Luc 11

E kiskinohamaketc Cecoc tan ke itwaniwonik e aiamihaniwonik

(Natawapata kaie Matio 6.9-13; 7.7-11)

1Peikwaw e kicikarik, wiec taci aiamihapan Cecoc. Ka ickwa aiamihatc ki pe itiko peikw owitcewakana: “Teperitcikein, kiskinohamacinan kitci aiamihaiak, mitowi Capatis ka ki kiskinohamawaspan owitcewakana kitci aiamiharitci.”

2Aci itew Cecoc: “Ekoni ke iteiekw e aiamihaiekw:

Notawinan,

ni nataweritenan kitci kicteritcikatek kiticinikasowin,

kitci otcitciparik kokimawin.

3Miricinan tato kickwa ke mitciak.#11.3 anotc ke mitciak: Mia itemakan: tcipaw, pakwecikan.

4Kasihamawicinan nipactatowinana,

kirano meka kit ici ponerimananak aniki ka matci totawimitcik.

Kaie akawir pakitinicinan kitci kokwetcihikoiak kitci pactatiak.”

5Cecoc itew kiapatc: “Arica ohwe ki ka iteritenano: peikw nta e taciekw e tarikwena okwimesa, e tca natawapamatc e apita tipiskarik, kitci itatc: ‘Nikwimes, awihici nicto pakwecikan. 6Ki pe takociniw peikw nikwimes warawik e ototetc. Nama takoniw ke acamak.’ 7Kecpin tca anahwe iriniw pitakamik omikiwamik e otewetak e itatc anihi ka pe natawapamikotc: ‘Ponihici. Aci nit ickwa atisekahen ickwatem. Aci kaie ni nipanan, ninitcanicak kirika nin. Nama ni ka ki pasikon kitci ki nta miritan pakwecikan.’ 8Tapwe ohwe ka witamatakok: peikon kata pasiko anahwe iriniw kitci miratc pakwecikana anihi ka ki pe nataweritamakotc. Nama aric pot e miro okwimesitc wetci miratc, aric kata mirew osam aka e cakwerimoritci okwimesa wikockatc e natotamakotc.”

9“Ki witamatinawaw tca: nataweritamokw kekocic, ki ka tca mirikowinawaw. Nantowapatamokw, ki ka miskenawaw. Papawohamokw, ki ka cenamakowinawaw ickwatem. 10Anahwe meka ka nataweritak kekociciriw, pe otitiko. Anahwe ka nantowapatak, miskam. Kata cenamowakaniwiw ickwatemiriw anahwe ka papawohak.”

11“Kecpin awik neta e taciekw e okositc, e tca nataweritamakotc namesa kitci mowaritci, kata mirew ia nitowatc kinepikoriw? 12Kecpin wawiriw e nataweritamakotc okosa kitci mitciritci, kata mirew ia nitowatc mantcoca e koctatikosiritci?#11.12 mantcoca e koctatikosiritci: Mia itemakan e emitikociwictek: “scorpion.” 13Kirawaw tca ata e matci iriniwiekw peikon ki kiskeritenawaw kitci mirekok miro kekociciriw kinitcaniciwawok. Wir tca Kotawino icpimik ka taciketc wawatc kirawe mictahi ki miro totakono e pe miritokw Miro Manitowa anahweriw e nataweritamakotc.”

Ka itetc Cecoc e itactahorakaniwitc

(Natawapata kaie Matio 12.22-30; Mark 3.22-27)

14Tapan iriniw ka ki pitciteheckakotc matci manitowa. Nama tca kackitakopan e arimwetc. Aci ki itew Cecoc kitci orowiritci anihi matci manitowa ka ki pitciteheckakowatc anihi iriniwa. Ka ickwa orowiticohowatc, tecikotc ki kackitaw e arimwetc anahwe iriniw. Ki micta kockowapamowok iriniwok ka tacikewaspan neta. 15Atita aric itewakopan: “Ah! Béelzébul,#11.15 Béelzébul: Enko na Matci Manito, ka tiperimatc kaskina matci manitowa. anahwe ka tiperimatc matci manitowa, enko na ka ki miratc Cecoca kitci kackitaritci kitci ki orowiticohwaritci matci manitowa.”

