John 6
6
Iaiak-aton nateioteriȣasonterakȣen tsini hoiaton ne Roiatatokenti San.
1ETHONE are onen ne Iesos tonsahaiaiake ne Galile tsi kaniatare ne Tiberiad.
2Kentiokoȣanen ronȣanonteratiene; ne tsi iontkatoskȣe ne ioriȣanerakȣatenions tsinisakotierasehakȣe ne iakohnonȣaktanionni.
3Onontoharake kati niiahare ne Iesos, eh iahatien nok oni ne raotiokȣa.
4Onen thoha siiakaheȣe tsini honentanoronse ne Sitaeronon nehne Shotonnhestston.
5Ȣahatarakestsko ne Iesos, Sahatkatto tsini iotiokȣatsanit ronȣanonteratie ȣahaȣenhase ne Philippe, ȣahenron: kah nonȣe ienteȣanataraninon naiethinonte neh nikentiokȣa?
6Neok nahotenienten tsi neh ȣahenron, aseken roterientarakȣe tsi nenhaiere.
7Tontahenron ne Philippe; ok oni ne tekeni teȣenniaȣe nikakȣenistake aeteȣanataraninonte, sekon ki iah takakȣeni ne ok oni nostonhasonha aiakoniatosere.
8Tihaiatate enskat ne raotiokȣa, nehne Simon Tier iatatekenha André ronȣaiasts, tahenron.
9Kentho ihres raksaa, ȣisk nihonataraien teiotikonstonres tanon tekentsiake: nahoten kati neneh kasta neh nikentiokȣa?
10Ȣahenron kati ne Iesos: iestsirori ehtake iontien. Kahentiiohne neh nonȣe; neh nahoten ne ȣisk niȣenniaȣehetserasen niionkȣetake neh nonȣe nahontien.
11Ȣatrakȣe kati ne Iesos ne kanatarok nok ȣahaiatateriste, ȣasakotiiakonhase ne raotiokȣa tsiniiakon ieterontakȣe; ȣasakohnon oni neneh ne tekentsiake tsinikon teiakotonȣentsioni.
12Nok nonen sahakohtane, ȣasakaȣenhase ne raotiokȣa: satsioronko ne iotatenronokonha tosa othenon akaiesha.
13Sahatiroroke kati, nok tekeni iaȣenre niȣatherake ȣakanane tsinikon ȣahotatenre ne ȣisk nikanatarake teiotikonstonres, neh nonen akȣekon siiakotaon.
14Tsi ȣaontkatto nonkȣesonha tsi nahaiere ne Iesos, iontonnionskȣe: Oriȣiio tsi neh kehiken ne Rotokense tare onȣentsiake.
15Nok tanon ne Iesos roterientaratsion tsi enthonne ienhonȣaiatenhaȣe nahonȣanontiioste, ehren sarete, onontoharake raonhatsiȣa iahatekȣashen.
16Nok nonen siiokarasneha tontahonnontastsnente ne raotiokȣa kaniatarakta niiaonne.
17Sahontita rahotiniarotakon, nok tonsahatiiaiake Kapernaumke niiaonne; ok eh iahokaraȣe iah tesesakohnonteraon ne Iesos.
18Onen oni tontasaȣen ȣatkaȣerakȣe.
19Nok tanon nonen neh nahoten nasen niȣasen niȣateniententserake siiehonenon tehonatkarerakȣastonhatie, iahontkatto onekakesson tare ne Iesos, eh niiahaȣenonhatie tsinonȣe nihatihonhiontie; oriȣiio tsi ȣahonateronhienten.
20Iahenron kati: iise, tosa seȣateronn.
21Oriȣiio tsi sahontsennonni nonen sonsahatita, oksaok oni eh iahonrarho tsi nonȣe niiahonenonha tiene.
22Nok ne tsi ȣahorhenne, tsiniiakon ne kenh nakaniatarati ieterontakȣe, iakoterientaratsion tsi neok enskat kaniarotaientakȣe ne raotiokȣa shonatitahkȣen nok oni tsi iah teshotiten ne Iesos rononhaa ok ne raotiokȣa teshotiiaiakon.
23Nok tanon nonen etho sonsakontkennisa noniarotasonha Tiberiad natontakonne akta tsi nonȣe ne Iesos nihaiatateriston ne ȣisk nikanatarake oni sakononten.
