱ke kharan ye maarang. 2Tu̱ yang ɗa ɓa ndu̱ njif nggur nu̱ke zurɗaran qaandan ɗyine ku̱rbuki. Nu̱ Yesu naki maito ɓaanda, tu̱ ze njif zurɗakandang za, “Woi ɓanga, damtana ɓa wa yaapa solar ɓa yoro.”

3Tu̱kti nang, tu̱ ɓeena Maalu̱m Taurete ku nggur ku̱s konyi mbu̱ memu̱na wor za, “Khuski nang a ndu̱mkya Magham.”

4Nu̱ke Yesu wa zu̱n konyi ɓaandang, tu̱ ze wor za, “Nu̱m saki tun ki kwari malkandi mbu̱ memu̱na nu wanangang? 5Nyi dukki ndolndola, ku̱ nduk zu̱ za, ‘Wa yaapa solar ɓa yor mu?’ Yang ‘Ju to shi yiri?’ 6Yang nga shim zu̱n nu nu̱ke zalale a nje kha Yi ɓu̱ nduku ma ku̱ yaapa solar ye nduku mbu̱ larji nang.” Tu̱ ze njif zurɗakandang za, “Ju to da ku̱rbuk ɓa to ɗu̱ va kaari.” 7Tu̱ njifang ji tu̱ ɗu̱ kaa ɓaran. 8Nu̱ tabar ndukyang naki wanang tu̱ sawar ku̱s wora, tu̱ gor dlu̱m Magham nu̱ vu̱rki zalale na ye nduki.

Yesu wa qa Matta

(Mar 2:13-17; Luk 5:27-32)

9Nu̱ Yesu zu̱mki guma ndu̱ yiri, tu̱ na khuski nggur nu̱ka qaki nda za Matta, kharan gha ye maa dlu̱r zhaanggali; tu̱ Yesu ze nda za, “A mburi nga.” Tu̱ yang ji tu̱ mburi nda.

10Qu̱rsan, Yesu a zu̱m ɗye zu̱mndi kaa ɓu̱ Matta, tu̱ nu̱ dlu̱r zhaanggalku ndu̱ nu̱ solarku khang a ɓa tu̱ kha gha su̱yen ndu̱ chin ndu̱ nu̱ mburindakwang. 11Nu̱ Parisekwang naki wanangang, tu̱ ze nu̱ mburi nda kwang za, “Nu̱m saki tu̱ Maalu̱m ɓaanu ki zu̱m ɗye zu̱mndi ndu̱ nu̱ dlu̱r zhaanggalku ndu̱ nu̱ solarkwang na?”

12Nu̱ Yesu tu̱kki tu̱ zu̱ za, “Nduki nu̱ke var wor mu̱ni ɓu̱ damta ndu̱ nu̱ kuzhi ɓa, buka nduki nu̱ke var wor mu̱n ɓa ka damtaki ndu̱ nu̱ kuzhiri. 13Ɗu̱ ma tun a nggu̱t mbu̱ ɗyi nu̱ke ɓalar na a zu̱ran, ‘Nga gang sadka kha nu ɓa, nga shimkya nar zhiyaye.’ Ku̱me na nga ɓa ma qa nu̱ jeembu ku ɓa, nga ɓa ku̱me nu̱ solarku.”

Zhamndi ɗyine Zhumti

(Mar 2:18-22; Luk 5:33-39)

14Sarchi ni, tu̱ nu̱ mbu Yokhana ku a ɓa she Yesu tu̱ zham nda ku za, “Nu̱m saki chem ndu̱ Pariseku chem wa ka shi zhumti yang nu̱ mburokwang nu̱ka shi ɓa?”

15Tu̱ Yesu tlogha ye wor za, “Woɗye raptikirku ɓu̱ nu̱ zhin ɓu̱rti wa ka shi chiti mbu sarchi nu̱ke a nje su̱yen ndu̱ wor mu? Yang sarchi a nje a ɓari nu̱ke ka ɓa da nu̱ zhin ɓu̱rtang ɓar kha wora, nang ke sarchi nu̱ke ka shiki zhumti ku.

16“Nduk a nje nu̱ke ka talki mewar kelɓeng kapar nu̱ke nu̱ za ɓa nu̱ ɗyine ngguzur kapa ɓa, ku̱me mbu̱ wa za, taatlang ka ɓyakhi tu̱ duk nu̱ sotndang. 17Nduka nje nu̱ke ka zu̱ki ɗyim anap mewakandi nu̱ mbu̱ kidlingndi ku̱zu̱mndi gu̱makandi ɓa, aa wa zi, kidlingndang ka ɓyakhi, tu̱ ɗyim anapang mbu̱ɗ nu̱ yaghai, wonji kidlingndang wa su̱bu̱ri. Shipa ku̱ nduk zu̱ mewar ɗyim anap nu̱ mbu̱ mewar ku̱dlingndi ku̱zu̱m. Na ka sa nduk ɓu̱ mbu̱ɗ ɗyim anapang ɓa yang ku̱dlingdang ɓa.”

