Matta 11

Yokhana nu̱ Baptisme a Ru̱k nu̱ Mburi nda ku nu̱ she Yesu

(Luk 7:18-35)

1Gaanje Yesu wa woɗa zu̱ ɓalarku nang ye nu̱ mburi nda ku gwaanggu̱m rapndang, tu̱ ji ɓar ye maaran tu̱ ɗu̱ mbu̱ ghaiku nu̱ Galili a shogar ye wor ndu̱ wopar ɓalar ɓu̱ Magham.

2Ye sarchi ni Yokhana nu̱ Baptisme a nje khiiran gha zhaaru̱m. Nu̱ tu̱kki ɗyi nu̱ke Masiya shiran, tu̱ ru̱k nu̱ mburi nda ku 3ndu̱ zhamndi za, “To ke njif nu̱ke a ɓara mu, yang nggu̱t mi njiv ɓu̱ njif nggur zum mu?”

4Tu̱ Yesu tlogha ye wor za, “Gaɓ ma tun a zu̱ ɗyi nun naki tun tu̱ki ye Yokhana. 5Pugumku a na maari, zu̱ɓtiku a yiri, nu̱ khaati gwaanji kwa khar shakhshakh, tuurangku a tu̱k ɓalari, mu̱tikwang nakhari, nu̱ nungndiku a tu̱k labar mu̱nkandang. 6Barkya ve njif nu̱ maitaki nga yang nu̱ tu̱b ɓa.”

7Ni nu̱ mbu Yokhana ɗu̱ki vaanda ku, tu̱ Yesu nggaasi ɓalar ɓu̱ Yokhana ye tabar ndukyang za, “Tun a nggu̱t kya nu̱m mbu̱ gaarang na? Tun ɗu̱kya ma na wuzu̱ndi kirkandi ku nu̱ke khu̱kheetang a yakhtara na mu? 8Yang tun ɗu̱kya ma nggu̱t nu̱m ɗo? Tamandi ɓaanu za tun kaɗa na njif nggur nu̱ lukti mbarkandi saran ve nda mu? Auwo; nu̱ sar lukti mbarkandi ku a njig patla she kuji. 9Yang ɗa, tun ɗu̱kya ma nggu̱t nu̱ma? Annabi mu? I ɗo, nga zu̱ran ye nu, wa duk annabi.” 10Nang ke njif nu̱ lagarkatang shiki ɓalar ɓaran za,

“ ‘Wonji ngaa ru̱k pude ɓang

ku̱ ɗa ɓa gume ro,

chin ka daasaki njiv yor me a ɓa na.’ ”

11Zhire ngaa zu̱ran ye nu, mbu̱ nduki nu̱ man wor shulki gha tu̱ kha wor kap, nduka nje wa Yokhana nu̱ Baptisma ɓa. Yang tu̱k njif nu̱ dukki koɗomme mbu̱ kwaaɗar ɓu̱ Magham wa duk Yokhana nu̱ Baptisma gwaari. 12Ji ye sarchi nu̱ Yokhana nu̱ Baptismya ɓa ki ma ɓar ye leendang, kwaaɗar ɓu̱ Magham a za bonye, yang nu̱ vu̱rti bonye kwang a shim dlu̱ kwaaɗarang ndu̱ du̱mbu̱r. 13Ku̱me wopar ɓu̱ Musa ndu̱ lagarkati ɓu̱ annabikwang wa shi ɓalar ɓu̱ kwaaɗarang me ku̱ Yokhana ɓa. 14Mbu̱ tun wa dlu̱ wopar ɓu̱ Yokhana, chin ke Iliya nu̱ zu̱ki za a ɓarang. 15Nu̱ dlu̱mndi tu̱kti maa ku̱ tu̱kki.

16“Shwat ngga ku̱r qaandi virkir meeni nang ndu̱ nu̱ma? Wa shipa qusonggi nu̱ khaki gha mu̱na patle tu̱ yang ka qa nyeezi wor nu̱ palamku a zu̱ran ku za,

17‘Chem wa pi pelnggum ye nu,

yang nun sapa ɓa!

