Yokhana 5

Yesu wa Shaana Zu̱ɓti ngguri ye Fu̱ɗar Maasi

1Qu̱rse nang, tu̱ Yesu ɗu̱ Urshalima ma tabar nggur ɓu̱ Yakhudekwang. 2Shaplangge#5:2 Shaplangge Ɗya maa kalar ɗyim wa ge daɓti. nggur a nje nu̱ kalapku qurmun karaki nda mbu̱ ghai Urshalima, me vi ɓu̱ ndu̱ɓangkwang nu̱ka qaki za Besaida#5:2 Ɓeena bu̱larku ka qa maa nang za Betzata. ndu̱ me Yakhuda. 3Nduki nu̱ke var wor mu̱n ɓa, pugumku ndu̱ zu̱ɓtiku ndu̱ nu̱ zurɗarku khang wa ka qan nu̱ mbu̱ kalapkwang a bu ku̱ du̱gɗa ɗyimang. 4Ku̱me nu̱ ru̱kti ɓu̱ Magham wa ka ɓa sarchi ngguri tu̱ du̱gɗa ɗyimang. Kap njif nu̱ nggu̱ɗki nu̱ mbu̱ ɗyim du̱gɗakandang gumapaali, ka shaana mbe aa nyi khaati nu̱ke a damta nda.#5:4 Ɓeena bu̱larku nu̱ka sa ma na ɓa. 5Yang khuski nggur a nje ye maaran nu̱ shiki sonyi ɗyin kunung qu̱m miyasi khaatan. 6Nu̱ Yesu naki nda qaandan wa zu̱n nu̱ke wa qan khang maɗyi ndu̱ khaatang. Tu̱ Yesu zham nda za, “Ta shim ku̱ shaana nu̱gha mu?”

7Tu̱ nu̱ khaatang tlogha yenda za, “Ku̱man, nduk khara ma ku̱ sa nga nu̱ mbu̱ ɗyim Shaplanggyang sarchi nu̱ dugɗaki ɓa. Aa nga zhang vara ma viri nu̱ mban tu̱ njif nggur kaya nga.”

8Tu̱ Yesu ze nda za, “Ju, to da ku̱rbuk ɓa to ɗu̱ vaaro.” 9Fan ndu̱ fan, tu̱ khuskyang shaana, tu̱ ɗyikhla ku̱rbuk ɓaran tu̱ ɗu̱ varan. Yang ɗyinang shi fu̱ɗar Su̱bji (nu̱ke ɗya Fu̱ɗar Maasi ɓu̱ Yakhudekwang). 10Tu̱ yang Yakhudekwang ze khuski nu̱ shaanakyang za, “Meeni ɗya Fu̱ɗar Maasi ku̱me nang, nu̱ shipa ku̱ da na ku̱rbuk ɓaa ɓar ɓa.”

11Tu̱ khuskyang tlogha ye wor za, “Njif nu̱ shaanaki ngang zu̱ki ya za da nga ku̱rbuk ɓang tang ɗu̱ vara.”

12Tu̱ zham nda ku za, “Nyi nduk zu̱ki yor za da na ku̱rbuk ɓaa to ɗu̱ vaara na?”

13Yang khuskyang nu̱ zu̱n njif nu̱ shaanaki nda nu̱ gha ɓa ku̱me Yesu wa sagha nu̱ mbu̱ ndukyang nu̱ke nduki a nje khang ye maaranang.

14Qu̱rsan tu̱ Yesu a gwa nda mbu̱ Rafti ɓu̱ Maghamang tu̱ ze nda za, “Nggu̱tka, ta shaana! Shi na sola tu̱k ɓa, ma ku̱ ɗyi nu̱ dukki nang gwa ɓa.” 15Tu̱ khuskyang ɗu̱ tu̱ ɗa ze dle gume ɓu̱ Yakhudekwang za ɗya Yesu shaanaki nda.

16Tu̱ dle gume ɓu̱ Yakhudekwang ku̱na maa khar ye Yesu ku̱me wa shaana khuskyang ye Fu̱ɗar Maasi. 17Tu̱ yang Yesu ze wor za, “Zhinkir ɓang nu̱ njig shir tlu̱nar ɓa, yang ngam njig zum ɓa.” 18Tu̱ ɓalar nang sa Yakhudekwang tu̱ shaata shim tlagha nda nu̱gha a zu̱ran ku za, “Ku̱me shaanar khuski nu̱ shiki fu̱ɗar maasang ɗyenda ɓa, wonji wa qa Magham Zhin tu̱k a buu ɗyinan ndu̱ Magham.”

Zalale ɓu̱ Yesu Yi ɓu̱ Magham

19Tu̱ Yesu tlogha ye wor za, “Zhire nga zu̱ran ye nu, Woyang nu̱ka shi aa nyi tun me ɗyinan ɓa, kope ɗyi nu̱ naki Zhin a shiran. Ku̱me nang, ɗyi nu̱ke Zhin a shiran, nang ke ɗyi nu̱ke Woyang a shiran. 20Jiwa Zhinkirang a shim Yi ɓaran, wa ka wut ɗyi nu̱ke chin a shiran kap ye Woyang, ka wut ɗyi gwaanjiku nu̱ dukki nang yenda, ma ku̱ shi nu lazham. 21Ba wa nu̱ke Zhinkirang ka nakhaki mu̱tiku tu̱ vu̱r nyifi ye wora, wanang tu̱k, Woyang wa ka vu̱r nyifi ye njif nyin shimki. 22Zhinkirang nu̱ka kuma aaki ɓa, wa vu̱r zalale aa nyi kuma nu̱ mbu̱ khar Woyang. 23Ma ku̱ aaki vu̱r gorkir ye Woyang, ba wa nu̱ka vu̱rki gorkir ye Zhinkirang ku. Kap njif nu̱ke nu̱ vu̱r gorkir ye woyang ɓa, nu̱ vu̱r gorkir ye Zhin nu̱ ɗa ru̱kki nda ɓa.”