16Kotakihik wikokwe paciwirewakopan Cecoca arotc kitci iteritci, ke ki otci itactahorakaniwiritci. Ekoni tca e ici nataweritamawatcik kitci wapatahikotcik Kice Manitowa e ki mirikoritci aniheriw ka ici kackitaritci. 17Aric Cecoc kiskeritamopan e iteritamiritci. Aci tca itew: “Kecpin e matciparihitotcik iriniwok peikw okimawinik ka taciketcik, wirawaw tipirawe e macikotatotcik, nikotin kata oraparin anihe okimawin. Peikon iriniwok ka tcirowemitotcik, kecpin e matciparihitotcik, kata niciwonatcihitisowok. 18Peikon tca kaie wir Matci Manito#11.18 Matci Manito: Satan icinikatakaniwiw Matci Manito ota. okimawin e icinakonik, kecpin e matciparihitoritci anahweriw ka atoskectakotc, kata niciwonatcitakaniwoniw. Wirata kit itanawaw e orowiticohwakik matci manitowok, Béelzébul enko na e ki miritc mackawisiwiniw kitci ki ici kackitawak. 19Atita nta e tacitcik ka nosanehitakok kackitawok kaie wirawaw kitci matceticohwatcik matci manitowa. Kecpin tapwe anihe ka ici itactahoriekw, Béelzébul omackawisiwin e apatcitawak, awiriw ka mirikotcik omackawisiwiniwaw aniki ka nosanehitakok? Wirawaw tipirawe wapatahiwewok aka mia e iteritamekw! 20Tapwe wirata, Kice Manito omackawisiwin ka apatcitawak e matceticohwakik matci manitowok. Ekoni tca ka otci kiskeritakok aci e ki pe takociparinik Kice Manito Okimawin ota ka ici tacikeiekw.”

21“Mitowi iriniw e mackawisitc kaie e omicta omokomanimitc, e nanakatcitatc omikiwam, nama ki kimotimakaniwiw e ici tatak. 22Kecpin aric pe takociniritena kotakihi iriniwa kirawe e mackawisiritci, e tca cakotcihikotc, kata maskamiko aniheriw omicta omokoman ka ki asperimototakipan. Kaskina kata mamiriweriw aniheriw ka ki maskatoweritci.”#11.22 Pot wi ici kiskinohamakaniwonotake: Actew awik kirawe kitci mackawisitc patok matci manito kitci ki matceticohwatc.

23“Anahwe aka ka witcewitc, ni wi cakotcihikw ni. Kirika anahwe aka ka witcihitc e mawotcihimaki iriniwa, oraticahwew.”

Ka kiwe pitciteheckakotc iriniw matci manitowa

(Natawapata kaie Matio 12.43-45)

24“Kecpin peikw matci manito e orowictawatc iriniwa, nte pa aitacikew wiec ka ici cipewatawokarik, e nantowapatak nte ke ici taciketc. Kecpin aka e miskak, aci itew: ‘Ni ka natawapaten minawatc anihe nimikiwam ka ki nakataman.’ 25E kiwetc, miskam aniheriw mikiwamiriw e miro wepahikanonik kaie e mirocterik.#11.25 Wi itemakanotake: Natawapamew anihi iriniwa. Wapatam aka awiriwa e tiperimikoritci otehirik. 26Ekoni kiapatc e ici matcatc e natcipahatc nicowaso#11.26 nicowaso: (7) kotakihi matci manitowa, kirawe kiapatc anahweriw e matcatikosiritci patok wir. Minawatc pe icawok tapickotc kitci taciketcik neta. Enko tca anahwe iriniw kirawe kiapatc mictahi kata nekatcitaw, patok ickotok ka peikocirispana anihi matci manitowa.”

