Tlu̱nar ɓu̱ Pudeku 23

1Tu̱ Bulus nggu̱t tabar dle gumekwang njang tu̱ zu̱ za, “Nyeezaku, ma ɓar meeni damta nje mbu̱ memu̱nara ɓa. Yang kwaari ɓang mbarkandi nu̱ wut ya za nga shi ɗyi galkandi nu̱ke ka viki nu̱ chele ɓang ndu̱ Magham ɓa.” 2Tu̱kti wanang tu̱ Khananiya gorkir ɓu̱ kurukwang ze nduki nu̱ke a nje chingndan bing ndu̱ Bulus ku̱ ɓu̱tl menang. 3Tu̱ Bulus ze nda za, “To garuk nu̱ pashaki nu̱ gha ndu̱ ghai ɓongndi.#23:3 Garuk nu̱ pashaki nu̱ gha ndu̱ ghai ɓongndimban za nu̱ mu̱nari. Magham ka ɓu̱tlor tu̱k! To kharan gha fan ma kuma nga ndu̱ woparang, yang ta sa za ku̱ ɓu̱tli nga, aa nu̱ke woparang nu̱ zu̱ za ku̱ shi wanang ɓa.”#23:3 Nggu̱t tu̱k mbu̱: Mat 23:27-28.

4Tu̱ nduki nu̱ke a nje chingdanang ze Bulus za, “Yang ta pu̱zkya gorkir kuru ɓu̱ Maghamang mu?”

5Tu̱ Bulus tlogha ye wor za, “Nyeezaku, nang zu̱n za chin ke gorkir ɓu̱ kurukwang ɓa. Jiwa a nje bu̱laran za, ‘Ku̱ pu̱z na dle gume ɓu̱ nduki ɓa.’ ”#23:5 Nggu̱t tu̱k mbu̱: Viri 22:28.

6Nu̱ Bulus daki mban za ɓeeni ndukyang ɗya Saduke ku, yang ɓeenan ɗya Parise ku, tu̱ da su̱quran nu̱ viɗi mbu̱ tabar dle gume ɓu̱ Yakhudekwang a za, “Nyeezaku, ai, nga Parise woi ɓu̱ Parise. Yang wonji a kuma nga ku̱me sar memu̱nar nang shiki nu̱ ɗyine jiiri mbe mu̱ti.”#23:6 Nggu̱t tu̱k mbu̱: Tlp 26:5; Fil 3:5. 7Zu̱r wanang tu̱ keele ji chele Pariseku ndu̱ Sadukeku tu̱ tabarang shakh san rap. 8(Ku̱me Sadukeku nu̱ maita za jiiri mbe mu̱tang a nje ɓa, yang nu̱ ru̱ktiku ɓu̱ Magham ndu̱ jiimbiku a nje shwat ɓa. Ɓu̱ Pariseku yang wa maita za ɗyi kunungndi nang a nje.)

9Tu̱ keele maɗyikandi ji chele ɓaanda, tu̱ yang maalu̱m taurete nu̱ke ɗya Pariseku nggur ji tu̱ ching gha ku a ɓalarku a zu̱ran za, “Ɓaarem nyem na zop nu̱ khuski nang shiki ɓa. Ki zu̱nkya? Bai jiimba gom, yang nu̱ ru̱kti ɓu̱ Magham gom shiki ɓalar yenda.” 10Nu̱ keele gangki, tu̱ gorkir sojang tu̱k sawa ku̱ ɓyakh Bulus nu̱gha kushit kushit ku ɓa. Tu̱ yang sa sojekwang tu̱ zhur ku tu̱ ɗa lawa Bulus ɓar kha wor ndu̱ du̱mbu̱r, tu̱ ɗu̱ ndu̱ chin ye maa khar ɓu̱ sojekwang.

11Nu̱ virkir shiki tu̱ Zhinerem gwaanji ching gha bing ndu̱ Bulus tu̱ ze nda za, “Gu̱n memu̱naro, ku̱me ba wa no saidaki nga mbu̱ ghai Urshalima, to ka saida nga wanang tu̱k mbu̱ ghai Roma.”

Wa shi Sawari ma Tlagha Bulus ku

12Nu̱ dumaari, tu̱ Yakhudekwang daasa ma tlagha nda Bulus. Tu̱ ku̱mnda ku za wor ɓu̱ zu̱m ɓa, yang wor ɓu̱ za aa nu̱m ɓa, kope wor wa tlagha Bulus. 13Yang nduki nu̱ shiki ku̱mndar nang wa duk nduki ɗyin vat. 14Tu̱ ɗu̱ ku she kuruku rututundi ndu̱ dlegumeku ɓu̱ ndukyang tu̱ zu̱ ku za, “Chem wa shi ku̱mndar gwaanji nyem za chem ɓu̱ zu̱m aa nu̱m ɓa yang chem ɓu̱ za aa nu̱m ɓa kope chem wa tlagha Bulus nang. 15Ku̱me nang, tun ndu̱ tabar dle gume ɓu̱ Yakhudekwang tun ka ru̱k ye gorkir ɓu̱ sojekwang ku̱ ɗa ɓa ndu̱ chin wa tun a shim ku̱ mbu nu mbu̱ ɓalarang nu̱gha zum mbari. Yang chem ka daasa chem tlagha nda me ku̱ ɗa khu̱l she nu.”

16Yang tu̱ ye khuski ngguri ngu̱nyin Bulus tu̱k labarang tu̱ ɗa ze Bulus mbu̱ maa khar ɓu̱ sojekwang.

