HABAKKUK 3
3
Habakkukwg Swgwnam
1Sigionotwg bekjaqb Nyiqry kaanbo Habakkukwg swgwl konam.
2At Swa, noqg pui betamnam mam ngo tapa paku,
hoo At Swa, noqg bonam nyinam mam,
ngo bosdvn yv.
Vnyw tulug pengko lo hoqham lokta swwdar mvto;
vnyw tulug pengko lo hoqham cengm dvb mvto;
hang lingtwrnam uraho aya mwwpa tvb.
3Teman hoqgv Pwnbov,
hoo puutu Paran hoqgv dvrwqbo Akv haanum.
Doangam mwwg yuunamv tomlupnum,
hoo swcw sam mwwg paqnamv bwwrnum.
4Mwwg puulungv huto hvb nyinum;
lvlaqkv mwwg alaq hoqgv bioqlinum;
hoo tolo mwwg huqlwngam mwv putumnum.
5Mwwg otuqb topum-yorupv wnum,
hoo mwwg ludho swcin-taiyaqkv wmin gvnum.
6Mwv daql swcw sam xikanum;
mwv nyob nyiilungam tuugabl kaal hwqdinum;
ho kuiyum namgub puutu tulungv cwrsaq-twqb nyinum;
kuiyum namgub yorn tulungv akob yoqlwqnum.
Mwwg lamtangv kuiyum xaqb dooky dvn.
7Ngo Kus nyi tulug doogw ho duqtwr-duqnam mam kaapanum;
Midian nyookwg tortumnanv tvmdwrnum.
8At Swa, hwdlo noqg svpur tulu aoho no wiyikho,
noqg ywwlinam ceriot aoho wiyikho,
noqg hang lingtwrnamv pobu tulungam ceeko namyv?
Noqg haaxaqnamv pobu tulungam ceeko namyv,
hvbmab noqg haaxaqnamv sa-svlongam ceeko namyv?
9Noqg illy lexangam no xwwyiq-xwxeql tumdwrnum,
uppuq lo vi gok hvl goqnam.
No swcwngam pobu tulu lvgab tvqnyi gob mvnum.
10Gvda puutu mwlwngv nam kaanum hoo hv hwqkub-hwqxeqnum;
vcjaqb suduq-duql iss tonbov nuug nukun;
iss ura hoqgv jaq yalam dulin mvnum;
ao jaqb hoq alaqkam icanum.
11noqg uppuq huto ho bulv jarl wdwkho,
noqg kwlwq-kvlaqbo nwwxongv bioql wdwkho
doonyiv la poolv bulug dook ho biimab doonum.
12Swcw nvg pengkob no bos kaapa dvb wpeqnum;
noqg haaxaqnam hoqgv nyob nyiilungam swqmwqnum.
13Noqg nyiilungam ywwtab no lvvgwb lengnum,
noqg xuqknum mam ywwlin taab.
Nyicbo namwg atam no vmwq yumgub mvnum,
xarpo hoqgv lwwpo nagub mwam asar dvb pvvl apnum.
14Mwwg atwg uppuqkv mwwg nyob pagbo at akam no vblwqnum,
hiyv cwkeq-lemeq dooi hvb ngam cwrsaq-bvraqb mvtab,
hoo hwnyir-hvmarl jwwgw boam kvsil mvpaqtab haanum.
15Noqg svpur tulu lvgab no sa-svlongam,
ator jaqb iss nyiipo bvleqboam caajabnum.
16Ngo tapanam, hoo ngoqg gvngv tvmdwr dvn;
ngoqg nabor yalv yadin dvn;
ngoqg alongv yaadwn hvb nyidwn;
ngoqg lvpiangv tvmdwr dvn.
Hvbsujaqkam ngulam nyob patab haanbo nyi tulug aoho,
haady bo vs-axaq aal gob ngo cooikab kaaya yaal dootayin,
At Swn Habakkuk Hemp-Hvnyirnam
17Taoq svvn tulungv opu puuma sujaqkam,
ho roo tulungv aaxy xeema sujaqkam,
olib pv osuq sujaqkam
hoo rongo rwqtaqkv dvs-twws lengma sujaqkam,
sibin-svv luutv twryum jaqkam hoo tuun-meengv dook maajaqkam,
18hvbsujaqkam ngo At Swn hwnyir-hvmar tayin;
ngam ywwlin bo Pwnbog uraho ngo hempam naatayin.
19Pwnbo, At Sw, ngoqg atorv;
mwv ngoqg lvpiangam sudum lvpia hvb mvdwn;
mwv ngam ngoqg aobo nyookub wm dvn.
Rwwxw-gung ga lvgab;
bemin begbov begdvn.
Currently Selected:
HABAKKUK 3: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