Tapwe caweritakosiwin

27Ka ickwa aitetc aniheriw Cecoc, aci peikw iskwewa ki otci aimihiko neta e mitcetinaniwonik, tetawitc e icikapowitc, e itikotc: “Caweritakosiw anahwe iskwew ka ki kanawerimisk kaie ka ki nocanehisk!”

28Aric Cecoc itew: “Kirawe aniki caweritakosiwok ka natotakik Kice Manitowa otitewiniw kaie ka pimatisiwaketcik!”

Cecoc e nataweritamawakaniwitc kitci mata kackitatc

(Natawapata kaie Matio 12.38-42)

29Eckam kirawe iti mitcetinaniwonipan Cecoc e waskapoctowakaniwitc. Ekoni tca e aitetc: “Iriniwok anotc tawok ka matci iriniwitcik. Ni nataweritamakok kitci mata kackitawak kitci kiskeritakik tapwe e atoskectawak Kice Manito. Nama aric kata mirakaniwiwok. Aci meka ickwa atisokowakaniwiwok weckatc ka ki iciwepasiritci anihi Jonas ka icinikasorispana. Ekoni tepirak ke ici kicawatcitamowakaniwitcik anotc iriniwok e mata kackitakaniwonik.#11.29 Jonas, enko anahwe peikw ka atisokatakaniwitc Kice Manito Omasinahikanik. Weckatc ki iciticohwakaniwiw kitci nikan tipatcimoctawatc iriniwa Ninive otenak e tacikerispana. Aric ki wikokwe ocimew Kice Manitowa, aka e wi nta nikan tipatcimotc. Ki posiw napikwan tcimaniw. Kek ki pe iciticaham Kice Manito kitci micta rotinik. Ki tca pakopepinakaniwiw anahwe Jonas kitci ki arwactanik. Minawatc micta names ki iciticohwakaniwiw, Jonas kitci kotciparihikotc. Nicto kickwa kirika nicto tipiskwa ki tacikew neta omisitarik anihi micta namesa, nac ki wikotcihiko Kice Manitowa. Minawatc kiapatc ki iciticohwakaniwiw anahwe Jonas kitci nta aimihatc anahweriw Ninive iriniwa. Ki icaw. Aci ki miro natotako anahweriw iriniwa. 30Anahwe Jonas ki wikotcihakaniwiw e ki kotciparihikotc micta namesa. Ekoni tca ka ki ici kicawatcitamowakaniwitcik iriniwok Ninive otenak e tacikewaspan kitci kiskeritakik tapwe Jonas e ki iciticohikotc Kice Manitowa otenamiwak. Ekoni peikon ke otci kiskeritakik anotc iriniwok kaie wir anahwe Ka ki pe iriniwihitisotc#11.30 Ka ki pe iriniwihitisotc: Arimomitiso ota Cecoc. e ki pe iciticohikotc Kice Manitowa. 31Okimakwew weckatc, cawonok ka ki pe otcitc, warawik ki pe ototew kitci ki pe natotawatc okimawa Salomon e aiarimweritci e omiro omitoneritcikaniritci. Aci anotc taw awik kirawe e kicteritakositc patok anihi okimawa Salomon. Takociparinike aniheriw ke kicikarik kitci tipaskonikaniwonik, kata pasiko anahwe okimakwew kitci icikapowictawatc kaie kitci itactahoratc anahweriw iriniwa anotc aka ka wi natotamiritci. 32Iriniwok weckatc ka tacikewaspan Ninive otenak ki kweskatisiwok, ka petawatcik Jonasa e kakeskweritci. Aci anotc taw awik kirawe e kicteritakositc patok Jonas. Takociparinike aniheriw ke kicikarik kitci tipaskonikaniwonik, aniki Ninive iriniwok kata pasikowok kitci icikapowictawatcik anahweriw anotc iriniwa, kitci itactahoratcik aka ka wi kweskatisiritci.”

