NAXUM 1
1
1Nenibi pagoq gab gamt tonam. Elkoswg Naxumg nyiqry kaanam kitap.
Pwnbog Nenibi-ngam Hang Lengtwrnam
2At Sw kaaneq bvla ree daqnbo Pwnbov;
At Sw ree daql hoo hang lingtwr-twrya dvn;
At Sw ree daqdwn mwwg ceebio tulug aoho
hoo mwwg ceebio tulungam hang lengtwr twrya gab pvvg dvn.
3At Sw haaxaq xaqla maadwn hoo huqlw ho ator dvn,
hoo At Sw hoggub nyijaqkam nyimuram apaqram.
Mwwg lamtangv cwkeq-lemeq dooi bvla nyodo taangv,
hoo doomwqkv mwwg lvpiag diimwrv.
4Mwv sa-svlongam yolu ruql ham pwtw dvb mvdwn;
mwv pobu mwlwngam pwtw dvb xoom dvn;
Basan la Karmelv sengnum;
swiywq nyam-nyambo Lebanonv sengnum:
5Puutu mwlwngv mwwg agaho hwqnum;
yorn mwlwngv jiqnum;
swcwngv mwwg agaho hoi-hocanam,
gvda gvtv la hoqho doonbo tulungv.
6Hiyv mwwg hang lengnam
agaho daqnyi tayin?
Hiyv mwwg haaxaqnam ogho cwqnyi tayin?
Mwwg hang lingtwrnamv wm hvb toolin dvn,
hoo mwv wlw tulungam vmwq-yumgub mwmwqnum.
7At Sw aldvn,
vs-axaq aalam cwwgw nanv;
mwv cengdwn hiyv mwam cwwgwdvn.
8Hvbmabde diidwr iss vcjaqb tonam lvgab mwv ceebio tulungam twrkiq-twrmal twryum tayin,
hoo mwwg ceebio tulungam kan twdwq ura nagub ruqmin gvtayin.
9No hoggv At Swn ceeko dvb mwwsil mwwdwn?
Mwv twrkiq-twrmal twryum tayin;
vs-axaqkv lwnyi dvb daqrab kuram.
10Hoggab bulam taa-haataqho hoqtu pan hvb nyipa ku,
bulv twwlayil twwxum bo hvb nyinam;
bulv pwtw rwrw bo svvda-teriam gupw maab gunam hvb nyinam.
11Nulug hoqgv niqtuq dooma dvb tomswr-hony bov
At Swn mwwsil almab ceekol nyidwb mwwnbo,
ak haanum.
12Soq si At Swg benamv,
“Bulv ator xeqxeq bvla mvqlw sujaqkam,
bulam pageq lotwl hoo wleq tayin.
Ngo nam dwqtwr dwqm sujaqkam,
ngo nam dwqtwr lokkam dwqm kuram.
13Hoo sija ngo mwwg luukam noqg hoqgv tupaq jitayin
hoo nam tuml ap nanv cwrsaq-bvraq taikun.”
14At Sw noqg pagoq gab gaml jip pakun:
“Noqg eminam lokam muiyu-mvca kuram;
noqg nammwg svvda taqnam guss samla dvvcw guss
pwnbo tulungam ngo papaq tayin.
Ngo noqg nyubungam mvtayin, hoggab no alma.”
15Kaato, gvda puutug aoho, mwwg tugu puiyam
baqa bo lvpiangam,
hiyv swrsongam pui dugaq dvn!
Judanga, noqg durum mam pvvl apto;
noqg dingrnam mam niqtuq lengm to,
hoggab nywywngam niqtuq dooma bov noqg dookub wpeq kuram;
mwam twrb looda twrm pakun.
Currently Selected:
NAXUM 1: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
