Matio 13

Atisokanicic: Iriniw ka ki matce kitiketc

(Natawapata kaie Mark 4.1-9; Luc 8.4-8)

1Peikwaw e kicikarik Cecoc ki orowiw nta mikiwamik, ki nasipew. Ki apiw neta rarewak sakihikanik kitci kiskinohamaketc. 2Micta mitcetinaniwonikopan neta waska e ici apispan. E apitc mitcetinaniwonik, ki nta positcimew. Ekoni ka ici apitc. Kiapatc rarewak icikapowiwakopan aniki iriniwok e mitcetitcik. 3Ekoni tca ka ici aiarimwetc Cecoc, mitcet kekociciriw e aiarimotamawatc, atisokaniciciriw e apatcitatc, e tca itatc: “Takopan kitike iriniw. Peikwaw e kicikarik, ki icaw okitikan askik kitci matce kitiketc. 4Mekwata e taci matce kitiketc, atita okitamina papakiciniriw meskanak. Pirecicak mockimewok kaskina aniheriw okitamina. 5Kotakihi kaie aniheriw okitamina e ici asiniwakarik ki ici papakiciniriw, aka nipara e ici takonik askiriw. Tecikotc ki iti nitawikiniw aniheriw kitikaniw, aka e kiskipitawokarik. 6E mekwa kicikarik e micta kiciterik, aci ickwateriw aniheriw ocki ka nitawikinik. Ki pacteriw, osam aka e tipi micarik otapia. 7Kotakihi atita kiapatc aniheriw okitamina, nta ka ici nitawikinik minesikaciriw ki ici papakiciniriw. Ki iti matcekiniw aniheriw minesikaciriw, aric nipatcikemakaniw neta kitikanik e ici mirwacikipan. 8Aric kotakihi okitamina ka matce kitikaniwok papakiciniwok nta miro askik. Ki mirokino. Aci tca ka takociparik kitci mockinakaniwitcik, atita mitato mitanawaw kirawe nipara ki nitawikin, kotakihi nikotwaso mitana, minawatc kotakihi nicto mitana.”

9Minawatc ki itew Cecoc: “Wewerita natotamokw ohwe, kirawaw ka kackitaiekw kitci nisitotamekw!”

Wetci apatcitatc atisokaniciciriw Cecoc e kiskinohamaketc

(Natawapata kaie Mark 4.10-12; Luc 8.9-10)

10Aci pe natawapamiko Cecoc owitcewakana e kokwetcimikotc: “Kekwan wetci apatcitain atisokanicica e kiskinohamawotcik aniki iriniwok?”

11Itew Cecoc: “Aci ki ki pe otitikonawaw kitci kiskeritamekw anihe ka ki katcictekipan Kice Manito Okimawinik otci, nama aric aniki kotakihik ki otci pe otitikowok. 12Anahwe meka aci ka ici tatak kekociciriw, awocamec kata pe mirakaniwiw, nac kitci micta mitcenik. Anahwe aric kotak aka ka takonik kekociciriw, wawatc aniheriw memantcic ka iteritak e ici tatak, kata maninamowakaniwiw, misawatc aka e sapinakonik.#13.12 Wi itemakanotake: Kaskina awik ka natotak nikiskinohamakewiniw, awocamec kata witcihakaniwiw kitci nisitotak, nac kitci micta mitcenik ke ici nisitotak. Aric kaskina awik aka ka natotak nikiskinohamakewiniw, wawatc niheriw memantcic ka ici nisitotak kata maninamowakaniwiw. 13Ekoni wetci apatcitaian atisokanicic e kiskinohamakeian, osam meka e tapwemakak ohwe ka itwaniwok: ‘Misawatc e kanawapatakik kekociciriw, nama wapatamok. Misawatc e petakik, nama nisitotamok.’ 14Ekoni tca ka otcitciparinik aniheriw weckatc ka ki ici masinahikaterik, wirawaw otci, anaha weckatc ka ki pe nikan tipatcimotc Kice Manitowa otci, Ésaïe ka icinikasospan, e ki itasinahak:

‘Ki miro petenawaw, nama aric ki ka nisitotenawaw.

Wewerita ki kanawapatenawaw, nama aric ki ka wapatenawaw.

15Osam ohki iriniwok aka ka pamerimatcik Kice Manitowa ki kipotokenitisowok,

ki pasikwapiwok,

aka tca kitci ki wapatakak,

aka kaie kitci ki petakik,

aka tca kaie kitci ki nisitotakik.

