BON 8

1Hoo Soul Istepennvn mengnam mam loor jinum.

Soul Dvrwq Namlongam Mvnyi-mviyanum

Hoq aal jaq hoqgv Jerusalemho doonbo dvrwq namlo hoqg nyi tulungam mvnyi-mviyal mvl nyelin dorsam ceceq jaqb hengrab kunum. Hvvky tulungam bepa maab, mwwjwbo mwlwngam cwrsaq-bvraq twqb Judiya gvdaho la Samariya gvdab ruqpin ruqra kunum. 2Mwwjw albo nyi tulu gon Istepennvn svma liiknum. Bulv Istepen gab ceceq jaqb nyiqs tanap dil mwwdwqnum.

3Hvbmabde Soul nam nvmxib wbnv dvrwq namlo hoq mwwjwbo nyi tulungam, nyem ge nyega ge bul mwlwngam nam hoqgam seelin banv pvtwq lwqnum.

Samariya Gvdaho Tugu Puiyam Tapanum

4Cwrsaq twqb ruqknam mwwjwbo tulungv bulug wk mwlwho Tugu Puiyam bekar yvnum. 5Pilip Samariya bopam wbnv nyi tulungam Ywwn bog puiyam betamnum. 6Hoo nyi tulungv Pilip benam mam hindy jaqb tagab lalal tanum. Bul mwlwngv mwwg benam mam tagab lalal tanum, mwwg swrdorxeqb nyinam mam kaanum. 7Sony cenam nyi tulug hoqgv sonyiv vc alwb sogoql lengknum, hoo lviya laqyabo, lvca bo nyiam vigo mwp jiknum. 8Hoqgab Samariya gvda hoqg nyi tulungv vcjaqb hemp ponum.

9Samariya bopamho Simonvk hvl benam nyi ak hv, apo go mwv dvab naabnv nyi tulungam lomdwb mvnum. Mwv atam nyi koi ab bokum mvk hvl besnum. 10Bopam hoq akam-anyo nyi vxiv mwwg benam mam hindy jaqb todunum. Bulv benum, “Mwwg ator hv Pwnbog ator go benam, “At ator koibo,” bulv benum. 11Bulam dvab naabnv kaakin banv mwv oyu jaqgo swrdorxeq gob nyi tulungam mwwmnum. 12Hvbmabde bulv Pilip Pwnbog lvpwg Tugu Puiyam tatwl Jisu Kristog eminam mwwjwnum, hoo nyem ge nyega ge bulv baptijum naanum. 13Simon mwv atv kokw so mwwjw kunv baptijum naaxo kokw so mwv Pilipnvn svqtin banv mwwg lvgab doomin gvnum, hoo swrdorxeqb la nyimanam nyinam mam kaatwl mwv lomnum.

14Kokw so Jerusalemho doonbo xuqnam nyi tulungv Samariya nyi tulungv Pwnbog agam mam tapa tvl mwwjw pak hvl tapa tvl bulv Pitor nvla Jonnvn bulug doodub kanamnum. 15Bulv wc kunv mwwjwbo nyi tulu gab bulam Dvrwqbo yalam kaapa mvdwb xumnum. 16Hoggab Dvrwqbo Yalv ho godab mwwjwbo nyi tulug aoho ipoq maadanum, hvbmabde bulam At Sw Jisug eminb baptijum jitwqnum. 17Ho Pitor la Jon bunyiv bulug aoho alaqngv idaq banv xumj yukam bulv Dvrwqbo yalam kaapanum.

18Bulug aoho xuqnam tulungv alaq idaql bulam yalam jinam mam Simon kaapanum. Hoqgab mwv Pitor nvla Jonnvn twngk jitwl 19benum, “Soq ator sam ngamkam jitbv, ho ngokam nyi tulug aoho idaql swgw yikam bulam Dvrwqbo Yalam kaapa mvdwb jito.”

