Yokhana 6

Yesu wa Zu̱m ndu̱ Nduki Du̱pu Qurmun

(Mat 14:13-21; Mar 6:30-44; Luk 9:10-17)

1Gaanje nu̱ shoɓki koɗom tu̱ Yesu dla ɗyim chitndi nu̱ Galili, nang ke ɗyim chitndi nu̱ Tiberiya. 2Tu̱ nduki khang mbu gaanje nda, ku̱me wa na ɗye saidu ɓaran nu̱ shiki ye nduki nu̱ke var wor mu̱n ɓa. 3Tu̱ yang Yesu dla dlengang tu̱ kha gha far su̱yen ndu̱ nu̱ mburi nda kwang. 4Nang ɗo, nu̱ke sarchi Tabar peetar ɗyin ɓu̱ Yakhudekwang shiki bing.

5Tu̱ Yesu da ɗyinan nu̱ viɗi, tu̱ na nduki khang a ɓar ku she nda, tu̱ ze Filibus za, “Chem ka masa ɗye zu̱mndi nu̱ke nduki nang ka zu̱mki tu̱ gama wor fu̱na?” 6Yang Yesu shi ɓalar nang ma nanji ɗyi nu̱ke Filibus ka shiki, ku̱me Yesu wa zu̱n ɗyi nu̱ke chin a ma shiran.

7Tu̱ Filibus tlogha yenda za, “Na aa mu̱zhindi ɓi nu̱ tlu̱nar me qaandi won rap ɓu̱ masa ɗye zu̱mndi nu̱ke aaki chele ɓaanda ka gwaki tu̱ san me ɓa.” 8Tu̱ da chele ɓu̱ nu̱ mburi nda kwang nu̱ke dlu̱man za Andu̱rawus khachin Siman Biturus ze Yesu za, 9“Wonji woi koɗommandi nggur fan ndu̱ ɓu̱rti tolir qurmun nu̱ shiki ndu̱ buɗki bale ndu̱ yurvi rap khanda. Yang nang ka shikya nu̱m chele nduki khangndi nanga na?”

10Tu̱ Yesu ze nu̱ mburi nda kwang za, “Zu̱ ma ye ndukyang ku̱ kha gha ku.” Yang ye maaranang wuzu̱ndi a nje khang. Tu̱ khuzukwang kha gha, wa khu̱l du̱pu qurmun ku. 11Nu̱ Yesu daki ɓurti tolirang tu̱ kuna Magham, tu̱ shakh ye nduki nu̱ khaki ghang, tu̱ gama wora. Tu̱ shi wanang tu̱k ndu̱ yurvyang.

12Nu̱ zu̱mki ku tu̱ mbu̱ wor zhi, tu̱ ze nu̱ mburi nda kwang za, “Taba ma nggusurnggusuran nu̱ khakyang ma ku̱ aa nu̱m su̱bu̱r ɓa.” 13Tu̱ nu̱ mburi nda kwang taba nggusurnggusuran kwang tu̱ nyel kang gwanggu̱m rap, yang a vi ve ɓurti tolir qurmun nu̱ shiki ndu̱ bale nu̱ nduki zu̱mki tu̱ njigang.

14Nu̱ ndukyang naki ɗye lazham nu̱ Yesu shikyang, tu̱ zu̱ ku za, “Shwat, mbu̱ wanang na ke annabi nu̱ke a ɓar mbu̱ larjyang yo.” 15Nu̱ Yesu daki mban za ndukyang a daasa ɓar ma da nda ndu̱ du̱mbu̱r ma ku̱ sa nda ku̱ ma kuji, tu̱ gaɓ Varan nu̱ ɗyin dlengang tu̱k chin ɗyenda.

