Luka 1
1
Nggarsan
1Nu̱ke nduki khang wa shi bu̱lar ɗyine ɗyiku nu̱ shiki chele ɓaarem, 2ba wa ni nu̱ mbu Yesu ku nu̱ gumapaali nu̱ke a tlu̱nar wopar ɓalar ɓu̱ Magham nu̱ shiki ɗyiku nang mbu̱ yiti wora zu̱ki yerem. 3Wa shi mbari nga ndu̱ vara njel nga su̱ ɗyiku nang yor kap ku̱me ngaa laɓ mban nu̱gha mbari vu̱ nggarsan, su̱ ghayi, Tiyofilus.#1:3 Tiyofilus Ɗya da chele nu̱ kwaaɗar ɓu̱ Romeku, ɗya nduk gori nu̱ gu̱na, nu̱ shimndi zu̱ndi ɗyi nu̱ke ɓu̱ Magham, ye mbu̱ dlu̱manang za, “Nu̱ ndolar Magham.” 4Ngaa shim ndaa su̱ ɗyiku na yoro ku̱me zu̱n na zhire ɓu̱ ɗyi no shogakyang.
Ɓalar Khar ɓu̱ Yokhana nu̱ Baptisme
5Sarchi nu̱ke Khiridus kuji gwaanji nu̱ Yakhudiya a mbu̱ kwaaɗari, kuru nu̱ tlu̱nar mbu̱ Rafti ɓu̱ Magham nggur a nje dlu̱man za Zakariya, ɗya kuru me sham ɓu̱ Abija. Rong ma kaani, Elizabet nokhzan ɗya tom me sham kuru ɓu̱ Kharuna.#1:5 Kharuna Ɗya khachinndi Musa chin ke Kuru nu̱ gumapaali nu̱ Magham datki, Kuruku nu̱ mbuki nda kap ɗya dlu̱dlarsan. 6Ku̱lmbu̱r ɓaanda ɗya nu̱ sawar Magham ku, wa ka khutlo Wopar ɓu̱ Magham ndu̱ zu̱r ɓaran wa nu̱ shipaki. 7Wa geema ku, yang aa da woi kha wor ɓa ku̱me Elizabet kwarandan.
8Sarchi ngguri Zakariya wa ɗu̱ ma tlu̱nar mbu̱ kib ɓu̱ Maghamang, ku̱me ɗya me tlu̱nar ɓu̱ me sham kuru ɓu̱ Abija. 9Tu̱ dat Zakariya ku ma va ɗye zhi mu̱nkandi mbu̱ Rafti ɓu̱ Magham ku̱me nang ke me ghai ɓu̱ kuruku. 10Sarchi nu̱ Zakariya viki nu̱ mbu̱ Rafti ɓu̱ Magham ma va ɗye zhi mu̱nkandang, tabar nduki a nje dam a bararku.
11Tu̱ nu̱ ru̱kti ɓu̱ Magham wuɗ varan ye Zakariya chingndan ɗyin bu̱n zu̱ma ndu̱ du̱ku̱l nu̱ka vaki ɗye zhi mu̱nkandi ɗyinanang. 12Tu̱ Zakariya ku̱zha su̱yen ndu̱ tu̱kti sawar maɗyikandi. 13Kom tu̱ nu̱ ru̱kti ɓu̱ Maghamang ze nda za, “Tu̱k na sawa ɓa, Zakariya; Magham wa tu̱k ghoori ɓaaro, Elizabet nokhzor ka shi ghu̱rɓan, tu̱ kha ye khusku, yang to ka sa dlu̱man za Yokhana. 14Mbor ka ɓa shi mu̱ni, to ka ɓa kasha maɗyi. Yang nduki khang ka kasha khar ɓaran tu̱k. 15Ku̱me ka kha ma nduk gori she Magham, yang ɓu̱ za ɗyema ndu̱ aa nyi ɗyi nu̱ka kuyaki nduk ɓa. Ka nyel nda ndu̱ Jiimbi shakhshakhndi me ku̱ kha nda. 16Ka sa nduki nu̱ Israila khang tu̱ gaɓ nu̱ she Maghamndi ɓaanda Zhinkir gwaanji. 17Ka ɗa ɓa mbu̱ du̱mbu̱r ndu̱ memu̱nar tlu̱nar ɓu̱ annabi Iliya,#1:17 Annabi Iliya Ɗya annabi nu̱ zu̱ki ɓalar ɓu̱ Magham ye nduki, tu̱ shi ɗye lazham khang, chele ɓaran ndu̱ Yesu sonyi 700, Annabi Malachi wa zu̱ za njif nggur wa Iliya ka ɗa ɓa me ku̱ Masiya ɓa (Mal 4:5-6; Mat 11:14; Mar 9:11-13). chin ka ɗa ɓa ki gume Zhinerem gwaanji ma daasa nduki yenda me ku̱ ɗa ɓa. Ka sa memu̱na khuzuku tu̱ gaɓ nu̱ ɗyin qusonggi ɓaanda, nu̱ nggarvarku ka gwa dlu̱mndi wor ye kaɗari ɓu̱ nduki ɓu̱ Magham.”
