METIYU 26

Jisun Mengdwb Ywrmin Sunam

(Mk 14:1-2; Lk 22:1-2; Jn 11:45-53)

1Jisu soq mwlw sam beknv benya tukul, kokw so mwwg buu tulungam mwv benum, 2“Aal loonyig kokwngam Juhudi nyedarko Durum moodho Nyia Ko Tuupam daapo aoho mengm dvb nyemaq alaqho jipaqtayin ham nulv cengdo.’’

3Kokw so nyub but tulungv la nyiixa nyi tulungv olum gob Nyub But, Kaiyapaswg namho hookum nyanum. 4Jisun kvsil nootul mwam mengdwb ywrsnum, 5“Ngulv sam durum dook moodam nyiyo ju, hvb nyibaloqkam nyi tulungv hur marab duqtayi,’’ hvl benum.

Jisun Betani Nampamho Kuty Piaqnam

(Mk 14:3-9; Jn 12:1-8)

6Jisu Betani nampamho tviyiq nyinbo Simong namho doonum. 7Jisu dvdul doodwkho nyem akv kuty xinam sungam albo alabastar uppum pumg bvalayil mwwg dookub haabnv mwwg dumpongam nyem akv kuty piaqnum.

8Buu tulungv sam kaapa tvl hang lengb nv benum, “Hoggab sam mwciq-mwiyiq dvn? 9Soq kuty sungam albo sam puqnyiloqkam twngkv vigo puqlin dvn nvpv, ho hoq twngkam jwwgwbo nyi tulungam jidwb alnum.’’

10Bulv hognvkam bidul doonam ham Jisu cengtwl bulam benum, “Nulv hoggab nyem dvn aksam bitur dvn? Hoggab mwn nyis hvvtw poot jaqkam ngoqgab nyipa kun. 11Jwwgwbo nyi tulungam nulug lvgab looxiam doodwb kaapa tayin hvbmabde nulv ngam looxiam nulug lvgab doodwb kaaparam. 12Mwv ngoqg gv aoso kuty sungam alboam piaqnam si ngam nyubuho liidnam mam nyix-nyiaql nyidwn. 13Ngo nulam jvqtw jaqb bedwn, hogloq ho soq tugu pui sam bekin tayin hoqho soq nyem ak soq nyinam sam bepa dvb nyitayin.’’

Judas Nyepin Dukub Loorwqnam

(Mk 14:10-11; Lk 22:3-6)

14Kokw so buu wyw leq vnyig pengko hoqgv akwn Judas Iskeriot hvl eminam akv nyub but tulug dookub wbnv 15mwlwngam benum, “Ngo Jisun nulam nyepin pinlin jibaloqkam nulv ngam hognvkv jitayin?’’ Bulv rup twngk kabar cammumgo hvnv ham mwam jinum. 16Hoq hoqgv Judas Jisun bulug alaqho nyepin pinlin dvb mood albo pagoq meegaql doonum.

Jisu Juhudi Dvtv Durum mam Mwwg Buu Tulug Lvgab Dvnam

(Mk 14:12-21; Lk 22:7-13,21-23; Jn 13:21-30)

17Opap kiilwq maanam wtw dvd otuq durum aalho buu tulungv Jisug ogum haabnv mwam toxnum. “Dvtv Durum mam no ngulam hogloqho mwx-mvaq mvdwb mwwdwn?’’

18Mwv bulam benum, “Bopam uraho doonbo akwg dookub wgdvl mwam beta, ‘Tomswr bov, bedwn, Ngoqg moodv haapa ku, ngo la ngoqg buu tulungv Dvtv durum sam noqg namho dvntayin.’”

19Buu tulungv Jisug bulam bekjaqb Dvtv Durum dvnam mam mwx-mvaql mvknum.

20Ariyum yukso, mwv mwwg wyw leq vnyig buu tulug lvgab lokub dvdwb doa kunum. 21Dvsam dvdul dootwl Jisu benum, “Ngo nulam jvqtw jaqb bedwn, nulug pengko soqgv ngam nyepin tayin.’’