E waskorek kiwiaw

(Natawapata kaie Matio 5.15; 6.22-23)

33“Nama awik iskaham wactenamakaniw tepirak kitci katatc, kekotc cipa askikok kitci akonahak. Kirawe kata actaw neta ka ici tcimatakaniwonik, kitci miro wapatakik kaskina ke pitaketcik e miro wacterik. 34Kickicikw, mia wactenamakan iteritakon kiwiaw otci. Kecpin e mirwacik kickicikw, kaskina kiwiaw miro wactenikatew. Kecpin aric e akosapiin, kaskina e itikitiin mia e kiski tipiskak e ici tacikein.”

35“Aiekwamisi aka kitci actaweparik kiwactenamakan, kitehik e takok. 36Kecpin tca kaskina e itikitiin e miro waskorek, aka wiec e takok aka ka waskorek kitci akwacteckakoin, tekaci kata waskorew, mia e wactenamakoin wactenamakan e miro wactek.”

Cecoc itactahorew Pharisien iriniwa kaie ka kiskinohamakeritci aiamihe irakonikewiniw

(Natawapata kaie Matio 23.1-36; Mark 12.38-40)

37Ka ickwa aiarimwetc Cecoc, peikw Pharisien iriniw ki wicamew kitci nta mitcisoritci omikiwamik. Ki icaw Cecoc. Ki pitakew. Ki orapiw mitcisowakanatikok. 38Kockopariw anahwe Pharisien iriniw e nanakatcihatc Cecoca aka e kasitcitceritci epwamoci mitcisonaniwonik.#11.38 e kasitcitceritci epwamoci mitcisonaniwonik: Kotc e itacterik cota aiamihe irakonikewiniw kitci totcikaterik. 39Aci itiko Teperitcikeritci: “Wesa e itatisiekw kirawaw Pharisien iriniwok! Oskitc ki kisisipatanawaw minikwakanik kirika orakanik kitci mirwinakoki, aric kitehiwaw ki nataweritenawaw kitci kimotiekw kirika ki micta matcatikosinawaw.#11.39 Wi itetake: Anihe ka totamekw, mia awik oskitc tepirak ka kisisipatatc orakan, aka tca e kisisipatatc pitc. 40Wesa ki kiwockweritenawaw! Kice Manito, anahwe ka ki ocihatc iriniwa oskitc e icinakosiritci, nama ia kaie ki otci ocihew atamik e icinakosiritci? 41Ki ta mirawawok ka kitimakisitcik ka ici takonik kiminikwakaniwak kaie korakaniwak. Ki ka tca mirwinakosinawaw kitehiwak.”

42“Ki ka arimiparinawaw, Pharisien iriniwok! Tato pipona kit aiamihe pakitinikanawaw Kice Manito otci peikwaw nta e mitatoniwok kitikan mitcim kirika kotakihi nakowi e ici nitawikiki kikitikan askiwak, mitowi ‘menthe’ acitc ‘rue’ e icinikateki, e iteritamekw kitci nosanetawekw otirakonikewin. Nama aric ki pameritenawaw icikowisk itatisiwin. Nama kaie tapwe ki sakihawaw Kice Manito. Enko ni anihi kirawe ka kicteritakoki kitci nosanetakaniwoki. Peikon aric kaie anihi kotakihi irakonikewina, actew kitci nosanetaiekw.”

43“Ki ka arimiparinawaw, Pharisien iriniwok! Ki mireritenawaw kitci miro nokosiekw neta e apiekw aiamihe mikiwamik, kaie e mitcetinaniwok ki mireritenawaw wewerita kitci arimikakoiekw. 44Ki ka arimiparinawaw! Mia matikowoc asinik e ki ocitakaniwonik kit icinakosinawaw, aka e takok kekocic kitci miro nokok e ici takok matikowoc, e tca takoskatakik iriniwok aka e kiskeritakik!”

