Yokhana 12

Wa Pasha Mor Zhiran Mu̱nkandi ye Yesu mbu̱ Ghai Betani

(Mat 26:6-13; Mar 14:3-9)

1Wa njig ba qaandi njong ku̱ sarchi Tabar peetar ɗyina a ɓa, tu̱ Yesu ɗu̱ Betani, ye maa nu̱ke Liazaru nu̱ nakhaki nda mbe mu̱tang kharan nje. 2Tu̱ shi ɗye zu̱mndi nu̱ virkir yenda nje, yang Marta shakki ɗye zu̱mndang, Liazaru a nje chele nduki nu̱ zu̱mki ɗye zu̱mnda ndu̱ Yeswang. 3Tu̱ Maryam da kulur mor zhiran mu̱nkandi nu̱ me mu̱zhindi nu̱ shiki ndu̱ nad me ɗyinan, tu̱ pu ye saari Yesu, tu̱ yang pasha saaranang nu̱gha ndu̱ ghosi ɗyinan. Tu̱ zhi mor mu̱nkandi nang dlu̱ mbu̱ raftang ɓar kap.

4Tu̱ yang Yakhuda Iskariyoti, da chele nu̱ mburi nda ku nu̱ke a ma vu̱rti nda ɓara zu̱ za, 5“Nu̱m saki nu̱ masa mor nu̱ke mu̱zhindan khangndi nang ɓar tu̱ vu̱r mu̱zhindang ye nu̱ nungndiku ɓa? Mu̱zhindan wa khu̱l ɓi nu̱ tlu̱nar me qaandi won kunung.” 6Yakhuda zu̱ ɓalar nang ku̱me wa damta ndu̱ nu̱ nungndiku ɓa, zu̱ ku̱me ɗya nu̱ muuru. Wa ka muura mu̱zhindi nu̱ du̱ngki gha ku nu̱ke chin ke nu̱ du̱ngndi mu̱zhindang.

7Tu̱ Yesu zu̱ za, “Njig ma nda, a du̱ng mor na gha ma daasa fu̱ɗar nu̱ke a ma pa mu̱ti ɓanga. 8Ai, tun a su̱yen ndu̱ nu̱ nungndiku aakochi, yang tun ɓu̱ kha su̱yen ndu̱ nga aakochi ɓa.”

Wa Shi Konyi Tlagha Liazaru ku

9Nu̱ tabar Yakhudeku khang tu̱kki labaran za Yesu a nje ye maaran tu̱ ɗa ɓa ku. A ɓa ku ku̱me Yesu ɗyenda ɓa, yang ku̱me Liazaru nu̱ nakhaki nda mbe mu̱tang tu̱k. 10Tu̱ kuruku rututundang shi sawari za tlagha nda Liazaru nu̱gha tu̱k. 11Ku̱me Yakhudeku khang wa maita Yesu tu̱ mburi nda ku ku̱me Liazaru.

Yesu wa Vi nu̱ mbu̱ Ghai Urshalima

12Ɗaatlu̱maaran tu̱ nduki khang nu̱ ɗa ɓa ki ku ma Tabar peetar ɗyinang tu̱k za Yesu a nje yiti njiv a ɓar Urshalima. 13Tu̱ ghar me bu̱n qu̱far jipu̱no ku tu̱ vi ku, tu̱ gaɗa nda, a zu̱ran ku za, “Khosana! Mban za (Khamndi ye Magham) Barkya ve njif nu̱ke a ɓar mbu̱ dlu̱m Zhinkir gwaanji, barkya ve Kuji ɓu̱ Israila!” 14Nu̱ Yesu gwaki ye kooro nggur tu̱ lu̱ba, ba wa nu̱ bu̱laki za, 15“Tu̱k nu̱ sawa ɓa, tun nduki Sikhiyona, wonji kuji ɓaanu a nja ɓar ɗyin ye kooro!” 16Gumapaali nu̱ mburindakwang nu̱ da mbu̱ ɗyi nu̱ shiki nang ɓa, yang gaanje nu̱ vu̱rki zhaaji ye Yesu#12:16 Vu̱rti zhaaji ye Yesu A ve gaanje mu̱ti ndu̱ jiiri ɓaran mbe mu̱tang., tu̱ kor ku nu̱ ɗyine bu̱lar a nje wanang ɗyine nda, yang ɗyikwang shi ba wa nu̱ bu̱lakyang.

