Lukas 8
8
Sio pinau wasoni oanori runa Yesus
1Ia pina isa isona Yesus ain atui tau mina hau rihue oyo potuina tewa, oyo Yesus ieu neka kotau runa niana-niana. Ieu isima na Sou Iake rerihoni Anahatana irime ne mansiau. Ne mampusua hutusa rahana ua oeu okatai oi. 2Sio pinau umau wasomo okataso oi. Sio pinau rei mo, sio umau Yesus isuiseneso, sio umau honu inei sakahatena arihoniso nea. Sio pinau rei mo:
Maria wain sio ooiki tau Magdalena. Tea mo, ia ne niane nanae Magdalena. Ia iae, Yesus inei sakahatena itu arihoniki nea oi.
3Yohana, Kusa sahai. Kusa mo, Herodes hanai wanane.
Susana
runa sio pinau panesi umau oi.
Sio pinau reini mo, saka orui ai totua na oakahai Yesus sio.
Mansia oatarima Anahatana ne maunauna nita-nitaya
4Taue isa, sio panesi oamanouso mai Yesus. Ohokaso arihoni kotau noi otoe rei. Oyo Yesus iruni matieue isa. Arei mo, atinui sani rei, 5“Taue isa, ia mamrahue isa ieui iahurara atuhu kania noi ne nisi. Iahurara atuhu kania rai ne umau ramnahuso noi arena tiae. Reiso mansiau oniku ohetare. Manua ratasoho raaire. 6Atuhu kania umau honu ramnahu tuama hatu lekau. Reiso, raruhu roe, oyo potuina tewa oi ramnunuso. Areimo, tau tuamane rekaimeniki. 7Atuhu kania umau honu ramnahu mono unia. Oyo raruhu rakata umau ne mono unia rai raruhu rasapare rotu ramataso. 8Atuhu kania umau honu ramnahu tuama iake. Taa raruhuso roe, nene huaya panesi ranesi sae waroni irahure rei. Kanie osa nene huaya utun.”
Yesus iruni matieue pusi oyo iakapona, “Ia sia tinai ukuna mo, kahurae atinu ia-ia!”
9Pusi, oyo Yesus ne mampusua oasei tanui. Oahata, “Upu! Matieue rerihoni atuhu kania rai mo, sima runa nene isie osima ee!”
10Yesus iasau ata, “Anahatana ihuka omi, we mampusua, anomo nea. Reiso oanei sapan na irime ne mansiau. Ne uruni matieua osi sio wason we mampusua tewa. Na
masike onoo sae waron Au unare nea iae, oaneire tewa.
Masike oatinu we maunaune nea iae, oanei nene isie rei tewa sirinia.
11Reiso matieue rei mo, nene isie sani rei. Atuhu kania rai mo, noore sani Anahatana ne anamanaya. 12Atuhu kania waroni ramnahuso noi arena mo, noore sani sio wasoni oatinu Anahatana ne anamanaya. Ne ia aia sakahatene ihoka iuna anoo kanihua runa sae waron oatinure rei. Reiso oparisaa tanure tewa reiso Anahatana iapuheuso na okatai rotu-tu ria supan tewa. 13Atuhu kania umau honu waroni ramnahu tuama hatu lekau mo, atieu rei sani sio wasoni oatinu Anahatana ne anamanaya, oyo oatarimare anoo mirika. Ne oapamese kua tewa sani atuhu waron nene namta tewa mo, rapamese kua tewa. Areimo oparisaa rotu-tu potuina tewa. Osupu masana, oyo oparisaa tau Anahatana tewa nea. 14Atuhu kania waroni ramnahu mono unia mo, atieu rei sani sio wasoni oatinu Anahatana ne anamanaya oyo opusure. Ne anoo raupono runa tuniai reini, onina kepen runa apia panesi man, na nanie tau no sanan mai tuniai reini mani. Sio wasoni sani rei mo, mka no hali pannuhu na Anahatana ne anamanaya tewa. Noo sani atuhu waron nene huaya tewa. 15Oo atuhu kania waroni ramnahu tuama iake mo, atieu rei sani sio wasoni oatinu Anahatana ne anamanaya oyo rarue pani anoo. Anoo rai iaka nai osa. Oakarota tewa. Sio wasoni sani rei mo, no hali pannuhu na Anahatana ne anamanaya.”