18Tu̱ Zakariya tlogha za, “Ɗyinang ka shi kikimnda? Wonji nga ndu̱ nokhza kap chem wa geema.”
19Tu̱ nu̱ ru̱kti ɓu̱ Maghamang ze nda za, “Nga ke Jibu̱railu nang ka chingki gha gume Magham. Magham a ru̱kki nga ma zu̱ labar mu̱nkandi nang yoro. 20Yang ku̱me ta keela ɓalar nang zu̱ki yoro, no maita ɓa, ta ma ɗu̱ma ɓala tu̱k ɓa kope gaanje khar ɓu̱ Woyang. Ɗyi nang zu̱ki nang ka nyel kap mbu̱ sarchi ɓaran.”
21Tu̱ nduki nu̱ke a bu Zakariya damang damta#1:21 Damta Ndukyang damta ku ku̱me mbu̱ke Kuru wa woɗa va ɗye zhi mu̱nkandang wa ka vi nu̱ dam tu̱ sa barke ye nduki. ku̱me wa shoɓ maɗyi mbu̱ rafti ɓu̱ Maghamang. 22Nu̱ Zakariya viki nu̱ dam, nu̱ ɗu̱ma ɓala ye wor ndu̱ men ɓa, tu̱ ka bu ɓalarang ye wor ndu̱ kharan. Nu̱ ndukyang naki wanang, tu̱ zu̱n ku za yiti Zakariya wa na tun mbu̱ rafti ɓu̱ Maghamang.
23Yang Zakariya nu̱ gaɓ nu̱ kaa ɓaran ɓa, ba a nje mbu̱ kib ɓu̱ Maghamang kope gaanje woɗar me tlu̱nar ɓaran. 24Ɗyina shi nu̱ shoɓ maɗyi ɓa, tu̱ Elizabet shi ghu̱rɓan, tu̱ yang tuka varan gha me chere qurmun. 25A zu̱ran mbu̱ memu̱naran za, “Magham ɗye kuna, ku̱me wa daa kawar ɓang gume nduki khang mbu̱ sarchi nang.”
Ɓalar Khar ɓu̱ Yesu
26Chere ɓu̱ Elizabet njong ndu̱ ghu̱rɓandang, tu̱ Magham ru̱k nu̱ ru̱kti ɓaran Jibu̱railu nu̱ mbu̱ ghai Nazaret nu̱ke a mbu̱ dlar ghai Galili. 27She wonkhar nggur nu̱ tloghaki ɓu̱rti ye Yusufu, zhikan Dauda, dlu̱man za Maryam. 28Tu̱ Jibu̱railu ɗu̱ she Maryam za, “Gappu̱ra, to no gwaki mu̱nkir she Magham, Magham a su̱yen ndu̱ to.”
29Tu̱ Maryam damta maɗyi ndu̱ pooni qaandi nang. 30Tu̱ nu̱ ru̱ktang ze nda za, “Tu̱k na sawa ɓa Maryam, ta gwa mu̱nkir she Magham. 31To ka shi ghu̱rɓan, to kha woi ye khusku, to ka qa dlu̱man Yesu. 32Ka kha ma nduk gori, ka ɓa qa nda Yi ɓu̱ Magham nu̱ viɗi. Magham Zhinkir gwaanji ka vu̱r kwaaɗar ɓu̱ zhikan Dauda yenda. 33Ka shi kwaaɗar ɗyine me vi ɓu̱ Nyagham koɗokhsi ɓa. Yang koɗokh nje ve kwaaɗar ɓaran rong tu̱k zu̱m ɓa.”
34Tu̱ yang Maryam zham nu̱ ru̱ktang za, “Ɗyinang ka shi kikimndana, nu̱ke nang zu̱n khusku ɓa?”
