Matta 15
15
Me ghai ɓu̱ Dlegumeku
(Mar 7:1-13)
1Tu̱ Pariseku ndu̱ Maalu̱m Taurete ku nu̱ ɗa viki Urshalima a ɓa she Yesu tu̱ zham ku za, 2“Nu̱m saki tu̱ nu̱ mburokwang ki zhang mbu me ghai ɓu̱ dle gumekwang gha? Jiwa nu̱ka shiɓ khar wor me ku̱ zu̱m ɗye zu̱mndi ku ɓa.”
3Tu̱ Yesu tlogha ye wor za, “Tun ɗa, nu̱m saki tun ki zhang mbu wopar ɓu̱ Magham gha ku̱me me ghai ɓaanwa? 4Magham wa zu̱ za, ‘Vu̱r gorkir ye zhinkir ɓaaro ndu̱ mankir ɓaaro,’ Yang tu̱k, ‘Aaki pu̱zki aa zhin aa man, ku̱ tlagha nda nu̱ gha shwat.’ 5Yang tun wa ka shoga ɓar za mbu̱ tun kha nduku nu̱ke ka vu̱rki ye zhin ndu̱ man, ma shaata wor si, ka ɗu̱ma zu̱ran za, ‘Kap ɗyi nang shimki tu̱ga nga vu̱r yenwang ngga shi alqawar vu̱rtan ye Magham.’ 6Na wa wuɗ za nu̱ ku̱s ku̱ vu̱r gorkir ye zhinang ɓa. Tun wa gaɓ ndu̱ ɓalar ɓu̱ Magham ma ɗyi bamndi ku̱me me ghai ɓaanu. 7Tun nu̱ mu̱narku! Ɓalar nu̱ annabi Yishaya zu̱ki ɗyinonwang wa shi torop, ku̱me wa zu̱ za,
8‘Nduki nang a vu̱r gorkir ya
ndu̱ me wor, ɗyenda,
yang memu̱na wor ɓakh ndu̱ nga.
9A ghar ghai ya ku ba bam,
shogar ɓaanda ɗya ɗyi nu̱
nduki zu̱ki ɗyenda.’ ”
Ɗyi nu̱ke ka Saki nduk tu̱ kha ndu̱ Zop she Magham
(Mar 7:14-23)
10Tu̱ Yesu qa tabar ndukyang nu̱ she nda za, “Ngga ma dlu̱mndonu tun da mban. 11Ɗyi nu̱ ka viki nu̱ mbu̱ me nduku nu̱ka sa tu̱ kha ndu̱ ‘zop ɓa,’ kope ɗyi nu̱ ka viki ɓar mbu̱ men chin ke nu̱ sa nduk tu̱ kha ndu̱ ‘zop.’ ”
12Tu̱ nu̱ mburi nda kwa a ɓa she nda tu̱ ze nda ku za, “Ta zu̱n za Parisekwang wa shi shokhna nu̱ tu̱kki ɓalarku nang shoɗa?”
13Tu̱ Yesu tlogha za, “Kap ɓanar ɗyi nu̱ke ɗya Zhinkir ɓang nu̱ mbu̱ viɗi kaɓki ɓa, ka ɓu̱ɗ nu̱gha ve dlu̱dlarsan. 14Njig wora, ɗya pugumku nu̱ke a bala pugumku. Mbu̱ pugum wa bala pugum kap ɓaanda kaɗa nggu̱ɗ ku nu̱ gwa.”
15Tu̱ yang Biturus ze nda za, “Zu̱ mbu̱ ku̱rti ɓalar na yerem.”
16Tu̱ Yesu zu̱ za, “Alapa ma ɓar leendang nun da mban ɓa?” 17“Nun zu̱n za kap ɗyi nu̱ viki nu̱ mbu̱ me ka khu̱l mbu kom qu̱rsan ta vi ɓar mbe nduk ɓa goma. 18Yang ɗyi nu̱ ɗa viki mbu̱ me nduk a vi mbu̱ memu̱naran. Nang ke ɗyi nu̱ka saki nduk tu̱ kha ndu̱ zop. 19Ku̱me kwaari malkandiku ndu̱ tlaghar mu̱ti, ndu̱ zawar mbu̱ ɓu̱rti, ndu̱ zawar ku zum zum, ndu̱ muuri, ndu̱ saidu kotame, ndu̱ khu̱ɓti nduki ka vi mbu̱ memu̱na nduku. 20Nang ke ɗyi nu̱ka saki nduk tu̱ kha ndu̱ ‘zop,’ yang zu̱mndi ɗye zu̱m waare shiɓti khar nu̱ka sa tu̱ nduk kha ndu̱ ‘zop ɓa.’ ”
Maito ɓu̱ Nokhzi ngguri
(Mar 7:24-30)
21Nu̱ Yesu njigki ye maaranang, tu̱ ɗu̱ dlar ghai Taya ndu̱ Sidon. 22Tu̱ nokhzi nggur nu̱ke kharan nje yang ɗya ye Kanana ta ɓa tu̱ da su̱quran nu̱ viɗi za, “No zhiyaye ɓanga Zhinerem gwaanji, Yi ɓu̱ Dauda. Khu̱kheeti nggur a vu̱r bonye ye woi ɓang ye nusu.”
