JON 11

Lajaraswg Sinam

1Betani nampam ho doonbo Lajar ngvk hvl eminam nyi ak vcnum. Betani nampam ho Meeri la mwnwg bwrm Marta bunyiv doonum. 2Soq Meeri si At Swg lvpiangam kuty paqyaq tvl mwnwg dumpo dum lvgab neexaqnum; vcil doonbo hv Lajar mwnwg borv. 3Amy tulungv Jisun pui bilwqnum “At Sw, noqg abynam ajinv vc cido.” 4Hvbmabde hoqham Jisu tapa tvl benum, “Soq vc si Lajarnvn sig dvb ma hvbmabde Pwnboam yuum dvb nyidwn, hoo soqgv Pwnbog Ko Tuupam yuum dvb nyipan.”

5Jisu Marta nvla mwnwg bwrm mamla Lajarnvn abynum. 6Lajarg vcnam puiyam tapa tvl mwv loonyi gota mwwg yvkho doobinum. 7Kokw so mwv buu tulungam benum, “Kuj Judiyab wkur nuk kuj.” 8Buu tulungv birwqnum, “Tomswrbo, oyu maadab kvdaq alo Juhudi tulungv nam wlw hurdwb meegaqnum, no lokta aloqb wkur dvb mwwdwn i?” 9Jisu birwqnum, “Aal loo hv mood wyw leq vnyig dooma dvn i? Hoqgab hiyv nyiv aal huto ho wgaq bov duqtubl geqma dvn, hoggab mwv soq gvda gvtwg hutongam kaapa dvn. 10Hvbmabde ai kanam gaqn bov mwv duqtubl geqdwn, hoggab mwv huto doogma.” 11Sam bexo kokw so bulam benum, “Ngulug ajin Lajar yubngaql doodu do, hvbmabde ngo mwam muu taab wtayin.” 12Buu tulungv birwqnum, “At Sw, mwv yubngaql dood nyiloqkam mwv al sui kuco.” 13Hvbmabde Jisug benamv Lajar sin kubak hvl benum, ham bulug mwwnamv Lajar yubl doodu dvngo mwwnum. 14Ho Jisu bulam bitw kwlwl bekinam, “Lajar sipa ku; 15Hvbmabde ngo mwwg lvgab doomin gvmanam hv al tvbnyi, ngo hemp mwwpa do, hoqgab nulv mwwjw tayin. Hoqgab mwwg dookub ngulv wnuj.” 16Tomas, Bwwpiamnam, mwwg buu ajin tulungam benum, “Kuj, ngulv kam wnuj, ho ngulv mwwg lvgab siba taaj.”

Jisu Turkurbov la Swwgv

17Hwdlo Jisu wcwl kaaknamv Lajarnvn aal loopy otuqho svma liitkul dooknum. 18Jerusalem hoqgv Betani ngv mail dvvnyi gob nyinum. 19Juhudi nyiv vigo Marta nvla Meerinvn bulug bor gab bet-bela taab haanum.

20Hwdlo Marta Jisu haadwk hvl benam puiyam tapa tvl mwn Jisun kaatab wnum, hvbmabde Meeri nam hv doonum. 21Marta Jisun benum, “At Sw, no so doonyiloqkam ngoqg borv simab dookam subaco! 22Hvbmabde sam ngo cengdwn sijakam nam Pwnbov noqg konam mam mwv nam jitayin.” 23Jisu mwnwn benum, “Noqg borv lokta turkur tayin.” 24Marta mwam birwqnum, “Ngo cengdo kolam turkur de aalam mwv lokta turab taikun.” 25Jisu mwnwn benum, “Ngo turkur dvb la swwgv. Ngam mwwjwbo akv sijaqkam swwtayin; 26hoo simab dootwl nam mwwjw bov nywywngam siram. No sam mwwjw dvn?” 27Mwn mwam birwqnum, “Vv, At Sw, ngo mwwjwdvn. Ngo nam Ywwnbo akv ho gvda gvtwb haady bo Pwnbog Ko Tuupv mwwjwdvn.”

Jisu Xabnum

28Sam bexo kokw so Marta wkur banv mwnwg bwrm Meerinvn goqsil goqbnv benum, “Tomswr bov haapa ku, hoo nam mwv goqdo.” 29Meeri ham tapa tvl cox alwb gorab banv mwam kaatab wnum. 30Jisu sija godab nampam ho hvvc maadab Marta mwam kaapa ko ditaqho doonum. 31Hwdlo Meerinvn namho bet-belal doonbo Juhudi tulungv mwn cox alwb gorab banv wnam mam kaatwl mwn nyubwb wl xabtab wde nago mwwnyia banv bulv kokw kokwb wmin gvnum.