Yesu wa Shi Yir ɗyin Ɗyimi

(Mat 14:22-33; Mar 6:45-52)

16Nu̱ mugdi shiki, tu̱ nu̱ mburi nda kwang a shur ku ma yir me ɗyim chitndang. 17Sarchi nang, maarang wa nggasi shir zhum, yang Yesu nu̱ ɗa ɓa she wor dong ɓa. Tu̱ nu̱ mburi nda kwang vi nu̱ mbu̱ du̱mbu̱li tu̱ nggasi dla ɗyim chitndang ma yir Kaparnakhum. 18Tu̱ ɗyim chitndang nggaasi me yirti, ku̱me khu̱kheeti du̱mbu̱rkandi nu̱ke a gu̱rtang. 19Qu̱rse wa shi yir ku ɗyin ɗyimang wa kilomite qurmun ma yir njong, tu̱ na Yesu ku a khatl yir ɗyine ɗyimang, a ɓar bing ndu̱ du̱mbu̱lang, tu̱ mbu̱ wor nja ɗyim. 20Yang tu̱ Yesu ze wor za, “Tu̱k nu̱ sawa ɓa, ɗya nga.” 21Kom tu̱ tlogha ku ku̱ Yesu vi nu̱ mbu̱ du̱mbu̱lang su̱yen ndu̱ wora. Fan ndu̱ fan tu̱ du̱mbu̱lang khu̱l ye maa nu̱ke a yir su̱ kwang.

Nduki wa Kaala Maa nu̱ Yesu

22Vi dumaaran, tu̱ nduki nu̱ke kharan dlar ɗyim chitndang da mban za du̱mbu̱l kaada a ɓa ki ye maaran. Tu̱ yang kor ku za Yesu nu̱ vi nu̱ mbu̱ du̱mbu̱lang su̱yen ndu̱ nu̱ mburi nda kwang ɓa, ku̱me nu̱ mburi nda kwa viki wor ɗyenda. 23Yang du̱mbu̱lku nggur a nje nu̱ ɗa viki ku Tiberiya, tu̱ ching gha ku bing ndu̱ ye maa nu̱ nduki zu̱mki ɓurti tolir gaanje Yesu wa kuna Maghamang. 24Nu̱ ndukyang naki za Yesu ndu̱ nu̱ mburi nda kwang a nje ku ye maaranang ɓa, tu̱ vi du̱mbu̱lku tu̱ ɗu̱ Kaparnakhum a kaala Yesu ku.

Yesu ke Ɓurti tolir nu̱ Vu̱rti Nyifiri

25Nu̱ gwaki nda ku me dlar ɗyim chitndang, tu̱ ze nda ku za, “Maalu̱m ta ɓa fan kochiya?”

26Tu̱ Yesu tlogha ye wor za, “Zhire, nga zu̱ran ye nu, tun a kaala nga ku̱me tun wa nji ɓurti tolirang tu̱ mbonu zhi, nun kaala nga ku̱me ɗye saidu nang shikya ɓa. 27Ki nu bonye ku̱me kaalar ɗye zu̱mndi nu̱ke ka su̱bu̱rki ɓa, laɓ ma ɗye zu̱mndi nu̱ke ɓu̱ shi su̱bu̱r ɓa, yang ka vu̱r nyifi ye nu nu̱ke ɓu̱ shi woɗa ɓa. Nang ke pooni ɗye zu̱mndi nu̱ke Yi ɓu̱ Nduk ka vu̱rki ye nu. Ku̱me Magham wa ghwaɗ saidu maito nu̱ ve Masiya Yesu.”

28Tu̱ ndukyang zham Yesu za, “Chem ka shikya nu̱m ma nyel mi ɗyi nu̱ke Magham a shimndanang na?”

29Tu̱ Yesu tlogha ye wor za, “Wonji ma ɗyi nu̱ke Magham a shimndanang, maita ma njif nu̱ ɗa ru̱kkyang.”

30Tu̱ ndukyang zham Yesu tu̱k za, “Yang to ka shikya nyi pooni ɗye saidu yerem ma nami nu̱ si chem maita ra? To ka shikya nyi pooni tuna? 31Ai zhikanerem nu̱ zhu tang wa nji manneku mbu̱ gaarang, ba wa nu̱ke a nje bu̱laran za, ‘Wa vu̱r ɗye zu̱mndi ye wor na shurki viɗi ma ku̱ zu̱m ku.’ ”

32Kom tu̱ Yesu tlogha ye wor za, “Zhire, nga zu̱ran ye nu, ɗya Musa vu̱rki ɗye zu̱mndi na shurki viɗang ye wor ɓa, Zhinkir ɓang ke nu̱ vu̱rti ɗye zu̱mndi yelndi na viki viɗi. 33Ɗye zu̱mndi ɓu̱ Maghamang ɗya nu̱ shurti viɗi, a vu̱r nyifi ye larji.”