35Tu̱ nu̱ ru̱ktang ze nda za, “Jiimbi shakhshakhndi ɓu̱ Magham ka shur nu̱ ɗyinoro, zalale#1:35 Zalale Ke du̱mbu̱r nu̱ke nduk ka gwaki nu̱ ku̱nshe Jiimbi shakhshakhndi ma tlu̱na shimndi ɓu̱ Magham. (Khausa ka qa za, “Iko”) ɓu̱ Magham nu̱ viɗi ka lu̱pa ro. Ku̱me nang, woyang ka kha shakhshakh, ka qa nda Yi ɓu̱ Magham. 36Nggu̱t ɓa, kheeti ɓa Elizabet nu̱ke geemaran, yang kap ndu̱ nang a ghu̱rɓan. Chere ɓaran njong meeni ndu̱ ghu̱rɓandang aa nu̱ke kwarandan. 37Tun a nje ka ku̱naki Magham ɓa.”
38Tu̱ Maryam tlogha za, “Wonji nga Magham, ku̱me nga maavi ɓaaro, bu ku̱ ɓalar no zu̱ki nang kha ya ma wanang.” Tu̱ nu̱ ru̱kti ɓu̱ Maghamang ɗu̱ varan.
39Nu̱ qan khang qu̱rsan ɓa, tu̱ Maryam ji nu̱ waakho ma yir dlar ghai nu̱ke a mbu̱ dlengkwang, tu̱ gal nu̱ mbu̱ dlar ghai nggur Yakhudiya, 40tu̱ vi nu̱ kaa ɓu̱ Zakariya tu̱ shi qaandi ye Elizabet. 41Yang ba nu̱ Elizabet tu̱kki su̱qur gappu̱re ɓu̱ Maryamang, tu̱ woyang shi qushumndi mbe nda, tu̱ Jiimbi shakhshakhndi nyel nda. 42Tu̱ da su̱quran nu̱ viɗi za, “To nu̱ barka mbu̱ nusuki, woi nu̱ke ta ghu̱rɓandanang ɗya nu̱ barka tu̱k! 43Nga ki ɗo nu̱ke man Zhinerem gwaanji ka ɗa ɓa ki sha? 44Nggu̱t ɓa, ba nang tu̱kki su̱qura gappu̱re ɓaaro, tu̱ woyang nu̱ke a mbyang shi qushumndi a kashari. 45Barkya ve ro, to no maitaki ɗyi nu̱ Magham zu̱ki, ku̱me Magham ka nyel ɓalar ɓaran.”
Taazi Gwaari Dlu̱m Magham
46Tu̱ Maryam tlogha za,
“Ngaa gor dlu̱m Magham mbu̱ memu̱nara,
47Ngaa kashar mbu̱ nyifi ɓanga ku̱me Magham
nu̱ ɗanar nga.
48Ku̱me wa kwaari nga
aa nu̱ke nga maavi ɓaran katakandi, no ya ka,
gana fan aa nyi nduk ka qa nga za nu̱ barka.
49Ku̱me nu̱ zalalyang wa shi ɗyi gwaanji ya.
Dlu̱man shakhshakh.
50Ɗaanar ɓaran ye nu̱ sawar nda,
wa ka mbu ɗyin zhikanki
ma yir ɗyin zhikanki.
51Wa shi tlu̱nar gwaanji ku̱me
bu̱nan shokhku̱rokh;
wa lakhta ɗyi nu̱ gwaari ɗyin ku
tamanki memu̱na wora.
52Wa fed kujiku ɓar mbu̱ kwaaɗar ɓaanda,
tu̱ na zhaaji ɓu̱ nduki
nu̱ke ndu̱mndan ku̱me
ɗya aa nu̱m ku ɓa.
53Wa vu̱r ɗyi mbarkandi ye nu̱ nungndiku,
tu̱ komba nu̱ gu̱narku ɓar khar wor rap.
54Wa shaata maavi ɓaran Israila,
ku̱me wa tu̱k zhiyaye ɓaran,
55wa nu̱ zu̱ki ye zhineremku,
ma yir she Yibram ndu̱
pooniku ɓaran tu̱k woɗasi ɓa.”
56Tu̱ Maryam kha gha ndu̱ Elizabet me chere kunung, kom tu̱ gaɓ nu̱ kaari.
Khar ɓu̱ Yokhana nu̱ Baptisme
57Nu̱ sarchi khar woi ɓu̱ Elizabet shiki, tu̱ kha ye khusku. 58Tu̱ nu̱ bing ɓaranku ndu̱ kheetiku ɓaran tu̱k labar ɗaanar maɗyikandi nu̱ Magham shiki yenda, tu̱ shi kashar ku su̱yen ndu̱ chin.