24Ȣahotinikonraientane tsi iah eh tehaiataratie ne Iesos oni ne raotiokȣa, ok kati neh ȣaontitakȣe netho skaniarotakerontakȣe, nok Kapernaiimke iathonnoiake ronȣaiatisakonhatie ne Iesos.
25Ȣahonniron nonen siiaonȣaiatatsenri ihsi nakaniatarati: Saianer! katke kentho nitisa?
26Tontahenron ne Iesos tsi tontasakoȣennaȣeron: Oriȣiio oriȣiio, tsi kȣarori, tsi iah neh teskȣaiatisaktonhaties tsi ȣeseȣatkatto ne ioriȣanerakȣat, neh tanon tsi kȣanataranonten nok oni tsi seȣatahon.
27Tosa neok seȣaser tsinahoten ne kenheions, neh tanon ne ionnhe onȣe oni iaiakohiatheȣe Karonhiake, neh oni nʼonkȣe Ronȣaienha hentsitsion: Aseken ne Roniha Niio, akȣa raonhake tehonetorarakon ne raonikonra.
28Tontahonniron: oh kati naiakȣaiere naontasakȣanikonraierite ne Niio?
29Tontahenron ne Iesos: kenh kaien rariȣanontons ne Niio: ahontatsiseȣeȣetakȣe ne totorion.
30Tontahonniron: oh nisierha naioriȣanerakȣaton iakȣatkatto, nok entiakȣetakȣe? oh nisaiotenseroten?
31Iakhinihokonkenha Kanataranoron rotinatarakon kahentakekoȣa tsiki niiot tsi kaiaton: Sakonatarononten ne karonhiake nitiotenatarinon.
32Tontahenron ne Iesos tsi tontasakoȣennaȣeron: Oriȣiio akȣa oriȣiio tsi kȣaroris; iahse karonhiake tethonatarenha ne Moïs ne etsiseȣanataranonten. Rakeniha tanon tokenske etsiseȣanataranontens ne karonhiake nitiaȣenon.
33Aseken nehe rahonatarok ne Niio ne karonhiake nithaȣenon, nok sakaonnhests nonkȣe.
34Tontahonniron kati: Saianer neh ki tiotkon askȣanataranontenseke.
35Tontahenron ne Iesos: Ii ne ionnhe ne kanatarok, iah nonȣenton tiiahatonkariake nenhakeniahese; iah oni tahonsahoniatathen nentretakȣe nak sennakon.
36Onen ki sane kȣarori, tsi takȣatkattos, iah ki sane tetiseȣetakȣen.
37Tsinikon rakaȣis ne Rakeniha, akȣekon enȣakrane, nok iah tahonsahiiatinekenȣe nenhakeniahese:
38Aseken tsi teȣakastsnenton ne karonhiake, iah neh teteȣakenienton nii akatatenikonraierite neh tanon nahinikonraierite ne thakatennieton.
39Kenh kati nihonikonroten ne Rakeniha ne thakatennieton: nene tosa othenon aonkatons tsinikon rakaȣi, akȣekon tanon aonsakheionnhete nonen enȣatenniserokten.
40Kenh oni natehotonȣentsioni ne thakatennieton; tsiniiakon enhonȣanoronkȣe entiaketakȣe oni raosennakon ne thotennieton Karonhiake aiontsennonni, nok ensekheionnhete nonaken tsi teȣenniseronte.
41Ȣahonerientaksenne ne Sitaeronon tsi ronattonte, ȣahenron: Ii, ne karonhiake nitiotenatarinon.
42Aseken rontonhakȣe: iah kenh naha neh teken ne Sose Roienha akȣekon niietsiteȣaienteri ne roniha oni ne ronistenha? Oh kati naha niiotieren ne raonha tsi raton: karonhiake niteȣakenon?
43Tontasakoȣennaȣeron ne Iesos, ȣahenron: Tosa sotsi seȣariȣakatat.
44Iah onka takakȣeni aonkiatorenne; ne iah Rakeniha ne oni ne thakatorion taontahoiatatirontane, nok nii enshiionnhete nonen onaken teȣenniseronte.
45Ȣaton tsi rotiiaton ne Rotitokensehakȣe: Niio ne entkaientakȣe tsi enhonȣatirihonnien. Neh kati nonka kiok enhoȣennarakȣen ne Rakeniha, Raonha oni enhorihonnienni, neh tohiken enhakiatorenne.
46Iah ki sane nonȣenton onka nakoren tehoken ne Roniha, neok nakȣa Niione nithaȣenon neh roken ne Roniha.