Chem shi taazi gho mu̱ti,

yang tun wa zhang yaaɓaran gha!’

18“Ku̱me ɗo, Yokhana a ɓa nu̱ka shi khang zu̱m ndu̱ za ɓa, tu̱ zu̱ ku za ɗya nu̱ khu̱kheet. 19Nu̱ Yi ɓu̱ nduk a ɓa ki a zu̱mndi ndu̱ zari, tu̱ gaɓ tu̱k za, ‘Na ma nda nu̱ khape zu̱mndi ndu̱ raptikir ɓu̱ nu̱ dlu̱r zhaanggal ku ndu̱ nu̱ “Solar ku.” ’ Yang kap ndu̱ nang, nduk ka na kaɗari ɓu̱ Magham mbe tlu̱nar ɓaran.”

Ghaiku nu̱ Zhangki Nggooti ku gha

(Luk 10:13-15)

20Tu̱ Yesu nggaasi wu ghaiku nyin shiki gwaari ɗye lazhamku ɓaran nje yang nu̱ nggoɗ ku ɓa. 21“Tun ɗye zhiyaye, Korazin! Tun ɗye zhiyaye, Besaida! Ku̱me ɗye lazhamku nu̱ shiki mbe nu, mbu̱ke shi mbu̱ ghai Taya ndu̱ Sidon, tu̱ga wa nggoɗ ku ɗau tu̱ sa ngguzur ku tu̱ ghar pu̱zhiti ye vaanda ku̱me nar tu̱ɓti ɓaanda. 22Yang nga zu̱ran ye nu̱, fu̱ɗar wuri, ka shi longgume ye Taya ndu̱ Sidon mbu̱ a ma kuma wora tu̱ duktonu. 23Yang to Kaparnakhum, ta tamandan za to ka ɗa gwa zhaaji maa viɗ mu? Fu̱n ɗo! Ka gaɓ ndu̱ to yaghai ye maa khar ɓu̱ mu̱tiku. Mbu̱ tlu̱nar ɗye lazham ku nu̱ shiki mbe ro mbu̱ shir nda Sodom tu̱ga a nje ma ɓar meeni. 24Yang nga zu̱ran ye nu fu̱ɗar wuri, ka shi longguma ye Sodom tu̱ duk toro (Kaparnakhum)”.

A ɓa ma sha tun gwa Maasi

(Luk 10:21-22)

25Ye sarchi nang tu̱ Yesu zu̱ za, “Ngaa kunaro, Aba, Zhinkir gwaanji ɓu̱ maa viɗi ndu̱ maa vu̱ghai, ku̱me ta tuka ɗyiku nang gha ye nu̱ kaɗari ku ndu̱ nu̱ zu̱ndi ku, to wuɗ ye qusonggi pichichindi. 26Wanang ni Aba, ku̱me nang shiki mu̱n yoro.

27“Zhinkir ɓang wa vu̱r aa nu̱m ya kap nduk nje nu̱ zu̱nki woyang ɓa kope Zhinkirang, yang tu̱k nduk nje zu̱nki Zhinkirang zum ɓa kope woyang, kom ndu̱ njif nu̱ woyang shimki ku̱ wutnji nda yenda.

28“A ɓa ma sha kap ɓaanu, tun nu̱ke nun nggumki tun a bonye ndu̱ shipiti taɗakandi ku, ngga vu̱r maasi ye nu. 29Da ma zu̱r ɓanga tun shoga sha, ku̱me nga nu̱ katar ɗyin ndu̱ ɓu̱tokh memu̱na, tun ka gwa maasi ye nyifi ɓaanu. 30Ku̱me shogar ɓanga ndolndol, yang shipiti ɓanga taɗa ɓa.”

Currently Selected:

Matta 11: ttrNT

Highlight

Copy