17Tu̱ nduki nu̱ke a nje sarchi nu̱ qaki Liazaru tu̱ ɗa vi ɓar mbe ku̱jipi, tu̱ ji mbe mu̱tang, tu̱ ku̱s zu̱ ɗyi nu̱ Yesu shikyang ye ndukikwang. 18Nduki khang ɗu̱ ma gaɗa Yesu ku̱me wa tu̱k ɗye saidu nu̱ shiki nang. 19Tu̱ Pariseku shi ɓalar chele ɓaanda za, “Nggu̱t ma, ɗyi nang ɓu̱ ɗu̱ ndu̱ chem aa fu̱n ɓa, na ma larji a gaanje nda guma da!”

Kheleneku nggur wa Laɓ Yesu

20Yang mbu̱ nduki nu̱ ɗu̱ki ma ghaari ghai mbu̱ tabarang, Khelenekwang a nje. 21Tu̱ ɗa ɓa she Filibus, nduk Besaida nu̱ke a mbu̱ dlar ghai Galili, tu̱ ze nda ku za, “Ku̱man, chem a shim ɓalar ndu̱ Yesu.” 22Tu̱ Filibus ɗu̱ tu̱ ɗa ze Andu̱rawus, tu̱ ku̱lɓu̱r ɓaanda ɗu̱ ku tu̱ ɗa ze Yesu.

23Tu̱ Yesu tlogha ye wor za, “Sarchi wa shi nu̱ke a ma vu̱r zhaaji ye Yi ɓu̱ nduku. 24Zhire, nga zu̱ran ye nu, mbu̱ nun kaɓ ye pooni tu̱ mu̱tl ɓa, ka kha ba chin ɗyenda. Yang mbu̱ wa mu̱tli wa ka vu̱r ye pooniku khang. 25Njif nu̱ke a shim nyifi ɓaran ka mbu̱ɗi. Yang njif nu̱ zhangki nyifi ɓaran mbu̱ larji nang a shikya du̱ngndan gha ma gwa nyifi nu̱ke ɓu̱ shi woɗa ɓa. 26Kap njif nu̱ke a ghar ghai ya, wa ku̱s ku̱ mburi nga. Ye maa nu̱ke nga si kap maavi ɓang ka kha su̱yen ndu̱ nga. Zhinkir ɓang ka vu̱r zhaaji ye nduki nu̱ke a ghar ghai ya kap.”

Yesu wa Shi Ɓalar Mu̱ti ɓaran

27“Leendang memu̱nara taɗa. Ngga zu̱kya nu̱m ɗo? Zu̱ nga nga za, ‘Zhinki, do sarchi nang ya ɓar mu?’ Auwo, ai nga ɓakya ma sarchi nang. 28Zhinki, vu̱r zhaaji ye dlu̱moro.” Tu̱ su̱qur ɓalar a vi viɗi za, “Ai, nga woɗa vu̱r zhaaji nu̱ si, yang ngga shaata vu̱r zhaaji nu̱ si tu̱k.” 29Nu̱ nduki nu̱ke chingndan nje tu̱kki su̱qurang, tu̱ zu̱ ku za, “Wa shi pedlangndi.” Ɓeenan za, “Ɗya nu̱ ru̱kti ɓu̱ Magham shiki ɓalar yenda.”

30Tu̱ Yesu ze wor za, “Su̱qur nang a ɓa ku̱me nga ɓa, a ɓa ku̱me tunu. 31Nang ke sarchi nu̱ke ka kumaki larji, ka komba nu̱ kwaaɗar larji nang#12:31 Komba nu̱ kwaaɗar larji A ve zu̱mndi loobo ɗyine Sheɗan.. 32Mbu̱ wa da nga ɓar mbu̱ larji ma yir mbu̱ viɗi#12:32 Mbu̱ wa da nga nu̱ viɗi A ve me qu̱far katlang. yang, ngga ɗa dut nduki kap nu̱ sha.” 33Yesu zu̱ nang ma ku̱ wut pooni mu̱ti nu̱ke chin a ma shiran.

34Tu̱ ndukyang tlogha ye Yesu za, “Ai, wopar ɓaarem wa zerem za, Masiya ka kha ndu̱ nyifiri koɗokhsi ɓa. Yang nu̱m saki to ki zu̱ran za wa ku̱s ku̱ da Yi ɓu̱ nduku nu̱ viɗa na?#12:34 Da Yi ɓu̱ nduku nu̱ viɗi A ve me qu̱far katlang. Ki ke Yi ɓu̱ nduka?”