20Hvbmabde Pitor mwam birwqnum, “No noqg twngkam ui ig gvn, hoggab no Pwnbog jinyinam mam twngkv rvn dvn hvl mwwdo i! 21No ngulug lvgab hog nyimin wmin gvdwb nyima, hoggab Pwnbog kaagaho noqg hangv alma. 22Mwwkurto hoq hvk mwwc mwwyangam At Swn apaq tvbwk hvl xumto ho mwam apaq jik dvb. 23Ngo nam kaanamv no mwwc-saqya hang baqdo, hoo aob no nyic nyia nyiib nyibnv nyic nyiag nyumwb swwl doodo.”

24Simon Pitor nvla Jonnvn benum, “Anya mwwpa gvdwl At Sw ngoqgab xumtab ho nunyig benam mwlwngam nyim mvma dvb jito.”

25Bulv bes mwlwngam la Pwnbog puiyam bexo kokw so Pitor la Jon Jerusalemb wkur kunum. Ho bulv lamta wi yikho Samariya nampam tuluho Tugu Puiyam betamnum.

Pilip la Itiopiya Saab

26At Swg ao gumtw ak Pilipnvn benum, “No mwx-mvaql Jerusalem hoqgv ako daiya Gajab inbo lamtab wn.” Soq diixa-rara nyookv. 27Kokw so Pilip mwx-mvaq layil wknv Itiopiya nyiipium bo ak mwwg nammwb wdul doon boam kaapanum. Mwv saab koi akgob nyinum. Mwv vi-koory gumn noosungam kaaya banv doonum. Mwv Itiopiya gvda hoqg dookum ho saab akub nyinum. Mwv Jerusalemb Pwnboam xumtab wpekul mwwg nammwb ceriotwb wkur kunum. 28Mwv ceriot aoho wjo ywwtwl nyiqry kaanbo Aijayag potangam pooril wnum. 29Kokw so Dvrwqbo Yalv Pilipnvn benum, “Toloq ceriot dookub wno.” 30Pilip wnwq banv mwam nyiqry kaanbo Aijayag potangam poory ridul wnam mam tapanum. Ho Pilip mwam toxnum, “Noqg poory gvdwn ham no cengs i?” 31Hoo saab akv birwqnum, “Nyiv ngam bekin maabloqkam ngo sam hoggub nyil cengtayin?” Hoo mwv Pilipnvn ceriot aob cao tvk hvl benum. Pilip cao banv mwwg lvgab doobanum. 32Saab ak hoqg pota pooril wnamv soq tulu si,

“Mwv padkub bool wgnam sviya hvb nyiknum;

Mwv sviya ko akgon vmmam reqxaq yukam sogoq maanbo sviya hvb nyiknum;

mwv agam gambeql vcwr gokam goomanum.

33Mwam bid kumab mvnyi-mviyal mengnukun.

Hiyvkam mwwg ko hosiq lengkam benyi kuram,

hoggab mwwg swwgam soq gvda soqgv naareq gvnkun.”

34Saab akv Pilipnvn benum, “Ngam bekin tvb, nyiqry kaanbo aksi hiyvg pagoqkam bedwn? Mwv atam bes dvn yv, ma nyi asaqgon beg dvn?” 35Ho Pilip soq pota poorynam soqgv goorab banv mwam Jisug Tugu Puiyam bekinnum. 36Bulv soq sib gool idul dooikam, bulv iss meeg dook golo wcnum, hoo saab akv benum, “Soq si iss ata go doodo; ngo baptijum nangam maadwb hognvkv doodwn?”

37Pilip mwam benum, “No jvqtw jaqb noqg hang mwlwngv mwwjw dvloqkam baptijum nangam maadwb hog dooma, naato.” Mwv birwqnum, “Vv, ngo Jisu Kriston Pwnbog kov hvl mwwjw dvn.”

38Hoo saab akv ceriotam xornu tvl, bunyiv, Pilip la saab akv iss urab haabnv Pilip mwam baptijum jinum. 39Bunyiv iss hoqgv agab lengda kalam, Pilipnvn At Swg Yalv bool wleq kunum. Saab akv mwam kokw so kaapa kumanum, hvbmabde mwv hemp poknv mwwg lamtab wknum. 40Pilip mwv atam Ajotas ho yvdwb hempa suknum, hoo mwv bopam vxib wbnv Sijariyangam wcnam gob Tugu Puiyam bel wnum.

Currently Selected:

BON 8: NYISBSI

Highlight

Copy