34Tu̱ tlogha yenda ku za, “Ku̱man, ki vu̱r ɗye zu̱mndi nang yerem aakochi!”

35Tu̱ Yesu tlogha ye wor za, “Nga ke ɗye zu̱mndi nu̱ka vu̱rki nyifi, njif nu̱ ɗa ɓa ki sha ɓu̱ tu̱k meeri gana fan ɓa, yang tu̱k njif nu̱ maitaki nga sar da ɓu̱ tu̱k khuzhum ɓa. 36Yang ba wa nang zu̱ki ye nu, tun wa na nga, yang kap ndu̱ nang nun maita nga ɓa. 37Kap nduki nu̱ Zhinkirang vu̱rki ya, kaɗa ɓa sha ku, yang njif nu̱ ɗa ɓa ki sha ngam ɓu̱ komba nda ɓa. 38Jiwa na nga shur viɗi ma shi shimndi ɓang ɓa, nga ɓakya ma shi shimndi ɓu̱ njif nu̱ ɗa ru̱kki nga. 39Yang njif nu̱ ɗa ru̱kki ngang nu̱ shim ku̱ mbu̱ɗ nga da chele nduki nyin vu̱rki ya ɓa, a shim nakha nga wor fu̱ɗar wuri. 40Ku̱me nang ke shimndi ɓu̱ Zhinkir ɓanga, kap njif nu̱ke a nggu̱t Woyang, tu̱ ki maita nda wa gwa nyifi nu̱ke ɓu̱ shi woɗa ɓa, yang nga ka da nda nu̱ viɗi fu̱ɗar wuri.”

41Tu̱ Yakhudekwang nggaasi ruru ku̱me wa zu̱ za, “Nga ke ɗye zu̱mndi nu̱ ɗa shurki viɗi.” 42Tu̱ zu̱ ku tu̱k za, “Woɗye nang ɗya Yesu de, woi ɓu̱ Yusufu, nu̱ke chem wa zu̱n man ndu̱ zhin? Yang nu̱m saki ka zu̱ki leendang za, ‘Nga shur viɗa na?’ ”

43Tu̱ Yesu tlogha ye wor za, “Njig ma ruru chele ɓaanu. 44Nduk a nje nu̱ke ka ɗu̱maki ɓar sha ɓa, buka mbu̱ Zhinkir nu̱ ɗa ru̱kki ngang a dutki nda. Yang ngga da nda nu̱ viɗi fu̱ɗar wuri.” 45A nje bu̱laran mbu̱ lagarkati ɓu̱ annabikwang za, “Magham ka shogaki ye wora. Yang kap njif nu̱ tu̱kki, tu̱ yang shoga she Zhinkirang, wa ka ɓa sha. 46Nduk a nje nu̱ naki Zhinkirang sar da ɓa kope njif nu̱ ɗa viki she Magham, chin naki Zhinkirang chin ɗyenda. 47Zhire, nga zu̱ran ye nu, aaki maitaki wa gwa nyifi nu̱ke ɓu̱ shi woɗa ɓa. 48Nga ke ɗye zu̱mndi nu̱ vu̱rti nyifiri. 49Zhikannu nu̱ zhu tang wa nji manneku mbu̱ gaarang, yang kap ndu̱ nang wa mu̱ɗ ku. 50Yang wonji ɗye zu̱mndi nu̱ke a shurti viɗi. Aaki zu̱mki ɗye zu̱mndi nang ɓu̱ mu̱ɗ ɓa. 51Nga ke ɗye zu̱mndi nu̱ vu̱rti nyifiri nu̱ ɗa shurki viɗi. Kap njif nu̱ zu̱mki ɗye zu̱mndi nang ka gwa nyifiri koɗokhsi ɓa. Yang ɗye zu̱mndi nang ɗya man vara, nu̱ke nga ma vu̱rtan ma ku̱ larji gwa nyifiri.”

52Tu̱ Yakhudekwang nggaasi keele maɗyikandi chele ɓaanda a zu̱ran ku za, “Ka shi kikimndi tu̱ khuski nang zu̱ za chin ka vu̱r dlu varan yerem ma njimyang na?”

