Yokhana 13

Yesu wa Shiɓ Saari nu̱ Mburi nda ku

1A nje a nje me ku̱ Tabar Peetar ɗyin shi, Yesu wa woɗa zu̱ndan za sarchi ɓaran wa shi nu̱ke chin a ma njig larji nang chin gaɓ nu̱ she Zhinkirang. Yesu wa ndola nduki ɓaran nu̱ke a larji, wa wut ndolar ɓaran ye wor ma yi lauɗar su̱ khar ɓaanda.

2Sarchi nu̱ke Yesu ndu̱ nu̱ mburi nda ku a zu̱m ɗye zu̱mndi virkiri, Sheɗan wa woɗa saran nu̱ mbu̱ memu̱na Yakhuda Iskariyoti yi ɓu̱ Siman ma ku̱ vu̱r Yesu ɓara. 3Yang Yesu wa zu̱n Magham wa sa aa nu̱m nu̱ mbu̱ kharan. Wa zu̱n chin a vi she Magham, yang chin a gaɓti nu̱ she Magham. 4A mbu̱ zu̱mndi ɗye zu̱mnda ku, tu̱ Yesu ji tu̱ fet lukti ɓaran nu̱ viɗa nu̱gha, tu̱ ɗa da tawul tu̱ gu̱n nu̱ ve wudlan. 5Tu̱ zu̱ ɗyim nu̱ mbu̱ du̱ɓi, tu̱ nggaasi shiɓ saari nu̱ mburi nda kwang, a pasha saari wor ndu̱ tawul nu̱ gu̱nki nu̱ ve wudlanang.

6Nu̱ Yesu khu̱lki ɗyine Biturus, tu̱ yang Siman Biturus zham nda za, “Zhinerem gwaanji, to kya ma shiɓ saara ya nu̱gha mu?”

7Tu̱ Yesu tlogha yenda za, “Ye leendang, tom ɓu̱ zu̱n ɗyi nu̱ke nga shiran ɓa, yang to ka ɓa zu̱ni gana fan.”

8Tu̱ Biturus ze nda za, “Tom ɓu̱ shiɓ saara ya nu̱gha shwat ɓa.”

Tu̱ Yesu tlogha yenda za, “Yang mbu̱ nang shiɓ yor nu̱gha ɓa, tun a nje ka tabaki nga ndu̱ to ɓa.”

9Tu̱ Siman Biturus ze nda za, “Zhinerem gwaanji, shiɓ na saara ya nu̱gha ɗyenda ɓa, shiɓ khara ndu̱ ɗyina nu̱gha kap tu̱k.”

10Tu̱ Yesu zu̱ za, “Qu̱rse nduk wa shi wurti, varan wa kha Shakhshakh. Ɓu̱ gang wur tu̱k ɓa kope ku̱ shiɓ kya saaran nu̱gha ɗyenda. Ku̱me tun Shakhshakh, yang kap ɓaanu ɓa.” 11Ku̱me Yesu wa zu̱n njif nu̱ke a ma vu̱rti nda ɓarang. Nang ke ɗyi nu̱ saki tu̱ zu̱ za, “Yang tun kap ke Shakhshakh ɓa.”

12Gaanje wa shiɓ saari wor nu̱gha, tu̱ gaɓ tu̱ sa lukti ɓaran, tu̱ gaɓ nu̱ ye maa khar ɓaran tu̱ kha gha. Tu̱ yang ze wor za, tu̱k ma, “Tun wa da mbu̱ ɗyinang shiki ye nwa mu? 13Tun a qa nga Maalu̱m, ndu̱ Zhinonu gwaanji. Na torop, ku̱me nga wanang. 14Mbu̱ nga ndu̱ vara, nu̱ke nga Zhinonu gwaanji ndu̱ Maalu̱m ɓaanu nga shiɓ saaro nu, wa shipa tun shiɓ saari yen tu̱k. 15Ku̱me nga buu ye nu ma njig dulbu nu̱ yenu ku̱me shi nu wa nang wa nang shiki ye nu. 16Nga zu̱kya ba zhire ye nu, maava nu̱ka duk nu̱ rafti ɓaran ɓa, nu̱ ru̱k nu̱ka duk njif nu ru̱kki nda ɓa. 17Nu̱ke tun wa zu̱n ɗyi ku nang leendang tun ka shi barka mbu̱ tun wa tlu̱na.

18“Nga ɓalarang ndu̱ tun kap ɓa. Nga zu̱n nduki nang datki. Yang wa ku̱s ku̱ nyel nga ɗyi nu̱ bu̱laki nu̱ gha mbu̱ ɓalar ɓu̱ Magham za, ‘Njif nu̱ kya zu̱m ɗye zu̱mndi ndu̱ nga mbu̱ du̱ɓ da, wa nggu̱ɗ nu̱ vya!’

19“Nga zu̱ran ye nu leendang me ku̱ ɗyen shi, ku̱me mbu̱ ɗyen wa shi ku̱ maita nu za nga ke Masiya. 20Zhire, nga zu̱ran ye nu, kap njif nu̱ dlu̱ki njif nang ru̱kki ndu̱ memu̱nar da, dlu̱kya nga. Yang njif nu̱ dlu̱ki nga ndu̱ memu̱nar da, dlu̱kya njif nu̱ ɗa ru̱kki nga.”

