Matio 11

Capatis ka pe iciticohwatc owitcewakana

(Natawapata kaie Luc 7.18-35)

1Ka ickwa witamawatc Cecoc ke aitotamiritci anahweriw owitcewakana e mitato acitc niciritci, ki matcaw neta, nte e pa icatc otenaskak e pa nta kiskinohamaketc kirika e pa kakeskwetc.

2Mekwata kipohotowikamikok e tacikespan Capatis, ki petakew e aitotamiritci Cecoca.#11.2 Cecoca: Mia itemakan: Krist. Ki tca iciticahwew atita owitcewakana, 3kitci nta kokwetcimaritci: “Kir ia ni Kice Manito ka ki itespan kitci pe iciticohwatc kitci akwacimiweritci kekotc ma kotak kiapatc kitci pehakitc?”

4Itikowok Cecoca: “Matca nta witamawakw Capatis e ici petamekw kaie e ici wapatamekw: 5Iriniwok aka ka wapiwaspan aci wapiwok, ka maskisiwaspan aci pimotewok, ka micta omikiwapinewaspan ki kikehakaniwiwok, ka kipitewaspan aci petamok, ka ki nipowaspan ki apitcipahakaniwiwok, minawatc ka kitimakisitcik witamawakaniwiwok Mirwatcimowiniw. 6Caweritakosiw anahwe aka ke ponitatc e asperimototawitc.”

7Ka ickwa matcatcik aniki Capatis owitcewakana, Cecoc ki iti aimihew iriniwa e mitcetiritci, Capatisa e arimomatc, e itetc: “Ka icaiekw neta askik ka ici cipewatawokak, awin ka ki iteritamekw kitci wapamekw? Iriniw ka otike cakosimakaniwitc, mia pisekan ia e aiatacitc e rotinik e iteritakositc? Nama ketcinatc! 8Kekwan tca ka ki nta kanawapatamekw? Iriniw ia e micta mirwaspisotc? Aric aniki ka mirwaspisotcik nte tacikewok kice okimawa omikiwamirik. 9Kekwan tca ka ki natawapatamekw? Iriniw ka nikan tipatcimotc? Ehe, ki witamatinawaw. Wawatc kaie kirawe kicteritakosiw patok awik ka nikan tipatcimotc. 10Enko meka Capatis anahwe ka arimomakaniwispan Kice Manito Omasinahikanik ka ki masinaterik:

Ki itew Kice Manito,

‘Ni ka iciticohwaw anahwe ke nikan witamaketc,

ke nikanickask, kitci nta ocitamask meskanariw.’ Malachie 3.1

11Tapwe ohwe ka witamatakok: kaskina ka ki pe tacitcik iriniwok, nama wiskat ki otci taw awik kirawe kitci kicteritakositc patok Capatis. Peikon aric anahwe mawotci aka ka kicteritakositc nete tca Kice Manitowa Okimawinik kirawe wir kicteritakosiw patok Capatis. 12Esko nta ki kitciparitc Capatis e pa tipatcimotc, nac anotc, mictahi macihiwaniwon Kice Manito Okimawinik otci, kaie iriniwok ka macihiwetcik natowi totamok kitci matcikonakik. 13Kaskina ka pe nikan tipatcimowaspan ki tipatatamok aniheriw Okimawiniw, kaie Moïse otirakonikewinik ki tipatcitcikateriw, nac apitc Capatis ka kitciparitc e tipatcimotc. 14Kecpin tca wi tapwetowiekwe, Capatis, enko na anahwe Élie ka ki pe itatcimakaniwispan. 15Wewerita natotamokw ohwe, kirawaw ka kackitaiekw kitci nisitotamekw!”

16“Anotc iriniwok, tan ani peikon e iteritakositcik? Mia ko awacak, wiec e ici mitcetinaniwonik e aipitcik, e pa tepitepwetcik e aititotcik: 17‘Ni ki potatcikanan kitci nimihitak. Nama aric ki ki otci niminawaw! Ni ki nakamonan tcipai nakamowin. Nama aric kaie ki ki otci matonawaw!’#11.17 Wi itemakanotake: Ekoni peikon e itatisitcik aniki anotc iriniwok aka ka otapinakik Mirwatcimowiniw. 18Tapwe wirata, Capatis ki pe icaw, mocak e roskosotc, aka kaie e minikwetc minicaporiw,#11.18 mocak e roskosotc, aka kaie e minikwetc minicaporiw: Mia itemakan: aka e mitcisotc, aka kaie e minikwetc. kirika itakaniwiw: ‘Matci manitowa ki pitciteheckako!’ 19Minawatc anahwe Ka ki pe iriniwihitisotc#11.19 Ka ki pe iriniwihitisotc: Arimomitiso ota Cecoc. ki pe takociniw, mocak e mitcisotc kaie e minikwetc, kirika itakaniwiw: ‘Kanawapamakw sa anaha iriniw. Tepirak mamitoneritam kitci mitcisotc kirika kitci minikwetc minicaporiw! Okwimesiw ka natockakeritci kaie kotakihi iriniwa aka ka kicterimakaniwiritci!’#11.19 iriniwa aka ka kicterimakaniwiritci: Peikon kata ki ici nisitotakon: “pactati iriniwok” ka iterimakaniwiritci. Aric miro nisitowinakoniw icikowisk e iteritakonik Kice Manito omiro omitoneritcikan e wapamakaniwitcik aniki ka nosanetawatcik.”

