METIYU 12

Doonunam Aalwg Pagoqkam Toxnam

(Mk 2:23-28; Lk 6:1-5)

1Jisu Doonu dvk aal golo am rongo rwqtaqb wpeql wnum. Mwwg buu tulungv kanonum, hoqgab am vmlyw niqtuqngam inciql am mam dvnum. 2Parisi tulungv soq sam kaapa tvl Jisun benum, “Kaaka to, noqg buu tulungv ngulug Pvvbam pvvb juqbo pa, hoggab noqg buu tulungv soq sam Doonu aal so nyipa!”

3Jisu birwqnum, “Debid la mwwg nyi tulungv kano yikho hognvkam nyinum ham nulv nywywngam poory ripa ma i? 4Mwv Pwnbog nam urab haabnv mwv la mwwg nyi tulungv Pwnboam jinam wtwngam dvnum, soq wtw sam dvngam maanum, soq si pvvbam juqbonam hvb nyinum, hoggab soq wtw sam nyub tulu arongv dvdwb nyinum. 5Hvbmab Mojesg pvvb ho Doonu aal looxiam xumk nam uraho doonbo nyi tulungv doonu dvk Doonu aalwg Pvvbam pvvb juqbonum, hvb jaqkam nyixiaq maanum hvl nulv poory ripa ma i? 6Hvbmabde nulam ngo bedwn, Xumk nam mam koi yaanbo ak si doopa ku. 7Dvrwqbo Potangv bedwn, ‘Ayangam sulak ngo meegaqdvn, sibin svv guunam mam ngo koma.’ Nulv jvqtw jaqb soq si hognvkam bedwn ham cengloqkam nulv nyi nyixiaq maanboam nyixiaq pan hvl bemab nyis paco. 8Hoggab Nyia Ko Tuupv Doonu aalwg At Swv su.”

Alaq Laqya boam Mwpnam

(Mk 3:1-6; Lk 6:6-11)

9Jisu hoqgv wknv kokw so Sinagog nam golo urab haanum. 10Hoo nyi alaq laqyabo ak doonum. Nyi tulungv tuugin Jisug nyixiaqnam mam yolu pagoq meegaql yvnyianum, hoqgab mwam toxnum, “Doonu aalam vcam mwp dvb Pvvblo doodwn i?”

11Jisu bulam birwqnum, “Nulug pengko hoqg nyi ak gonwg sviya dorg Doonu aalam ung golo holwq baloqkam ham nulv hoggub mvtayin? Mwv hoq sviya ham nootul ung ura hoqgv agab naalin ram i? 12Hoggab nyiv sviyangam vigo xibin yaanamv! Hoqgab Doonu aalam albo bonam nyidub ngulug Pvvbv hoq aalam svka kaam dvb gaml jidwn.” 13Kokw so mwv alaq laqyabo nyi ak ham benum, “Noqg alaqngam ijinto.”

Kokw so mwwg alaqngam ijinum ho ijin kalam twqda mwwg alaqngv alaq laqgin hvbkalam al kunum. 14Kokw so Parisi tulungv wggin layil Jisun mengdwb hvl hwwgaqnum.

Pwnbog Hvvky Nyera

15Kokw so Jisu mwam mengdwb hvl ceebio baql hwwgaqnam puiyam cengt kul mwv hoq nyookam apaqpel wleqnum hoo mwwg kokw kokwb nyiv vigo wmin gvnum. Mwv vcbo mwlwngam mwpnum 16Ho bulam hiyv nvkam mwwg pagoqkam bekin maabwk hvl yvtw panum. 17Mwv soq sam nyinam si hvbaloqkam nyiqry kaanbo Aijaya Pwnbov hognvkam bemnum ham niqtuq lengm dvb nyinum

18“Soq si ngoqg nyera xuqbwqnam akv,

mwv ngoqg hang xumnam akv. Ngo ngoqg yalam mwam jilwqtayin ho mwv nyoodo nyi mwlwngam pw-hwwdynam mam bekin tayin.