22Buu tulungv vijaqg muur albanv mwam akwn kokwb akwn tox xurabnum, “At Sw ngoma co?’’

23Jisu birwqnum, “Hiyv ngoqg lvgab mwwg wtwngam dvnam betaho swwburbo ak hv ngam nyepin tayin, 24Dvrwqbo potangv bekjaqb Nyia Ko Tuupv sitayin hvl benam hvb nyitayin, hvbmabde Nyia Ko Tuupam nyepinbo nyi ak hoqgab mwwdwqnam jaqgo! Hoq ak hv nywywngam dwrbuqma nyiloqkam aljaq himbanyi.’’

25Ho mwam nyepinbo Judas benum, “Tomswrbo, jvqtw jaqb no ngam bema co?’’

Jisu mwam birwqnum, “No kvtaqjaqb bedo.’’

At Swg Swrsa Dvnam

(Mk 14:22-26; Lk 22:14-20; 1 Kor 11:23-25)

26Kokw so dvdul doodwkho Jisu wtw taqg naarab banv xuml paqnv wtwngam pindub tvl mwwg buu tulungam ham jinum, sam naagdvl, “Dvto, soq si ngoqg gv soodinv.’’

27Hoq kokw so mwv pvtaqkam naarab banv xuml Pwnboam paqnum, ho bulam jinum, mwv benum, “Nulv mwlwngv sam twwto, 28Soq si ngoqg hijumv, Pwnbog pvvbv, mwlwg nyicam nyedar darxaq naadwb. 29Ngo nulam bedwn, soq twwnam sam nulug lvgab ngo nywywngam twwpa kuram hwdlo ngoqg Abwg lvpw tol nitib twwnam sam lok nulug lvgab twwma deedib.’’ 30Kokw so bemin benum, Olib puutub lengl wknum.

Jisu Pitorg Xaalyo Deenam mam Belinam

(Mk 14:27-31; Lk 22:31-34; Jn 13:36-38)

31Ho Jisu bulam benum, “Soiyig aiso nul mwlwngv ngam apaqpel keleqtayin, hoggab Dvrwqbo Potangv bedwn, ‘Pwnbov sviya rvkybo akam mengtayin ho sviya pvtwngam cwrsaq twqb mvtayin.’ 32Hvbmabde ngam turdkub swwgwb purab kokwngam ngo nulug otuqb Galilib wcotayin.’’

33Pitor Jisun birwqnum, “Mwlwngv nam apaqjaqkam, ngo nywywngam nam apaqpel wram!’’

34Jisu Pitornvn benum, “Ngo jvqtwjaq bedwn, soi poroqngv xoqma daab, ngam no cengma dvnwk hvl luum go no betayin!’’

35Pitor birwqnum, “Ngo noqg lvgab sidwb nyijaqkam hoojaqkam ngo sitayin.’’

Hoq benam akinam buu tulu mwlwngv benum.

Jisug Getsemani Booluho Xumnam

(Mk 14:32-42; Lk 22:39-46)

36Hoq kokw so Jisu mwwg buu tulungam bool Getsemani hvl benam nyookub wbnv mwwg buu tulungam mwv benum, “Nulv so dooiya to, ngo alo wggin gvdwl xumtayin.’’ 37Mwv Pitornvn la Jebedig ko tuup vnyiam mwwg lvgab bool wgnum. Ho mwv vdwq akwl mwwdwq saqk gob vs-axaqb nyirabnum. 38Kokw so mwv bulam benum, “Ngoqg hang si mwwdwqkv ngam sig tado. Nulv soq so hengabl ngoqg lvgab dooiya to!’’

39Mwv hoq ditaq hoqgv meeg wggin layil, mwv atv kedhv nywtin tvl Abam xumnam, “Ngoqg Ab, soq hentwrnam ui pvtaq sam ngoqg galoqkv naapaq dvb nyipa nyiloqkam naaxa tvb! Hvbmabde ngoqg mwwkub ma, hvbmab noqg mwwlwqkob nyimto.’’

