Tlu̱nar ɓu̱ Pudeku 12
12
Wa shaata Vu̱r Bonye ye nu̱ Mbu Yesu ku
1Yang ba ye sarchi nang kuji Khiridus ku̱ski ɓeeni nduki mbu̱ tabar ɓu̱ nu̱ mbu Yesu ku ma vu̱r bonye ye wora. 2Khiridus saki ku̱ tlagha Yaqub, khachin Yokhana nu̱ gha ndu̱ kaskari. 3Nu̱ naki Yakhudeku wa kasha ɗyi nyin shikyang, tu̱ ku̱s Biturus tu̱k. Ku̱si nda sarchi tabar nji ɓurti tolir nu̱ke yis mban ɓa ndang. 4Nu̱ ku̱ski nda ku tu̱ khi nda gha zhaaru̱m, tu̱ sa sojeku gwaanggu̱m njong ku̱ bu yinan. A shim ku̱ ɗa vi ndu̱ chin dam gaanje tabar paskyang, ku̱me ku̱ shi kumar yenda ye dalangi.
5Sarchi nu̱ke Biturus a zhaaru̱m, tu̱ tabar ɓu̱ nu̱ mbu Yesu ku ki barar ye Magham maɗyi ku̱me chin.
Wa Lawa Biturus ɓar mbu Zhaaru̱m
6Ba mbu̱ virkir nu̱ke Khiridus a konyi viri ndu̱ Biturus dumaari ma kumarang, chin Biturusang a nje gu̱ndan ndu̱ yakhli rap, a ɗyenir chele sojeku rap, nu̱ bu me zhaaru̱m kwang a nje me viri a bu zhaaru̱mang. 7Fan ndu̱ fan, tu̱ nu̱ ru̱kti ɓu̱ Magham wut varan, tu̱ yarang shi wuti mbu̱ kibang. Kom tu̱ nu̱ ru̱ktang yakhta Biturus ve ku̱bdan tu̱ Biturus ji nu̱ viɗi. Tu̱ nu̱ ru̱ktang ze nda za, “Ju ɗau!” Tu̱ yakhlikwang ghu̱r ɓar ve qura bu̱nankwang.
8Tu̱ nu̱ ru̱kti ɓu̱ Maghamang ze nda za, “So luktiku ɓaaro ndu̱ paghamndi.” Nu̱ Biturus saki, tu̱ nu̱ ru̱ktang ze nda za, “Lu̱po ɗye lu̱par ɓaaro ta mbu gaanja.” 9Tu̱ Biturus mbu nda tu̱ ɗa vi ɓar mbu̱ zhaaru̱mang, nu̱ zu̱n za ɗyi nu̱ke nu̱ ru̱ktang a shiranang ɗya yel ɓa, a taman za qu̱n kya yitan ma na ɗyi tukakandi. 10Nu̱ peetaki nu̱ buuriku nu̱ da ndu̱ nu̱ rap tu̱ khu̱l ku me viri nu̱ shiki ndu̱ vi nu̱ nduk ka viki nje ma yir mbu̱ ghayi, tu̱ me virang qu̱n ndu̱ varan tu̱ vi nu̱ dam ku. Ba nu̱ khu̱lki ku ve lauɗar su̱ njiv ngguri, tu̱ nu̱ ru̱kti ɓu̱ Maghamang njigti nda.
11Nu̱ Biturus a gaɓki nu̱ mbu̱ khangkal ɓaran tu̱ zu̱ za, “Leendang nga zu̱n shwat, Magham a ru̱kki nu̱ ru̱kti ɓaran ku̱ lawa nga ɓar mbu̱ khar Khiridus kom ndu̱ mu̱nar nu̱ke Yakhudeku daasaki nu̱ ɗyina.”