Nina na anei Anahatana ne maunauna
16“Mansia oakanupu kamane oyo osoui tau parten mo, tewa tea! Te oaunutui poe koi nohue mo, tewa tea! Ne oaunutui tau naniae na ia sia mani waini inusui noi numa anoe inoo nene itane na inoo mosa. 17Mka Anahatana iatuhete ne maunauna waron naone rauhunso. Sae mani wan rauhunso, mka Anahatana iatuhete ne maunauna nene isie. 18Reiso saka oatinu ia-ia. Ia sia mani wain anei we maunauna nea, mka Anahatana ihuka anoi na ianei renesi honu. Ne ia sia waini ianeire tewa, mka Anahatana inea sae waron iata kani ianeire rei.”
Yesus ne kaka waniu tau sio wason opusu ne maunauna
19Taue isa, Yesus inai runa nea waniu oeuso noi tanui. Ne nanie ohainekei ne resun tau mansiau panesi onete arena. 20Ia isa isima osiki ata, “Upu, inam runa mea waniu nanie oeuso mai tanua. Wason ooso pan mui nanie onooa.”
21Ne Yesus iahata, “Sio wasoni oatinu tau Anahatana ne maunauna oyo ouna suire areimo, sio sahoro inaku runa we waniu.”
Yesus iuna ihu onate rematurui
22Taue isa, Yesus iasau osi ne mampusua. Iahata, “Mai na isaa arupae na ieuta ria waene ria hae.” Reiso osaa arupae oyo oeuso. 23Wasoni oeuso, Yesus ineke munui. Sira tau ihu onate ereuna kola onata rapapa no arupae rei rotu-tu waene renusu pani arupae anoe. Haineke omokoso nea.
24Reiso Yesus ne mampusua ohanu Yesus. Oahata, “Upu, Upu! Mka imatata. Nanie imokota nea reini!”
Oyo Yesus ihanui iasau na nioi makae tau ihute runa kola onata rei. Iahata, “Amaturumo!”. Oyo ihute runa kolau rai ramanu.
25Oyo Yesus iasau ata, “Oparisaa tau Au tewa ata mka uakahaimo tewa si?”
Oyo pusiso okaitau na osira. Oasei mai umau. Oahata, “Ia onate reino mo, ia sia? Ihute na kolau man oo, ratinu tanui.”
Yesus inei sakahatena arihoni ia isa
26Yesus runa ne mampusua osaa arupae rotu-tu ososuso ria hae, ria otoe Gerasa. Otoe rei mo, waria Wae Galilea ria hae. 27-29Noi otoe rei, ia hanaie isa wain sakahatena ramasuniki. Sakahatena saka ranesa-nesai potuina nea. Reiso sio noi otoe rei okanihoo ain atui runa hanai atua tau rante. Ne, masike osakai sui osa iae, iuna roha ranteu rai sirinia. Oyo sakahatena raroriki noi otoa waroni huia. Reiso irue mosa noi numa anoe tewa nea. Naone irue ria kota Gerasa ne tewa nea. Saka iruei sui kupuro. Iausahu papite na taka tewa potuina nea oi.
Taa Yesus isipu ria kaimenne oyo ia hanaie waini sakahatena ramasuniki rei ieui mai Yesus. Hoka mai, oyo Yesus iaisosi sakahatena rai. Iahata, “Ohokamo!”
Taa inoo Yesus, iakapona oyo irike tunne mai Yesus uai anoe. Ne sakahatena rai raasau na nioa mainaya. Raahata, “Yesus, Anahatana Wain Ia Mainae Anai, nanie amunaku? Uainisi tau Anahatana nanai, pene auna sinsaraku.”
30Pusi, oyo Yesus iasei tanui, iahata, “Nanam sia?”
Iahata, “Au mo, nanaku ‘Panesi’.” Iasau sani rei tau sakahatena panesi nai osa ramasuniki nea. 31Oyo sakahatena rai raai-ainisi arihon Yesus. Rahata, “Pene aisosima aeu poe ekote wan Anahatana iapasana sakahatena.”
32Noi tihue rei, hahu panesi warumo ranina muaia roe sanene pupue. Oyo sakahatena rai raainisi arihoni Yesus ata, “Yesus ee! Sani nanie aneima mo, aisosima na anusuma pan hahu rapan!”
Oyo Yesus iasau ata, “E-e! Eumo na nusumo pani hahu rapan nea!”
33Pusi oyo, sakahatena rai rahokaso arihoni ia rei, samatoro oeuso onususo pani hahu rai. Oyo hahu rai raruma rapu pusu ekote hanae rei rotu-tu rasoman na poe waene. Oyo ramokoso, oyo ramataso.
34Sio mamsaka hahu rai onoo sani rei, oyo oruma osima osi sio ria niane runa sio sui nisiu. 35Osima, oyo pusiso ohokaso, nanie onoo. Hoka nau Yesus sio oyo osupu ia hanaie wain naone sakahatena ramasuniki rei. Onooi waimo iruei haineke Yesus ain. Iausahu apia nea na imuke tewa nea. Reiso pusiso okaitau. 36Oyo sio wason onoo pusire sinasi rei, oruni rerihoni Yesus inei sakahatena arihoni ia hanaie rei.
