JON 14

Jisu Abwg Dookub Wg bov

1Jisu bulam benum, “Nulug hangv mwwkwq-svqwl mwwdwq maabv, Pwnboam mwwjwto hoo ngam kam mwwjwto. 2Ngoqg Abwg dook namtv dookv vigo doodwn. Dooma nyiloqkam ngo nulam bekin banwp, hoo ngo wdeen nulgab dook mwx-mvaqtab? 3Hoo ngo nulgab dooklo ak wgdvl mwx-mvaq taden, hoo ngo lokta hookur tayin hoo ngo atv nulam bool wtayin ngo hogloqho doodwn ho nulvkam dootayin. 4Ngo hogloqb wdeen ham nulv lamtangam cengdo.” 5Tomas mwam benum, “At Sw, no hogloqb wdeen ham ngulv cengma; hvnyiloqkam ngulv hoggub nyil lamtangam cengtayin?” 6Jisu mwam benum, “Ngo lamtangv, hoo jvqtwngv, hoo swwgv. Ngoqg lvgab wma baloqkam hiyvkam Abwg dookub wc nyoram. 7Nulv ngam cengnyiloqkam, nulv ngoqg Abam kam cengspaco. Sija galoqkv nulv mwam kaapa ku hoo cengpa ku.” 8Pilip mwam benum, “At Sw, Abam ngulam kaatam tvb, hoo hoqhv ngulam xumt mvtayin.” 9Jisu mwam birwqnum, “Pilip, ngo noqg lvgab hwdgo yvba xwqt lo no ngam sija godab cengmada i? Ngam kaanbo akv ngoqg Abam kaapa kun. Hvnyiloqkam, no hoggub bedwn, “Abam ngulam kaatam tvb’? 10Pilip no ham mwwjw maadwn ngo Abwg uraho doodwn hoo Ab ngoqg ura si doodwn? Ngoqg nulam agam begdvn si ngoqg at galoqkv bema dvn, hvbmabde Abv ngoqg ura si dootwl nyis tulungam nyidwn. 11Ngo Abwg uraho doodwn hvl mwwjwto. Hvbmab nyiloqkam swrdorxeqb nyis tulungam nyinam sam kaatwl ngam mwwjwto. 12Jisu benum, “Ngo jvqtw jaqb nulam bekin dvn ngam mwwjwbo akv ngoqg nyis tulungam nyinam hvbkalam mwv nyitayin. Ho sam koi yaanbo nyis tulungam nyitayin; hoggab ngo Abwg dookub wde kun. 13Nulv ngoqg eminb hog nvkvxeq kotayin, ham ngo nyijtayin, ho Abam Ko Tuup galoqkv yuum dvb nyidwn. 14Nulv ngoqg eminb ho hog kobnyiloqkam ngo ham jitayin.

Dvrwq Yal gab Dingrnam

15“Nulv ngam aby dvn nyiloqkam, nulv ngoqg gaml benam mam pvvtayin. 16Hoo ngo Abwn kotayin, hoo mwv nulam Svka bo asaq ak jitayin, hiyv nwrba gob nulug lvgab dooba tayin, 17gvda gvtv mwam nvvrwq nyoram; hoggab gvda gvtv mwam kaapa nyoma ho cengkam ma. Hvbmabde nulv mwam cengdkun hoggab mwv nulug lvgab dooba dvn ho nulug uraho doodwn.

18“Ngo nulam hopin hvb apaqram; ngo lokta nulug dookub hookur tayin. 19Oyu maadwb gvda gvtv ngam kaapa kuram, hvbmabde nulv ngam kaapa tayin, hoggab ngo simab doodwn, hoo nulvkam simab dootayin. 20Hoq aalam nulv cengtayin ngo Abwg uraho doodwn, hoo nulv ngoqg ura si, hoo ngo nulug uraho doodwn.

21“Ngam aby bov ngoqg gamlam tatwl mwv ham apdvn. Hoo hiyv ngam aby bov ngoqg Abam aby dvn, hoo ngo mwam aby tayin hoo ngo atv mwam kaakin tayin.” 22Judas (Iskeriot maanbo hv) mwam benum, “At Sw, hoggub nyil no atam gvda gvtam kaakin maab ngulam kaakin tayin?” 23Jisu mwam birwqnum, “Ngam abybo nyiv, mwv ngoqg gomcwram pvvtayin, hoo ngoqg Abv mwam aby tayin, hoo ngulv mwwg dookub haatayin hoo mwwg lvgab ngulug nammam mvtayin. 24Ngam aby maanbov ngoqg gomcwram pvvma dvn. Nulug tapanam gomcwr si ngoqg gomcwr ma, hvbmabde ngam kanambo Abwg gomcwrv.

25“Ngo nulug lvgab dooba tvl soq pagoq goonam tulu sam nulam bekin pakun. 26Hvbmabde, ngoqg emin gab svka bo ak kanam tanam hv Dvrwqbo Yalv, mwv nulam hog luuxiam tomswr tayin, hoo ngoqg nulam bekinam hog mwlwngam nulam mwwpa mvdwb jitayin.

27“Swrsomalongam ngo nulug lvgab ap jigyin; ngoqg atwg swrsomalongam ngo jigyin. Ngoqg nulam swrsomalo jinam hv gvda gvtv swrsomalo jinam hvb nyimadvn. Nulv hangv vs-axaql mwwdwq maabv hoo hoq tulu ham bos kamabv. 28Ngo nulam benam mam nulv tanum, “Ngo wde kun hvbmabde ngo nulug dookub hookur tayin. Nulv ngam aby dvn nyiloqkam ngoqg Abwg dookub wnam mam hemp mwwpa tayin; hoggab mwv ngam koi yaadwn. 29Hoo kokwngam hog nyibaloqkam nulam mwwjw mvdwb ngo nulam hog nyima daab sija bekin coog yin. 30Ngo nulug lvgab vigo goodul doodub nyiram, hoggab soq gvda gvt soqg lvpw abv haadku. Mwv ngoqg aoso hog gaqnyiram, 31hvbmabde gvda gvtv ngo Abam aby dvn ham cengdwb nyitayin, hoqgab ngo hog mwlwngam mwwg gaml jikub ngo nyidwn. Kuj, gorab tuk soqgv wnkuj.

Currently Selected:

JON 14: NYISBSI

Highlight

Copy