Nama tca kaie ni ka koski natawapamikok kitci kikehakik,

itew Kice Manito.’ Ésaïe 6.9-10

16Kirawaw aric ki caweritakosinawaw e kackitaiekw kitci wapatamekw kaie e petamekw! 17Tapwe ohwe ka witamatakok: mitcet iriniwok ka pe nikan tipatcimowaspan kaie kotakihik mocak ka nosanehwawaspan Kice Manitowa wi wapatamwakopan aniheriw anotc ka ici wapatamekw, nama aric ki otci wapatamok. Wi petamwakopan kaie aniheriw aci anotc ka ici petamekw, nama aric ki otci petamok.”

E witak Cecoc wa itemakanik otatisokanicic

(Natawapata kaie Mark 4.13-20; Luc 8.11-15)

18“Natotamokw wa itemakak anihe nitatisokanicic, ka atisokatak iriniw ka ki matce kitiketc. 19Anotc iriniwok ka petakik e arimotcikaterik Kice Manitowa Okimawiniw, aka aric e nisitotakik, tarasak e pe takocik Ka Matcatikosiritci#13.19 Ka Matcatikositc: Enko na Matci Manito. kitci maninamakotcik aniheriw ka ki ici matce kitikaniwonik otehiwak.#13.19 otehiwak: Wi itemakaniw: Kice Manitowa otitewiniw ka ki actakaniwonik. Enko anihe okitamina ka ki matce kitikaniwok meskanak. 20Kotakihik iriniwok tarasak icinakosiwok mia askiriw e ici papakiciniritci okitamina e ici asiniwakarik. Petamok Kice Manitowa otitewiniw, micta tca mireritamok e petakik. 21Nama aric kinowec kanaweritamok otehiwak. Memacic tepirak tapwetamok. Kotc aric e arimihakaniwitcik kekotc ma e ki nosanetawatcik Kice Manitowa otitewiniw, tecikotc pakiteritamok otasperimowiniwaw. 22Kotakihik kiapatc iriniwok icinakosiwok mia okitamina ka papakiciniritci ka ici nitawikinik minesikaciriw. Ki petamok Kice Manitowa otitewiniw, aric osam ki kanawapatamok kekociciriw ka kicteritcikaterik ota askik, kekotc ma e paciwirikotcik micikitawiniw, e iteritakik aniheriw kitci mireritamihikotcik. Nama tca mirokiwok aniki iriniwok otcitcakociwak itekera, aka awocamec e pameritakik Kice Manitowa otitewiniw. 23Kotakihik aric icinakosiwok mia anihi okitamina ka papakiciniritci miro askik. Petamok Kice Manitowa otitewiniw, kirika miro nisitotamok. Aci tca e otcitciparik kitci mawotcitakaniwok kitikanicica, atita mitato mitanawaw kirawe nipara nitawikin, kotakihi nikotwaso mitana, minawatc kotakihi nicto mitana.”

Atisokanicic: Matci mackoci

24Aci Cecoc atisokawew kotakeriw atisokaniciciriw, e itatc: “Ekoni e icinakonik Kice Manito Okimawin: mitowi kitike iriniw e ki kitiketc miro kitikaniw okitikan askik. 25Peikwaw e tipiskarik, mekwata kaskina e nipaniwonik, peikw iriniw ka cikerimatc anihi kitike iriniwa ki pe icaw okitikan askik, matci mackociriw e ki pe nta matce kitiketc neta mirominockwa ka ici nitawikiritci. Ekotca ka ici matcatc. 26Kek nanake anihi miro kitikana mekwata e nitawikiki, aci matci mackocia kaie nitawikino. 27Anahwe kitike iriniw pe natawapamiko otarotakana, e itikotc: ‘Okimaw, miro kitikana neta ka ki matce kitikeipan kikitikan askik, tante wetcipariki anihi matci mackocia?’”

28“Itew anahwe kitike iriniw: ‘Awik ka cikerimitc ka ki totak.’”

“Aci arotakanak kokwetcimewok, e itatcik: ‘Ki nataweriten ia kitci nta maninamak anihi matci mackocia?’”

29“Itikowok: ‘Nama! Kecpin meka maninamekwe anihi matci mackocia, matci kaie ki ka motci maninenawaw anihi miro kitikana. 30Marotc kata matcekino tapickotc anihi ka mirwaciki kaie ka marataki, nac kitci kicinitawikiki kitci tca mawotcitakaniwok. Aci tca nta ni ka itawok aniki otamiro iriniwok ke mawotcitatcik kitikaniw: Maninamokw patama anihe matci mackoci. Okwapikatamokw tca kitci ickwasikatek. Minawatc anihe ka mirwacik kitikan pitakewotakw nte actasokiwamik.’”

