BEGGAR 21
21
Aisaknvn Ko Bwwnam
1At Sw mwwg benum hvb Sara dookub haanum, hoo At Sw mwv Saranvn dingr kunam mam nyij kunum 2Hoo Sara ko gvnum hoo Pwnbov mwam hoggub agam goonum hvb Abraham hwdlo nyekam yukho nyega ko ak bwwjnum. 3Abrahamnvn nyega ko ak Sarag ko bwwjnam ham mwv Aisak hvl emin mingknum. 4Hoo Pwnbog gaml jinam hvb, hwdlo aal piin yikho Abraham mwwg nyega ko Aisaknvn mux mvnum. 5Hwdlo mwwg nyega ko Aisaknvn ko bwwi yikho, Abraham vnyw lwwg kunam. 6Hoo Sara benum, “Pwnbov ngam nyirj dvb mvpa ku; tapa bo nyi vx-cwrv ngam nyirj tayin.” 7Hoo mwn benum, “Hiyv bela tan Abraham gab Sara ko tulungam sorab nyotayin? Hvbsujaqkam mwwg nyekam mood so ngo mwwg gab nyega ko ak bwwnum.”
Pwnbov Hagar nvla Ismaiyelnvn Roanam
8Hoo kongv swwrabnum hoo dvs-twws dvrab kunum. Hoo Abraham koibo durum ak rumnum ho hoq aalho Aisak dvs-twws dvbeql dvrabnum. 9Hvbmabde Sara kaanamv Ijipt paqn Hagarg nyega kov, hiyam mwn Abraham gab bwwjnam akv nyirj-nyirparnum. 10Hoggab mwn Abrahamnvn benum, “Soq paqn nvsur sam mwnwg nyega ko lvgab ruqtaql ruqpaqto, hoggab soq paqn nvsurg nyega ko si ngoqg nyega ko Aisak lvgab otu nvvsiql bwwbam dvb nyiram.” 11Hoo mwwg ko tuup pagoq gab Abraham vcwr gokam hemp maanum. 12Hvbmabde Pwnbov Abrahamnvn benum, “Soq nyega ko gabla noqg paqn nvsur nyem gab vcwr gokam mwwdwq maabv. Hoggv xeq Sara nam bepan, mwnwg benam hvb no nyito, hoggab Aisak hoqgv noqg hosiqkam xilin tayin. 13Hoo ngo paqn nvsurg ko tuup hoqgv kam nyob hoolu ak mvtayin, hoggab mwv kam noqg hosiqkv.” 14Ho Abraham ar komc gorab layil wtwngam la vpin yooxaqho iss hwwlwq tvl ham Hagarg gorbwho tolwq jinum, ho ko lvgab mwnwn rootaql roolin kunum. Hoo mwn ruqlin kutwl Beerseba deexa-raraho gaqkar yvnum.
15Hwdlo vpin yooxaqho iss baqnam mam twwiyum yukam, mwn kongam puum niikum golo joopnum. 16Hoo mwn kongam kaatol kaapa dvb taqcgon ho doonum, hoq aadongv uppuq toocnam hwdgo aadonum, hoggab mwn benum, “Ngo ko sinam mam kaanyi kuma.” Hoo mwn mwwg taqcgon ho dootwl, mwn vc loodab kiir nool sogoqnv xabnum. 17Hoo Pwnbov nyega koog xabnam mam tapanum, hoo Pwnbog gumtwngv Hagarnvn ao gvda toloqkv goqbnv mwnwn benum, “Hagar, no hognvk vs-axaqkv doodwn? Bos maabv Pwnbov nyega kov hogloq ho dootwl xabdwn ham tapa paku. 18Nyebiab gorabl! Koam joorab to, hoo mwam noqg alaq hoqgv hingkib sorabto, hoggab ngo mwam koibo nyob hoolu ak gob mvtayin.” 19Hoo Pwnbov mwnwg vnyiqkam nyiqbio mvknum, hoo mwn iss sokum ak kaapanum. Hoo mwn hoqb wbnv vpin yooxaqho issam bwwr dvb hwwlwq layil hoo kongam twwm dvb jinum. 20Hoo Pwnbov ko lvgab doobanum, hoo mwv swwrabnum. Mwv deexa-raraho doonum hoo mwv tumr-xiram palaq jaqnum. 21Mwv Paran deexa-raraho doonum, hoo mwwg annv mwwg gab Ijipt gvda hoqgv nywxw ak nvvjnum.
Abimelek lvgab Pvvb Mwrminsnam
22Hoq moodho Abimelek la mwwg sipai saab Pikol Abrahamnvn benum, “Pwnbov noqg hog mwlw nyiklo dooba do. 23Sija hoqgab ngam Pwnbo eminlo dingr to, ngam la, ho ngoqg hotam lvgab, ho ngoqg swwnam-geenam lvgab, no vm-xaalyo nyimur nyiram hvl, hvbmabde noqg nyiogy gil dook gvdaho, ngo nam hoggub aya jaqb nyik-wknum, hoqhvb kalam no ngam nyila ka.” 24Hoo Abraham benum, “Ngo dingr dvn.”
25Hwdlo Abimelek gv nyera tulungv iss sokum mam naareq ko-gab Abraham Abimeleknvn soranum, 26Abimelek benum, “Ngo cengma hoqham hiyv nyipan; no ngam betam ma, hoo soolo namgub ngo ham tapa ma.” 27Ho Abraham sviyangam la svv hvvbam naalayil hoo hoq tulu ham Abimeleknvn jinum, hoo nyi vnyiv pvvb birnam mam mvnum. 28Abraham sviya ko kvn go mwwg sviya pvtw hoqgv nvvbwq lengnum. 29Hoo Abimelek Abrahamnvn benum, “Hognvk niqtuqkv soq sviya ko kvn sam no nvvbwql apnam si?” 30Mwv benum, “Soq sviya ko kvn sam ngoqg alaq soqgv no naatayin, ho hoqhv ngo soq sokum sam dukoq bov hvl ngoqg hvvkib nyitayin.” 31Hoqgab hoq nyookam Beerseba hvl goqnum, hoggab hoqho bunyi vnyiv pvvb bwwl dingrnum. 32Ho bulv Beerseba ho pvvb mwrwl apnum. Ho Abimelek la mwwg sipai saab Pikol gorab kunv Palistan gvdab wkur kunum. 33Abraham Beerseba ho tamarisk svvn ak liinum hoo hoqho Pwnbo At Swg eminam Kuiyum xaqb swwn bov hvl goqnum. 34Hoo Abraham Palistan gvdaho aal vigo doonum.
Currently Selected:
BEGGAR 21: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
