Markus 13

Yesus ianamana rerihoni kakinate rerihon tuniai reini repena

1Yesus runa ne mampusua oeu arihon Anahatana ne numa mainisie nusue, oyo ne mampusue isa iasau ata, “Ano Ona Matuhetene, masi anoo. Anahatana ne numa mainisie rei iake. Sio onanai tau hatu maina-mainaya waron iaka.”

2Iahata, “Onoo numa mainaya rai? Mka sio okuka Anahatana ne numa mainisie reini na hatu rai ratanuhaha tewa nea. Hatu rai rakukaso arihon nahaya.”

3Oyo Yesus ieui roe pupue wani nanae Saitun. Hoka roe oyo, iruei iamanane Anahatana ne numa mainisie pan ekote hanae pan hae. Oyo Petrus, Yakobis, Yohanis, runa Anreas ohoka mai tanui, nanie oasei tanui tau sio umau okataso tewa nea. 4Oasei ata, “Masi asau mai. Sae waron Ano asau runare mo, inasa rayari? Na sani munata nanie rayari nea mo, nene kakinata waron sapan?”

5Iahata, “Osaka ruamo ia-ia. Pene tu-tu mansiau oakarotamo rerihon rai pusire. Mka sio panesi ohoka oasau ata, ‘Au mo, au Aia wain Anahatana Ihitiku na Uapuheu Mansia.’ 6Mka sio panesi ohokaso ohete nanaku oasau ata, ‘Au mo, Ia wain Anahatana Iratiku Uapuheu Mansia’ oyo oakarota sio panesi. 7Sani oatinu hapare rerihoni manahitana mo, pene okaitau. Areimo tau kahurae reeu san rei naone. Ne, tuniai nanie repena mo, tewasi. 8Mataanoe niane isa osaa niane isa honu. Mka ia aia isa ieu iahita na ia aia tamene isa honu. Mka isu mainaya sui supa-supan. Mka omata muaine sui supan man. Ne areini mo, pusire nene aikune man sani ia ikine nanie iamrae, inai tiai reun.”

9 Kahurae osaka-saka. Mka sio osotamo na oruimo osi sio mainaya tau niana-niana. Mka ohitamo sui sio Yahudiu no numa mananouna. Mka ororimo noi sio gubernur runa sio aiau noso opusu Au. Reiso saka osima rerihoni Au. 10Kahurae osima na Sou Iake rerihoni Au osi sio niana-niana pusire mai tuniai reini naone. 11Mka oaresimo, oyo ororimo oamanane sio onata, pene anomo rauponu runa mka oasau sapan. Mka Anahatana iasau osimo kahurae oasau sapan. Omi ruamo oanamana tewa, ne Anahatana Ne Inaha mka irui anamanaya osimo. 12Mka kakai irui wanin wain iparisaa tau Au osi sio ohunui. Wanin irui kakai wain iparisaa tau Au osi sio ohunui. San rei honu na amai na ne hehuka. Sio ikina mka orui noa ama na noa ina osi sio umau ohunso. 13Mka mansia pusiki openeso tanumo noso oparisaa tau Au. Ne ia seia iapamese rotu-tu imatai, mka Anahatana iapuheui na pene iapasanai.

14 Mka onoo sio oapuoo sae isa wan repaputi reiso reuna Anahatana ieui arihon ne numa. Anahatana isopo na pene oapuooi pan ne numa rei. (Ano wan ahatae tau surate reini, atinu ia-ia na anei.) Sio oapuooi, oyo kahurae omi wan oruemo pan otoe Yudea mo, orumamo na roe tinetaya nea. 15Sio wason pan mui mo, pene onususo pan no numau honu na onana no apia. Tea mo, mka orari tewa nea. 16Sio wason noi nisi iae, pene onunso poe numa na onana no papite. Sio mo, kahurae oaparikuna. 17Tau rei mo, mka sio pina onata wason osusu no sio iki msinana runa sio pina matitiana mo, mka siraka tanso nai osa. Tea mo, oruma kua tewa. 18Ainisi na pene san rei tau ihate. 19Pan muie reimo, sinsaraso mainae san sio sinsaraso tewasi on Anahatana ihaye tau tuniai reini asi. Oyo pan muie honu sinsaraso tewa nea. 20Ne mka Upuri anoi repeka na sio wason ininiso na ouna ne mansiau. Reiso itapiso sinsaraso rotu-tu potuina tewa. Sinana sinsaraso rotu-tu potuina mo, mka ia isa iamahaiki tewa nea.