45Aci peikw ka kiskinohamaketc cota aiamihe irakonikewiniw itew Cecoca: “Kiskinohamake iriniw, ani ka itein, kaie ninan ki mareriminan.”

46Itew Cecoc: “Ekwa kaie kirawaw ka kiskinohamakeiekw aiamihe irakonikewin, ki ka arimiparinawaw! Micta kosikoniw aniheriw ka mirekok iriniwok kitci miwotatcik. Kirika nama wiec ki totenawaw kitci witcihekok iriniwok kitci miwotatcik aniheriw.#11.46 Pot wi itemakanotake: Micta arimaniw aniheriw irakonikewiniw ka mirekok iriniwok kitci nosanetatcik. Kirika nama wiec ki totenawaw kitci witcihekok iriniwok kitci kackitatcik aniheriw irakonikewiniw. 47Ki ka arimiparinawaw! Ki ocitanawaw matikowoca e micta mirwaciki neta ka ki ici nahikowakaniwitcik iriniwok ka pe nikan tipatcimowaspan. Aric enko aniki ka pe nikan tipatcimowaspan ka ki nipahikotcik weckatc kitaniskotape kimocomiwawa! 48Ekoni e ici wapatahiweiekw e ici naheritamekw aniheriw ka ki totakik kitaniskotape kimocomiwawok, e ki nipahatcik ka pe nikan tipatcimorispana. Kirawaw ki ocitamowawok omatikowociwaw! 49Ekoni wetci ki itetc Kice Manito, e omiro omitoneritcikanitc: ‘Ni ka iciticahamowawok nitirinimak ke pe nikan tipatcimoritci kirika nitarotakana. Aric atita nta e taciritci kata nipahewok, kirika kotakihi kata nekatcihewok.’ 50Kata tca anweritakosiwok iriniwok anotc ka pimatisitcik aniheriw otci: kaskina tato ka ki pe nikan tipatcimorispana ka ki nipahakaniwiritci, esko ka kiceritcikaterik askiriw, 51esko anahwe nictam ka ki nipahakaniwitc, Abel ka icinikasospan, nac anahwe mamitcitc ka ki nipahakaniwitc, Sakari ka icinikasospan. Neta ki taci nipahakaniwiw anahwe Sakari pitakamik kitci aiamihe mikiwamik, nictowitc neta ka ici ickwasowakaniwiritci awesisa e aiamihe pakitinikaniwonik kirika neta ka ici micta kicteritakonik. Tapwe ohwe ka witamatakok: iriniwok anotc ka pimatisitcik kata anweritakosiwok aniheriw otci ka ki ici manohonaniwonik.”

52“Ki ka arimiparinawaw, kirawaw ka kiskinohamakeiekw aiamihe irakonikewin! Ki ki kimotinawaw cehikan ka apatak kitci cenikatek ickwatem, kiskeritamowinik ka iticimok. Kirawaw tipirawe nama ki pitakanawaw neta. Nama kaie ki pakitinawawok iriniwok ka nataweritakik kitci pitaketcik.”#11.52 Wi itemakanotake: Ki ki kipaskohenawaw meskanaw Kice Manitok ka iticimok. Nama aric kirawaw tipirawe ki nosanetanawaw anihe meskanaw, kirawaw ki kipaskohamowawok aniki ka wi nosanetatcik.

53Ka ickwa orowitc neta mikiwamik Cecoc, micta kiciwasipanak aniki ka kiskinohamaketcik aiamihe irakonikewinik kirika Pharisien iriniwok e acitematcik e wi cakosimatcik, kirika kaskina kekwariw e kokwetcimatcik. 54Wikokwe paciwirepanak arotc kitci iteritci.

Currently Selected:

Luc 11: ATMK

Highlight

Copy