Matio 14

Ka nipotc Capatis

(Natawapata kaie Mark 6.14-29; Luc 9.7-9)

1Ani apitc, Hérode, anahwe ka okimawikopanen Galilée askik, ki petakepan e arimomakaniwiritci Cecoca. 2Ki itew anihi ka atoskectakotc: “Enko na anahwe Capatis! Ki ni apitcipaw! Ekoni wetci ici kackitatc aniheriw, e mata kackitatc.”

3 Hérode meka ki itepan kitci makonakaniwiritci Capatisa, kitci takopitakaniwiritci kaie kitci kipohwakaniwiritci kipohotowikamikok. Wetci ki totamokopanen aniheriw Hérode, osam ni anihi Hérodiade otci, ocima Piripa okomiriw. 4Capatis meka ki itepan anihi Héroda: “Nama ni actew kitci okomiin Hérodiade!”

5Nataweritamokopan Hérode kitci nipahakaniwiritci Capatisa, aric kaie koctepan cota iriniwa. Kaskina meka wirawaw iterimewakopan anihi Capatisa “ka nikan tipatcimotc.”

6Mekwata aniheriw e kicikarik e tipickak Hérode, Hérodiade otanisiriw ki nimiriw neta e mitcetiritci ka ki wicamakaniwirispana. Hérode ki micta mirerimew. 7Ki tca nespi tapwew kitci miratc kaskina ke ici nataweritamiritci. 8Okawiwa e ki itikotc, anahwe ickwecic ki itew: “Pe mirici ota Capatis octikwan, orakanik kitci acterik!”

9Ki kackeritam anahwe okimaw. Peikon aric ki itew kitci mirakaniwiritci anihi ickweca ka ici nataweritamiritci, osam e ki nespi tapwetc neta e mitcetinaniwonik. 10Ki tca iciticahwew iriniwa neta kipohotowikamikok kitci nta kickikwecowakaniwiritci Capatisa. 11Ki petakaniwoniw aniheriw octikwaniw orakanik e acterik. Ki mirakaniwiw anahwe ickwecic, minawatc wir anahwe ickwecic ki iti mirew okawiwa. 12Owitcewakana Capatis ki pe natcipatariwa owiawiriw e nta rikwaskatatcik. Minawatc ki nta witamawewok Cecoca aniheriw e ki isparinik.

Cecoc e acamatc 5 000 iriniwa

(Natawapata kaie Mark 6.30-44; Luc 9.10-17; Jean 6.1-14)

13Ka petaketc Cecoc e ki nipahakaniwiritci Capatisa, ki matceho, wircike wiec e icitcimetc aka e ici taniwonik. Aric mitcet iriniwok ki petakewok. Ki otci matcawok otenamiwak, e nosanehwatcik Cecoca, rarewak sakihikanik e pimotetcik. 14Ka macakatc Cecoc, wapatam e mitcetinaniwonik. Ki micta kitimakerimew anahweriw iriniwa. Ekoni e ici kikehimatc otakosimiwariw.

15E iti awokaskowarik, aci pe natawapamiko Cecoc owitcewakana e itikotc: “Aci iti tipiskaw kirika nama tapwe taniwon ota. Ki ta matceticohwawok kaskina aniki iriniwok kitci icatcik papikan otenacik ka takonik kaie kitci otapinamatisotcik mitcimiriw.”

16Aci itew Cecoc: “Nama takatc kata matcawok. Kirawaw tipirawe otinamowakok ke mitcikik!”

17Itiko owitcewakana: “Tepirak niaraniwok pakwecikanak kirika niciwok namesak.”

18“Pecowakw ota,” itew Cecoc.