Cecoc e aimihatc iriniwa otenak ka tacikeritci aka ka wi tapwerimikotc

(Natawapata kaie Luc 10.13-15)

20Cecoc ki iti kakeskimew iriniwa neta otenak ka ki ici mawotci mata kackitaspan, osam aka e ki otci kweskatisiritci. Ki itew: 21“Ekwa kirawaw neta Chorazin otenak ka tacikeiekw! Nikotin ki ka nakickenawaw kitci arimipariekw! Kaie kirawaw Bethsaïda otenak ka tacikeiekw, nikotin ki ka arimiparinawaw! Kecpin nitowatc nete Tyr otenak kirika Sidon otenak ki taci mata kackitaian patok ota kirawaw ka ici tacikeiekw, aci weckatc wirawaw aniki iriniwok kata ki piskamopanak wikasiriw ka kawekinik acitc kata ki cicocimoropanak iskwaskiteskok kitci wapatahiwetcik e kweskatisitcik. 22Ekoni tca wetci witamatakok: takociparike anihe ke kicikak kitci tipaskonikaniwok, kirawe kata ariman kirawaw ke ici anwerimikoiekw patok aniki Tyr otenak kirika Sidon otenak ka taciketcik ke ici anwerimakaniwitcik.#11.22 Peikon kata ki ici nisitotakon: kirawe kata kitimakerimakaniwiwok aniki iriniwok Tyr otenak kirika Sidon otenak ka taciketcik patok kirawaw ke asitci kitimakerimikoiekw. 23Minawatc kirawaw Capernaüm ka tacikeiekw, kit iteritenawaw ia kitci icpinikoiekw wakwek? Ki ka nitinikowinawaw, neta ka ici taciketcik ka nipotcik kitci icaiekw!#11.23 neta ka ici taciketcik ka nipotcik kitci icaiekw: Peikon kata ki ici nisitotakon: l'Hadès. Kecpin meka anihe ki ici mata kackitaiapan nete Sodome otenak, mia anotc e ici mata kackitaian kirawaw otci, kiapatc anotc kata ki takonopan anihe otenaw. 24Ekoni tca wetci witamatakok: takociparike anihe ke kicikak kitci tipaskonikaniwok, kirawe kirawaw kata ariman ke ici anwerimikoiekw patok aniki wirawaw Sodome otenak ka taciketcik.”

Pe natawapamicikw kitci miskamekw arwepiwin#11.25 arwepiwin: Manawan: arwecimowin.

(Natawapata kaie Luc 10.21-22)

25Ani apitc Cecoc aiamihapan, e itetc: “Notawi, kir ka tiperitaman wakwek kaie askik, mikwetc kit ititin e ki wapatahatcik kitapwewiniw ka apicicitcik kaie tca e ki katowatcik iriniwok ka iterimitisotcik ‘ni omiro omitoneritcikaninan’ kirika ‘ni micta miro kiskeritenan kitci kekocic e ki kiskinohamasoak.’ 26Tapwe, Notawi, ekoni mia ka ki ici nataweritaman kitci icinakok.”

27Minawatc kiapatc Cecoc aimihepan mitcet iriniwa, e itetc: “Notawi ni ki mirikw kaskina kekociciriw kitci tiperitaman. Peikociw ka kiskerimatc Kice Manitowa Okosiriw, enkweriw Otawiwa. Peikociriw kaie anihi ka kiskerimikotc Kotawino, enkweriw Okosa, acitc kaskina anihi ka wi witciharitci kitci kiskerimaritci.”

28“Pe natawapamicikw, kaskina e taciekw ka aieskosiekw, e miwotaiekw kekocic ka kosikok.#11.28 e miwotaiekw kekocic ka kosikok: Pot wi itemakanotake: kaskina e ici kackeritamekw, e ici arimeritamekw, kaie e ici arimisiekw. Ki ka tca miritinawaw kitci arwepiekw. 29Pakiterimitisokw kitci atoskectawiekw. Pakitinicikw kitci kiskinohamatakok. Ni roskitehan meka, kaie ni tipaterimitison. Ki ka tca miskenawaw tapwe arwepiwin kitehiwak. 30Wetan meka anihe ke miritakok kitci itotiskeiekw e atoskectawiekw. Rakicin kaie anihe ke miritakok kitci miwotaiekw.”

Currently Selected:

Matio 11: ATMK

Highlight

Copy