Atisokanicic: Rimotat okitamina

(Natawapata kaie Mark 4.30-32; Luc 13.18-19)

31Cecoc kiapatc atisokawew kotakeriw atisokaniciciriw: “Ekoni e icinakonik Kice Manito Okimawin: mia mitowi okitamina, rimotat ka icinikatcikatek, iriniw e ki otapinak, minawatc e ki matce kitiketc okitikan askik. 32Enko ni ka mawotci apicacik okitamina. Aric ka ickwa kicinitawikik, enko ni ka mawotci kinwaskok neta kitikan askik. Nac ki iti mictikowiw, matci kaie pirecicak kitci pe nta ocitatcik otcictoniwaw neta otikonik.”

Atisokanicic: Ciwockitcitcikan

(Natawapata kaie Luc 13.20-21)

33Kiapatc Cecoc atisokew kotakeriw atisokaniciciriw: “Ekoni peikon e icinakonik Kice Manito Okimawin: mia mitowi ciwockitcitcikan, iskwew e tcipaketc, e otapinatc nipara napanewa e tca mamowinatc ciwockitcitcikana, nac kaskina e opisoritci.”

Wetci apatcitatc atisokaniciciriw Cecoc e kiskinohamaketc

(Natawapata kaie Mark 4.33-34)

34Kaskina ka itaspan anahweriw mitcet iriniwa Cecoc, atisokaniciciriw ko apatcitapan. Nama otci kiskinohamakekopan patoc ko aniheriw e apatcitatc atisokaniciciriw. 35Wetci totakipan, tapwe kitci isparinik aniheriw ka ki itasinahak peikw weckatc ka nikan tipatcimospan:

“Atisokanicica ni ka apatcitan e aiarimweian.

Ni ka witamakan kekocica ka katcictekipan

esko ki kiceritcikatek aski.” Psaumes 78.2

Cecoc wewerita e witamaketc kitci miro nisitotcikaterik aniheriw matci mackoci atisokaniciciriw

36Minawatc ki matcaw Cecoc neta e mitcetinaniwonik, e pitaketc mikiwamik. Aci pe natcikapowictako owitcewakana, e itikotc: “Witamacinan wa itemakak anihe kitatisokanicic, matci mackociriw e ki kitikaniwonik neta kitikan askik.”

37Ekoni e ici naskamowatc Cecoc, e itatc: “Anahwe ka matce kitiketc miro kitikaniw, enko na anahwe Ka ki pe iriniwihitisotc.#13.37 Ka ki pe iriniwihitisotc: Arimomitiso ota Cecoc. 38Anihe kitikan aski, enko ni kaskina awik ota askik. Miro kitikana, enko aniki ka pakitinitisotcik kitci tiperimikotcik Kice Manitowa Okimawiniw. Anihe tca matci mackoci, enko aniki iriniwok ka tiperimikotcik Ka Matcatikosiritci.#13.38 Ka Matcatikosiritci: Enko na Matci Manito. 39Anahwe ka cikerimatc kitike iriniwa, ka matce kitiketc matci mackociriw, enko na Matci Manito. Anihe tca aci e mawotcitakaniwok kitikan, enko anihe ke ponaskiwok. Aniki tca atoskectaketcik ka mawotcitatcik kitikaniw, enko aniki Kice Manito otacerima.”

40“Mia mitowi e maninikatek matci mackoci e motcictewepinikatek, ekoni ke isparik ponaskiwoke. 41Anahwe Ka ki pe iriniwihitisotc kata iciticahwew otacerima. Ekoni ke ici orowiticohwatcik aniki aceriwok neta Okimawinik kaskina ka matci totamiritci, kaie anihi kaskina ka cikimaritci iriniwa kitci pactatiritci. 42Kata iciwepinewok matci ickotek.#13.42 matci ickotek: Mia itemakan: ickotek, micta kicapiskisikanik e takonik. Ekota ni ke taci micta matonaniwonik kirika kitci micta kakiceapitecininaniwonik. 43Aric kaskina icikowisk ka iteritakositcik kata micta wasisowok neta Otawiwawa Okimawinik, mia peikon pisimw e wasisotc. Wewerita natotamokw ohwe, kirawaw ka kackitaiekw kitci nisitotamekw!”