37-39Pusi, oyo sio noi otoe Gerasa oasau osi Yesus. Oahata, “Upu! Aeua arihoni ma otoe rein nea!” Oasau sani rei, tau pusiso okaitau hunu ruao. Ne ia wain naone sakahatena ramasuniki rei iainisi arihoni Yesus. Iahata, “Upu! Ueu upusua oi kee!”
Ne Yesus iasau osiki ata, “Pene nea! Nunia poe me numa na asima osi me mansiau rerihoni sapani na Anahatana iunaya iake nea reini.”
Pusi oyo, Yesus sio osaa no arupae wan sinasi rei. Oyo, ia rei ieu iruni osi mansiau sui supan mani noi niane rei rerihoni Yesus inei sakahatena arihoniki rei.
Yesus iuna iamahai Yairus anai runa isuisene ia pina isa waini ieu nasi
40Yesus inuniki on nau waene, on nau hae. Sio panesi onapai reiso oatarimai. 41Sira tau ia onate isa tau sio Yahudiu no numa mananoune ihokai mai tanui. Ia onate rei mo, nanai Yairus. Ihokai oyo irike tune mai Yesus uai anoe. Iahata, “Upu, mai na eua poe we numa nea. 42Tea mo, anaku pina waipo ikupui mtinte haineke imatai nea.” Anai pina osa mtola mani. Ia ikine pina rei mo, kani ne musum hutusa rahana ua san rei nea.
Reiso Yesus ieu ikata Yairus poe ne numa. Wason oeu, mansia panesi oneteso rotu-tu oeseso. 43Ia pina isa wain ieu nasi musum hutusa rahana ua nea waimo ikata sio panesi rei oi. Ia isa tewa oi isuisene kua ne kupue rei tewa. 44Ieu pusu Yesus totui nanie ieu hainekei. Oyo isii Yesus ne papi naue nene rurue. Oyo nasi rerihon rei sirinia. 45Oyo Yesus iasau. Iahata, “Ia sia isiiku rei ano?”
Ne sio pusiso oauhaa. Oyo Petrus iasau ata, “Upu, mansia hutue wason rotu-tu ososo umau oesea.”
46Ne Yesus iasau ata, “Ia isa isiiku. Areimo tau uahana we mkonae rekaisunu mkane.”
47Ia pina rei ianei ata sae waini iunai rei mo, Yesus ianeiki nea. Oyo ieu ikana-kananunui mai Yesus. Oyo irike tune mai Yesus uai anoe. Pusi, oyo iruni osi sio panesi rerihoni sae eremuna na isii Yesus oyo tau rei sirinia, ne kupue iake rei sirinia. 48Yesus iasau osi ia pina rei. Iahata, “Anaku! Aparisaa tanuku, reiso me kupue rei iake sirinia. Aeu noi, akarihuru amahai.”
49Yesus waini ianamana osi ia pina rei asi, sira tau ia isa ihokai on pan Yairus, ia onate wain sinasi rei, ne numa. Iasau osi Yairus ata, “Upu! Anam pina watipusi nahai nea. Reiso pene auna apaputa ia matuhetene reino nea.”
50Ne Yesus iatinu ia rei ianamana reiso iasau osi Yairus iahata, “Pene akaitau! Aparisaa man. Anam reimo mka iamahaiki honu.”
51Taa ohokaso poe Yairus ne numa, Yesus isopo na pene ia isa man inusu katai. Hasae Petrus, Yohanis, Yakobis runa ia ikine rei inai na amai man. 52Mansia pusiki wasoni noi rei orani ohiti tau ia ikine rei imatai nea. Ne Yesus iasau ata, “Pene orani. Ia ikine pina reini mo, imata tewa. Ne wain inekei man.”
53Ne sio panesi rei oaumaniki. Tea mo, oanei nea ata ia ikine pina rei mo, imatai nea. 54Oyo Yesus irime ia ikine pina rei hanai oyo iasau osiki iahata, “Anaku, ahanu!” 55Oyo ia ikine rei tiunui erenuniki noi tanui honu. Oyo tau rei sirinia ihanu hitio. Yesus iahata, “Mai, na opanai.” 56Ia ikine rei inai na amai osira hunu ruao. Ne Yesus iasau, “Pene oeu oruni osi ia seia man rerihoni sae wani onooi reini.”
Currently Selected:
Lukas 8: ANA
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc., All rights reserved.