21 Tau napisi reimo, mka ia isa iasau osimo ata, “Masi onoo. Ia Aia wain Anahatana Ihitiki na Iapuheu Mansiau wain ihokai nea. Te, ia isa honu iahata, ‘Mai, ia waipan rei.’ Pene oparisaa tau sio rei. 22Tau sae? Sio umau mka ohokaso oasau oakarota ata sio rei wason Ia Aia wain Anahatana Ihitiki na Iapuheu Mansiau te sio wason ia mamsima runa Anahatana ne maunauna umau. Mka ouna sima-simana waron ratuhete ata no kawasa rerihoni Anahatana runa sima-simana arihon Anahatana waron rasiraso. Oakarota rea sio wason Anahatana ininiso na ouna ne mansiau. 23Reiso osaka-saka. Uatuhetemo nea, tuniai reini mo repena sapan on repena tewasi.”

24 Tau napisi reimo, sinsaraso, oyo ranie repumonoi, hunane reriohui. 25Oneu ramnahuso on roe nante na ranie na hunane rakoka roe nante. 26Tau orase rei sirinia mka mansiau onoo Au, Tumata Reini mo, Anahatana Ihitiku uhokaku on roe nante pan yahu anoa. Mka ukaisunu runa we rinane reita-itai runa we kawasa mainae. 27Mka uaisosi we maisosia on roe noiyaha na oamanou sio wason Anahatana ininiso na ouna ne mansia. Oamanouso on nau, on ria, on poe, on pan, oyo on pan tuniai rurue rotu-tu rekotoi poe rurue.

28 Anei pusu matieue reini. Sani inoo ai ara totua rasineu nea mo, rekakina na anei ata nanie naene na irahuta nea. 29Sani inoo ai ara totua rasineu nea mo, ianei ata mata hun tewa oyo, tuniai reini repena nea.

30 Atinu mai ia-ia nanie asau osimo. Titue! Sae waron mato uasau nnare osimo reini, mka rayari on omi naene reini omatamo tewasi. 31Nante na tuniai reini mka ranikuso, ne Au we anamanaya mo, mka ranikuso tewa.

32 Ia seia man iae ianei tewa inasa mka sio sinsaraso san rei. Anahatana ne maisosia roe noiyaha iae, oanei tewa oi. Au Anahatana Anai iae uanei tewa oi. Hasae amaku ruai man sahoro ianei. 33Reiso oainati. Osaka-saka. Oanei tewa inasa na uhokaku honu. 34Areimo sani ia isa ieui arihoni ne numa, oyo ieui hainau. Ia rei iaisosi ne manorina. Irui kawasa osiso na osaka ne numa rei. Sio pusiso osupu no taneiu. Iaisosi ia mamsaka mitanunue isakai ia-ia. 35Reiso osaka-saka. Oanei tewasi inasa na numa upue inuniki. Kani tau ran manne te? Tau saa monon tihu te? Tau manua ratunkeko te? Tau ranie resaa te? Oanei tewa. 36Pene rotu-tu uhokaku, omi osaka-saka tewa, oyo usupu pusimo oneke munumo. 37Sae wan uasaui osimo reini mo, uasau osi sio pusiso, na osaka-saka.

Currently Selected:

Markus 13: ANA

Highlight

Copy