JON 9

Jisu Nyiqca dvb Ko Bwwnam Nyi Ak Mwpnum

1Kokw so Jisu lamta ho wdul dooi yikho ko bwwiywk hoqgv nyiqca dvb bwwnam nyi ak kaapanum. 2Ho mwwg buu tulungv mwam toxnum, “Tomswrbo hiyvg nyic nyia nyigam gab soq nyi sam nyiqca dvb ko bwwpan, mwwg atwg nyic nyia gab yv, ma mwwg ann-abwg nyigam gab?” 3Jisu birwqnum, “Mwwg nyiqcanamv mwwg nyic nyia nyigam gab kama, ann-ab nyigam gab kama, hvbmabde Pwnbog nyis tulungam nyidul doonam atoram mwwg galoqkv kaapa mvdwb sulak nyipan. 4Ngam kanam bog bonam ngulv aal huto deeda so nyidwb nyidwn, aiyv hoodu do, ho hiyvkam nyis tulungam nyiny kuram. 5Ngo gvda gvtso doody deedib, ngo gvda gvt soq hutongv.” 6Sam mwv bexo kokw so Jisu kedho tacoram curxab tvl suiyub mvtwl mwv nyi ak hoq vnyiqho suiyungv neetwl kanam banv benum, 7hoo mwam benum “Wgdvl noqg nyuqm mam siloam swnyiq al moomiqta.” (Hvgdvn hv kanamnam) Ho nyi akv wknv nyuqm mam moomiqnum hoo vnyiqngv kaapa tukul wkur kunum. 8Ho mwwg gutu-gorangv la mwam otuqho kodul doonam mam kaanbov benum, “Soq nyi aksi dootwl konbo hvvmas i?” 9Tuugin benum, “Mwv sulak.” Asaqkv benum, “Ma hvvma, hvbmabde mwam kvviyiq bogo.” Nyi ak hvviya atv besnum, “Ngo sulak hoq nyi akv.” 10Bulv mwam toxnum, “Noqg vnyiqkam hoggub nyil mvko kunum?” 11Mwv birwqnum, “Jisu ngvk hvl benam nyi ak hv suiyu ata go mvbnv vnyiq si neetwl ngam benum, “Siloam wgdvl noqg nyuqm mam moomiqtak hvl betwl hoo ngo hoqb wnv moomiqnum, hoo ngo moomiq daqkalam kaapa kunum.” 12Bulv mwam toxnum, “Mwv hogloq ho?” Nyi akv birwqnum, “Ngo cengma.”

