BEGGAR 18
18
1Hoo aal lvpa og ko-gab mwv Mamreg kora svvn nwwtaqho, mwwg tombu viyap haaga ho doodu yin, At Sw mwam kaakinum. 2Mwwg vnyiqkv piorabl kaanum, hoo kaato, nyi oum go mwwg agaho doqdunam. Hwdlo mwv bulam kaapa yin, mwv tombu hoqgv bulam kvvrwqtab xarlinv kedho mwv atv bumpnum 3hoo benum, “At Swa nulug kaagaho ngo mwwsw dvb nyid nyiloqkam noqg nyerangam wleq maabv. 4Iss lo anyo go bwwlin mvtwl nulug lvpiangam hwrxaqto, hoo nulv svvn niikum so doonu to, 5ngo dvs loq anyo go bwa taden, ho nulv atv dvbia pel, hoo kokwngam nulug wtub wto—hoggab nulug nyera dookub nulv haapa ku.” Ho bulv benum, “Noqg bekwb nyito.” 6Hoo Abraham nyebia jaqb tombu urab xara banv Saranvn benum, “Nyebia jaqb, albo wtw loq oum go naagdvl, ham nwrnyiaqtvl hoo wtw kabto.” 7Hoo Abraham xarbnv svv hvvtw hoqgv bobuqbo hvvdo dorg naalayil, ham yaapangam jitwl nyebia jaqb mwx-mvaql munu mvnum. 8Ho mwv doxi gola gwwi hoo hvvdongam mwwg mwx-mvaqnam mam naalayil ham bulug agaho ap jinum. Hoo bulug dvdu dvk ho mwv svvn niikumwg bulug bviywrho daqnum.
9Bulv mwam benum, “Noqg nywxw Sara hoglo?” Hoo mwv benum, “Mwn tombu ura vv doodwn.” 10At Sw benum, “Soq moodig dvra gon alo ngo jvqtw jaqb noq dook so hookur tayin, hoo noqg nywxw Sara nyega ko dootayin.” Hoo Sara tombu viyapg mwwg langk ho tal doodunam. 11Abraham la Sarag vnywngv viyig wggam gab nyekam-xox kunum. Sara nyem tulug namc doocwngam dook maanum. 12Ho Sara mwn atv nyirs banv begamv, “Ngo xoxwl tiqkub-tiqyub paku, hoo ngoqg nyolv nyekam pvg duku, ngo hvraqb nyega bwwnwnamv dootayin yv?” 13At Sw Abrahamnvn benum, “Hoggub Sara nyirl bedwn, ‘Ngo jvqtw jaqb soq swdwg xox tvl ko ak dootayin yv?’ 14At Sw gab hog nyila maanam dood nvi yv? “Soq mood xikjaqb soq moodig dvra gon alo ngo noqg dook so hookur tayin, hoo noqg nywxw Sara nyega ko dootayin.” 15Hvbmabde Sara ham loomanum, hoo begamv, “Ngo nyirma,” hoggab mwn bosnum. Mwv benum, “Ma, no nyirnum.”
16Ho nyi tulungv hoqgv lengknum, hoo bulv Sodom mam kaababl kaanum. Hoo Abraham bulug lamta wkwb bulam wlwq mingnum. 17At Sw benum, “Ngo hoggv nyita dvn ham Abraham hoqgv kvs ram, 18kaanamv Abraham jvqtw jaqb koi bvla atorbo nyob hoolu gob nyitayin, hoo swcw soqg nyob mwlwngam mwwg hoqgv lvqc citayin? 19Hoggab ngo mwam daalin pakun, ho mwv mwwg ko tulungam la mwwg nombungam At Swg lamtangam dvrwq lootwngam la jvqtwb nyil mwwg kokwb pvvm dvb gaml jidy bov, ho At Sw hoggv Abrahamnvn dingrnum ham mwv nyim tayin.” 20Ho At Sw benum, “Sodom mam la Gomorrangam ceekol sogoqnamv vc loodab sogoq do hoo bulug nyicv vc loodab koido, 21Bulug lvkin gob nyinam mam ngam tapa dvb sogoqnam si jaq-maq gvi yv, ngo ipoq gvdwl kaaka tayin. Hoo jvqtw maanyiloq, ngo cengtayin.”
Abraham Sodom gab Bulyw-buut Wnam
22Ho nyi tulungv Sodom daiyab tuukurl wnum, hvbmabde Abraham At Swg agaho hvraqb daqnum. 23Ho Abraham ogumb hvvnwqnv benum, “No jvqtw jaqb dvrwq lootw boam nyic-nyia bo lvgab twrm tai nvi yv? 24Hoq bopam uraho dvrwq lootw bo camng go doob nyiloqkam. No nyookam twryum tai nvi yv hoo camg go dvrwq lootw bo nyiv doojaqkam no apaqmab hoqho doon boam twryum tai nvi yv? 25Dvrwq lootw boam nyic-nyia lvgab twrtaq tanam mam noq hoqgv aado mvto, hoggab dvrwq lootw bov nyic-nyia lvgab laqm-baqmin gvta yi! Hoqham noqg hoqgv aado mvto! Swcw mwlw sam pw-hwwdwb hvbnyiloqkam hoggv jvqtw dvn ham nyiram yv?” 26Hoo At Sw benum, “Ngo Sodom bopam uraho dvrwq lootw bo camng go kaapa baloqkam, ngo bulug emin gab bopam mwlw ham pvvl aptayin.”
27Abraham birwqnv hoo benum, “Kaato, ngo At Swn bulyw-buut agam mam goodwb mwwdo, ngo nyiloqkam diimwr rvla mubv twq. 28Hoqho dvrwq lootw bo campy leq ang go doob nyiloqkam. Dvrwq lootw bo ang go juqc maagam gab no bopam mam twryum tai nvi yv?” Hoo mwv benum, “Hoqho campy leq ang go ngo kaapa baloqkam ngo ham twryum ram.” 29Mwv lokta mwam agam gool benum, “Hoqho campy go doob nyiloqkam.” Mwv birwqnum, “Campig emin gab ngo ham nyijram.” 30Ho mwv benum, “At Swa haaxaq maabv, hoo ngo agam gootayin. “Hoqho cammum go doob nyiloqkam.” Mwv birwqnum, “Cammum go ngo kaapa baloqkam bulug emin gab ngo ham nyijram.” 31Mwv benum, “Kaato, ngo At Swn bulyw-buut agam mam goodwb mwwdo.” “Hoqho camnyi kaapa baloqkam.” Mwv birwqnum, “Camnyig emin gab ngo ham twrram.” 32Ho mwv benum, “At Swa haaxaq maabv, hoo soq lvkin aro sam ngo agam gootayin. “Hoqho camg kaapa baloqkam.” Mwv birwqnum, “Camg emin gab ngo ham twrram.” 33Hoo hwdlo mwv Abrahamnvn agam gooyum yukam, At Sw mwwg lamtab wknum, hoo Abraham mwwg nyookub wkur kunum.
Currently Selected:
BEGGAR 18: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
