Matta 17

Nggooti Shipar ɓu̱ Yesu

(Mar 9:2-13; Luk 9:28-36)

1Gaanje qaandi njong, tu̱ Yesu da Biturus, ndu̱ Yaqub, ndu̱ khachin Yaqub, nang ke Yokhana, tu̱ ɗu̱ ndu̱ wor ɗyin dleng nggur kirkandi, wor me ɗyin wora. 2Tu̱ shipar ɓaran mbu̱m gume wora, tu̱ mbu̱ yitan kha yarang wa fu̱ɗari, tu̱ lukti ɓaran kha ɓong khat khat. 3Fan ndu̱ fan tu̱ annabi Musa ndu̱ annabi Iliya wut vaanda ye wora, a ɓalarku ndu̱ Yesu.

4Tu̱ Biturus ze Yesu za, “Zhinerem gwaanji, wa shi mbar nu̱ke chem a nje fan. Mbu̱ ta shimndan ngga kwaɗa shekhɗekhku wor kunung fan, da ɓaaro, da ɓu̱ annabi Musa, da ɓu̱ annabi Iliya.”

5A mbu̱ ɓalarang, tu̱ ku̱zapti nu̱ke a wuti, a ɓa tu̱ za wor nu̱gha, tu̱ tu̱k su̱qur mbu̱ ku̱zaptang a zu̱ran za, “Nang ɗya Yi ɓanga, nu̱ke nga ndolaran, ngaa tu̱k mu̱ndi ɓaran maɗyi. Gwa ma dlu̱mndonu yenda.”

6Ni nu̱ mburi nda kwang tu̱kki wanang, tu̱ tu̱k sawar ku maɗyi tu̱ nggu̱ɗ yaghai ku. 7Tu̱ Yesu a ɓa tu̱ su̱ɓa wora tu̱ zu̱ za, “Ji man viɗi, tu̱k nu sawa ɓa.” 8Nu̱ daki ɗyin wor nu̱ viɗi, nu̱ na aaki ɓa kope Yesu chin ɗyenda.

9A bu̱rti ku nu̱ vu̱ghai ɗyin dlengang, tu̱ Yesu wu wor za, “Zu̱ nu ɗyi nun naki nang ye aaki ɓa, kope Yi ɓu̱ Nduk wa ji mbe mu̱ti.”

10Tu̱ nu̱ mburi nda kwang zham nda za, “Yang nu̱m saki tu̱ Maalu̱m Taurete kwang zu̱ za shwat annabi Iliya kaɗa ɓa ki gumapaali dongang na?”

11Tu̱ Yesu tlogha ye wor za, “Ɗyen wanang shwat, annabi Iliya kaɗa ɓa tu̱ gaɓ ndu̱ aa nu̱m ye maa khar ɓaran. 12Yang ngaa zu̱ran ye nu, Iliya a woɗa ɓari yang nu̱ saida nda ku ɓa, tu̱ shi ɗyi nu̱ shimki ku yenda. Yang Yi ɓu̱ Nduk ka za bonye kha wor ba wanang.” 13Kom tu̱ nu̱ mburi nda kwang da mban za a shikya ɓalar ɓu̱ Yokhana Nu̱ Baptisma ye wora.

Yesu wa Shaana Woi nu̱ Muɗyuri

(Mar 9:14-29; Luk 9:37-43a)

14Nu̱ khu̱lki ku she tabar ndukyang, tu̱ khuski nggur a ɓa she Yesu tu̱ kurumgha gume nda za, 15“Zhinerem gwaanji, no zhiyaye ɓu̱ woi ɓanga, mu̱ɗyura damta nda, a za bonye maɗyi. Sar khang wa ka nggu̱ɗ nu̱ ɓai ndu̱ mbu̱ ɗyimi. 16Ngaa ɗu̱ ndu̱ chin ye nu̱ mburoro kwang, yang nu̱ ɗu̱ma shaana nda ku ɓa.”