24“Zhire nga zu̱ran ye nu, njif nu̱ka tu̱kki ɓalar ɓanga, tu̱ka maita njif nu̱ ɗa ru̱kki nga, wa gwa nyifi nu̱ke ɓu̱ shi woɗa ɓa. Ɓu̱ kuma nda ɓa, wa woɗa lawar me mu̱ti wa gwa nyifiri. 25Zhire, nga zu̱ran ye nu sarchi a ɓari, wa kar a ɓa, nu̱ke mu̱tiku ka tu̱k su̱qur Yi ɓu̱ Magham, wor nu̱ tu̱kkyang ka nakha. 26Jiwa ba wa nu̱ke Zhinkirang nu̱ ɗyinan ke dlu̱dlarsi nyifi, wanang tu̱k wa sa Woi ɓaranang ku̱ kha ma dlu̱dlarsi nyifi. 27Wa vu̱r zalale kumar yenda tu̱k ku̱me ɗya Yi ɓu̱ nduku.”

28“Ku̱ shi nu lazham ɓalar nang ɓa, ku̱me sarchi a nje a ɓari nu̱ke mu̱tiku nu̱ke a mbu̱ ku̱jipku kap ka tu̱k su̱quran, 29tu̱ ɗa vi ɓar ku. Nduki nu̱ shiki ɗyi mbarkandi ka ji ku tu̱ gwa nyifiri, yang nduki nu̱ tlu̱naki ɗyi malkandi ku, ka ji tu̱ kuma wora. 30Nang ka ɗu̱ma shi aa nu̱m nga ɗyenda ɓa. Ngga shi kumar ɓang ba wa nu̱ Magham zu̱ki ya za shi nga. Ku̱me nang kumar ɓang ɗya zhire, ku̱me nga shikya shimndi ɓang ɓa, nga shikya shimndi ɓu̱ njif nu̱ ɗa ru̱kki nga.”

Saiduku Ɗyine Yesu

31Mbu̱ nga ɗyenda kya saida ɗyina, saidu ɓang ɓu̱ gwa dlu̱ ɓa.#5:31 Saida Nduk nu̱ka saida ɗyinan gume kuma ɓa. 32Yang njif nggur a nje nu̱ke a saida nga, nga zu̱n saidu ɓaranang ɗya zhire.

33Tun wa ru̱k nduki nu̱ she Yokhana, yang wa saida zhire ni ye nu. 34Kap ndu̱ nang, nang dla vara nu̱ ve saidu ɓu̱ nduk ɓa. Nga zu̱ wanang ma gwa nu ɗanari. 35Yokhana ɗya yarang nu̱ke a wuti, yang tun wa dat kasha nu yarang ɓaranang me sarchi koɗomma.#5:35 Yarang Yarang nu̱ke a wuti a saida kya Yesu.

36Yang saidu ɓanga nje khara nu̱ dukki saidu nu̱ Yokhana shiki ɗyina. Ɗyiku nu̱ke nga shiran Zhinkirang vu̱rki ya za shi nga, ɗyi nu̱ke nga shiranku nang, wor saidaki za Zhinkirang a ru̱kki nga. 37Chin Zhinkir nu̱ ɗa ru̱kki ngang, ndu̱ varan ɗya saidu ɓanga. Sar da nun tu̱k su̱quran ɓa yang sar da nun na shipar ɓaran ɓa. 38Nu̱ke ɓalar ɓaran a nje kharan mbu̱ memu̱na nu ɓa, ku̱me nun maita njif nu̱ Zhinkirang a ru̱kki ɓa. 39Ba tun a laɓ mbu̱ Bu̱lar ɓalar ɓu̱ Magham, ku̱me tun a tamandan za tun ka gwa nyifi nu̱ke ɓu̱ shi woɗa ɓa mban. Yang Bu̱lar ɓalar ɓu̱ Magham ku nang kya saida nga. 40Yang kap ndu̱ nang tun wa zhang ɓar sha gha ma gwa nu nyifiri.

41Nang damta ndu̱ makhtar ɓu̱ nduk ɓa. 42Yang nga zu̱ndo nu, ndolar ɓu̱ Magham a nje mbu̱ memu̱na nu ɓa. 43Nga ɓa ndu̱ zalale ɓu̱ Zhinkir ɓanga, nun dlu̱ri nga ɓa, yang mbu̱ njif nggur a ɓa ku̱me ɗyinan, tun ka dlu̱ri nda. 44Yang ɗa, tun ka maita kikimndana nu̱ke tun a komkomi gwa makhtar chele ɓaanu, yang nun zhang vaanu ma gwa nu makhtar nu̱ka viki she Magham ɗyenda ɓa?

45“Taman nu za ngga da zhaano ɓaanu nu̱ she Zhinkirang ɓa. Nu̱ dar zhaano ɓaanu a nje, chin ke Musa, chin nu̱ke tun a tamandan za ka shaata nwang. 46Mbu̱ tun wa maita Musa, tu̱ga tun wa maita nga, ku̱me Musa wa shi bu̱lar ɗyina. 47Yang mbu̱ nun maita ɗyi nu̱ bu̱laki ɓa, tun ka maita ɓalar ɓang kikimnda?”

Currently Selected:

Yokhana 5: ttrNT

Highlight

Copy