35Tu̱ Yesu ze wor za, “Yarangang a nje su̱yen ndu̱ tunu me sarchi koɗomma. Shi ma yir sarchi nu̱ke yarangang a nje su̱yen ndu̱ tunu, ma ku̱ zhum maari gwa nu ɓa. Nu̱ yir mbu̱ zhum maari nu̱ zu̱n ye maa nu̱ke chin a yir su̱ ɓa. 36Maita ma yarangang, sarchi nu̱ke tun a su̱yen ndu̱ chin, ma ku̱ kha nu ma qusonggi ɓu̱ yarang.”

Yakhudeku wa Zu̱m guma ndu̱ Song Maito ɓaanda

Qu̱rse nu̱ Yesu shiki ɓalar nang, tu̱ ɗu̱ tu̱ ɗa tuka varan gha ye wora. 37Aa nu̱ke Yesu wa shi ɗye saidu khang gume wora, kap ndu̱ nang nu̱ maita nda ɓa. 38Ɗyinang shi ku̱me ku̱ nyel ɗyi nu̱ke annabi Yishaya zu̱ki za, “Zhinkir gwaanji, ki maitaki ɗyi nyem zu̱kya; Wut zalale ɓu̱ Zhinkirang ye kiya?” 39Nang ke ɗyi nu̱ saki nu̱ ɗu̱ma maitaran ku ɓa. Ba wa nu̱ Yishaya zu̱ki tu̱k ye maa nggur za, 40“Wa gaɓ ndu̱ wor ma pugumku, tu̱ sa memu̱na wor tu̱ shi kaaku̱ɗakh. Ma ku̱ na ndu̱ yiti wor ɓa, ku̱ da mban ndu̱ memu̱na wor, ma ku̱ ɗa gaɓ ku nu̱ sha tang shaana wor nu̱gha ɓa.” 41Yishaya zu̱ wanang ku̱me wa na zhaaji ɓu̱ Yesu tu̱ vu̱r labar ɓaran.

42Kap ndu̱ nang tu̱ nduki khang maita Yesu, su̱yen ndu̱ dlegumeku ɓaanda khang tu̱ maita nda ku. Yang ku̱me a sawa Parisekwang, nu̱ zu̱ ku za wor wa maita ɓa ku̱me ku̱ komba wor ɓar ye maa tabar ɓaanda ɓa. 43Ku̱me a shim makhtar ɓu̱ nduki tu̱ duk ɓu̱ Magham.

Ɓalar ɓu̱ Yesu ka Kuma Nduki

44Tu̱ Yesu da su̱quran nu̱ viɗi tu̱ zu̱ za, “Kap njif nu̱ maitaki nga, a maitakyang nga ɓa, a maitakyang njif nu̱ ɗa ru̱kki nga. 45Kap njif nu̱ke a nggu̱ti nga, a nakya njif nu̱ ɗa ru̱kki nga. 46Nga ɓa wa yarang mbu̱ larji ku̱me ku̱ aaki nu̱ke a maita nga shi yir mbu̱ zhum ɓa.”

47“Kap njif nu̱ tu̱kki shogar ɓanga, yang nu̱ khutlo ɓa, nga kya ma kuma nda ɓa. Ku̱me na nga ɓa ma kuma larji ɓa, nga ɓakya ma ɗana larji. 48Njif nu̱ zhangki nga gha, yang nu̱ dlu̱ shogar ɓang tu̱k zu̱m ɓa, nu̱ kuma nda nje, ɓalar nang zu̱ki, chin ka kumaki nda fu̱ɗar wuri. 49Ɗyi nu̱ke nga shogaran ɓara ɗya ɓang ɓa, Zhinkir ɓang nu̱ ɗa ru̱kki nga zu̱ki ɗyi nu̱ke ngga zu̱ki ndu̱ ɓalar nu̱ke ngga shiki. 50Nga zu̱n nduk ka gwa nyifi nu̱ke ɓu̱ shi woɗa ɓa ku̱nshe zu̱r ɓu̱ Zhinkirang. Ku̱me nang ɗyi nang zu̱ki kap, nga zu̱kya ba torop ɗyi nu̱ Zhinkirang zu̱ki ya.”

Currently Selected:

Yokhana 12: ttrNT

Highlight

Copy