Yesu wa Zu̱ za a ma Vu̱rti nda ɓara

(Mat 26:20-25; Mar 14:17-21; Luk 22:21-23)

21Gaanje Yesu wa shi ɓalar nang, tu̱ ɗyen damta nda maɗyi mbu̱ memu̱naran, tu̱ zu̱ ye dalang za, “Zhire, nga zu̱ran ye nu, nduk da chele ɓaanu a ma vu̱rti nga ɓara.” 22Tu̱ nu̱ mburindakwang nggu̱t yen, ku̱me nu̱ zu̱n njif nu̱ke a ɓalarang ndu̱ chin chele ɓaanda ɓa. 23Yang da chele ɓu̱ nu̱ mburindakwang, nu̱ke Yesu a ndola nda a nje kharan bing ndu̱ Yesu. 24Tu̱ Siman Biturus buu yenda ndu̱ kharan za ku̱ zham Yesu ku̱ zu̱ njif nu̱ke chin a ɓalarang ɗyine nda ye wora.

25Tu̱ chin khakandi bing ndu̱ Yeswang zham nda za, “Zhinerem gwaanji ɗya kiya?”

26Tu̱ Yesu tlogha za, “Ngga sa njilakhti ɓurti tolirang nu̱ mbu̱ kotumndi. Njif nang vu̱rki yenda, ɗya chin.” Nu̱ Yesu daki njilakhti ɓurti tolirang tu̱ san mban, tu̱ vu̱r ye Yakhuda yi ɓu̱ Siman Iskariyoti. 27Nu̱ dlu̱ki njilakhti ɓurti tolirang tu̱ Sheɗan vi nu̱ mbe nda fan ndu̱ fan.

Tu̱ Yesu ze Yakhuda za, “Ɗyi nu̱ke ta ku̱r shiranang, to shi ɗau ɗau.” 28Yang nduk a nje mbu̱ nu̱ zu̱mndi ɗye zu̱mndi kwang nu̱ zu̱nki ɗyi nu̱ saki tu̱ Yesu ze nda wanang ɓa. 29Yang ma nu̱ke Yakhuda ke nu̱ du̱ngndi mu̱zhindi ɓaanda, tu̱ ɓeeni nu̱ mburindakwang taman za bai Yesu ze nda ma ku̱ ɗa masa ɗyi nu̱ke ka shiki boote su̱ ku fu̱ɗar tabarang. Kom ndu̱ bai a zu̱ran yenda za ku̱ vu̱r ɗyi nggur ye nu̱ nungndi ku. 30Yang nu̱ dlu̱ki njilakhti ɓurti tolirang tu̱ vi varan nu̱ dam. Yang ɗya virkiri.

Mewar Woparku

31Gaanje Yakhuda wa vi varan, tu̱ Yesu zu̱ za tu̱k ma, “Nang ke sarchi nu̱ vu̱rki zhaaji ye Yi ɓu̱ nduku, tu̱ vu̱r zhaaji ye Magham nu̱ ku̱nshe nda.”

32“Mbu̱ ke Magham wa gwa zhaaji ku̱n she nda, Magham ndu̱ varan ka vu̱r ye Woyang ku̱nshe ɗyinan, yang ka gwa zhaajyang fan ndu̱ fan. 33Tun nyeezaku, wa njig sarchi koɗomma nu̱ke ngga khaki ndu̱ tunu.” Tun ka laɓti nga, yang ba wa nang zu̱ki ye dle gume ɓu̱ Yakhudekwang nga za, “Ye maa nu̱ke nga yiri, tun ɓu̱ ɗu̱ma yir ɓa.” Nga zu̱ran ye nu wanang tu̱k leendang.

34“Nga zu̱kya mewar Wopar ye nu, ba wa nang ndolaki nu, tun ndola yen tu̱k wanang. 35Nu̱ ku̱n she nang nduki kap ka zu̱n za tun nu̱ mburi nga, mbu̱ ke tun a ndola yen.”

Biturus ka ɓa Keela Zu̱ndi Yesu

(Mat 26:31-35; Mar 14:27-31; Luk 22:31-34)

36Tu̱ Siman Biturus zham Yesu za, “Zhinerem gwaanji, ta yir kya fu̱na?”

Tu̱ Yesu tlogha za, “Tom ɓu̱ ɗu̱ma mburi nga ma yir ye maa nu̱ke nga yir si leendang ɓa, yang gana fan to ka ɓa mburi nga.”

37Tu̱ Biturus ze nda za, “Zhinerem gwaanji, nu̱m saki ngam ɓu̱ ɗu̱ma mburor leendang ɓa? Ai, ngga vu̱r nyifi ɓang ɓar ku̱me to.”

38Tu̱ Yesu tlogha za, “Alapa to ka vu̱r nyifi ɓa ɓar ku̱me nga? Zhire, nga zu̱ran yoro, me ku̱ koogurokh shi mbaari, to ka keela no za no zu̱ndi nga ɓa sar kunung.”

Currently Selected:

Yokhana 13: ttrNT

Highlight

Copy