19Mwv yolu swcin duram, sogoq goqram,

ho lamta bvvx hookam agam vcib gooram.

20Mwv ator doomabo nyi tulungam hang biitayin,

ho asarbo nyi tulungam ayatayin.

Mwv lootwjaqb mviyanam mam kaapanam gob

nyidynam mam nyikil dootayin.

21Ho mwwg emin ho nyoodo

nyi mwlwngv mwwgw tayin.”

Jisu la Beljebul

(Mk 3:20-30; Lk 11:14-23)

22Kokw so nyi tuugin Jisug dookub nyi nyiqca bo hoo goolaq maanbo nyi ak ham mwp kunum, hoggab hoq nyi ak hv agam mvkam gooknum hoo vnyiqkv kam kunum. 23Nyi acamv Jisug soq nyinam sam kaatwl lomnum. Bulv benum, “Jvqtw jaqb soq nyi ak si Debidg ko Tuup gokam de?”

24Soq nyinam sam Parisi tulungv tapa tvl birwqnum, “Mwv sonyiam ruqpaq dvn si hvbaloqkam bulug lvpw at Beljebul mwam ator jigam gab sulak.”

25Bulv hognvkv mwwnam ham Jisu cengnum, hoqgab mwv bulam benum, “Hiyvg gvdangv atv hang pwsaqb baql dvpar asaqb nyil akwn akwn nyob pamin sunbo hoq gvda hv swwiyuram. Hoo hiyvg nampamv ho imiqkv dvpar parsaqb pvrnyi gob nyil akwn akwn paiyaq mins dvn hoqhv bwdw hotayin. 26Hoqgab Uiyv ui kalam mam paiyaq mins baloqkam uiyig lvpwngv asaq asaqb nyitayin! 27Nulv bedo ngo sonyiam ruqpaq dvnwk hvl, hoqhv Beljebul ngam ator jigam gab. Vv, hvb nyiloqkam nulug buu tulungv hiyvg galoqkv atoram naalayil sonyiam ruqpaq dvn? Hoqgab nulam bulv pw-hwwtayin. 28Ma, Beljebul ma sulak, hvbmabde ngam ator jinbov Pwnbog yalv sulak jitwl ngo sonyiam ruqpaq dvn, ho soq si Pwnbog Lvpwngv nulug ogumb haapa kun hvl kaakin dvn.

29“Hiyv nyiv kam nam hoqg mwlwngam ator yaanbo nyi akam gwbwl leedaq cooma baloqkam nyiig nammwg dvrab pam hublayil naal wg nyoram.

30“Hiyv nyiv ngoqg nyemaqb daqma dvn hoq nyi hv mwv jvqtw jaqb ngam ceebio baqdwn, ho hiyv nyiv ngoqg lvgab noocum maadwn, mwv jvqtw jaqb dvmciq dvmyiql damxa dvn. 31Hoqgab ngo nulam soq sam bekin dvn, nyi tulug nyic nyinam mam ho almanbo agam benam mwlwngam apaq jidwb nyitayin, hvbmabde Dvrwqbo Yalam almab bimur boam nywywngam apaq jiram. 32Hiyv lajaqkam Nyia Ko Tuupam bec benboam mwwg nyicam apaq jitayin, hvbmabde hiyv nyiv Dvrwqbo Yalam bec bedwn ham mwwg nyicam kuiyum nagub nywywngam apaqdvb nyiram.

Svvnwg Aaxy

(Lk 6:43-45)

33“Aaxy albo kaapa dvb mwwb nyiloqkam nulv svvn bobuqboam doog dvb nyidwn, hoggab nulv svvn bobuq maanboam doog baloqkam aaxy alman boam kaapa tayin. Hoggab aaxy hoqgv svvnam kaacin dvn. 34Tvbwg tulu, nulv al maatwl hoggub agam mam goonyi tayin? Hoggab hang uraho hognvkv doodwn ham agamv goodwn, 35Albo nyiv albo dvrab pam mwwg uddum hoqgv naalin dvn ho almanbo nyiv almanbo dvrab pam mwwg uddum hoqgv naalin dvn.