53Tu̱ Yesu ze wor za, “Zhire, nga zu̱ran ye nu, mbu̱ nun nji dlu ɓu̱ Yi ɓu̱ nduk tun za tom ɓaran ɓa, nyifi nje mbe nu ɓa ɗo. 54Kap njif nu̱ke a nji dlu vara, tu̱ ka za tom ɓang tu̱k, wa gwa nyifi nu̱ke ɓu̱ shi woɗa ɓa, ngga da nda nu̱ viɗi fu̱ɗar wuri. 55Ku̱me dlu vara ɗya ɗye zu̱m maɗyi, tom ɓang yang ɗya ɗye zar maɗyikandi. 56Kap njif nu̱ke a nji dlu vara, tu̱ ki za tom ɓanga kharan mbya, nga kharan mbe nda tu̱k. 57Ba wa ni Zhinkir nu̱ nyifi a ru̱kki nga, yang nga a khar ndu̱ nyifi ku̱me chin, wanang tu̱k, njif nu̱ gaɓki ndu̱ nga ma ɗye zu̱mndi ɓaran ka kha ndu̱ nyifi ku̱me nga. 58Nga ke ɗye zu̱mndi nu̱ ɗa shurki viɗi. Zhikannu nu̱ zhu tang wa nji manneku, yang kap ndu̱ nang tu̱ mu̱t ku, yang njif nu̱ zu̱mki ɗye zu̱mndi nang ka kha ndu̱ nyifiri koɗokhsi ɓa.” 59Yesu zu̱ ɗyiku nang sarchi nu̱ke a shogar ye maa tabar ɓu̱ Yakhudeku nu̱ke a Kaparnakhum.

Nu̱ mbu Yesu ku Khang wa Njigti nda

60Tu̱kti wanang ke shar, tu̱ khang chele ɓu̱ nu̱ mburindakwang zu̱ za, “Nang ɗya ɓalar sharkandi, ki ka dlu̱kya?”

61Yang nu̱ke Yesu wa zu̱n za nu̱ mburi nda kwang a ruru ɗyine shogar nyin shikyang, tu̱ zu̱ za, “Shogar nang wa su̱bu̱r memu̱na nu mu? 62Yang tun ka shi kikimndi mbu̱ tun wa na Yi ɓu̱ Nduku a dlar ma yir mbu̱ viɗi ye maa nu̱ ɗa viki si? 63Jiimba ke nu̱ vu̱rti nyifi, zalale aa nu̱m kha manva ɓa. Ɓalarku nang zu̱ki ye nwang ɗya jiimba, ndu̱ nyifi. 64Yang ɓeeni nduki a nje chele ɓaanu nu̱ke nu̱ maita ɓa.” Ku̱me gumapaali Yesu wa zu̱n nduki nu̱ke nu̱ maita ɓa, ndu̱ njif nu̱ke a ma vu̱rti nda ɓarang. 65Tu̱ zu̱ tu̱k za, “Na ke ɗyi nu̱ saki tang ze nu nga za, ‘Nduk a nje nu̱ke ka ɗu̱maki ɓar sha ɓa, buka mbu̱ Zhinkirang wa vu̱r zalale ni yenda.’ ”

66Gaanje ɓalar nu̱ Yesu shiki nang, tu̱ khang chele nduki nu̱ke a mbu gaanje ndang njigti nda, tu̱ njig mburi nda ku tu̱k.

67Tu̱ Yesu zham gwaanggu̱m rapndang za, “Tun a shim yi va nu tu̱k mu?”

68Tu̱ Siman Biturus tlogha yenda za, “Zhinerem gwaanji, chem ka ɗu̱kya she kiya? To ke nu̱ ɓalar nu̱ka vu̱rki nyifiri nu̱ke ɓu̱ shi woɗa ɓa. 69Chem wa maita, chem wa zu̱n tu̱k za to ke Shakhshakhndi ɓu̱ Magham.”

70Tu̱ Yesu tlogha za, “Nga datki nu tun gwaanggu̱m rapndi nang ɓa goma? Yang da chele ɓaanu ɗya sheɗan.” 71Yang a shiran ndu̱ Yakhuda, yi ɓu̱ Siman Iskariyoti, ku̱me chin kya ma vu̱rti nda ɓara, aa nu̱ke ɗya da chele gwaanggu̱m rapndang.

Currently Selected:

Yokhana 6: ttrNT

Highlight

Copy