METIYU 1

Jisu Kristog Nwd

(Lk 3:23-38)

1Soq si Abraham ko hos Debidg ko hosiqb lengn bo Jisu Kristog nwd niqtuqkv.

2-6aAbraham ko hoqgv Debid Lvpw at nagub soq tulu si ko hosiv Abraham gv kov Aisak, Aisak gv kov Jakub, Jakub kov Judas ho mwwg vbw-bor tulungv. Ho Judag nywxw Tamar hoqgv Perej la Jera doonum, ho Perej kov Hejron, Hejron kov Ram. Ramwg kov Aminadab, Aminadab kov Nason, Nason kov Salmon, Salmonwg nywxw Rahab galoqkv Boaj, Boajwg kov Obed, Obed kov Jesse ho Debid Lvpw at.

6b-11Kokw so Israel nyi tulungam cwrsaq twqb bookarl Bebilonwb boonam gob soq tulu si Debid galoqkv lengn bo ko hosiv-Debidg nywxw, Uriya galoqkv naareqnam nyem hoqgv Solomonwg kov Rehoboam, Rehoboam kov Abija, Abijag kov Asa, Asag kov Jehosapat, Jehosapat kov Joram, Joram kov Ujjiya, Ujjiya kov Jotam, Jotam kov Ahaj, Ahaj kov Hejekiya, Hejekiya kov Manasse, Manasseg kov Amos, Amos kov Josiya, Josiya kov Jehoiakin la mwwg vbw-bor tulungam Bebilonwb bool wgdvk moodho doonum.

12-16Bebilonwb bool wxo kokw soqg Jisu Kriston dwrbuqnam gob nwdv siilak, Jehoiakin kov Siltiyal, Siltiyal kov Jerubbabel, Jerubbabel kov Abiyud, Abiyud kov Eliyakim, Eliyakimg kov Ajor, Ajor kov Jadok, Jadok kov Akim, Akim kov Eliyud, Eliyud kov Eleajar, Eleajar kov Mattan, Mattan kov Jakub, Jakub kov Josap, Josap Meerig nyol; Meeri galoqkv Kristo hvnam Jisun bwwtayin.

17Soq sib Abraham hoqgv Debid nagub ko hotamv camleq vpynum ho Debid hoqgv Bebilonwb boonam gob hotamv camleq vpynum, hoqgv Bebilonwb booxo kokw soqgv Kriston dwrbuqnam godab hotam camleq vpy kalamnum.

Jisu Kriston Dwrbuqnam

(Lk 2:1-7)

18Jisu Kriston soq sib nyil dwrbuqnam. Mwwg ann Meerinvn Josap nyem begaql apnum. Hvbmabde nyem nyega naamin suma daab Meeri Dvrwqbo Yal galoqkv ko ak gvnum. 19Josap nyiidarbo nyi ak gob swwnum, mwv hognvkv aldvn ham nyinum, hoqgab mwv Meerinvn nyi mwlwg kaagaho hvnyw-har nyipa dvb mwwmanum, hvbmabde cooikab apaqdvb mwwl mwwsil doonum. 20Hvbmabde mwv soq sib mwwdul doodwkho At Swg gumtw ak mwwg dookub haabnv yuma maamwl benum, “Debid ko hosiq Josap, no Meerinvn noqg nywxw boodwb mwwram maab, hoggab mwnwg ko gvnam si Dvrwqbo Yal galoqkv nyidwn. 21Mwv nyega ko ak bwwtayin, no mwwg eminam Jisu hvl apto, hoggab mwv mwwg atwg nyi tulungam bulug nyic hoqgv ywwtayin.”

22Soq mwlw si At Sw hog hvla xeq nyiqry kaan boam bekinam mwlwngam jvqtw jaqb niqtuq lengm dvb benum. 23“Kaato, nyijwr ak ko gvrab tayin ho nyega ko ak bwwtayin, mwwg eminam Immanuel hvl emin dvb nyitayin” (hvgdvn hv, “Pwnbo ngulug dookub dooba dvn”).

24Kokw so Josap yuma moul huurab laikul At Swg ao gumtwngv mwam benam hvbkalam mwv kokw so Meerinvn nyem naaknum. 25Hvbmabde Meeri mwnwg nyega koam bwwnam gob bunyiv nywxw-nyol boomin sumanum. Kokw so Josap ko akam Jisu hvl emin ap kunum.

Currently Selected:

METIYU 1: NYISBSI

Highlight

Copy