17Tu̱ Bulus qa soje gwaanji ɓu̱ Rome ngguri tu̱ ze nda za, “Ɗu ndu̱ nyakhtlir nang she gorkir ɓaanu, ɓalar a nje nu̱ke a shim zu̱ran yenda.” 18Tu̱ soje gwaanjang ɗu̱ nu̱ nyakhtlirang she gorkirang.

Tu̱ soje gwaanjang ze gorkirang za, “Ye zhaaru̱m nu̱ka qaki nda za Bulusang qaki nga, tu̱ khuti nga za a ɓa nga ndu̱ nyakhtlir nang shoro ku̱me a ma zu̱ ɗyi nggur yoro.”

19Tu̱ gorkir ɓu̱ sojekwang khuɓ khar nyakhtlirang, tu̱ dut nda nu̱ konggol, tu̱ zham nda chin ɗyenda za, “Ta shim kya zu̱ nu̱m ya?”

20Tu̱ nyakhtlirang zu̱ za, “Dlegumeku ɓu̱ Yakhudekwang wa tlaɗ ku za wora ma khutoro ku̱ ɗa ɓa nu̱ Bulus gume tabar wuri, wa wora shim ku̱ mbu nda mbu̱ ɓalarang nu̱gha mbari. 21Yang tlogha na ye wor ɓa, ku̱me nduki nu̱ dukki ɗyin vat chele ɓaanda a nje luɓaran ku me njivi, a shim ku̱ tlagha nda Bulus. Wa ku̱mnda ku za wor ɓu̱ zu̱m ɓa yang wor ɓu̱ za ɓa, kope wor wa tlagha nda. Yang wa woɗa daasa var wor ku a bu kya tloghar ɓa ɗyenda.”

22Tu̱ gorkir ɓu̱ sojekwang dut dlu̱mndan za, “Zu̱ na ye aaki no za ta zu̱ ɓalar nang ya ɓa.” Tu̱ shi khar mu̱ndi ndu̱ nyakhtlirang.

Wa Tu̱pa Bulus nu̱ she Nggomna Feliks

23Tu̱ gorkirang qa soje gwaanjiku wor rap tu̱ ze wor za, “Daasa ma tun a ma yir Kaisariya vi mu̱dlam nu̱ virkiri. Su̱yen ndu̱ sojeku won rap, ndu̱ soje nu̱ dlar pu̱rsiku ɗyin mut, ndu̱ sojeku won rap nu̱ka shiki dakhlar ndu̱ kaaziku. 24Gwa ma pu̱rsiku ye Bulus nu̱ke ka lu̱baki. Tun ɗu̱ ndu̱ chin she nggomna Feliks sur.”

25Tu̱ gorkir ɓu̱ sojekwang bu̱la lagarkati.

26A za, lagarkati nang a vi she Ku̱laudiyus Lisiyas.

Ma yir she Nu̱ Du̱mbu̱rang, Nggomna Feliks.

“Nga qaandi yor maɗyi.

27“Khuskinang, Yakhudeku a ku̱ski nda tu̱ shi bing tlagha nda ku, kom tang ɗu̱ ɗau, nga ndu̱ sojeku ɓanga ta nga lawa nda ɓar kha wora, ku̱me nga tu̱k za zalale khar ye Roma nje kha nda. 28Nu̱ke nga shim zu̱n nga ɗyi nu̱ shiki ye wor tang ɗu̱ ndu̱ chin gume tabar dle gume ɓu̱ Yakhudekwang. 29Yang tang gwa a pu̱zi nda ku ɗyine ɓalar woparku ɓaanda, yang zop nu̱ shikyang nu̱ khu̱l ku̱ gu̱n nda gha ɓa, yang ku̱ tlagha nda ɓa. 30Nang gwaki labarang za a daasa shi ɗyi malkandi ku yenda, nang ke ɗyi nu̱ saki tang a ru̱kti nda nu̱ sho ro fan ndu̱ fan. Nga ze nu̱ dar zhaano ku ɓaranang ku̱ zu̱ zop nu̱ shikyang yoro.”

31Tu̱ sojekwang ɗu̱ ndu̱ Bulus ku ɗo ba wa nu̱ zu̱ki ye wora, tu̱ ɗu̱ ndu̱ chin Antipatiris mbu̱ virkiri. 32Vi dumaaran tu̱ njig sojeku nu̱ lu̱bar pu̱rsikwang tu̱ peeta ndu̱ chin, ɓaanda yang tu̱ ɗa gaɓ nu̱ ye maa khar ɓaandang. 33Nu̱ sojeku nu̱ lu̱bar pu̱rsikwang khu̱lki mbu̱ ghai Kaisariya, tu̱ vu̱r lagarkatang ye nggomna, tu̱ njig Bulus nu̱ mbu̱ kharan. 34Nu̱ nggomna nggu̱tki lagarkatang, tu̱ zham Bulus ye maa nu̱ ɗa viki si. Nu̱ tu̱kki za ɗya ye Kilikiya, 35tu̱ zu̱ za, “Ngga kuma ɓalar nang sarchi nu̱ ke nu̱ dar zhaano ɓarang a khu̱lki ku.” Tu̱ nggomnyang sa za ku̱ du̱ng nda nu̱ mbu̱ rafti kwaaɗar nu̱ kuji Khiridus du̱nki.

Currently Selected:

Tlu̱nar ɓu̱ Pudeku 23: ttrNT

Highlight

Copy