Parisi Tulungv Mwpnam mam Miidumnum

13Ho bulv nyiqca bo nyi akam Parisi tulug dookub boanum. 14Jisu suiyu neel nyi ak hoqg vnyiqngam mvkol mwpko aal hv Doonu ko aalwb nyinum. 15Ho Parisi tulungv nyi akam hoggub nyil kaapa kunum hvl lokta toxnum, mwv bulam bekinnum, “Mwv suiyu atago ngoqg vnyiq si neenum, hoo ngo ngoqg nyuqm mam moomiqnum, hoo ngo kaapa dukun.” 16Parisi tulu hoqg tuugin benum, “Soq sam nyinbo nyi ak si Pwnbog galoqkv haaram, hoggab mwv Doonu aalam vrr ma.” Hvbsujaqkam tuugin benum, “Nyic nyia nyinbo nyiv hoggub nyil soq svk ator alwb nyimanam mam swrdorxeqb nyilatayin?” Hoqgab bulug pengko ho hang pwsaq pwsaqb mwwnyianum. 17Hoqgab Parisi tulungv nyi akam lokta toxnum, “Noqg begamv mwv noqg vnyiqngam mwv mvko pan hvdo hvnyiloqkam no mwwg pagoqsam hog hvl bedwn?” Mwv birwqnum, “Mwv nyiqry benbov.” 18Hvbsujaqkam Juhudi tulungv nyi nyiqcal doon bov sija kaapa dukun hvl nyi ak hoqg ab annam goqnam gob mwwjw dvb mwwmanum 19hoo bulv bulam toxnum, “Soq si nulug nyega kov i? Nulv mwam nyiqca dvb ko bwwjaqnum? Hvnyiloqkam mwv sija hoggub nyil kaapa dukun?” 20Mwwg ab annv birwqnum, “Ngulv cengdwn mwv ngulug nyega kov, hoo ngulv hamkam cengdwn mwam nyiqca dvb ko bwwnum. 21Hvbmabde mwv sija kaapa duku ham ngulv cengma. Mwam toxto, mwv akam paku, mwv atv birwqtayin.” 22Mwwg ab annv Juhudi tulungam bos banv soq sib benum, hoggab, Juhudi tulungv Jisun hiyv akgon Ywwnbo ngvk hvl begam gab Sinagog nam hoqgv ruqlin dvb hvl birwl ywrbnv apnum. 23Hoqgab mwwg ab ann tulungv, benum, “Mwv akam paku mwam toxto.” 24Lwnyi dvb bulv ko bwwiywk hoqgv nyiqca bo nyi akam goqkur banv mwam toxnum, “No jvqtw jaqb betayinwk hvl Pwnbog aga so dingto! Ngulv cengdwn soq nyi ak si nyic-nyiab nyigbo nyiv.” 25Nyi akv birwqnum, “Mwv nyic nyia nyinbo nyiv suiyv nyima bov nyiv suiyv ham ngo cengma. Hvbmabde ngo sam cengdwn, ngo nyiqcal doonum, sija ngo kaapa dukun.” 26Bulv mwam lokta tox xudarnv toxnum, “Mwv nam hognvkv nyijnum. Noqg vnyiqngam mwv hoggub nyil mvkonum.?” 27Mwv birwqnum, “Nulam kajo oyu maadab bekin tuknvlak, nulv tagab ma. Hog nyitwl nulv sam lokta toxdvn?” Nulv kam mwwg buub swwdwb mwwkam sudco?” 28Bulv mwam bej-bepar banv benum, “No lak mwwg buungv, hvbmabde ngulv Mojesg buungv su. 29Ngulv cengdwn Pwnbov Mojesg lvgab agam goonum, hvbmabde soq nyi ak si hogloqkv haaspan bwdwq ham ngulv cengma.” 30Nyi akv birwqnum, “Hognvk taka maanam pagoq go soq si! Nulv mwv hogloqkv haapan ham cengma, hvbmabde mwv ngoqg vnyiqngam mvko jipan. 31Ngulv cengdwn Pwnbov nyic nyia nyinbog xumnam mam tama dvn, hvbmabde mwam xuml mwwg nyimdvb mwwnam mam nyinbog xumnam mam tadwn. 32Gvda gvt si swwrab dvk hoqgv jaq nyiqca dvb ko bwwnam nyi akam hiyvkam mvko jinam sija godab tapa ma. 33Soq nyi ak si Pwnbo galoqkv haama loqkam, mwv hog akam nyinyi ram.”

34Bulv mwam birwqnum, “No ko bwwiywk hoqgv nyic nyia nyiv, hoo nyic-nyiab nyil swwca pan. No ngulam tomswr tadwn i?” Kokw so bulv mwam Sinagog nam ura hoqgv agab ruqlin kunum.

Yalwg Nyiqcanam

35Bulv nyi akam ruqlinam mam Jisu tapanum, hoo nyi akam mwv kaapanum hoo toxnum, “Nyia Ko Tuupam mwwjw dvn i?” 36Nyi akv birwqnum, “Mwv hiyv ham ngam betamtvb, tomswrbo; ho ngo mwam mwwjwtayin.?” 37Jisu mwam benum, “No mwam kaag nukun; sija noqg lvgab agam goodul doonbo ak siilak mwv.” 38Nyi akv benum, “At Swn, ngo mwwjw dvn,” hoo mwv Jisun xumnum. 39Jisu benum, “Ngo nyiqca boam meegaql kaapa dvb hoo kaapa bo tulungam nyiqca dvb mvtab gvda gvtso haanum.” 40Mwwg bviywr-bvcarho yvba bo Parisi tuugin mwwg soq benam sam tatwl mwam toxum, “Ngulv kam nyiqca bov i?” 41Jisu birwqnum, “Nulv nyiqca nyiloqkam, nulug lvgab mwwmurv dooram; hvbmabde nulv sija begamv, ‘Ngulv kaadwn,’ hoqgab nulug nyiqcangv hvraqb doodwn.”

Currently Selected:

JON 9: NYISBSI

Highlight

Copy