Matta 8
8
Yesu wa Shaana nu̱ Khaati gwaanji
(Mar 1:40-45; Luk 5:12-16)
1Nu̱ Yesu a zhurki ɗyine dlengang, tu̱ tabar nduki khang mburi nda. 2Fan ndu̱ fan tu̱ nu̱ khaati gwaanji nggur a ɓa tu̱ shul gha gume nda tu̱ zu̱ za, “Zhinerem gwaanji, mbu̱ ta shimi to ka ɗu̱ma gaɓti ndu̱ nga tang kha shakhshakh.”
3Tu̱ Yesu da kharan tu̱ su̱ɓa nda si tu̱ zu̱ za, “Nga shimi, kho Shakhshakh.” Fan ndu̱ fan tu̱ nu̱ khaati gwaanja shaana. 4Tu̱ yang Yesu ze nda za, “Ku̱gam zu̱ na ɗyi nang ye aaki ɓa, ɗu to ɗa wuɗ va ye kurwang, to vu̱r vu̱rtang ba wa nu̱ wopar ɓu̱ Musa zu̱ki. Shu wanang ma ku̱ aaki zu̱n nu̱ke za ta shaana.”
Yesu wa Shaana pude ɓu̱ Gorkir Soje ngguri
(Luk 7:1-10)
5Sarchi nu̱ Yesu viki nu̱ mbu̱ ghai Kaparnakhum, tu̱ gorkir soje Rome nggur a ɓa she nda ma gang shaata tu̱ khuti nda za, 6“Zhinerem gwaanji, pude ɓanga nje qaandan kaari, zu̱ɓtan, a mbu̱ bonye maɗyikandi.”
7Tu̱ Yesu ze nda za, “Ngga ɗa ɓa tang shaana nda.”
8Tu̱ sojang tlogha yenda za, “Zhinerem gwaanji, nang khu̱l a ɓa na kaa ɓang ɓa, yang shi ba ɓala ɗyenda, pude ɓang ka shaana. 9Ku̱me aa nga nang, nga mbu̱ bu̱n njif ngguri, yang sojeku a nje tu̱k mbu̱ bu̱na. Ngaa kaa ze da chele ɓaanda nga za, ‘Ɗu’ tu̱ ɗi, tang ze nggur nga za, ‘A ɓo’ tu̱ ɗa ɓa. Tang ze maavi ɓang, nga za, ‘Shi ɗyinang ka’ tu̱ yang shi.”
10Nu̱ Yesu tu̱kki ɓalar nang, tu̱ shi lazham, tu̱ ze nduki nu̱ke a mbu gaanje nda za, “Zhire ngaa zu̱ran ye nu, sar da aa mbu̱ Israila nang gwa nu̱ maito du̱mbu̱rkandi wanang ɓa. 11Nga zu̱ran ye nu, nduki khang ku nu̱ke ɗya Yakhudeku ɓa ka ɗa vi ku ɗokhatla ndu̱ mugu tu̱ kha gha ku maa zu̱m ɗye zu̱mndi su̱yen ndu̱ Yibram ndu̱ Yishaku, ndu̱ Nyagham mbu̱ kwaaɗar viɗi. 12Yang ka mbuk nduki nu̱ke tu̱ga wor ke qusonggi kwaaɗar ɓu̱ Magham, tu̱ yang zhang gha kwang nu̱ dam. Mbu̱ zhum maari, ye maa nu̱ke ka shiki ghoori ku ndu̱ ku̱ti dliindi.”
13Tu̱ Yesu ze gorkir soje Romyang za, “Ɗu, ka shi yor ba wa no maitaki.” Fan ndu̱ fan tu̱ pude ɓaranang shaana.
Yesu wa Shaana su̱rvi Biturus nusukandi
(Mar 1:29-31; Luk 4:38-39)
14Nu̱ Yesu viki nu̱ kaa ɓu̱ Biturus, tu̱ na man nokhzi Biturus qaandan, nu̱ ɓalɓali. 15Tu̱ su̱ɓa kharan, tu̱ yang ɓalɓalang ngga nda gha, tu̱ ji nu̱ viɗi tu̱ shi tlu̱nar yenda.
Yesu wa Shaana nduki khang me Mugdi
16Nu̱ mugdi shiki, tu̱ ndukya ɓa ndu̱ nu̱ khu̱kheetiku yenda khang, tu̱ fed khu̱kheetikwang ɓar ba nu̱ ɓalar mbu̱ men. Tu̱ gaɓ tu̱k tu̱ shaana ru̱m nduki nu̱ke nu̱ da lawan ku ɓa. 17Shi wanang ma ku̱ nyel ɗyi nu̱ zu̱ki nu̱ ku̱nshe annabi Yishaya za, “Wa da khaatiku ɓaarem ɓara, tu̱ shakhterem ndu̱ song dar lawan.”