40Kokw so mwv buu oumg dookub haanum ho mwv bulam yubl doodub kaapanum, ho mwv Pitornvn benum, “Hoggub nyil nul oumv ngoqg lvgab wm swlw duur gob kam kaayal doonyi maadkun? 41Hoqgab pookal sup koma dvb hengabl xuml hvvmin gvdwl nulv dooto. Yalv mwwby sujaqkam gv ayaqngv ator maadwn.’’

42Jisu lokta bulam apaqpel wggin banv xuml benam, “Ngoqg Ab, soq hentwram twwn nan pvtaq sam ngo twwma dvb no naapaq dvb mwwma nyiloqkam, noqg mwwkub nyimto.’’ 43Mwv lokta hookurl kaaknamv bulam yubdul doodub kaapanum, hoggab bulug vnyiqkam nyiqbiol doodwb ap nyomanum.

44Kokw so Jisu hvraqb bulam apaqpel luum dvb xumtab wnum, ho benam akin agam mam hvraqb betinl benum. 45Kokw so mwv buu tulug dookub hookur kunv benum, “Nulv sija godab yubtab tabl doodu dvn? Kaato! Nyia Ko Tuupam nyicbo nyi tulug alaqho gvqlwq jid moodv hvvnwq paku. 46Kuj, gorabtuk, ngulv wnkuj. Kaato, ngam nyepinbo nyi akv si haapa ku!’’

Jisun Nootunam

(Mk 14:43-50; Lk 22:47-53; Jn 18:3-12)

47Jisu agam goodul doodu dvkho buu wyw leq vnyig pengko hoqgv akwn Judas, mwwg lvgab nyi acamgo nyub buda tulungv la nyi axa tulungv kanamnamv lyoqr orioq ho dvvp jootwl haanyanum. 48Nyepinbo akv nyi acam mam bix-beaql apnum, mwv benum, “Ngo hoglo nyi ak ham moopup tayin, hoq nyi hv nulug nootu tanam akv. Ho nulv mwam nootu laka!’’

49Judas Jisug ogum haabnv benum, “Tomswrbo, swrsomalongv noqg lvgab dooba nvka,’’ hvl mwam moopupnum.

50Jisu birwqnum, “Ajin, no hognvkam nyitab haapan ham vnwqb nyito!’’

Kokw so ogum haabnv Jisug gv aoho alaq idaql mwam nootul bool wg kunum. 51Jisug lvgab yvba bo nyi tulug pengko hoqgv akwn mwwg orioqngam seqlin banv nyub but jaqg nyera akwg nyuru ruugwn xaqxianum. 52Jisu mwam benum, “Noqg orioqngam buqxaho xwqlwq tuku. Lyoqr orioq buqnbo mwlwngv lyoqr lvgab atam twrstayin. 53Ngo ngoqg Abam svka konyiloqkam mwv ao gumtw nyemaq lwwyw leq lwwnyi laleqgo kanam jiram hvl no mwwdwn? 54Hvbmabde Dvrwqbo potalo bepnamv hoggub nyil niqtuq lengnamv niqtuq lengtayin?’’

55Kokw so Jisu nyi tulungam benum, “Nulv dvcobo nyi akgon nootunam hvb orioq bwwl hoo dvvp jootwl ngam nootu taab haaiyin i? Ngo aalwg looxiam dvrwq namlo ho ngo dootwl tomswr dvkho nulv ngam nootu maanum. 56Hvbmabde mwlw si nyiqry benbo tulungv Dvrwqbo potalo xeqpwl ap kunam mam niqtuq lengm dvb nyiknum.’’ Ho buu mwlwngv Mwam apaq peekul ho keleq kunum.

