Matta 14

Mu̱ti ɓu̱ Yokhana nu̱ Baptisme

(Mar 6:14-29; Luk 9:7-9)

1Ye sarchi nang, tu̱ kuji Khiridus tu̱k labar ɓu̱ Yesu. 2Tu̱ yang ze nu̱ tlu̱narku ɓaran za, “Na ɗya Yokhana nu̱ baptisma nakhaki mbe mu̱ti, nang ke ɗyi nu̱ saki tu̱ kha ndu̱ zalale shir ɗye lazhamku nang.”

3Mbu̱r far Khiridus wa ku̱s Yokhana tu̱ gu̱n nda gha, tu̱ sa nda nu̱ zhaaru̱m, ku̱me Khirudiya nokhzi Filibus khachin. 4Yokhana wa ze Khiridus za nu̱ shipa ku̱ ɓu̱r nda ɓa. 5Aa nu̱ke Khiridus a shim tlagha Yokhana, yang a tu̱k sawar ɓu̱ nduki ku̱me wa da nda ku ma annabi.

6Nang ɗo, nu̱ fu̱ɗar khar ɓu̱ Khiridus a ɓa ki tu̱k, tu̱ woi ɓu̱ Khirudiya nusukandi shi sapar gume runggiku na ɓa ki ma tabarang. Tu̱ Khiridus kasha maɗyi. 7Tu̱ shi alqawar yenda su̱yen ndu̱ ku̱mndari, za chin ka shi kap ɗyi nu̱ khuɗki yenda. 8Tu̱ man zu̱ ɗyi nu̱ke ka khuɗkya yenda. Tu̱ yang khuɗ za, “Vu̱r ma ɗyin Yokhana nu̱ Baptisma ya mbu̱ kotumndi.” 9Tu̱ kuji damta, yang ku̱me alqawar nu̱ daki kom ndu̱ runggikwang tu̱ sa za ku̱ vu̱r yenda. 10Tu̱ ru̱k tu̱ ɗa ɗakh ɗyin Yokhana nu̱ gha zhaaru̱m. 11Tu̱ ɗa ɓa ndu̱ ɗyinanang mbu̱ kotumndi, tu̱ vu̱r ye wonkharang tu̱ ɗu̱ si ye man. 12Tu̱ nu̱ mburi Yokhana kwa a ɓa, tu̱ da man varanang, ta pa gha, tu̱ ɗu̱ ku tu̱ ɗa ze Yesu.

Yesu wa Zu̱m ndu̱ Nduki Du̱pu qurmun

(Mar 6:30-44; Luk 9:10-17; Ykh 6:1-14)

13Nu̱ Yesu tu̱kki wanang, tu̱ ji tu̱ vi varan nu̱ mbu̱ du̱mbu̱l ɗyimang, tu̱ dlan dam ye maa nu̱ke aaki nje ɓa, ma ku̱ ɗa khanji varan gha chin ɗyenda. Yang nu̱ tabar ndukyang tu̱kki wanang, ta vi ku mbu̱ ghai zu̱m zu̱m tu̱ mbu gaanje nda ku ndu̱ sar. 14Nu̱ Yesu viki ɓar mbu̱ du̱mbu̱lang, tu̱ na tabar ndukyang, tu̱ na zhiyaye ɓaanda. Tu̱ shaana nduki nu̱ chele ɓaanda nu̱ke var wor mu̱n ɓa.

15Nu̱ mugdi shiki tu̱ nu̱ mburindakwang ɓa she nda za, “Nduk nje ve maa nang ɓa, wonji mugdi wa shi. Shi khar mu̱ndi ye nduki nang, ma ku̱ gwa tu̱ ɗu̱ ku mbu̱ gureku, tu̱ ɗa masa ɗye zu̱mndi ye vaanda.”

16Tu̱ Yesu ze wor za, “Nu̱ ku̱s ku̱ ɗu̱ ku ɓa, vu̱r ma ɗyi nggur ye wor ku̱ zu̱m ku.”

17Tu̱ tlogha ku za, “Tun kha rem fan ɓa, ɗya ba ɓu̱rti tolir qurmun ndu̱ yurvi rap kya nje.”