19Minawatc itew anihi iriniwa e mitcetiritci kitci apiritci mackocik. Aci otapinew anihi niaran pakwecikana acitc nicw namesa. Itapiw icpimik wakwek, mikwetc e itatc Kice Manitowa. Ki pakwepitew pakwecikana. Minawatc ki mirew owitcewakana kitci papakitinaritci. 20Tato nta e tacitcik aniki iriniwok kaskina ki mitcisowok nac e miro tipiparitcik. Cecoc owitcewakana ki mawotcitawok ka ki ickonikaterik mitcimiriw. Mitato acitc nicw pakitenakaniw ki mockinetawok. 21Aniki iriniwok ka ki acamakaniwitcik, niaranaw kice mitato mitana taciwakopan. Nama aric ki otci akimakaniwiwok iskwewok kirika awacak kaie wirawaw e ki mitcisotcik.

Cecoc e pimotetc okitc sakihikanik

(Natawapata kaie Mark 6.45-52; Jean 6.15-21)

22Kotc ka ickwa acamatc anahweriw iriniwa e mitcetiritci, Cecoc ki itew owitcewakana kitci positcimeritci kitci nikan matcehoritci e acohamiritci sakihikaniw epwamoci wir, kitci itatc Cecoc anihi mitcet iriniwa kitci kiweritci. 23Ka ickwa kiweticohwatc anihi iriniwa, aci wircike ki amatciwew matinacik e nta aiamihatc. Ka iti awokaskowarik, kiapatc wircike neta taci tacikepan. 24Aci aniki Cecoc owitcewakana tetawokam iti aitawok.#14.24 tetawokam iti aitawok: Wiec pot aci apitokam neta sakihikanik. Nakahactaniw otcimaniwaw e mitcahanik e micta rotinik, ekote meka mia e pe icirowerik. 25Epwamoci sakasikeritci pisimwa, Cecoc natawapamew owitcewakana, okitc nipik e pimotetc. 26Aniki Cecoc owitcewakana ka wapamatcik Cecoca e pimoteritci okitc nipik ki micta sekisiwok, e itetcik: “Tcipai na!”#14.26 Tcipai na!: Nit amatisonan, iteritamwakopan.

27Tecikotc ki aimihew Cecoc, e itatc: “Sokitehekw! Nin ni! Akawir sekisikw!”

28Aci Pien itew: “Teperitcikein, kecpin tapwe kir, tota kitci pimoteian kaie nin okitc nipik kitci natawapamitan.”

29“Petcimote,” itiko Cecoca.

Aci Pien kapaw tcimanik e iti pimotetc okitc nipik e natcikapowictawatc Cecoca. 30Aric ka wapatak e micta rotinik, ki sekisiw. Aci kaie iti kitapariw. Ekoni e ici tepwetc, e itetc: “Teperitcikein, akwacimici!”

31Tecikotc Cecoc ki icitcitcerictawew e makonatc, kirika e itatc: “Nama micaw kit asperimowin! Kekwan wetci ki anwetowiin?”

32Ekoni e ici positcimetcik e nicitcik. Kek tekaci ki acteraweriw. 33Aci anahweriw Cecoc owitcewakana ka apiritci neta tcimanik nipiskoctako, e itikotc: “Tapwe ni kir Kice Manito Okosa!”

Cecoc e kikehatc ka akosiritci Génésareth askik itekera

(Natawapata kaie Mark 6.53-56)

34Minawatc ka ickwa acohakik sakihikaniw, aci ki macakawok neta Génésareth askik itekera. 35Iriniwok neta ka tacikewaspan nisitowinawewok Cecoca. Ekoni tca kaskina wiec e ici pa tipatcimotcik e ki takociniritci. Kaskina ka akosiritci pe iciwitowakaniwiw Cecoc. 36Pakoserimewok Cecoca kitci pakitinamiritci anihi otakosikaniwawa kitci takinamiritci kirakec nitek okapotowanik. Kaskina tca ka ki takinamowatcik okapotowaniw ka akosiwaspan ki mirwatisiwok.

Currently Selected:

Matio 14: ATMK

Highlight

Copy