Jisun Dookum Agaho Boanam

(Mk 14:53-65; Lk 22:54-55,63-71; Jn 18:13-14,19-24)

57Jisun nootubo nyi tulungv mwam nyub but Kaiyapaswg nammwb Pvvb tomswrbo ho nyi axa tulug dookum dookho boanum. 58Pitor wc-wc yoomab kokw-kokwb nyub but nam baag ogum namgob wmin gvnum. Mwv urab haabnv rvkybo tulug lvgab dootwl hoggub jaq nyin dvba dw ham kaayal doonum.

59Nyub buda tulungv ho Dookum hoqg doonbo mwlwngv Jisun mengdwb vm xaalyo benbo hvvky pagoq meekarnum. 60Hvbmabde hog akukam meelin nyomab nyinum, hvbsujaqkam vigo nyiv mwwg pagoqkam xaalyob benum. Kokw jaqso nyi vnyi go 61haabnv Jisun benum, “Soq nyi ak si benum, ‘Ngo Pwnbog xumk nammam sapia tvl aal loum kokwngam mvdar tayin hvl benum.’”

62Nyub but akv daqrab banv Jisun benum, “No soq sam nam yolu hvl benam sam hog birwqsv dooma i?’’ 63Jisu birwqmab, cooikab doonum. Nyub but akv lokta mwam benum, “Sima bo Pwnbog emin gab ngo nam dingl bedwn ngulam jvqtw jaqb bekin tvb, no Pwnbog Ko Tuup, Ywwnbo ak hvvjaq yv?’’

64Jisu mwam birwqnum, “Noqg benam hv sulak hvbmabde ngo nul mwlwngam At ator yaanbo akwg lvqbwq alaq taqc tol doodwb hoo ao gvda toloqgv doomwq aoho ipoqnam mam kaapa tayin.’’

65Nyub but akv mwwg atwg gv vjam swrcaq-swryaq banv benum, “Mwv Pwnboam bepaq paku, ngulv sija hvvky meegaq dukub nyikma, hoggab mwv Pwnboam bepaq taiyaqnam mam nulv atv tagnukba! 66Nulv hoggub mwwdo?’’

Bulv birwqnum, “Mwv nyixiaqpa, hoqgab mwv sidkub nyipa ku.’’

67Kokw so mwwg nyuqm mam tacor curyaqnum, hoo mwam jwwnum, hoo mwam pitaql mvnbo nyi tulungv 68benum, “Ywwnbo, nam jwwn bo nyiv hiyv ham nyiqry kaalin kaatna!’’

Pitorg Jisun Cengmak hvl Vmvnam

(Mk 14:66-72; Lk 22:56-62; Jn 18:15-18,25-27)

69Pitor nyub but nam wgag haty ho doodu dvkho nyub butwg paqn nyijwr ko akwn mwam benum, “No kam Galili Jisu lvgab yvn mvlak.’’ 70Hvbmabde mwam cengmak hvl bul mwlwg agaho benum, mwv birwqnum, “No hog hvl bedwn ham ngo tacin ma.’’ 71Hoqgv mwv urag viyap haagab haanum, hoqgv mwam nyem ko ak kaapa tvl nyi tulungam bekinnum, “Mwv Najaret Jisug lvgab yvbanum.’’

72Pitor lokta lwnyi dvb birwqnum, “Ngo dingl bedwn, ngo hoqg nyi ak ham ngo cengma dvn!’’

73Hoqgv oyu maadab hoq dvtaqho daqnyiabo nyi tulungv Pitorg dookub haabnv benum, “No bulug pengko hoqgv yvnbo akgon hvvma, hoggab noqg agam goonamv nam bekin do!’’

74Kokw so Pitor benum, “Ngo hoq nyi ak ham cengma! Ngo xaalyo dvloqkam Pwnbov ngam kaato hvl beesnum!’’

Hvl beda kalam poroqngv xoqnum, 75ho Pitor Jisu mwam hog hvl benum, ham mwwpa kunum poroqngv xoqma daab, “No ngam cengmak hvl luum go vm mvtayin.’’ Mwv agab lengknv vcjaqb xabnum.

Currently Selected:

METIYU 26: NYISBSI

Highlight

Copy