Lukas Anamana Mautunue
Anamana Mautunue
Lukas ne Sou Iake rerihoni Yesus reini mo, rerihoni Yesus Kristus, oni mato iamrae rotu-tu isaai na roe noiyaha. Lukas iruni rerihoni Yesus iatuhete mansiau, isuisene sio kupua, inei sakahatene arihoni sio wason oauwena, iuna iamahai mansia matane, Isiru heu mansiau no rosau, na iuna sima-simana. Yesus iuna rai pusire suka samatoro, sio osotai, ouna sinsarai, na ororui roe hini, nene onona tonu iamahaiki honu. Itotoe ata mka iaisosi Anahatana ne Inaha osi ne mampusua na iakahaiso osima runa Sou Iake osi ia seia man mai tuniai reini. Pusi oyo, Isaai na roe noiyaha.
Surate reini mo, nene nanae Sou Iake, areimo tau nene sirita rerihoni sapan na Amari Anahatana iaisosi Yesus Kristus na imatai oyo iamahaiki honu na ihana mansiau no rosau, na ia seia man wain iparisaa tanui areimo ouna iake nnai honu, na oamahaiso okatai rotu-tu ria supan.
Lukas irun isakanau ne sirita tau sae waron Yesus ne maisosia orun runare tau ne surate. Surata ua rai mo, ratuhete runa sae man waron rauna rotu-tu mansia pusiki pani Roma runa sio wason parisaa tau Yesus oasinena neka otoe Roma pusiki.
Ia seia ikanu surate reini Mai surate reini mo, ianei tewa ata ia seia ikanui. Anamanaya reini reasau tewa ia seia wain ikanui rei. Sani pusu sio mainaya tau kereya naon-naone mo, ia wain ikanu surate mo, nanai Lukas. Ia mo, ia mam suisene (Kolose 4:14). Ia iae ne neta tau Paulus tau uaso oeu osima runa Sou Iake (Sio Maisosia no Atata 16:9-10; 2 Timotius 4:11; Pilemon 1:24). Ia mo ia Yahudi tewa wain iparisaa Yesus. Ia ianei sirita rerihoni Yesus arihoni sio wason oparisaa. Oyo sae man waron sio oruni rerihon Yesus rei, inina nene aikune, oyo iamanoure, samatoro ikanu pusire ia-ia. (1:1-4).
Surate reini osi ia seia Lukas ne Sou Iake rerihoni Yesus runa Yesus ne Maisosia no Atata, Lukas ikanure osi ia wain ioki tau “Amari Teopilus wani uamuirai” (1:1-4). Tau ikanu surate rei mo, nananake Teopilus mo, nananake wan sio Yahudiu te sio Romau wason isikola mainae sahoro sio ooiso tau nananake rei. Oyo, Lukas ioiki runa sou nanae reini, “Wain au uamuirai”. Sou nanae rei iae, noo sani sou nanae wani Paulus ioiki tau Gubernur Peliks (Sio Maisosia No Atata 24:2-3) runa Gubernur Pestus (Sio Maisosia No Atata 26:25). Reiso, sio umau oasau ata Teopilus mo, ia mainae oarihon sio Romau wain iparisaa tau Yesus. Ne, surate reini mo, osi Amari Teopilus man tewa, ne arei iae osi “Anahatana ne neta” renesi oi osi sio wason Yahudiu tewa wason onina rerihoni Yesus Kristus.
Lukas ikanu Surate rei nanie tau sae Lukas ikanu surate rei na Amari Teopilus, na sio pusiso wason ohatae tau surate, na oanei ia-ia rerihon pusire waron titue rerihoni Yesus (1:4) runa nanie Ihokai mai tuniai reini nanie tau sae. Yesus Kristus mo, Ia Wain Anahatana Ihitiki na Iapuheu Mansiau (2:11). Ia ihokai mai tunia na iapuheu sio wason opalalosa (19:10). Lukas iae iatuhete ata Sou Iake rei osi sio Yahudiu man tewa, ne osi mansia pusiki mai tuniai reini. (2:10, 30-32, 24:47). Lukas nanie iatuhete osita ia-ia rerihoni Yesus, reiso Lukas ikanu rerihon Yesus ne upu momou rotu kua Abraham man tewa, ne rotu-tu kua Adam (3:23-38), na sio pusiso wason ohatae tau surate reini oanei ata sio iae no Ama tau Anahatana na iapuhaiso. Sou Iake rei iae osi sio wason sio onoo runaso tewa. Lukas nanie iatuhete osita ia-ia, reiso Lukas iruni rerihon sapan na Yesus iatuhete ne iake osi ia kupu unte, ia Samaria, sio wason sio Yahudiu tewa, ia mainisi pea, sio wason sio kasian, runa sio ikina.
Surate reini resamai tau inasa rai
| 1:1-4 | Lukas ikanu surate rein tau sae. |
| 1:5 - 2:52 | Yohanis Ia Mamsohue runa Sirita Yesus iamrae runa Yesus oni ia ikine. |
| 3:1-38 | Yohanis Ia Mamsohue ne pakarian runa Sio osohu Yesus. |
| 3:23-38 | Yesus ne upu momou. |
| 4:1-13 | Sio orea Yesus. |
| 4:14 - 9:50 | Yesus ne pakarian pan otoe Galilea. |
| 9:51 - 19:27 | Yesus ne pakarian tau ieui na roe Yerusalem. |
| 19:28 - 21:38 | Yesus ne pakarian roe Yerusalem. |
| 22:1 - 24:53 | Sio osota Yesus, sio ororui roe hini, iamahaiki honu, runa isaai na roe noiyaha. |
Currently Selected:
Lukas Anamana Mautunue: ANA
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc., All rights reserved.