59Nu̱ qaandi miyasi shiki, tu̱ ɗa ɓa ku ma dla su̱ woyang, tu̱ ji ma sa dlu̱m Zakariya yenda ku ku̱me nang ke dlu̱m zhin, 60yang tu̱ Elizabet man woyang zhang gha za, “Dlu̱m woyang ɗya Yokhana.”
61Tu̱ ndukyang zu̱ za, “Sar da nu̱ wor tu̱k dlu̱m na mbu̱ pooni ɓaanda ɓa.” 62Tu̱ ndukyang zham dlu̱m woyang she zhin ndu̱ buuri khari, 63tu̱ zhin woyang bu ndu̱ kharan za ku̱ vu̱r ɗye bu̱lar yenda, tu̱ bu̱lan ɗyin ɗye bu̱larang za, “Dlu̱m woyang ɗya Yokhana.” Tu̱ ndukyang kap shi lazham. 64Fan ndu̱ fan tu̱ men qu̱ni, tu̱ ghiindan kwatli, tu̱ shi ɓalari a sa barke ye Magham. 65Tu̱ nu̱ bing ɓaanda kap tu̱k sawar ku, tu̱ labar nang ɗu̱ aa fu̱n mbu̱ dlar ghai Yakhudiya; 66tu̱ nduki nu̱ tu̱kki kap ki kwaari ɗyine ɗyi nang, tu̱ ku̱s zu̱ran ku za, “Woi nang ka ɓa kha kya ma nu̱ma?” Ku̱me khar Maghamang nje ɗyine nda.
Zakariya wa Gor Dlu̱m Magham ku̱me Khar ɓu̱ Yokhana
67Tu̱ yang Jiimbi shakhshakhndi nyel Zakariya zhin woyang, tu̱ zu̱ ɓalar ɓu̱ Magham za,
68“Barke ye Maghamndi ɓu̱
Israila Zhinerem gwaanji,
ku̱me wa kor nduki ɓaran tu̱ dli ɗyin wora.
69Aa ɓa ndu̱ nu̱ ɗanar yerem
me vi kwaaɗar ɓu̱ maavi ɓaran Dauda,
70ba wa nu̱ zu̱ki nu̱ ku̱nshe
annabiku shakhshakhndi nu̱ dlu̱r ɓalarku
she Magham nu̱ kya nje ku
zhu tang.
71Za chin ka lawa rem ɓar mbu̱ khar
nu̱ zhangndiku ɓaarem,
ndu̱ nu̱ kareku ndu̱ chem.
72Ka na zhiyaye ɓu̱ zhikanerem,
ka kor ndu̱ alqawar ɓaran shakhshakhndi
ku̱me ku̱mndar shakhshakhndi#1:72 Ku̱mndar shakhshakhndiNggu̱t mbu̱ Nggarsi 22:16-18 ndu̱ mbu̱ ɓeena ye ɓalarku tu̱k. ɓaran.
73Nang ke ku̱mndar nu̱ ku̱mndaki
ye zhinerem Yibram
74za chin ka lawa rem ɓar mbu̱ khar
nu̱ zhangndiku ɓaarem
ku̱me gharmi ghai yenda sawa su̱ ɓa.
75Ku̱me khami shakhshakh ndu̱ jeembu#1:75 Jeembu Nu̱ khutlo wopar ɓu̱ Magham ndu̱ zu̱r ɓaran.
mbu̱ khar viti ɓaarem kap.
76To woi nang tu̱k, ka ɓa qa annabi
ɓu̱ Maghamndi nu̱ viɗi.
To ka khan gume Zhinerem gwaanji
ma daasa njiv ɓar ɓaran.
77To ka ɗa ɓa ndu̱ labar ye ndukiku ɓaran
za ka gwa ɗanar ku nu̱ ku̱n she
yaapar solar ɓaanda.
78Ku̱n she nar zhiyaye ɓu̱ Maghamndi ɓaarem
sarchi nu̱ke yarang ɗanar ɓu̱ Magham ka ɗa
ɓa ki yerem viɗi,
79ma vu̱r yarang ye nduki nu̱ke
kharan mbu̱ zhumi,
ndu̱ jiimbi mu̱ti.
Ka khutlo saarerem ku̱ mbu njiv nu̱ke
qaandi memu̱nar a si.”
80Tu̱ Yokhana shi gori ndu̱ du̱mbu̱r mbu̱ Jiimbi shakhshakhndi, yang kharan varan gha gar ma yir sarchi nu̱ shipaki ku̱ wuɗ varan ye Israila.
Currently Selected:
Luka 1: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