Yi ɓu̱ Jairus ndu̱ Nokhzi nu̱ Khaati mbu̱ti Tom

(Mar 5:21-43; Luk 8:40-56)

18Yesu a mbu̱ zu̱ ɗyikunang ye wora tu̱ dle gume maa tabar ɓu̱ Yakhude ku nggur a ɓa tu̱ shul gha gume nda tu̱ zu̱ za, “Yi ɓang ye nusu wa mu̱ɗ nu̱ shoɓ ɓa, yang a ɓo to su̱ɓa nda ka nakha.” 19Tu̱ Yesu ndu̱ nu̱ mburi nda kwang ɗu̱ su̱yen ndu̱ khuskyang ku.

20Tu̱ yang nokhzi nggur nu̱ shiki sonyi gwaanggu̱m rap ndu̱ khaati mbu̱ti tom a ɓa gaanje nda tu̱ su̱ɓa me bu̱n lukti ɓaran. 21A zu̱ran mbu̱ memu̱naran za, “Aa mbu̱ nga su̱ɓa kya lukti ɓaran ɗyenda, ngga shaana.”

22Nu̱ Yesu mbu̱mki tu̱ na nda, tu̱ zu̱ za, “Damtana ɓa yi ɓanga, maito ɓa wa shaana ro.” Fan ndu̱ fan tu̱ nokhzang shaana.

23Nu̱ Yesu khu̱lki kaa ɓu̱ dle gumyang, tu̱ na nu̱ pi pelnggum ku ndu̱ tabar ndukiku khang a gho mu̱tang. 24Tu̱ ze wor za, “Ji ma ɓar ya fan ka! Ye wonkharang nu̱ mu̱ɗ ɓa, a shikya ba ɗyeni.” Tu̱ yang shi mu̱si nar nggu̱bu̱ng yenda ku. 25Yang ba ni kombaki wor nu̱ dam, tu̱ vi tu̱ khuɓ khar wonkharang, tu̱ wonkharang ji nu̱ viɗi. 26Tu̱ labar nang ɗu̱ aa fu̱n mbu̱ dlar ghayang.

Yesu wa Shaana Pugumku ndu̱ Meɗum

27Nu̱ Yesu njigki ye maaran tu̱ pugumku nggur wor rap mbu gaanje nda tu̱ ku̱s da su̱qura wor nu̱ viɗi a zu̱ran ku za, “No zhiyaye ɓaarem, Yi ɓu̱ Dauda!”

28Nu̱ Yesu viki nu̱ mbu̱ rafti ngguri tu̱ pugumkwang a ɓa she nda, tu̱ yang ze wor za, “Tun wa maita za ngga ɗu̱ma shaana nu mu?”

Tu̱ tlogha yenda ku za, “E Zhinerem gwaanji.”

29Tu̱ su̱ɓa yiti wor tu̱ zu̱ za, “Tun ka shaana ku̱me maito ɓaanu.” 30Tu̱ yiti pugumkwang qu̱ni, kom tu̱ Yesu mata wor maɗyi za, “Zu̱ nu ɗyinang ye aaki ɓa.” 31Tu̱ yang vi nu̱ dam ku tu̱ ɗa zu̱ labar nang nu̱ aa fu̱n mbu̱ ghayang.

32Nu̱ Yesu ndu̱ nu̱ mburindakwang viki nu̱ dam ku, tu̱ ɗa ɓa ndu̱ njif nggur nu̱ khu̱kheeti saki nu̱ka ɗu̱ma ɓala ɓa yenda. 33Nu̱ fedki khu̱kheetang ɓara, tu̱ njifang nggasi ɓalari. Tu̱ tabar ndukyang shi lazham ku tu̱ zu̱ ku za, “Sar da nu̱ nduk na tun wanang mbu̱ Israila ɓa.”

34Tu̱ yang Parisekwang zu̱ za, “Ai, a shikya boote ndu̱ zalale ɓu̱ gorkir ɓu̱ khu̱kheetiku ma fed khu̱kheetikwang ɓara.”

Yesu wa tu̱k Zhiyaye ɓu̱ Nduki

35Tu̱ Yesu ɗu̱ mbu̱ ghaiku ndu̱ gureku kap a shogar ye wor mbu̱ kib tabar ɓaanda a wopar labar mu̱nkandi nu̱ kwaaɗar ɓu̱ Magham. Tu̱ ku̱s shaana aa nyi nu̱ khaatiku ndu̱ nduki nu̱ke nu̱ da lawan ku ɓa. 36Nu̱ naki nduki wa taba khang tu̱ tu̱k zhiyaye ɓaanda, ku̱me a za bonyeku yang nu̱ khutlo nje ɓa. Wa kha ku wa ndu̱ɓangku nu̱ke nu̱ khutlo kha wor ɓa. 37Tu̱ yang ze nu̱ mburindakwang za, “Ku̱mndang a nje khang, yang nu̱ tlu̱narkwang wa kata. 38Ku̱me nang, khuɗ ma nu̱ damang ku̱ ɗa ru̱k nu̱ tlu̱narku ma ku̱mndang.”

Currently Selected:

Matta 9: ttrNT

Highlight

Copy