36“Hvbmabde ngo nulam jvqtw jaqb bekin dvn, pw-hwwd aalam nyi vxiv hog hwdgo almanbo agamv mwv gooknum ham mwlwngam bid dvb nyitayin. 37Hoggab noqg atwg agam goonam hoqgv nam pw-hwwdil noqg yolu doonam doomangam nyitayin.”

Swrdorxeqlo Kaakin Tvb

(Mk 8:11-12; Lk 11:29-32)

38Kokw so Pvvb tomswrbo hoo Parisi ata gon mwam benum, “Tomswrbo, ngulam no swrdorxeqb nyinamlo ak nyil kaakin tvb.”

39Hvbmabde bulam mwv birwqnum, “Soq nyi tulu si hog hwdgo al maadwn ho dvrwq maanbo nyiib nyidwn. Nulv ngam swrdorxeqlo nyil kaakin tvbwk hvdwn? Hvbmabde nyiqry kaanbo Jonag aoho hiyv nvkam hoqhvk swrdorxeq nyinam mam kaakin dvb nyiram 40Jona hoggub nyil ngui cirt albo ayeq uraho aal loum ai yubum go doonum, hoq hvbkalam Nyia Ko Tuupv swcw nvg uralo aal loum hoo ai yubum go doodwb nyitayin, 41Pw-hwwd aalam Nenibi nampam nyi tulungv daqrabl nulam yolu betayin hoggab Jonag bekinam mam tatwl sija Jonanvn koi yaanbo ak si doodo. 42Nyooko gvdag Sebag Vi-kooriv pw-hwwd aalam daqrabl nulam yolu betayin, hoggab mwv Lvpw atwg Solomonwg nyijwq-nyegam mam tatab hvd gvda aado hoqgv haanum. Hvbmabde ngo nulam bedwn, kaato, sija si Solomonnvn koi yaanbo akv doodo!

Almanbo Yal Hookurnam

(Lk 11:24-26)

43Almanbo yalv nyi ak galoqkv leng layil mwv iss doomako nyookho gaqkarl doonu dvb meekar dvn, hvbmabde mwv ham meepa nyoma dvn. 44Kokwngam mwv bedwn, ‘Ngo hogloq nam hoqgv lengknum ngoqg hoq nammwb wkur taikun.’ Ho hoq nammam haal kaanamv asarb doodwb, dvrwq dvb hoo hog mwlwngam aldvb kaapa dvn. 45Ho mwv wbnv mwam alyama bo yal kvn gota boal hoq urab haal doodwn, kokwngam hoq nyi ak hoqg bvrwqngv otuqg ham al yak maab nyidkun. Almanbo nyi tulu lvgab hoq hvbkalam nyitayin.”

Jisug Annv la Vbw-bor Tulu

(Mk 3:31-35; Lk 8:19-21)

46Jisu nyi tulungam agam goodul doodwkho mwwg annv la bor tulungv mwwg lvgab agam goodwb mwwnv agahv doodunum. 47Kokw so nyi akwn benum, “Mwwg annv la bor tulungv mwwg lvgab agam goodwb meegaqdo ho agahv mwam kaayal doqdu dvk hvl bepanum.” 48Hvbmabde mwam bepabo nyi ham mwv birwqnv benum, “Hiyv ngoqg annv hoo bor tulungv?” 49Kokw so mwv mwwg buu tulug taqcib alaqngv irab banv benum, “Kaato! Soq tulu siilak ngoqg annv hoo ngoqg bor tulungv! 50Hiyv nyiv ao gvda tolo doonbo ngoqg Abwg mwam nyitwk hvl benam mwwg mwlwqkob mwwg hangam xumdwb nyinbo nyiv ngoqg borv, bwrmv ho annv.”

Currently Selected:

METIYU 12: NYISBSI

Highlight

Copy