12Nu̱ Biturus daki mban, tu̱ ɗu̱ kaa ɓu̱ Maryam, man Yokhana nu̱ka qaki nda za Markus ye maa nu̱ke nduki tabaki a bararku. 13Nu̱ ghwatki me vi raftang, tu̱ wonkhar nggur nu̱ke a tlu̱nar mbu̱ raftang dlu̱man za Ruda a ɓa ma na nji ɗya kiya. 14Nu̱ saidaki ɗya su̱qura Biturus, nu̱ qu̱n me virang ɓa ku̱me kasha tu̱ ɗan mbu, tu̱ ze wor za, Biturus a nje chingndan me virang.
15Tu̱ yang ze nda ku za, “To yirtan!” Tu̱ wonkharang gang varan nu̱ si za ɗya ba chin. Tu̱ zu̱ ku za, “Mbu̱ wanang, ɗya jiimban!” 16Tu̱ Biturus zu̱m guma ndu̱ ghwaati me virang. Nu̱ qu̱nki ku tu̱ na nda tu̱ shi lazham ku. 17Tu̱ yang Biturus bu ye wor nu̱ kharan za ku̱ kha yit ku, kom tu̱ ndaa su̱ ɗyi nu̱ Magham shiki ta fet nda ɓar mbu̱ zhaaru̱mang. Tu̱ ze wor tu̱k za, “Zu̱ ma ɗyi nang ye Yaqub ndu̱ ɓeeni nyeezerem.” Kom tu̱ ji tu̱ ɗu̱ ye maa ngguri.
18Nu̱ dumaari shiki, damtar nu̱ jiiki chele sojeku nang ɗyine ɗyi nu̱ ɗatlki ndu̱ Biturus palaman ɓa. 19Nu̱ Khiridus laɓki nda nu̱ gwa nda ɓa, tu̱ shi zhamndi ye nu̱ bu zhaaru̱m kwang tu̱ sa za ku̱ tlagha wor nu̱gha. Qu̱rsan tu̱ Khiridus njig Yakhudiya tu̱ ɗi Kaisariya tu̱ ɗa qan rap njigi.
Mu̱ti ɓu̱ Khiridus
20Ye sarchi nang, Khiridus nu̱ka dlu̱ yen ndu̱ nduki nu̱ Taya ndu̱ Sidon ɓa. Yang ghaiku nang ka gwa ɗye zu̱mndi ɓaanda she dlar ghai nu̱ke Khiridus a kwaaɗar ɗyinan. Ku̱me nang, tu̱ nduki nu̱ mbu̱ ghaiku nang ɗu̱ she Bu̱lastus nu̱ke ɗya nu̱ tlu̱nar ɓu̱ kuji nu̱ke a bing ndu̱ chin. Tu̱ khuɗ ku̱ gu̱n su̱ ye wor ku̱me wora shim somta yen ndu̱ Khiridus. 21Tu̱ sa fu̱ɗar nu̱ke wor ka naki kuji. Tu̱ Khiridus shi viri mbu̱ lukti kwaaɗar ɓaran, tu̱ khan ɗyin zhakhɗye ɓaran tu̱ nggaasi ɓalar ye ndukyang. 22Nu̱ ndukyang tu̱kki ɓalar ɓaranang tu̱ ku̱s zhanare ku a zu̱ran za, “Nang shwat ɗya su̱qur nduk ɓa, ɗya su̱qur maghamndi ngguri!” 23Fan ndu̱ fan tu̱ nu̱ ru̱kti ɓu̱ Magham nggur a ɓa tu̱ ghwat nda nu̱ yaghai, ku̱me nu̱ vu̱r gorkir ye Magham ɓa. Tu̱ khogdiku ki zu̱m nda tu̱ mu̱ɗi.
24Tu̱ ɓalar ɓu̱ Magham ki zu̱m guma tu̱ dlu̱ ɗyin maari.
25Tu̱ Barnaba ndu̱ Shawulu a gaɓ nu̱ Urshalima, gaanje wa woɗa tlu̱nar ɓaanda, yang a gaɓ ku ndu̱ Yokhana nu̱ka qaki nda za Markus.
Currently Selected:
Tlu̱nar ɓu̱ Pudeku 12: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