32Hwdlo Jisug dookam wc yikho Jisun kaapa tvl mwwg al lwkwho geqpwl benum, “At Sw, no so doonyiloqkam ngoqg borv simab nyispaco!” 33Hwdlo Jisu mwnwg xabnam mam la ho mwnwg lvgab haamin gvnbo Juhudi tulug xabnam mam kaatwl mwwg hangv vc banv hvvdwq mwwpanum. 34Hoo bulam toxnum, “Hogloqho mwwg svmangam nulv liipan?” Bulv birwqnum, “At Sw, haagdvl kaato.” 35Jisu xabnum. 36Ho Juhudi tulungv benum, “Kaaka to mwv hog hwdgo mwam abynum!” 37Hvbmabde bulv tuugin benum, “Mwv nyiqca bo vnyiqngam mvko jimanum i, hvnyiloqkam mwv Lajarnvn sim maab mutur nyoyin maanum i?”

Lajarnvn Turdkub Mvknum

38Lokta hangv cwqla kumab mwwdwq kunv Jisu nyubu dookub wnum. Hoq nyubu hv lwwpwqb nyinum, ho wlw pwg ungngam ngurtumnum. 39Jisu benum, “Wlw alam ngurginto. Nyi sikbo amiv, Marta mwam benum, “At Sw, naiyangv suutai, Mwam svma liiknamv aal loopy duku.” 40Jisu mwnwn benum, “Ngo nam bemanam i, Pwnboam yuunam mam no mwwjw bvnyiloqkam kaapa tayin hvl ngo bekin maanum i?” 41Ho bulv wlwngam ngurginum. Jisu aob koodul benum, “Ngo nam paqyalinco hvdwn, no ngoqg benam mam tadwn. 42Ngo cengdwn no looxiam ngoqg benam mam tadwn, hvbmabde ngo sam nam kogdvn si no ngam kanam bov hvl ngoqg dook so sija daqnbo nyi tulungam mwwjw mvdwb mwwl kogdvn.” 43Sam bexo kokw so mwv vc alwb sogoql benum, “Lajar agab lengtku!” 44Sikbo nyiv mwwg al-alaqngam svma tumnan vjv tumtw paqtwl nyubu hoqgv agab lengnum, hoo mwwg nyuqm mam vj ko ak putumnum. Jisu bulam benum, “Toosuqtvl mwam wmto.”

Jisun Mengdwb Ywrsnam

(Mt 26:1-5; Mk 14:1-2; Lk 22:1-2)

45Meerinvn kaatab haanbo Juhudi nyiv vigo Jisug nyinam wnam mam kaatwl mwam mwwjwnum, 46hvbmabde tuugin Parisi tulug dookub wkur kunv bulam Jisu hog nvkvxeq nyinum ham bekinnum. 47Ho Parisi tulu ngvla nyub buda tulungv Dookum koi al doobnv benum, “Ngulv hoggv mvdwn? Hoggab soq nyi si swrdorxeqkv vigo nyido. 48Ngulv mwam hvraqb nyim bvnyiloqkam nyi vxiv mwam mwwjw tayin, hoo Roman nyiv haal kaatwl ngulug Xumk nammam la ngulug gvdangam naareq tayin.” 49Hvbmabde bulug pengko hoqgv Kaiyapasvk hvl eminam akv, hoq vnywho nyub butwb swwnum, mwv benum, “Nulv hog gokam cengma! 50Nulv mwwdar maad nvi yv, nyob lupwngv simmam lingsam nulgab nyi akin gon sinamv alyadwn. 51Hvbmabde soq agam sam mwv at galoqkv mwwsul bemanum, hvbmabde hoq vnyw ho mwv nyub butwb swwgam gab, Jisu Juhudi nyi tulu gab sitanam mam nyiqry bebnv begol apnum, 52hoo bul gab twqma hvbmabde gvda gvt mwlwho cwrsaq twqb gaqkar yvnbo tulungam olumgob, bookum dvb nyitayin. 53Ho hoq aal jaq hoqgv Juhudi tulungv Jisun mengdwb hwwknv birwql ap kunum. 54Hoqgab Judiya gvda hoqgv Juhudi nyi tulug dookho gaqkar yvkmab deexa-rara ogumho doonbo Iprayim bopamb wknv mwv buu tulug lvgab doobanum.

55Ho Juhudi tulug Nyedarko Durum moodv hvvnwq kunum, hoqgab nampam hoqgv nyiv vijaqg Durum otuqb atam nyedar darxaq kotab Jerusalemb wnum. 56Bulv Jisun meekar banv doqkum-doqlum ywwtwl bemin sunum, “Nulv hoggub mwwdo? Mwv jvqtw jaqb soq Durum so haram yu, ma haatayin?” 57Hvbmabde nyub buda tulungv la Parisi tulungv gaml jil apnum, hiyv akgon Jisug dookam cengnbov bulam cengm tvk hvl benum, ho bulv mwam nootu dvb.

Currently Selected:

JON 11: NYISBSI

Highlight

Copy