Nu̱ zu̱ran ku za wor ka mbu Yesu
(Luk 9:57-62)
18Nu̱ Yesu naki tabar nduki khang wa kara nda ku, tu̱ sa za ku̱ dlan dam ku me gu̱mndi dandang. 19Tu̱ Maalu̱m Taurete nggur a ɓa tu̱ ze nda za, “Maalu̱m, ngga mburoro kap ye maa nu̱ke ta yir si.”
20Tu̱ Yesu ze nda za, “Gwa kha birimbirimku, aa ɗyikhtiku nu̱ viɗi pugdi a nje kha wora, yang Yi ɓu̱ nduk maa qan khanda ɓa.”
21Tu̱ da chele ɓu̱ nu̱ mburindakwang zu̱ za, “Zhinerem gwaanji, bu ɗu̱ nga dong tang a pa mu̱ti ku̱maandi ɓanga.”
22Tu̱ yang Yesu ze nda za, “A mburi nga, njig nduki nu̱ke mu̱tanku mbu̱ jiimba ku̱ pa nyeezi wor mu̱tkandi ku.”
Yesu wa sa Khu̱kheeti du̱mbu̱rkandi tu̱ Ching gha
(Mar 4:35-41; Luk 8:22-25)
23Nu̱ viki nu̱ mbu̱ du̱mbu̱l ɗyimi, tu̱ nu̱ mburindakwang ɗu̱ gaanje nda. 24Tu̱ khu̱kheeti du̱mbu̱rkandi a ji mbu̱ ɗyim chitndang. Tu̱ ɗyimang ku̱s pakhdlar nu̱ mbu̱ du̱mbu̱lang, yang Yesu a nje mban a ɗyeni. 25Tu̱ yang nu̱ mburindakwang ɗu̱ tu̱ ɗa nakha nda tu̱ ze nda za, “Zhinerem gwaanji ɗono remi, chem a me mu̱ti.”
26Tu̱ tlogha ye wor za, “Nu̱m saki tun a tu̱k sawara, tun nu̱ke maito ɓaanu kata?” Tu̱ yang ji tu̱ var wuuri ye khu̱kheetang ndu̱ ɗyim chitndang, tu̱ maarang kha yit.
27Tu̱ ndukyang shi lazham tu̱ ku̱s zu̱ran ku za, “Na ɗya nyi pooni nduka, nu̱ke khu̱kheeti ndu̱ ɗyim chitndang mbu su̱qurana na?”
Yesu wa Shaana nu̱ Khu̱kheetiku
(Mar 5:1-20; Luk 8:26-39)
28Nu̱ dlaki ɗyim chitndang nu̱ dam ku, mbu̱ dlar ghai Gadarin, tu̱ yirtiku wor rap na viki ku ye maa nu̱ka paki mu̱ti ku gama ndu̱ chin. Wa kha ku ma ɗye sawa ku nu̱ke nduka nje nu̱ka mbuki njiva tu̱k ɓa. 29Tu̱ ghwat zhaano ku tu̱ zu̱ ku za, “Nu̱m baki ndu̱ chema, Yi ɓu̱ Magham? Ta ɓakya ma vu̱r bonye yerem me ku̱ sarchi ni shi mu?”
30Yang tabar aledeku a nje a khutlori ku guma koɗom. 31Tu̱ khu̱kheetikwang khuti nda za, “Mbu̱ke ta kombarem, njigterem chem vi nu̱ mbu̱ aledeku nang.”
32Tu̱ Yesu ze wor za, “Ɗu̱ ma!” Tu̱ vi ku ɓara ta vi nu̱ mbe aledekwang, yang ba fan ndu̱ fan tu̱ tabar aledekwang ɓu̱tl ɗar ku tu̱ zhan mbu̱ ɗyimang tu̱ mu̱ɗ ku. 33Tu̱ nu̱ khutlo aledekwang ɗa vaanda tu̱ vi nu̱ mbu̱ ghai ta zu̱ aanu̱m ye aaki kap ndu̱ ɗyi nu̱ gwaki yirtikwang. 34Tu̱ nduki nu̱ mbu̱ ghayang ru̱m a vi ma na Yesu. Nu̱ naki nda ku tu̱ khuti nda ku za ku̱ njig mbu̱ dlar ghai ɓaanda ye wora.
Currently Selected:
Matta 8: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