47Oriȣiio akȣa oriȣiio tsi kȣaroris, onka entretakȣe nʼaksennakon henronnheke onȣe.
48Ii ne kanatarok niakonnhekȣen.
49Seȣasotsera rotinatarakon ne kanataranoron kaentakekoȣa, nok ronahȣentaon.
50Kenh kaien nehne karonhiake nitiotenatarinon; neh neiah terenheionsere onka enhanatarake ne kenh kanatarok.
51Ii ne kanatarok ne ionnhe, nehne karonhiake nitiaȣenon; toka onkakiok neh enhanatarake henronnheke onȣe, nok ne kanatarok nenthiion neh nakȣa ii akeȣaronk, neh oni ne kheiaȣire naiakonnhekȣen nonkȣe okon.
52Ronateriȣakȣeksene kati ne Sitaeronon, nok rontonhakȣe; oh ne kenh neneh nenhaiere kehiken nasonkȣanonte ne raoȣaronk?
53Tontasakaȣenhase ne Iesos: Oriȣiio oriȣiio tsi kȣaroris niah tenseȣaȣarakhe nonkȣe Roienha raoȣaronk, iah oni tenseȣanekirane ne raonekȣensa iah ki taetsionnheke ne tsionhake.
54Onka kiok ihraks nakeȣaronk oni ranekirha nakenekȣensa, roien naronnheke Onȣe, nok enshiionnhete nonaken teȣenniseronte.
55Aseken akȣa oriȣiio tsi kakkȣa nakeȣaronk, nok ienekirata nake nekȣensa.
56Onka enhaȣarake nakeȣaronk oni enhanekira nakenekȣensa nehtohiken tenhiakenikȣekhene.
57Tsikiniiot ne Rakeniha ne takatorion Ronnhe nok raonhake konnhe, eh kati oni nii nenhiionnhete nenhakeȣarake.
58Kenh kaien ne karonhiake nitiotenatarinon, iah eh tekanataroten tsiniiot ne ietsinihokonkenha rotinatarakon tanon ronaȣentaon; nok ne kenh kaien enhronnheke Onȣe neneh nenhanatarake.
59Tsi ionterennaientakȣa nonȣe kehiken neh nihaȣen sissakorionnenni Kapernaiimke.
60Ronentiokoȣanen ne raotiokȣa nahonniron sahatiȣennaronke neh nikaȣennoten: Oriȣiio tsi kaȣennasatste tsinahoten raton.
61Roterientaratsion se ne Iesos tsini hotinikonraȣenskȣe ne raotiokȣa ȣasakaȣenhase kati: Seȣariȣaientatenni kati kenh tsinahoten katon?
62Oh kati ne kenh naiaȣenne natsiseȣaken nonkȣe Roienha eh niiaonsare tsi nonȣe thenterontakȣe ne tiotierenton?
63Kanikonra se iakaonnhests nok noȣaronk iah neneh othenon tekastak: kehiken nikaȣennoten kȣaroris neh nakȣa aoskon kanikonra oni ionnhe.
64Nok sane sekon otiake tsinitsion neh iah tetiseȣetakȣen; aseken ok sihoterientare ne Iesos, onka neiah taontaretakȣe, onka oni ienhotenninon.
65Ȣasakaȣenhase kati: neh ȣahi ȣaonni ȣaken tsi kȣarori: iah onka takakȣeni aonkrane ne iah Rakeniha tenhoȣire.
66Ethone onen kentiokoȣanen tsini hati ne raotiokȣa sahonȣateȣentete nok ehren saonnete.
67Iesos ȣasakaȣenhase ne tekeni iaȣenre Nihati: iah oniken oni nise teseȣere ahonseseȣatenti?
68Simon Tier tahatati, ȣahenron: Saianer! onka aonsaiakhiiateranentakten? ise ishaȣe noȣenna ne ionnhe onȣe.
69Nok tionkȣetakȣen ionkȣaterientare oni tsi ise ne Keristos Niio Roienha.
70Tontahenron ne Iesos: iah kenh naha ii tekȣaiatarakȣen ne tekeni iaȣenre Nitsion? nok sane sekon saiatat akȣa ranessonronon.
71Sitas Iskariot rotonhakȣe tsineh ȣahenron, Simon roienha, aseken raonha kenhne nenhotenninon, raiataresane ne tekeni iaȣenre Nihati.
Currently Selected:
John 6: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