17Tu̱ Yesu tlogha za, “Tun nduki nu̱ qaandi virkir meeni, nu̱ song maito, ndu̱ kaaku̱ɗakh ɗyin, ngga kha su̱yen ndu̱ tun ma yir kochiya? Ngga du̱ng me kanaɗyi ndu̱ tun nu fu̱na? A ɓa ma ndu̱ woyang ya fan.” 18Tu̱ Yesu ghwat wuuri ye khu̱kheetang, tu̱ khu̱kheetang njig woyang. Fan ndu̱ fan tu̱ woyang shaana.

19Tu̱ nu̱ mburi nda kwa a ɓa she Yesu sarchi nu̱ke chin ɗyenda, tu̱ ze nda ku za, “Nu̱m saki chem ku̱na komba khu̱kheetang ɓara na?”

20Yang tu̱ Yesu tlogha ye wor za, “Ku̱me maito ɓaanu wa shi koɗomma. Zhire ngaa zu̱ran ye nu, mbu̱ maito khanu nu̱ khu̱lki ye pooni mastad, aa nu̱ke chin dukki aa nyi ye pooni koɗomme, tun ka ɗu̱ma zu̱ran ye dleng nang ku̱ ji ɓar fan ma yir fara, yang ka ji. Tun a nje ka ku̱naki nu ɓa.” 21Ai, poona nang nu̱ka shi kheɗ ɓar ɓa, kope su̱yen ndu̱ barari ndu̱ zhumti.#17:21 Ɓeena bu̱larku nu̱ zhu, nu̱ka sa maa nang ɓa.

Yesu wa Gaɓ tu̱ shi Ɓalar ɗyine Mu̱ti ɓaran

(Mar 9:30-32; Luk 9:43-45)

22Nu̱ gaɓki tu̱ gonta ku nu̱ dlar ghar Galili, tu̱ Yesu ze wor za, “Ka vu̱r Yi ɓu̱ Nduk ɓar nu̱ mbu̱ khar nduki. 23Ka tlagha nda nu̱ gha ku. Ye fu̱ɗar nu̱ kunung ka ji mbe mu̱tang.” Tu̱ nu̱ mburi nda kwang damta maɗyi.

Dli Zhaanggal nu̱ Rafti ɓu̱ Magham

24Nu̱ Yesu ndu̱ nu̱ mburindakwang khu̱lki Kaparnakhum, tu̱ nu̱ dlu̱r zhaanggalku nu̱ Rafti ɓu̱ Magham a gwa Biturus tu̱ ze nda ku za, “Maalu̱m ɓaanu nu̱ka dli zhaanggal nu̱ Rafti ɓu̱ Maghamang de?”

25Tu̱ tlogha za, “Wa ka dli.”

Nu̱ Biturus gaɓki nu̱ kaari, tu̱ Yesu nggaasi ɓalar yenda za, “To Siman, to nakya nu̱m ɗyine zhamndi nanga na? Kujiku larji ka dlu̱ mu̱zhindi zhaanggal ɓaanda fu̱na, she qusonggi ɓaanda mu yang nduki ngguri.”

26Nu̱ Biturus zu̱ki za, “She nduki ngguri.”

Tu̱ Yesu zu̱ za, “Na wa wuɗ za qusonggi ɓaanda nu̱ka dli ku ɓa. 27Kap ndu̱ wanang, ma ku̱ nduki nang shi shokhna ndu̱ chem ɓa, ɗu̱ me ɗyim chitndi to mbuk nggilingndi. To qu̱n mbu̱ me yurvi no nggaki su̱ ku̱san. To ka gwa mu̱zhindi ye vi, to vu̱r ye wora. Nang ke mu̱zhindi zhaanggal ɓanga ndu̱ ɓaaro.”

Currently Selected:

Matta 17: ttrNT

Highlight

Copy