Atisokanicic: Kekocic ka micta misakitakok e ki rikotawokahikatek e katakaniwok

44“Ekoni peikon e icinakonik Kice Manito Okimawin: mia mitowi peikw iriniw e miskak kekociciriw e misakitakonik, ka ki rikotawokahikaterik kitikan askik, tecikotc kaie wir kitci rikotawokahak kitci katatc. Ke apitc mireritak, kata kiwew omikiwamik kaie kata nta atawew kaskina e ici tatak. Minawatc kata apatcitaw aniheriw coriariw ka ki kackitatc kitci nta otapinak aniheriw kitikan askiriw ka ki ici katakaniwonik aniheriw ka ki miskakipan.”#13.44 Wi itemakanotake: Kata kicpinataw aniheriw kitikan askiriw kitci ki tiperitak aniheriw kekociciriw ka misakitakonik ka ki katakaniwonik neta atamitawak. Ekoni peikon e icinakositc iriniw ka nantowapatak Kice Manito Okimawiniw. Kaskina kekociciriw kata nakatam kitci taciketc neta ka ici tiperitamiritci Kice Manitowa.

Atisokanicic: Mikis ka misakitakositc

45“Ekoni kiapatc e icinakonik Kice Manito Okimawin: mia mitowi iriniw kaskina wiec ka pa icatc e nantowapamatc mikisa ka mawotci mirosiritci. 46Apitc miskawate peikw e misakitakosiritci, kata atawew kaskina e ici tatak kitci ki nta otapinatc anihi mikisa.”

Atisokanicic: Aripi

47“Kiapatc, ekoni peikon e icinakonik Kice Manito Okimawin: mia mitowi aripi, iriniwok ka ki iciwepinatcik sakihikanik, mitcet namesa e patahoratcik, e nakowi aicinakosiritci anihi namesa. 48Kotc e mockineritci otaripiwawa, aci aniki namesike iriniwok natakamewapitewok. Minawatc apiwok neta e tatipaniratcik anahweriw namesa. Ka mirosiritci nte arewok askikok, minawatc aka ka mirosiritci wepinewok. 49Ekoni kaie peikon ke icinakok ponaskiwoke: aceriwok kata pe nta tatipanirewok anahweriw ka matci iriniwiritci kaie tca anahweriw icikowisk ka itatisiritci. 50Aniki ka matci iriniwitcik kata iciwepinakaniwiwok matci ickotek.#13.50 matci ickotek: Mia itemakan: ickotek, micta kicapiskisikanik e takonik. Ekota ni ke taci micta matonaniwonik kirika kitci micta kakiceapitecininaniwonik.”

Ocki kirika weckatc micikitawin acitc kiskinohamakewin

51Aci Cecoc kokwetcimew anahweriw owitcewakana: “Ki ki nisitotenawaw ia kaskina ka ki ititakok?”

“Ehe,” itewok.

52Kiapatc ki itew Cecoc: “Ekote meka tca ni, tato iriniw ka kiskinohamaketc cota aiamihe irakonikewiniw, kecpin tca e nta kiskeritak Kice Manitowa Okimawiniw e wi nosanetawatc, mia peikon icinakosiw kirika ohwe ke atisokatak: mia mitowi iriniw e micikitatc, e mitcenik e ici tatak, atita ocki kekociciriw, kaie kete kekociciriw.”

Nazareth iriniwok aka e tapwerimatcik Cecoca

(Natawapata kaie Mark 6.1-6; Luc 4.16-30)

53Ka ickwa aiatisoketc Cecoc aniheriw atisokaniciciriw, ki matcaw neta, 54nete e icatc otenak ka ki otci matcekitc. Ekoni ka iti kiskinohamaketc cota aiamihe mikiwamik. Kaskina iriniwok ka natotawaspan ki micta mamiskasitawewok. Ki itewok: “Tante ka otinak omiro omitoneritcikan? Kekwariw wetci kackitatc kitci mata kackitatc? 55Namaiew ia ni anahwe, manike iriniw okosa? Mari tca, namaieriw ia ni anihi okawiwa? Kaie Cak, Sosep, Simo kirika Jude, namaieriw ia anihi ocima? 56Kaie tca anahweriw ocima ka ickweciwiritci, nama ni ota tacikeriwa kaskina e taciritci? Tante tca wetciparinik aniheriw omiro omitoneritcikan kaie omackawisiwin?” 57Ekoni wetci aka ki tapwerimatcik.

Aci itikowok Cecoca: “Awik ka nikan tipatcimotc kaskina wiec kicterimakaniwiw, nama tepirak otenamik neta ka ki otci pe matcekitc kaie nama otcirowemakanik.” 58Tepirak memantcic neta ki mata kackitaw Cecoc, osam aka e asperimototawakaniwitc.

Currently Selected:

Matio 13: ATMK

Highlight

Copy