DOOGIN 6

Pwnbov Naalin dvb Dingrnam

1Hvbmabde At Sw Mojesnvn benum, “Hoggv ngo Paronvn nyitayin sija no kaaya to; atorbo alaq hoqgv bulam roolin tayin, hoo atorbo alaq lvgab bulam mwwg gvda hoqgv boolin tayin.”

2‍Pwnbov Mojesnvn agam goonum hoo mwam benum, “Ngo jaq At Swv. 3‍Mwlwngam koi yaanbo Pwnbo gob, ngo Abrahamnvn, Aisaknvn, hoo Jakubnvn kaakinum, hvbmabde ngoqg eminam hoqgv At Sw atv bulam cengm mvmanum. 4‍Ngoqg pvvb birnamv Kanaan gvdangam bulam jidwb hvnam mam ngo mvko pakun, hogloq gvdaho bulv nyoodo nyi hvb doonum. 5‍Hoq aoho, Ijipt nyi tulungv Israel nyiilungam raasur gob parl apnum, hoqgv bulug sigin gingnam mam ngo tapa paku, hoo ngoqg pvvb birnam mam ngo mwwpanum. 6‍Hoqgab Israel nyiilungam bedo, ‘Ngo jaq At Swv, hoo ngo nulam Ijipt nyi tulug bon nyimnam ura hoqgv boolin tayin, hoo ngo nulam raasurb nyimnam hoqgv naalin tayin, hoo ngo nulam alaq yvmjinl hoo koibo pw-hwwnam bon tulungam nyigdvl pvlyw tayin. 7‍Ngo nulam ngoqg nyiilu gob naatayin, hoo ngo nulug Pwnbob nyitayin, hoo ngo nulug Pwnbo At Sw jaqkv hvl nulv cengtayin, hiyv Ijipt nyi tulug bon nyimnam ura hoqgv boolin bov hvl. 8‍Ngo Abrahamnvn, Aisaknvn, hoo Jakubnvn dingrnum gvdaho ngo nulam boolwq tayin. Ngo ham nulam gumn bwwm dvb jitayin. Ngo jaq At Swv.’” 9‍Hoqgab Mojes Israel nyiilungam agam goonum, hvbmabde bulv Mojesnvn tvjw kumanum, hoggab bulam silo tors dvb raasur gob bon nyim ko-gab, bul pvnyi dook maanum.

10‍Ho At Sw Mojesnvn benum, 11“Wn, Ijipt gv lvpw atam beta, Israel nyiilungam mwwg gvda hoqgv tolin tuku.” 12‍Hvbmabde Mojes At Swn benum, “Kaato, Israel nyiilungv ngam tvjw kuma. Hvnyiloqkam Paro ngam hoggub tvjw tayin, hoggab ngo agam pwbwb goolaq maanbo nyiingv?” 13‍Hvbmabde Ijipt gv lvpw at Parog pagoq gab, At Sw Mojes nvla Aaronnvn agam goonv hoo Israelwg nyiilu gab bulam yolu ruqnum: Israel nyiilungam Ijipt gvda hoqgv boolin mvdkub.

Mojes la Aaron gv Hotam

14‍Soq tulu si bulug imiq dvpar hoqg abv: Israelwg ko tuup vbw cociq Reubenwg ko tuupv: Hanok, Pallu, Hejron, hoo Karmi; soq tulu si Reubenwg nyob hoolungv. 15‍Simeon gv ko tuupv: Jemuyel, Jamin, Ohad, Jakin, Johar, hoo Soul, Kanaan nyem hoqgv ko tuupv; soq tulu si Simeon gv nyob hoolungv. 16‍Soq tulu si Lebi gv ko tuup tulug eminv bulug hotam-hotam hoqgv: Gerson, Kohat, hoo Merari, Lebi 137 vnyw gob swwl doonum. 17‍Gerson gv ko tuupv: Libni la Simei, bulug nyob hoolungv. 18‍Kohat gv ko tuupv: Amram, Ijar, Hebron, hoo Ujjiyel, hoo Kohat 133 vnyw gob swwl doonum. 19‍Merari gv ko tuupv: Mahli la Musi. Soq tulu si Lebi nyi tulug nyob hotamb lengknum. 20‍Amram mwwg abwg bwrm Jokebednvn mwwg nywxwb naanum, hoo mwn mwam Aaron nvla Mojesnvn ko bwwjnum, Amram vnyw 137 gob swwl doonum. 21‍Ijarg ko tuupv: Kora, Nepheg, hoo Jikri. 22‍Ujjiyelg ko tuupv: Misayel, Eljapan, hoo Sitri. 23‍Aaron mwwg nywxwb Amminadabg nyem ko Nahsonwg bwrm, Elisebanvn naanum, hoo mwn mwam Nadab, Abihu, Eleajar, hoo Itamarnvn ko bwwjnum. 24‍Kora ko tuupv: Assir, Elkana, hoo Abiyasap; soq tulu si Korag nyi tulu nyobv. 25‍Aaron gv ko Eleajar mwwg gab Putiel nyem kongam nywxwb naanum, hoo mwn mwam Pinehasnvn ko bwwjnum. Soq tulu si Lebi nyob tulug imiq dvpar hoqg ab tulungv.

26‍Soq tulu si Aaron la Mojesnvn hiyam At Sw benum: “Israel nyiilungam Ijipt gvda hoqgv bulam tuml apnam mam boolin to.” 27‍Soq Mojes siila Aaron bunyi, bulv Ijipt gv lvpw at Paronvn Israel nyiilungam Ijipt gvda hoqgv boolin gvde kun hvl agam goon bov.

28‍Hwdlo aalho At Sw Mojesnvn Ijipt gvdaho agam goonum, 29‍At Sw Mojesnvn benum, “Ngo jaq At Swv; ngoqg nam benam hog mwlw ham, Ijipt gv lvpw at Paronvn betam to. 30‍Hvbmabde Mojes At Swn benum, “Kaato, ngo agam pwbwb goolaq maanbo nyiingv. Hoggub yu Paro ngam tvjw tayin?”

Currently Selected:

DOOGIN 6: NYISBSI

Highlight

Copy