23Yang Yesu nu̱ zu̱ aa nu̱m yenda ɓa. Tu̱ nu̱ mburi nda kwang a ɓa tu̱ khuti nda ku za, “Kombo nda ɓara! Ku̱me a mburerem a damta remi ndu̱ zhaano!”
24Tu̱ tlogha za, “A ru̱kti nga nu̱ she ndu̱ɓangku nu̱ Israila nu̱ saghaki ku ɗyenda.”
25Tu̱ nokhzang kurum gha gume nda za, “Zhinerem gwaanji, shoto nga!”
26Tu̱ Yesu tlogha yenda za, “Ɓu̱ shi mbar ku̱ nduk da ɗye zu̱mndi ɓu̱ qusonggi tu̱ vu̱r ye yiɗaku ɓa.”
27Tu̱ nokhzang zu̱ za, “I ɗo, Zhinerem gwaanji, yang kap ndu̱ nang, yiɗaku wa ka zu̱m ɓeeni ɗye zu̱mndi nu̱ka lawaki nu̱ su̱ tebu̱r ɓu̱ nu̱ rafti ɓaanda.”
28Tu̱ Yesu tlogha yenda za, “Nusu, maito ɓa du̱mbu̱ran! Ta gwa ɗyi nu̱ke to khuɗkyang.” Tu̱ woi ɓaranang shaana fan ndu̱ fan.
Yesu wa Shaana Nduki khang
29Tu̱ Yesu njig ye maaran tu̱ ɗu̱ tleebi ɗyim chitndi nu̱ Galili. Tu̱ dlan ɗyin dleng tu̱ kha gha. 30Nduki khang ta ɓa she nda. A ɓa ku ndu̱ zu̱ɓtiku, ndu̱ nu̱ zurɗarku, pugumku, ndu̱ meɗumku, ndu̱ ɓeenan ku khang, tu̱ du̱ng wor gha gume nda. Tu̱ shaana wora. 31Tu̱ ndukikwang shi lazham nu̱ naki meɗumku a ɓalari, nu̱ zurɗarkwang wa shaana, zu̱ɓtiku a yiri, pugumku a na maari, tu̱ gor dlu̱m Maghamndi ɓu̱ Israila ku.
Yesu wa Zu̱m ndu̱ Nduki Du̱pu vat
(Mar 8:1-10)
32Tu̱ Yesu qa nu̱ mburindakwang nu̱ she nda tu̱ zu̱ za, “Nga na zhiyaye ɓu̱ nduki nang ku̱me meeni qaandi kunung a su̱yen ndu̱ nga, yang ɗye zu̱m nje kha wor ɓa. Nang shim shi nga khar mu̱ndi ye wor ndu̱ meeri na ɓa, ku̱me bai ka mugan ku yiti njivi.”
33Tu̱ nu̱ mburindakwang ze nda za, “Mbu̱ gaari nang, chem ka gwa ɓurti tolir nu̱ke ka zu̱mki ndu̱ nduki na fu̱na?”
34Tu̱ Yesu Zham wor za, “Ɓurti tolir kim kya kha nwa?”
Tu̱ zu̱ ku za, “Wor mut ndu̱ yurvi pichichindi koɗom.”
35Tu̱ sa tabar ndukyang ku̱ kha gha ku yaghai. 36Tu̱ da ɓurti tolir mutndang ndu̱ yurvikwang. Nu̱ kunaki Magham, tu̱ kushitang gha tu̱ vu̱r ye nu̱ mburi nda kwang, kom tu̱ nu̱ mburi nda kwang vu̱r ye ndukyang. 37Tu̱ aaki zu̱mi tu̱ mban zhi. Qu̱rsan tu̱ nu̱ mburi nda kwang taba ɓeeni ɗye zu̱mndang tu̱ nyel kang mut. 38Nduki nu̱ zu̱mki, khuzuku du̱pu vat, yang nu̱ shiga nusuku ndu̱ qusonggi ɓa.
39Gaanje wa shi khar mu̱ndi ye ndukyang tu̱ vi nu̱ mbu̱ du̱mbu̱l ɗyim tu̱ ɗu̱ dlar ghai Magdala.
Currently Selected:
Matta 15: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