18Tu̱ zu̱ za, “A ɓa ma si ya.” 19Tu̱ ze ndukyang za ku̱ kha gha ku ɗyin wuzu̱ndikwang. Tu̱ da ɓu̱rti tolir qurmundi ndu̱ yurvi rapndang, tu̱ da ɗyinan nu̱ viɗi, tu̱ sa barke nu̱ si. Tu̱ shakh ɓurti tolirang nu̱gha tu̱ vu̱r ye nu̱ mburi nda kwang, wor tu̱k yang tu̱ ka vu̱r ye ndukyang. 20Tu̱ aaki nji tu̱ mban zhi, tu̱ taba ɓeenan nu̱ khaki, tu̱ nyel kang gwaanggu̱m rap. 21Yang nduki nu̱ zu̱mki wa khu̱l khuzuku du̱pu qurmun waare nusuku ndu̱ qusonggi.

Yesu wa shi Yir ɗyine Ɗyimi

(Mar 6:45-52; Ykh 6:15-21)

22Fan ndu̱ fan tu̱ Yesu sa nu̱ mburindakwang nu̱ mbu̱ du̱mbu̱l ma ku̱ dlan dam me gu̱mndi dandang. Ɓaran yang tu̱ ching gha ma khar mu̱ndi ye tabar ndukyang. 23Gaanje wa shi khar mu̱ndi ndu̱ wora, tu̱ dlan ɗyin dleng chin ɗyenda ma barari. Tu̱ mugdi shi a ɗyin dlengang chin ɗyenda. 24Yang ye sarchi nang, du̱mbu̱lang a ɓakh ndu̱ me gu̱mndi ɗyim chitndang, ɗyim nu̱ke a shokhnarang a ghwaɗ var du̱mbu̱lang, wonji khu̱kheeti a nggum wora.

25Vi kunung nu̱ virkiri tu̱ Yesu napa wor a yir ɗyine ɗyimang. 26Ni nu̱ mburindakwang naki nda a yir ɗyine ɗyim chitndang, tu̱ tu̱k sawar ku, tu̱ zu̱ ku za, “Ɗya zombu̱ra!” Tu̱ ghwaɗ zhaano ku ku̱me sawa.

27Fan ndu̱ fan, tu̱ Yesu shi ɓalar ye wor za, “Damta nu ɓa! Ɗya Nga, tu̱k nu sawa ɓa!”

28Tu̱ Biturus tlogha yenda za, “Zhinerem gwaanji, mbu̱ ɗya to, zu̱ ya no za a ɓa nga shoro ɗyine ɗyimang.”

29Tu̱ Yesu ze nda za, “A ɓo.” Tu̱ Biturus vi ɓar mbu̱ du̱mbu̱lang tu̱ nggaasi khatl ɗyimang a yir she Yesu. 30Yang nu̱ naki khu̱kheetang du̱mbu̱ran, tu̱ tu̱k sawari, nu̱ nggaki su̱ khiiri tu̱ ghwat zhaano za, “Zhinerem gwaanji, ɗono nga!”

31Fan ndu̱ fan, tu̱ Yesu zoɓa kharan tu̱ khubti nda, tu̱ ze nda za, “To nang vu̱rti zhire ɓa kata, nu̱m saki tu̱ memu̱na kha rap rapa na?”

32Nu̱ viki nu̱ mbu̱ du̱mbu̱lang ku, tu̱ khu̱kheetang ching gha. 33Tu̱ nduki nu̱ke a mbu̱ du̱mbu̱lang ghar ghai ye Yesu a zu̱ran ku za, “Zhire to Yi ɓu̱ Magham.”

Yesu wa Shaana Nduki mbu̱ Ghai Janisarat

(Mar 6:53-56)

34Nu̱ dlaki ɗyim chitndang nu̱ dam, tu̱ zhur ku nu̱ mbu̱ dlar ghai Janisarat. 35Nu̱ nduki nu̱ mbu̱ ghayang saidaki nda ku, tu̱ ru̱k ku za ku̱ ɗa ze aaki mbu̱ ghaiku nu̱ mbu̱ maarang, tu̱ ɗa ɓa ku nu̱ kap nduki nu̱ke var wor mu̱n ɓa. 36Tu̱ khuɗ ku za su̱ɓa nda aa me bu̱n lukti ɓaran. Nduki nu̱ su̱ɓaki kap tu̱ shaana ku.

Currently Selected:

Matta 14: ttrNT

Highlight

Copy